Mulanshanya Shani na Bena Mwenu?

“UWA MYAKA 60, Alemba Kalata ya Citemwiko.” Uyo wali e mutwe wa kucimfyanya uko ibanki limo mu Japan lyaleangalila imyaka inono iyapita. Muli uku kucimfyanya, balekoselesha abena Japan abali ne myaka 50 na 60 ukulanda “mu bufumacumi ifyo bayumfwa” pa bena mwabo. Umwaume umo uwaangeleko uku kucimfyanya atile ku mukashi wakwe: “Nalimo walaseka, lelo te kuti ng’umfwe bwino nga nshisosele ifyo ng’umfwa pali iwe, mune mu kupongomoka ndeti: Ndatasha pa kuti walisumine ukuupwa kuli ine.”

Mu ntambi ishingi, ukusanshako na shimo isha bena Asia, tabasuminisha umuntu ukulanda ifyo aleyumfwa pa bantu. Nangu line cabe fyo, abantu ukucila pali 15,000 e balembele amakalata muli uku kucimfyanya. Abantu balitemenwe sana uku kucimfyanya ica kuti balikubwekeshepo na kabili, na mabuuku yalilembelwe ukushimpwa pa makalata ya citemwiko ayo abantu balembele. Ici cilelanga fye ukuti abantu abengi balafwaisha ukulanda ifyo bayumfwa pa bena mwabo. Lelo bambi nabo balafilwa ukulande fyo bayumfwa pa bena mwabo. Mulandu nshi? Limbi ni co tacibangukila ukweba abena mwabo ifyo bayumfwa pali bena. Bakabila ukutontonkanya sana pa kuti fye balande ifyo bayumfwa pali bambi.

BaHitoshi Kato, abalembele ibuuku ililanda pa kupoka penshoni, batila mu fyupo fya bakalamba abengi mu Japan, abakashi e bafwaya ukuti balekane pa mulandu wa kutila pa myaka iingi balisungila ubukali ku mukoshi. BaHitoshi batila: “Lelo icintu cimbi icilenga ukuti bafwaye ukulekana ni co tabalanda ifyo baleyumfwa lintu bali no bwafya.”

Ilyo fye abalume bapoka penshoni, abakashi balafwaya ukuti balekane kabili ici cilapapusha abalume. Limbi pa myaka iingi bonse babili tabalelanda ifyo baleyumfwa pa bena mwabo.  Kuti nalimo baleesha ukulanda lelo lyonse tabalelanshanya bwino. Mu nshita ya kuti bucibusa bwabo bulekoselako, baleumana fye umo shacela.

Lelo bushe abalume na bakashi kuti bapwisha shani amafya mu mutende no kulanda ifyo baleyumfwa ku bena mwabo mu nshila iisuma? Ubwafwilisho busuma tabusangwa mu citabo cilanda pa cupo ico bampanda mano ba muno nshiku balemba. Lelo busangwa mu Baibolo icitabo ca kale sana ico abantu abengi bacindika pa myaka iingi.