Ifipusho Ukufuma ku Babelenga

Mulandu nshi Satana etilwa ati “uukwete amaka ya kulenga imfwa” pa AbaHebere 2:14?

Nga kwasuka mu kwipifya kuti twatila, Paulo aloseshe mu kuti Satana, umwine wine nelyo ukupitila mu nshila shimbi, kuti aipaya abantu. Mu kumfwana ne fi fyebo, Yesu aitile Satana ati “inkomi ya bantu ilyo atendeke.”—Yohane 8:44.

Pali ili lembo ilya AbaHebere 2:14 kuti paba ukufulunganishiwa pa mulandu wa nshila bakapilibula balipilibwilamo, pantu balanda ati Satana aba na “bucibinda bwa mfwa” nelyo “amaka ya mfwa.” (Baibolo wa ba Diocese of Mbala) Ukupilibula kwa musango yu kuti kwalenga calamoneka kwati Satana alikwata amaka yonse aya kwipaya fye umuntu onse uo engafwaya ukwipaya. Lelo, takwata ayo maka. Nga alikwete ayo maka, ukwabula no kutwishika nga ni kale alofya abapepa Yehova bonse pe sonde.—Ukutendeka 3:15.

Amashiwi ya mu ciGriki ayapilibulwa “amaka ya mfwa” mu maBaibolo yamo yamo na “uukwete amaka ya kulenga imfwa” mu Amalembo ya Calo Cipya ni “kraʹtos tou tha·naʹtou.” Amashiwi ya kuti Tou tha·naʹtou ni nshila imo iya kulandilamo ati “imfwa.” Ubupilibulo bukalamba ubwa kraʹtos, “maka.” Ukulingana na Theological Dictionary of the New Testament, ili shiwi lipilibula “ukubapo no bucindami bwa maka te kubomfya kwa ayo maka iyo.” E ico, pa AbaHebere 2:14, Paulo talelosha mu kuti Satana akwata amaka yonse pa mfwa. Lelo, alelangilila amaka Satana akwata ayengalenga imfwa.

Bushe Satana abomfya shani “amaka ya kulenga imfwa?” Mwi buuku lya kwa Yobo, tubelengamo icacitike cimo icaibelele. Ifyalembwa filangilila ukuti Satana abomfeshe umwela ukalamba ku “kulenga imfwa” pa bana ba kwa Yobo. Lelo, moneni ukuti Satana acitile ici pa numa ya kusuminishiwa na Lesa, ne calengele ukuti asuminishiwe ni co kwali umulandu wine wine uwalingile ukubombelwapo. (Yobo 1:12, 18, 19) Na kuba, Satana tali na maka ya kwipaya Yobo. Tasuminishiwe ukumwipaya. (Yobo 2:6) Ici cilelangilila ukuti nelyo ca kuti Satana limo limo alipaya abantu ba busumino, tatufwile ukutiina ukuti kuti atwipaya fye icipayeipaye apo atemenwa fye.

Satana na kabili alenga imfwa ukupitila mu bantu. E mulandu wine Abena Kristu abengi bafwila icisumino cabo, bamo ukwipaiwa fye ku tupondo nelyo ukwipaiwa pa mulandu we funde lya balashi ba buteko nelyo abapingushi babipa.—Ukusokolola 2:13.

Kabinge, Satana limo limo alenga imfwa pa kubomfya ubunake bwa bantunse. Mu nshiku sha bena Israele, kasesema Balaamu afundile abena Moabu ukongola abena Israele “ukufutuko bumfutu kuli Yehova.” (Impendwa 31:16) Ici calengele abena Israele 23,000 ukufwa. (Impendwa 25:9; 1 Abena Korinti 10:8) Abantu na lelo line, balalufiwa ku “micenjelo” ya kwa Satana kabili balabelelekwa mu kucita bucisenene nelyo ifintu fimbi ifyabipa. (Abena Efese 6:11) Ca cine ukuti abacite fi tabafwa apo pene fye. Lelo kuti bapanya ishuko lya kwikala ku ciyayaya, kabili iyi e nshila Satana alengela imfwa yabo.

Nelyo ca kuti twalishiba amaka ya kwa Satana aya kulenga imfwa, tatufwile ukutiina icitiinetiine fye. Ilyo Paulo atile Satana alikwata amaka ya kulenga imfwa, alandile no kuti ico Kristu afwilile ni pa kuti “onaule [Satana] . . . no kuti alubule bonse abateekelwe mu busha ubumi bwabo bonse pa mulandu wa kutiine mfwa.” (AbaHebere 2:14, 15) Cine cine, Yesu alipiile icilubula no kulubula abantunse batetekela ku busha bwa lubembu ne mfwa.—2 Timote 1:10.

Kwena tulalangulushiwa pa kwishiba kuti Satana alikwata amaka ya kulenga imfwa, lelo tuli abashininwa ukuti Yehova kuti apwisha ubwafya bonse ubwingaletwako na Satana na bantu abomfya. Yehova atulaya ukuti Yesu wabushiwa ‘akabongolole milimo ya kwa Kaseebanya.’ (1 Yohane 3:8) Ku maka ya kwa Yehova, Yesu akabuusha abafwa kabili ilyo akacite fi ninshi e kukaba konaula imfwa. (Yohane 5:28, 29) Kwi pele pele, Yesu akalangisha ukupelebela kwa maka ya kwa Satana ilyo akamupoosa mu muyenge. Mu kulekelesha Satana akonaulwa ku ciyayaya.—Ukusokolola 20:1-10.