“Abantu Babili Baishile pa Mwesu”

“PAPITA imyaka ibili ukutula apo umwana wesu umukashana uwatemwikwa afwilile.” Ayo mashiwi e yeswila kalata wa mu nyunshipepala ya Le Progrès iya mu Saint-Étienne, ku France.

“Mélissa aali ne myeshi fye itatu kabili akwete ubulwele bwabipisha ubwitwa trisomy 18. Takuba ukupuupuutuka nga waponenwa no busanso bwa kufwilwa umwana munono, uo cimoneka kwati talingile ukufwa. Nangula twakulile mu Katolika, twaikalile fye ukutontonkanya atuti ‘Mwe Lesa, nga e ko mwaba, cinshi mwalekela ifya musango yu ukulacitika?’” Nacimoneka fye ukuti umwanakashi walembele uyu kalata alikalipwe kabili aali uwapelelwa. Kalata wakwe akonkanyapo ati:

“Ilyo tapalalepa sana pa numa ya ifi fintu, abantu babili baishile pa mwesu. Apo pene nalishibe ati ni Nte sha kwa Yehova. Napene mbatamfye mu mucinshi, lelo namwene broshuwa untu baletambika. Alelanda pa mulandu Lesa asuminishisha ukucula. E ico nalibengishe mu ng’anda, lelo ico nalefwaya fye kubasuusha umupwilapo. Naletontonkanya ati ulupwa lwandi lwalicula nakalya nakalya kabili twalyumfwa amashiwi yaseeka aya kuti ‘Lesa e watupeele umwana, kabili Lesa e wamusendele.’ BaNte baliikele pe awala limo ne mpusho. Balekutikisha no kunangulukilako, kabili ilyo baleya, nalyumfwileko bwino ica kuti nalisumine ukuti bakabwele kabili. Apo ico cacitikile papita imyaka ibili. Nshilati mbe Nte ya kwa Yehova, lelo nalitendeke ukusambilila Baibolo na bene, kabili ilingi line ndasangwa ku kulongana kwabo.”