Amepusho Ukufuma ku Babelenga

Bushe ifibanda fikaba kwi mu Kuteka kwa kwa Kristu ukwa Myaka Ikana Limo?

Baibolo taya-asuka ubu bwipusho mu kulungatika. Lelo, kuti twaishiba uko ifibanda fikaba mu Kuteka kwa kwa Kristu ukwa Myaka Ikana Limo.

Ilyo Yohane alelanda pa cikacitika ku kutendeka na ku kupwa kwa iyi Myaka Ikana limo, atile: “Namwene malaika aleika mu muulu ali no lufungulo lwa ku muyenge no munyololo ukalamba mu minwe yakwe. Kabili aikete icing’wena, icisoka ca pa kutendeka, e Kaseebanya kabili Satana, no kucikaka imyaka ikana limo (1,000). Kabili acipoosele mu muyenge no kwisalapo no kukakatikapo pa muulu wa ciko, ukuti ciilufya kabili inko mpaka imyaka ikana limo (1,000) ikapwe. Pa numa ya ifi cifwile ukukakulwa inshita inono.” (Ukusokolola 20:1-3) Ifi fikomo filanda fye pa kupooswa kwa kwa Satana mu muyenge na pa numa ukukakulwa pa nshita iinono. Nangu ca kuti ifibanda tafyalumbulwa muli ici cikomo, cimoneka kwati ilyo malaika uuli no lufungulo lwa ku muyenge, e kutila Yesu Kristu uwakatamikwa, akekata Kaseebanya no kumupoosa mu muyenge, akacita cimo cine na ku fibanda.—Ukusokolola 9:11.

Ilyo Yesu Kristu aikele pa cipuna ca Bufumu mu muulu mu 1914, acitile icintu cimo kuli Satana ne fibanda. Ukusokolola 12:7-9 kutila: “Kwabuukile inkondo mu muulu: Mikaele na bamalaika bakwe balwile ne cing’wena, ne cing’wena na bamalaika ba ciko [ifibanda] fyalilwile lelo tacacimfishe iyo, ne cifulo cabo tacasangilwe kabili mu muulu. E fyo icing’wena cikalamba capooselwe pa nshi, icisoka ca pa kutendeka, iciitwa Kaseebanya kabili Satana, icilufya aba pano isonde bonse; capooselwe pe sonde, na bamalaika ba ciko bapooselwe pamo na co.” Ukutule yo nshita, Satana ne fibanda fyakwe baba fye mu bwina mupalamano bwe sonde. Kanshi kuti twatila ilyo Yesu Kristu na kabili akalenga Satana ukuleka ukubomba pa kuti alubule abantu ukufuma ku kusonga kwakwe, akacita cimo cine na ku fibanda.

Tontonkanyeni na pa kusesema kwa kubalilapo fye ukwa mu Baibolo. Lesa atile: “Ndebika no bulwani pa kati ka iwe [Satana] no mwanakashi [ukuteyanya kwa kwa Yehova ukwa ku muulu], kabili pa kati ka bufyashi bobe [ubwa kwa Satana] no bufyashi bwakwe [ubufyashi bwa mwanakashi, e kutila Yesu Kristu]: bwene bwakulakulasa ku mutwe, nobe wakulabulasa ku citende.” (Ukutendeka 3:15) Ukulasa icisoka ku mutwe kusanshamo no kupooswa kwa kwa Satana mu muyenge mu Kuteka kwa Myaka Ikana Limo ukwa kwa Kristu. Ukusesema kulanda no kuti paliba ubulwani pali Yesu no bufyashi bwa kwa Satana. Ubu bufyashi, nelyo ukuteyanya kwa kwa Satana, busanshamo bamalaika babifi abashimoneka nelyo ifibanda. E ico, kanshi kuti twatila, ilyo Yesu akapoosa Satana mu muyenge, akakaka ne fibanda fiine no kufipoosa mu muyenge. Icishinka ca kuti imipashi ibifi yaliba no mwenso sana uwa kupooswa mu muyenge cilanga ukuti yalishiba ifyo pa nshita imo ku ntanshi, ikaleka ukubomba.—Luka 8:31.

 Lelo, bushe ca cine ukuti ifi Ukusokolola 20:1-3 kushalanda pa fibanda ni pa mulandu wa kuti fikonaulwa pa Armagedone pamo no bufyashi bwa kwa Satana ubwa pano isonde? Baibolo ilangilila ukuti ici te kuti cibe ca cine. Ukulanda pa cikacitikila Satana mu kupelako, Baibolo itila: “Kaseebanya uwalebalufya apooselwe muli bemba wa mulilo ne libwe lya mingu, umwali iciswango na kasesema wa bufi; kabili bakalungulushiwa akasuba no bushiku pe na pe.” (Ukusokolola 20:10) Iciswango na kasesema wa bufi mabuteko ya bupolitiki kabili yaba lubali lwa kuteyanya kwa kwa Satana ukwa pano isonde. (Ukusokolola 13:1, 2, 11-14; 16:13, 14) Yakonaulwa pa Armagedone, ilyo Ubufumu bwa kwa Lesa bukashonaula no kupesha amabufumu yonse aya pe sonde. (Daniele 2:44) Baibolo ilanda pa “mulilo wa muyayaya uwapekanishiwa Kaseebanya na bamalaika bakwe.” (Mateo 25:41) Satana ne fibanda fyakwe bakapooswa mumo mwine muli “bemba wa mulilo ne libwe lya mingu” pamo ne ciswango na kasesema wa bufi, e mu kuti na bo bakonaulwa umuyayaya. Nga ca kuti ubu bufyashi bushimoneka ubwa kwa Satana ubwa maka bwali no konaulwa pa Armagedone, ukwabula no kutwishika ifibanda nga fyalilumbulwa ukuba kale muli bemba wa mampalanya pamo ne ciswango na kasesema wa bufi. Ifi tafyalumbulwa mu Ukusokolola 20:10 cilangilila ukuti ifibanda tafyakonaulwe pa Armagedone.

Apo ifibanda tafyalumbulwa mu kulungatika ukuti fikapooswa mu muyenge, e co no kulandwapo fishalandilwapo mu kulungatika ukuti fikakakulwa ukufuma mu muyenge. Na lyo line, icikacitikila Kaseebanya e cikacitikila ne fibanda. Pa numa ya kukakulwa pamo na Kaseebanya no kubombela pamo mu bwesho bwa kupelekesha pa kupwa kwa myaka ikana limo, ifibanda na fyo fikapooswa muli bemba wa mulilo kabili fikonaulwa umuyayaya.—Ukusokolola 20:7-9.

Kanshi, nangu ca kuti Ukusokolola 20:1-3 kulanda fye pali Satana ukuti akekatwa no kupooswa mu muyenge umo ashakalebomba, kuti twasondwelela ukuti bamalaika bakwe na bo bakakakwa no kupooswa mu muyenge. Satana pamo pene ne milalo yakwe tabakasuminishiwe ukupumfyanya ukufikilishiwa kwa bufwayo bwa kwa Lesa ubwa kwalula isonde ukuba paradaise no kubwesha abantunse ku kupwililika mu Kuteka kwa kwa Kristu ukwa Myaka Ikana Limo.