Ifyo Lesa Amona Abafwa

IMFWA ya mutemwikwa ilalengo kukalipwa icine cine. Ukupelelwa, ukutalalilwa, no kulufya kulaba ukukalamba. Ukufwilwa kuti kwalenga umo ukupelelwa, pantu takwaba umuntu nangu umo pe sonde uwingapeela uwafwa ubumi, te mulandu ne cuma, amaka nelyo ukusonga uyo muntu engakwata.

Nangu cibe fyo, Kabumba wesu amona ifintu mu nshila yapusanako. Apo e wabumbile umuntu wa kubalilapo ukufuma kwi loba, aliba na maka ya kubumba cipya cipya umuntu wafwa. Pali uyu mulandu Lesa amona abafwa nga bomi. Ukulosha ku babomfi ba busumino aba ku kale abafwa, Yesu atile: “Te Lesa wa bafwa iyo, lelo uwa bomi,” nelyo baba abomi ukulingana na Lesa.—Luka 20:38.

Lintu Yesu aali pe sonde, alipeelwe amaka ya kubuusha abafwa. (Yohane 5:21) E co na o alemona abafwa aba busumino filya fine Wishi abamona. Ku ca kumwenako, ilyo Lasaro cibusa wakwe afwile, Yesu aebele abasambi bakwe ati: “Ndeya ku kumubuusha.” (Yohane 11:11) Lasaro alifwile ukulingana ne mimwene ya bantu, lelo kuli Yehova na Yesu, Lasaro alele fye utulo.

Mu Kuteeka kwa kwa Yesu kukaba “ukubuushiwa kwa balungama na bashalungama.” (Imilimo 24:15) Mu kupelako abo bakabuushiwa bakasambilishiwa na Lesa kabili bakaba ne subilo lya kwikala pe sonde kuli pe na pe.—Yohane 5:28, 29.

Ca cine, imfwa ya mutemwikwa ilalenga ubulanda no kukalipwa ukukalamba ukwingakokola pa myaka iingi. Nangu cibe fyo, ukumona abafwa nga fintu Lesa abamona kuti kwatupeela icisansamushi ne subilo.—2 Korinti 1:3, 4.