Balengele Abafyashi Babo Ukusekelela

“WE MWANA wandi, ngo mutima obe wa mano, na ine umutima wandi kuti wasamwa.” (Amapinda 23:15) Ca cine, abafyashi Abena Kristu balasekelela nga ca kutila abana babo basambilila amano ya kwa Lesa. Ubushiku bwa pa Cibelushi, pa 10 September, 2005, abantu 6,859 ukufuma mu fyalo fyalekanalekana, basangilwe kuli programu wa bapwishishe isukulu lya Gileadi ilyalenga 119. Abasangilweko bonse balitemenwe nga nshi, sana sana abafyashi ba balya 56 abapwishishe ili sukulu.

Ba David Walker abakokola nga nshi ukubombela pa maofesi ya musambo aya ku United States bapepele ipepo lya kwiswila programu ilya kufuma pa nshi ya mutima. Lyena abali ba ceyamani ba programu ba David Splane, ababa mwi Bumba Litungulula Ilya Nte sha kwa Yehova, batendeke na mashiwi ya kutasha abafyashi ba balya abapwishishe isukulu ukuti: “Nacilinga sana ukuti tumutashe. Imibele isuma iyo mwasambilisha abana benu nailenga ukutila basalepo ukubomba umulimo wa bumishonari.” Napamo balya bafyashi balisakamene, pantu abana babo bali no kuya mu kubombela ku fyalo fimbi ifyabela ukutali nga nshi. Lelo, Munyina Splane abakoseleshe ukutila: “Mwilasakamikwa pa bana benu. Yehova kuti abasunga bwino sana ukucila ne fyo imwe mwingabasunga.” Na kabili batile: “Tontonkanyeni pa fisuma ifyo abana benu bakacita. E bakapeela abantu abacula, icisansamushi icine cine pa muku wa kubalilapo mu bumi bwabo.”

Ifyo Bengacita pa Kuti Bakatwalilile Ukulenga Bambi Ukuba ne Nsansa

Ceyamani aitile bakalanda bane. Ba Ralph Walls ababa muli Komiti wa Musambo pa maofesi ya ku United States e bali bakalanda wa kubalilapo kabili balandile ilyashi lyaleti: “Beni Abalola lwa ku Mupashi.” Balandile sana pa cishinka ca kuti ubupofu bwa ku mupashi bwalibipa nga nshi ukucila na pa kupofula amenso. Icilonganino ca Bena Kristu ba kubalilapo icali mu Laodikea tacali icalola lwa ku mupashi. Abena Kristu abali no bupofu bwa ku mupashi muli cilya cilonganino balibafwile, lelo lyonse fye icacindama nga nshi kucingilila ubupofu bwa ku mupashi, kabili pa kuti tubucingilile kano twatwalilila ukuba abalola lwa ku mupashi. (Ukusokolola 3:14-18) Kalanda atile: “Beni abalola, kabili mulemona abaletungulula filya fine Yehova abamona.” Aba bapwishishe isukulu tabalekabila ukusakamikwa sana ilyo mu cilonganino mwaba amafya. Shikulu Yesu Kristu alishiba fyonse ificitika. Pa nshita yalinga akabombelapo pa milandu yonse.

Lyena, pakonkele ba Samuel Herd ababa mwi Bumba Litungulula abayaswike ilipusho lya kuti: “Bushe Namuipekanya?” Filya fine umuntu uuli pa lwendo asenda ifya kufwala ifya kubomfya pa lwendo lwakwe, e fyo na bapwisha isukulu lya Gileadi bafwile ukucita. Lyonse bafwile ukufwala imibele ya buntu bupya. Balingile ukuba ne nkumbu shakweteko Yesu. Lintu uwa fibashi amwebele ukuti: “Nga mulefwaya, kuti mwansangulula,” Yesu amwebele ati: “Ndefwaya. Sangululwa.” (Marko 1:40-42) Lyena kalanda we lyashi atile: “Nga ca kutila mu cine cine mulefwaya ukwafwa abantu, mukasanga inshila ya kubafwilamo.” Pa Abena Filipi 2:3 patila Abena Kristu balingile ‘ukulamona bambi ukuti balibacila.’ Munyina Herd atile: “Ukuiceefya kwalicindama nga nshi ukucila no kwishiba ifintu ifingi. Abantu abo  mukalasanga lintu muli mu mulimo wa kushimikila e lyo na ba bwananyina mu cilonganino, bakamwenamo mu fyo mwaishiba nga ca kuti mwaiceefya.” Na mu kulekelesha balandile no kuti nga ca kutila aba bapwisha isukulu batwalilila ukuba no kutemwa kwa Bwina Kristu, ninshi nabafikapo ukuyabomba kuntu babatumine, kabili beshibe no kuti imilimo yabo yonse ikalondoloka.—Abena Kolose 3:14.

