Ilyo Ukufwaya kwa kwa Lesa Kukacitwa Pano Isonde

ILYO Yesu asambilishe abasambi bakwe ukupepa ati, “Ukufwaya kwenu kucitwe pano isonde nga mu muulu,” alelanda pa fyo amonapo kale pantu aalipo ku muulu na Wishi. (Mateo 6:10; Yohane 1:18; 3:13; 8:42) Ilyo Yesu talaisa pe sonde, alimweneko uko ifintu fyonse mu muulu na pano nse fyalecitika ukulingana no kufwaya kwa kwa Lesa. Shilya nshiku shali ishisuma kabili fyonse fyaleenda bwino.—Amapinda 8:27-31.

Ifyo Lesa abumbile ntanshi fibumbwa fya ku mupashi, ‘bamalaika bakwe, impalume sha maka ishicite cebo cakwe.’ Baali, e lyo kabili bacili ni “bakapyunga bakwe abacite co afwaya.” (Amalumbo 103:20, 21) Bushe malaika umo umo alikwete ukufwaya kwakwe? Ee, na pa kubumbe sonde, aba “bana baume bonse ba kwa Lesa baliweleshe.” (Yobo 38:7) Ukuwelesha baweleshe kwalangile ifyo batemenwe uku ukufwaya kwa kwa Lesa kabili balengele ukufwaya kwabo ukumfwana no kwa kwa Lesa.

Pa numa ya kubumbe sonde, Lesa apekenye lyene ku kwikalwamo na pa kulekelesha abumbile umwaume wa ntanshi no mwanakashi. (Ukutendeka, icipandwa 1) Bushe ici na co cali ca kuweleseshapo? Icalembwa capuutwamo citila: “Kabili Lesa amwene conse ico acitile, kabili, moneni, naciwamisha,” cali icabula akalema, icapwililika.—Ukutendeka 1:31.

Cinshi cali ukufwaya kwa kwa Lesa ku bafyashi besu aba kubalilapo na bana babo? Ukulingana na Ukutendeka 1:28, ukufwaya kwakwe kwali ukusuma icine cine: “Lesa alibapaalile, Lesa atile kuli bene, Fyaleni, fuleni, kumaneni pe sonde no kupanasha; kabili mube na bukateka kwi sabi lya muli bemba, na ku fyuni fya mu lwelele, na ku fya mweo fyonse ifyenda pe sonde.” Pa kuti babombe uyu mulimo ushaiwamina, abafyashi besu aba kubalilapo bali no kutwalilila abomi—ukwikala umuyayaya—na bana babo kumo. Takwalemoneka ukuti kukaba akalanda ku ntanshi, nangu lufyengo, nangu kukalipwa umutima, nangu ni mfwa.

Pali iyi nshita e lyo ukufwaya kwa kwa Lesa kwalecitwa mu muulu na pano nse. Abali no kwikala ukulingana no kufwaya kwakwe baali no kuipakisha icine cine. Nomba cinshi calubene?

Kwacitike ubwafya bwakumine ukufwaya kwa kwa Lesa. Tabwali bwafya bushingacimfiwa. Na lyo line, pali ubu bwafya e patendekele inshita yalepa iyali no kufulunganya abantu pa co Lesa afwaya kuli bene. No bu bwafya bwalitukuma bonse fye. Bushe ubo bwafya nshi?

Ukufwaya kwa kwa Lesa Ilyo Kwali Ukupondoka

Umo pa “bana ba kwa Lesa” aba ku mupashi alefwaya ukufulunganya ukufwaya kwa kwa Lesa pa bantunse, ne pange lyakwe lyali lya kuinonsha umwine. Cilya ulya mwana wa ku mupashi atontonkanyapo sana, e lyo amwene sana ukuti kuti fyabomba kabili ici camoneke no kuwaminako. (Yakobo 1:14, 15) Napamo atontonkenye ukuti nga ca kuti abantu ba kubalilapo bamuumfwila ukucila  ukuumfwila Lesa, ninshi Lesa aali no kupatikishiwa ukuleka kube mulopwe na umbi uwa kulwishanya nankwe. Napamo atontonkenye ukuti Lesa taali na kumwipaya, pantu Lesa nga acite co kuti afilwa ukufishapo bufwayo bwakwe. Ukucila ukumwipaya, Yehova Lesa aali no kwalula ubufwayo bwakwe pa kuti aleke uyu mwana wa ku mupashi ukuteeka abantunse babumbwa na Lesa abo nomba batendeke ukumumfwila. E mulandu wine kanshi uyu cintomfwa baishilemwinikila ati Satana, icalola mu kuti ‘Uukaanya.’—Yobo 1:6.

