Amepusho Ukufuma ku Babelenga
Amepusho Ukufuma ku Babelenga
Bushe Yosefe umubomfi wa cishinka uwa kwa Yehova, alebomfya ulukombo lwa silfere ku kubuka, nga fintu cimoneka kwati e fyo alecita pa Ukutendeka 44:5?
Takwaba nangu cimo icingalenga twasumina ukuti Yosefe alebuka.
Baibolo ilatweba bwino bwino ukuti Yosefe alishibe ukutila ukubuka te kuti kwafwe umuntu ukwishiba ifya ku ntanshi. Inshita imo, ilyo bamwebele ukuti alondolole ifiloto fya kwa Farao, Yosefe alilandile imiku iingi ukuti Lesa eka fye e wingasobela ifya ku ntanshi. Ici calengele Farao ukusumina ukuti Lesa uo Yosefe alepepa, e kutila Lesa wa cine, e walengele ukuti Yosefe alondolole fyonse ifyali no kucitika ku ntanshi, tabomfeshe amano nangu yamo ayapala ku fya kubuka. (Ukutendeka 41:16, 25, 28, 32, 39) Mwi Funde Yehova apeele Mose, alileseshe ukucita ifinjelengwe no kubuka, kanshi alefwaya bonse beshibe ukuti ena fye eka e wingasobela ifya ku ntanshi.—Amalango 18:10-12.
Nomba, cinshi Yosefe aebele umubomfi wakwe ukulanda ukuti ulukombo lwakwe ulwa silfere lwali lwa ‘kubukilamo’? * (Ukutendeka 44:5) Tufwile ukwishiba ifyalecitika ilyo Yosefe alandile aya mashiwi.
Umulandu wa cipowe ca kapela makufi, bamunyina kwa Yosefe baile ku Egupti ku kushita ifya kulya. Kale, balya bene bamunyina e bashitishe Yosefe mu busha. Nomba, ukwabula bena ukwishiba, baile mu kushita ifya kulya kuli munyinabo uwali kangalila wa fya kulya mu Egupti. Yosefe taisokolwele kuli bena. Lelo, aeseshe amano yabo. Yosefe alefwaya ukumona nga balilapile pali filya bakwete imitima iibi. Na kabili, alefwaya no kumona ifyo batemenwe munyinabo Benyamini na shibo Yakobo, uwatemenwe sana Benyamini. E ico Yosefe abacitile ubwile.—Ukutendeka 41:55–44:3.
Yosefe aebele umubomfi wakwe ukwisusha ifya kulya mu mifuko ya bamunyina, ukubwesesha indalama shonse mu mifuko umo bashifumishe, no kubika ulukombo lwa silfere ulwa kwa Yosefe mu mufuko wa kwa Benyamini. Pa kucita ifi fyonse, Yosefe aifungushenye fye kuli bena pa kuti bena batile ni kangalila wa fya kulya umwina fyalo. Alyalwile imimonekele yakwe, imicitile yakwe, no lulimi alelanda, pa kuti bamunyina bamone ukuti ni kangalila wa fya kulya umwina fyalo.
Ilyo bamunyina kwa Yosefe bafikile kuli ena, talefwaya ukuti bamwishibe nga filya fine amapange yakwe yali, e ico abepwishe ukuti: “Bushe tamwishibe ukuti uwaba nga ine cine cine aishibo kubuka?” (Ukutendeka 44:15) Kanshi ulukombo lwali lwa kubepelako fye bamunyina ukuti bena bamone kwati ca cine Yosefe mwina fyalo. Filya fine Benyamini ashaibile ulukombo, na Yosefe wine apangile fye bulya bwile ilyo alandile ukuti lulya lukombo lwali lwa kubukilamo.
[Futunoti]
^ para. 5 Icitabo ca The Holy Bible, With an Explanatory and Critical Commentary, icalembelwe na F. C. Cook, cilalondolola ulu lutambi lwa kale ulwa kubukila mu lukombo, ilyo citila: “Pa kubukila mu lukombo, balebikamo amenshi no kupoosamo golde, silfere nelyo utubeekobeeko tumbi, e lyo balolekesha ifyo ako bapoosele mu menshi kalemoneka; nelyo kuti balolesha fye mu menshi yali mu lukombo kwati ni mu cilola.” Uulanda pa fya mu Baibolo, Christopher Wordsworth atile: “Limo baleisusha amenshi mu lukombo, lyena akasuba nga kasanika mu lukombo kalelenga fimo ukumoneka mu menshi, ninshi apo pene baishiba ne fyo balefwaya.”