Ba Mark Noumair, bamo abasambilishako mwi sukulu lya Gileadi balengele abantu ukufwaya ukumfwikisha ico balelandapo lintu balandile ilyashi lyaleti: “Bushe Ifi Fine E fyo Mukatwalilila Ukucita?” ‘Ukutwalilila’ ukucita cinshi? Ukutwalilila ukutasha Yehova pa busuma bwakwe. Amalumbo 103:2 yatila: “We mutima wandi, cindika Yehova, kabili wilaba fya kutesa fyakwe fyonse.” Abena Israele tabatashishe Yehova pali mana abapeele iyalengele ukuti befwa ku nsala, lelo batendeke ukwita mana ati “icilyo ici icinangwa.” (Impendwa 21:5) Mu kuya kwa nshita, abena Israele balilekele ukutasha Yehova pa fyo alebapeela, lelo mana yena yaleumfwika fye bwino filya fine yali na pa kubala. Kafundisha atile: “Nga ca kuti mwalaba ifyo Yehova alemucitila kabili mwatendeka ukumona umulimo mwakulabomba kuntu mukaya kwati tawacindama nelyo ukulabombela fye cikulu kubomba, cikalenga mukasuule umulimo uo Yehova amupeela ukubomba.” Pa Amalumbo 103:4 patila, Yehova “e ukufwika ku mutwe uluse.” Abapwishishe isukulu bakamona uluse lwa kwa Lesa mu filonganino ifyo bakayako.

Bakafundisha na bambi abe sukulu lya Gileadi ba Lawrence Bowen balandile ilyashi lyaleti: “Bushe Amapaalo Yakamusanga?” Batile abali mwi kalasi lyalenga 119 ilya Gileadi nabasambilila sana ifya kucita pa kuti bakabombe bwino umulimo wa bumishonari. Nomba, bafwile ukushintilila pali Yehova no kutwalilila ukubomba umulimo uo abapeele. Pa Ukusokolola 14:1-4, ba 144,000 babalondolola ukutila “e batwalilila ukukonka Umwana wa mpaanga konse uko aya.” Bonse ababa muli lilya ibumba balalambatila kuli Yehova mu cishinka na ku Mwana wakwe te mulandu na mesho bakwata, kabili balatunguluka mu mulimo bafwaya ukubomba. Kalanda atile: “Te mulandu ne fingatucitikila, na ifwe bene tulalambatila kuli Yehova mu cishinka no kubomba umulimo atupeela.” Nga ca kuti aba bapwishishe isukulu bacite co, bakasanga ukuti cine cine amapaalo ya kwa Yehova ‘yakabasanga.’—Amalango 28:2.

Ukutwala Ifisabo mu Mulimo Wabo uwa Kushimikila

Ilyo balesambilila, abasambi lyonse baleya mu kushimikila mwi bala pa mpela ya mulungu. Lintu ba Wallace Liverance bakalemba we sukulu balelanda na bana be sukulu muli iyi ine programu, calimoneke fye ukutila aba bantu balibombele bwino. Bashimikile imbila nsuma mu ndimi mupepi na 10 kabili batendeke amasambililo ya Baibolo ayengi. Umulume no mukashi abali muli ili kalasi batendeke ukusambilila Baibolo no mwaume umo umwina China. Pa numa ya kumutandalila imiku ibili, bamwipwishe ifyo aleumfwa pa kwishiba Yehova. Akupukwile Baibolo no kubeba ukuti babelenge Yohane 17:3. Aleumfwa ukuti ali mu nshila ya ku bumi.