Ukulingana no kufwaisha kwakwe, Satana aile ku mwanakashi. Amusembeleke ukusuula ukufwaya kwa kwa Lesa no kutendeka ukuicitila ifyo alefwaya. Atile: “Ukufwa tamwakafwe. . . . Mukaba nga [Lesa, NW] abaishibo busuma no bubi.” (Ukutendeka 3:1-5) Ifyalandile Satana ku mwanakashi fyamoneke nge fyali no kumuletela ubuntungwa, kabili alisumine no kucetekela ukuti e cali no kubapo bwino ukucila kale. Pa numa, anashishe no mulume wakwe ukutobe funde.—Ukutendeka 3:6.

Icacitike tacali kufwaya kwa kwa Lesa kuli aba bantunse. E fyo balefwaya abene. Kabili mwali no kutumbuka amafya icine cine. Lesa alibebeele limo ukutila ukubulwe cumfwila kwali no kubaletele mfwa. (Ukutendeka 3:3) Tababumbilwe na mano ya kuiteeka abene bwino bwino ukwabula Lesa. (Yeremia 10:23) Kabinge, baali no kusanguka abashapwililika, kabili ukukanapwililika ne mfwa e bupyani bali no kupeela ku bana babo. (Abena Roma 5:12) Satana takwete maka ya kwalule fi fintu.

Bushe ifi fyacitike fyalyalwile ukufwaya kwa kwa Lesa umupwilapo ku bantunse na kwi sonde? Iyo. (Esaya 55:9-11) Lelo kwali amepusho yaimine ayalekabilwa ukwasukwa: Bushe abantunse kuti ‘baba nga Lesa, ukwishiba ububi no busuma,’ nga filya Satana asosele? Mu mashiwi yambi, bushe nga papita inshita kuti twaishiba pa lwesu icisuma ne cibi, ifingatuwamina ne fingatubika mu bwafya mu mikalile yesu? Bushe tufwile ukumfwila Lesa muli fyonse, pantu inshila atekelamo e yawamisha? Bushe tufwile ukwikala umwabela ukufwaya kwakwe muli fyonse? Kuti mwa-asuka shani aya mepusho?

Kwali fye nshila imo iya kupwishishamo ifikansa pa menso ya fibumbwa fyonse ifitontonkanya: Ukuleka abalefwaya ukuiteeka beshe ukuiteeka nga kuti bakumamo. Ukubepaya fye apo pene takwali na kwasuka amepusho yaimine. Ukuleka abantunse ukuiteeka pa nshita iyalinga e cali no kupwisha ubwafya pantu ifya kufumamo fyali no kwasuka bwino bwino amepusho. Ilyo Lesa aebele umwanakashi ukutila aali no kukwata abana, camoneke ukuti Lesa aali no kubomba umwabelele ukufwaya kwakwe. Ico calengele ulupwa lwa buntunse ukutendeka. Tuletasha Lesa pali ici, pantu e calenga ukuti tubeko!—Ukutendeka 3:16, 20.

Lelo ici tacalolele mu kuti Lesa ali no kuleka abantunse no mwana wa ku mupashi uwapondweke ukucita conse ico balefwaya. Lesa talekulwike muli bumulopwe bwakwe, kabili talekele ukucita ukufwaya kwakwe. (Amalumbo 83:18) Alangile ukutila talekulwikemo muli fi fintu ilyo asobele ulwa konaula uwatendeke ubusangu no kufumyapo ulubembu  lonse. (Ukutendeka 3:15) Kanshi ukufuma fye pa kutendeka, abantunse balikwete isubilo lya kulubuka.

Lelo kwena, abafyashi besu bali-italwishe abene pamo no bufyashi bwabo bonse ku kutekwa na Lesa. Pa kuti Lesa abacingilile ku fyabipa fyonse ifyatumbwike mu kusala kwabo, icalefwaikwa kubapatikisha ukucita ukufwaya kwakwe. Lelo, ico nga calingene no kukanabaleka ukuiteeka.

Ukuba kwena, abantu umo umo kuti basala ukuteeka kwa kwa Lesa nga balefwaya. Kuti basambilila ico Lesa afwaya ku bantunse muli ino nshita no kwikala umwabela uku kufwaya. (Amalumbo 143:10) Na lyo line na bo kuti bakwata amafya pantu ubwafya bwa bantunse ubwa kufwaya ukuiteeka tabulapwa.

Amafya yatumbuka mu fyo abantu basala ukucita yalimoneke pa kutendeka fye. Kaini, ibeli lya bantunse bonse, aipeye munyina Abele pantu “imilimo [ya kwa Kaini] yali ya bubifi, lelo iya kwa munyina yali iyalungama.” (1 Yohane 3:12) Ici tacali kufwaya kwa kwa Lesa, pantu Lesa alisokele Kaini kabili aishilemukanda. (Ukutendeka 4:3-12) Kaini asalile bucaibela bwa kwa Satana; e co ‘abelele uwa mubifi.’ Na bambi bacitile cimo cine.

