Bushe Mufwile Ukuba Mwi Bumba lya Mapepo?

ILYO abantu balelanda pa lwa kuba mwi bumba lya mapepo nelyo ukuya ku calici lyonse, abengi batila ‘nshifwile ukuba mwi bumba lya mapepo nelyo ukuya ku calici lyonse pa kusumina muli Lesa!’ Na kuba, bamo balanda no kuti balapalama sana kuli Lesa nga ca kutila bali fye pa nse baletamba ifyo Lesa abumba ukucila ukusangwa ku mapepo mu calici. Pali nomba, abengi batontonkanya ukuti pa kusumina muli Lesa te kutila kano waba mwi bumba lya mapepo.

Lelo bambi te fyo batontonkanya. Baishiba ukuti pa kuti Lesa abasenamine, bafwile ukuba mwi bumba lya mapepo no kusangwa ku mapepo. Ukwishiba nampo nga tufwile ukuba mwi bumba lya mapepo kwalicindama ku muntu onse, te ku basambilila fye pa mipepele no kufwaya ukwishiba impendwa ya bapepa nelyo ifintu fimbi. Apo uyu mulandu naukuma bucibusa bwesu na Lesa, bushe teti ciwame tumfwe ifyo Lesa alandapo? Cinshi Icebo cakwe, Baibolo citweba pali uyu mulandu?

Ifyo Lesa Abombele na ba Kale

Napapita imyaka nalimo 4,400 ukutula apo ilyeshi lyabipisha lyaonawile isonde lyonse. Abantu tabakalabe ili lyeshi, kabili mwi sonde lyonse mwaba inshimi shalekanalekana pali ili lyashi lya kale. Nangu line abantu balanda ifyapusanapusana pali ili lyeshi, ifishinka ifingi balanda fyalipalana, kumo fye ne cishinka ca kuti abantu abanono fye e bapuswike ne nama shimo shimo.

Bushe abapuswike Lyeshi bapusukile kuli cela mushuke? Te fyo Baibolo itweba. Icishinka ca kuti, Lesa taebele cila muntu pa lwa Lyeshi lyali mupepi no kwisa. Lelo, aebele Noa, e lyo Noa na o asokele ababiye ulwa Lyeshi lyali mupepi.—Ukutendeka 6:13-16; 2 Petro 2:5.

 Icalekabilwa pa kupusuka, kuba mwi bumba lya bantu abalebombela pamo no kuumfwila ifyo Lesa alelanda ukupitila muli Noa. Nangu fye ni nama shali mu cibwato shapuswike Ilyeshi pa mulandu wa kuba pamo ne li bumba lya bantu. Noa bamupeele ifipope fyalungama pa kuti ateyanye bwino umwa kupusushisha inama.—Ukutendeka 6:17–7:8.

Pa numa ya myaka iingi, abatuntwike kuli Shemu mwana Noa baileba abasha mu Egupti. Lelo, ubufwayo bwa kwa Lesa bwali bwa kubalubula no kubatwala ku calo alaile icikolwe cabo Abrahamu. Apa na po, Lesa taebele umuntu umo na umo, lelo intanshi aebele abo asalile ukuba intungulushi shabo, e kutila Mose na munyina Aarone. (Ukufuma 3:7-10; 4:27-31) Pa numa ya kulubulwa ukufuma mu busha mu Egupti mwi bumba, bapeelwe Ifunde lya kwa Lesa pa Lupili lwa Sinai kabili bapangilwe uluko lwa Israele.—Ukufuma 19:1-6.

Icalengele ukuti umwina Israele umo na umo apusuke, kuba mwi bumba lya bantu abo Lesa apangile uluko e lyo no kuumfwila intungulushi shasontelwe ukutungulula ili bumba. Kwali na mateyanyo ya kuti abena Egupti bamo balebishanya ne li bumba ilyo Lesa apaalile. Ilyo abena Israele bafumine mu Egupti, aba bena Egupti umo na umo balikonkele, ne ci calengele na bo baipakishe ipaalo lya kwa Lesa.—Ukufuma 12:37, 38.

Lyena mu mwanda wa myaka uwa kubalilapo, Yesu atendeke umulimo wakwe uwa kubila, alongenye abantu no kubalenga babe abasambi bakwe. Alebombela na bo pamo mwi bumba, nangu line alesakamana no muntu umo na umo ukulingana ne fyo alekabila. Yesu aebele abatumwa bakwe 11 aba cumfwila ati: “Ni mwe mwe batwalilila na ine mu fya kunjesha; kabili ndepangana na imwe icipingo, ifyo na Tata apangana na ine icipingo ca bufumu.” (Luka 22:28, 29) Mu kuya kwa nshita, umupashi wa mushilo uwa kwa Lesa waikele pa basambi ilyo bali pamo mwi bumba.—Imilimo 2:1-4.

Aya malyashi twalandapo yalanga bwino bwino ukuti ukutula na kale Lesa abomba na bantu bakwe mwi bumba lyateyanishiwa bwino. Na kuba, abantu abo Lesa abombele na bo umo umo, pamo nga Noa, Mose, Yesu, na bambi, e bo Alebomfya pa kulanda ne bumba lya bantu abalebombela pamo. Tapali icingalenga umo ukusumina ukuti pali nomba te fyo Lesa abomba na babomfi bakwe. Kwena, ifi fyalandwapo fyalenga kube ne lipusho na limbi ilya kuti: Bushe ukuba mwi bumba lya mapepo ilili lyonse e cifwaikwa? Twalalanda pali ili lipusho lyacindama mu cipande cikonkelepo.

[Icikope pe bula 4]

Lyonse Lesa abomba na bantu bakwe mwi bumba lyateyanishiwa bwino