Lyena ba Anthony Morris ababa mwi Bumba Litungulula baipwishe bamunyinefwe batatu ababa mu Makomiti ya Misambo aya mu fyalo fyabo e kutila aba ku Dominican Republic, Ecuador, na Ivory Coast. Aba bamunyinefwe baebele abapwishishe isukulu ukutila ababa mu Makomiti ya Misambo balelolela fye ukuti bafike bwangu kabili balefwaisha no kubafwa ukuti babeleshe imikalile ya ku fyalo bakayako.

Abakonkelepo ni ba Leonard Pearson ababombela pa maofesi ya musambo wa ku United States, abalanshenye na bamunyinefwe batatu ababa mu Makomiti ya Misambo abafumine ku Democratic Republic of the Congo, Papua New Guinea, na Uganda. Aba bamunyinefwe bakoseleshe abapwishishe isukulu ukubombesha mu mulimo wa mwi bala. Umwaume umo no mukashi wakwe ababomba umulimo wa bumishonari ukucila pa myaka 21 mu Congo, balyafwilisha abantu 60 ukufika na ku kuipeela e lyo no kubatishiwa. Aba bamishonari nomba batungulula amasambililo ya Baibolo 30 kabili pa bantu basambilisha, 22 balasangwa na ku kulongana. Apo ino e nshita ukulobolola kwa ku mupashi kukulile, e lyo ciweme nga nshi ukubomba umulimo wa bumishonari.

Ukubombesha Umulimo wa Kucitilo Bunte Ilyo Inshita Tailapwa

Ba Gerrit Lösch ababa mwi Bumba Litungulula e balandile ilyashi lya kulekelesha. Umutwe we lyashi waleti: “Ukulanda Pali Lesa no Kushimika Ubunte bwa kwa Yesu mu Bushiku bwa kwa Shikulu.” Amashiwi ya kuti “ubunte,” “inte,” no “ukushimika ubunte,” yasangwa mwi buuku lya Ukusokolola imiku 19. Kanshi ukwabula no kulamba, Yehova alilondolola umulimo afwaya ababomfi bakwe ukubomba. Nomba, ni lilali tufwile ukushimika ubu bunte? “Mu  bushiku bwa kwa Shikulu.” (Ukusokolola 1:9, 10) Bulya bushiku bwatendeke mu 1914, kabili bwalitwalilila ukufika na ino nshita kabili bukatwalilila ukufika na ku nshiku shileisa ku ntanshi. Ukusokolola 14:6, 7 kutila, bamalaika e batwafwa ukubomba umulimo wa kushimika pali Lesa. Ukusokolola 22:17 kulangilila ukuti Abena Kristu basubwa no mupashi wa mushilo abashalapo e bapeelwa amaka ya kutungulula umulimo wa kushimika ubunte pali Yesu. Lelo na ifwe bene bonse twalikwata ishuko lya kubombako uyu mulimo kabili tufwile ukubombesha. Icikomo 20, cilangilila ukuti Yesu atile: “Ndeisa bwangu.” E ico munyina Lösch akoseleshe bonse abasangilweko ukuti: “Bilisheni ku bantu amuti, ‘Iseni, mubuule amenshi ya bumi aya bupe fye.’ Yesu aleisa bwangu. Bushe natuipekanya?”

Ba Fred Rusk, ababombele umulimo wa kusambilisha aba mwi Sukulu lya Gileadi pa myaka 11, e basondwelele programu ne pepo lya kutasha Yehova ilyafikile abantu bonse abasangilweko pa mitima. Awe e fyo ubu bushiku ubwa kusekelela bwapwile mu nshila yawama nga nshi.

[Akabokoshi pe bula 13]

IFIPENDO FYA BALI MU KALASI

Bafumine mu fyalo: 10

Bakayabombela mu fyalo: 25

Abasambi bonse pamo bali: 56

Imyaka ya kufyalwa nga kwakanya pali umo: 32.5

Imyaka baba mu cine nga kwakanya pali umo: 16.4

Imyaka babomba mu mulimo wa nshita yonse nga kwakanya pali umo: 12.1

[Icikope pe bula 15]

Abapwishishe Isukulu lya Gileadi Ilyalenga 119

Mu mutande uli pe samba, ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.