Ilyo papitile myaka 1,500 ukutula apo umuntu abumbilwe, “pano isonde palyonaike, kabili pano isonde paiswilepo ulufyengo.” (Ukutendeka 6:11) Pa kuti isonde lionaika Lesa alingile ukucitapo cimo. Lesa aletele ilyeshi lye sonde lyonse kabili acingilile ulupwa lumo mpo ulwalungama, e kutila, Noa, umukashi wakwe, abana bakwe, na bakashi babo. (Ukutendeka 7:1) Ifwe bonse e ko twatuntuka.

Ukutula lilya, Lesa alatungulula abafumacumi abafwaya ukwishiba ukufwaya kwakwe. Apuutilemo abaume ba cishinka ukulemba icebo cakwe pa kuti abafwaya ukwishiba ukufwaya kwakwe beshibe. Ici calembwa mu Baibolo. (2 Timote 3:16) Alekele aba cishinka ukumwishiba bwino, no kuba ifibusa fyakwe. (Esaya 41:8) Kabili abapeele na maka balekabila pa kushipikisha amafya yabipisha ayo abantunse baaculako pa myaka iingi iyo baiteeka. (Amalumbo 46:1; Abena Filipi 4:13) Mwandini tulingile ukutasha pali ifi fyonse!

‘Ukufwaya Kwenu Kucitwe’—Umupwilapo

Ifi Lesa acita ukufika pali nomba te fyeka fye ifyo akacitila abantunse. Umutumwa wa Bwina Kristu Petro alembele ati: “Kuli imyulu ipya ne sonde lipya ifyo tulelolela umwabela ubulayo bwakwe, na muli fyene e mukekala ubulungami.” (2 Petro 3:13) Icilelandwapo muli aya mashiwi ya mampalanya, buteeko bupya ubukateeka abantunse, e lyo na bantunse abakalateekwa.

Kasesema Daniele alembele ukwabulo kulamba ati: “Mu nshiku sha shamfumu ishi Lesa wa mu muulu akemyo bufumu ubushakonaulwe. . . . bukashonaula no kupesha aya mabufumu yonse, kabili bukeminina umuyayaya.” (Daniele 2:44) Uku kusesema kusobela impela ya buno bwikashi bwafilwa ukuwamya ifintu no kupyanikwapo kwa Bufumu, nelyo ubuteeko, bwa kwa Lesa. Ala iyo ni mbila nsuma! Ukuumana na bukaitemwe ifyalenga icalo ukubamo ulukakala ifingonaula ne sonde, bushiku bumo fikapwa.

Bushe fikacitika lilali? Abasambi ba kwa Yesu baipwishe ati: “Ni lilali ifi fintu fikabako, kabili cinshi cikaba icishibilo ca kubapo kwenu ne ca mpela ya bwikashi?” Cimo ico Yesu alandile pa kwasuka ili lipusho ni ci: “Ne mbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.”—Mateo 24:3, 14.

Bonse balishiba ukutila iyi mbila nsuma iya Bufumu ilebilwa icalo fye conse. Limbi na imwe mwalimona ici uko mwikala. Mwi buuku litila These Also Believe, kalemba wa liko, Professor Charles S. Braden, atila: “Inte sha kwa Yehova balishimikila isonde lyonse fye. . . . Takwaba icalici pa calo ilyapimpa kabili ilya mupampamina nge Nte sha kwa Yehova mu kufwaya ukwananya imbila nsuma iya Bufumu.” BaNte baleshimikila iyi mbila nsuma mu fyalo ukucila 230 na mu ndimi mupepi  na 400. Uyu mulimo wasobelwe tawatala aubombwa ifi ulebombwa isonde lyonse. E bushinino bumo pa bushinino ubwingi muno nshiku ubulanga ukutila inshita ya kwisa kwa Bufumu ubukafumyapo imitekele ya bantunse naipalama.

Ubufumu ubo Yesu atile tufwile ukushimikila e bumo bwine atusambilishe ukupepela mwi pepo lyakwe ilya We Shifwe, umwaba amashiwi yatila: “Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:10) Ubufumu e nshila Lesa akabomfya ku kufishapo ubufwayo bwakwe ku bantunse na kwi sonde.

Bushe ici calola mwi? Lekeni Ukusokolola 21:3, 4 kwasuke: “E lyo naumfwile ishiwi likalamba ukufuma ku cipuna ca bufumu lileti: ‘Moneni! Ihema lya kwa Lesa lili pamo na bantunse, kabili akekala pamo na bo, kabili bakaba abantu bakwe. Na Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.’” Pali iyi nshita e lyo ukufwaya kwa kwa Lesa kukacitwa pe sonde na mu muulu—ukucitwa umupwilapo. * Bushe te kuti mutemwe ukwisabapo pe sonde?

[Futunoti]

[Icikope pe bula 5]

Ukuitalusha ku kucita ukufwaya kwa kwa Lesa kwalileta amafya