Amatukuto ya Muntu aya Kufwaya Lesa Ukusekelela

“MU BWIKASHI fye bonse abantu balisumina muli Lesa, maka maka ukuti e ulama fyonse no kuti e kalenga. E fyo caba na ku batila Lesa takwaba.” E fyasosele John Bowker mu citabo cakwe icitila God—A Brief History. Kanshi, amatukuto ya kufwaya Lesa no kutemwikwa kuli wena e capulamo ku muntunse. Mwi sonde lyonse, abengi mu bufumacumi balafwaya Lesa ukusekelela pa fyo balecita. Lelo, inshila bacitilamo ici ilapusana, ilingana fye ne fyo basuminamo.

Bamo basumina ukuti icifwaikwa pa kutemwikwa kuli Lesa kuba fye ne mibele isuma. Bambi batila balatemwikwa kuli Lesa pa kucitila abapiina ifisuma. Kabili, ku bantu abengi nga nshi ukukonka intambi sha mapepo kwalicindama.

Lubali lumbi, kwaba abantu abasumina ukuti Lesa aba ukutali sana—ica kuti te kuti apalame kuli bena nangu ukuti alikwatisha ifya kucita ica kutila tapoosako amano ku bantu yaweyawe. Uwa mano ya buntunse Epicurus uwa mu calo ca Grisi ica ku kale ashimikwa ukuti asumine ukuti ‘imilungu yaba ukutali sana ica kuti taingakuma imikalile ya bantu nangu panono.’ Na lyo line, abengi abatontonkanya muli uyu musango balapepa. Bamo balatuula na malambo no kucita ifya cishilano fye calici ku kufwaya ukutalalika ifikolwe fyabo ifyafwa.

Nga imwe muletipo shani? Bushe kwena Lesa alamona ukweshaesha kwesu ukwa kutemwikwa kuli wene? Bushe ifyo tucita kuti fyafika Lesa pa mutima no kumulenga ukusekelela?

 [Abatusuminishe Ukubomfya Icikope pe bula 2]

COVER: Abatuminishe ni ba ROE/Anglo-Australian Observatory, abakopele ni baDavid Malin