Mwilatiina Yehova Ali ne Mwe!

PAPITA imyaka ukucila pali 50, ninshi tapalakokola ukufuma apo ibomba lya kubalilapo ilya nyukiliya lyapuukile, sayantisiti Harold C. Urey, uwapeelweko ne cilambu ca Nobel inshita imo, alandile pa fyo inshita ya ku ntanshi ikaba, kabili atile: “Tukalalya mu mwenso, ukulaala mu mwenso, ukwikala mu mwenso no kufwa ku mwenso.” Ca cine ukuti shino nshiku abantu mwi sonde lyonse balikwata sana umwenso, kabili kuti twaishiba ne calenga! Cila bushiku, mu manyunshipepala muba ilyashi lya kutiinya ilya kusansa kwa tupondo, ulukaakala lwabipisha, na malwele ayashaishibikwa bwino bwino.

Fwe Bena Kristu twalishiba ico ifintu fyabela ifi. Filanga ukuti tuleikala mu “nshiku sha kulekelesha” isha buno bwikashi bwabipa, isho Baibolo yasobele ukuti shikaba ni “nshita shaibela ishayafya.” (2 Timote 3:1) Kanshi ici cilalenga icitetekelo cesu ukukosa ica kwishiba ukuti nomba line Yehova Lesa ali no kuleta isonde lipya umukekala ubulungami. (2 Petro 3:13) Lelo bushe, tatumfwa umwenso pantu fye tuli Bena Kristu?

Ababomfi ba kwa Lesa na Bena Kuti Baumfwa Umwenso

Yakobo, Davidi na Eliya ni bamo pa babomfi ba kwa Yehova abaumfwilepo umwenso ilyo kwacitike ifyabatiinishe mu mikalile yabo. (Ukutendeka 32:6, 7; 1 Samwele 21:11, 12; 1 Ishamfumu 19:2, 3) Te kutila aba bantu tabakwete icitetekelo. Lelo, bashintilile pali Yehova umupwilapo. Na lyo line, Yakobo, Davidi na Eliya bali bantu; kanshi, na bo bene baletiina. Umusambi Yakobo alembele ukuti: “Eliya ali muntu wa myumfwile nga ifwe bene.”—Yakobo 5:17.

Na ifwe bene kuti twaumfwo mwenso nga twatontonkanya pa bwafya tukwete ino nshita nelyo pa bwafya twingakwata ku ntanshi. Ca nsambu ukumfwa umwenso wa musango yo. Pantu na kuba, Baibolo itila Satana Kaseebanya alafwaisha “ukulwa” na “babaka amafunde ya kwa Lesa kabili abakwata umulimo wa kushimika ubunte bwa kwa Yesu.” (Ukusokolola 12:17) Nangu ca kuti aya mashiwi yalosha sana sana ku Bena Kristu basubwa, Paulo atile: “Na bonse abafwaisha ukwikala umwabela ukuipeelesha kuli bukapepa muli Kristu Yesu bakapakaswa.” (2 Timote 3:12) Na lyo line, tatulingile ukucimfiwa ku mwenso ilyo twaba na mafya. Mulandu nshi?

“Lesa wa Kupusushapususha”

Kemba wa malumbo Davidi atile: “Lesa atubela Lesa wa kupusushapususha.” (Amalumbo 68:20) Imiku fye iingi, Yehova alilanga ukuti alikwata amaka ya kupususha abantu bakwe ukupitila mu kubapokolola ku mafya yabipisha nelyo ukubapeela amaka ya kushipikisha. (Amalumbo 34:17; Daniele 6:22; 1 Abena Korinti 10:13) Ku fyo mwasambilila muli Baibolo, bushe bantu banga mwingebukisha abo Yehova ‘apuswishe’?

Nga mwabomfya Watch Tower Publications Index, * nelyo Icisontelelo ca Malyashi iciba mu Ulupungu lwa kwa Kalinda ulwa December 15, kuti mwasapika pa fintu ifyacitike pamo nga Ilyeshi lyaliko mu nshiku sha kwa Noa, ukupusushiwa kwa kwa Lote na bana bakwe abanakashi mu Sodomu na Gomora, Ukufuma mu Egupti ukwa bena Israele no kupita pali Bemba Wakashika, nelyo ifyo ipange lya kwa Hamani ilya kufwaya ukonaula abaYuda lyafililwe ukubomba. Ukubelenga amalyashi ya kucincimusha aya musango yu no kutontonkanyapo kukakosha icitetekelo cenu ica kuti Yehova ni Lesa uupususha. Ici cikamwafwa ukuba abashipa ilyo mwaponenwa na mesho.

 Ifya Kumwenako fya Muno Nshiku

Bushe mwalishibako abantu abashipikisha ababa uko mwikala? Napamo muntu uo bakaka mu cifungo pantu wa citetekelo kuli Lesa. Limbi mwalishibako Umwina Kristu umo umukoloci uulebombela Yehova nangu ca kuti alalwalilila. Kabili tontonkanyeni na pa balumendo na bakashana abashaba ulubali lwa ici calo nangu ca kuti abanabo ba ku sukulu balabapatikisha ukucite fyo. Lyena kwaba na bafyashi ababa beka, abalekusha abana babo ukwabula abena mwabo, nelyo Abena Kristu abashimbe ababombela Yehova nangu ca kuti limo balaba abatalalilwa. Finshi musambililako kuli aba bantu? Ukutontonkanya pa citetekelo cabo kukamwafwa ukushipikisha no kuba abashipa te mulandu na mesho ayengamuponena.

Tukabila ukuba abashipa ilyo baletukaanya no kutupakasa na lintu twatendeka ukumona kwati Yehova tatutemwa. Tulingile ukucetekela ukuti ilambo lya kwa Kristu lilabomba kuli ifwe pa lwesu. (Abena Galatia 2:20) Lyena kuti twapepa kuli Yehova ukwabula umwenso nelyo ukututuma. Nga tuleimona kwati Yehova te kuti atutemwe, tufwile ukutontonkanya pa mashiwi Yesu aebele abakonshi bakwe aya kuti: “Bushe inseba shibili tashishitwa ku kalikobili kamo akacepesha? Na lyo line takuli nangu lumo ulwingapona pa nshi ukwabula Shinwe ukwishiba. Lelo ne mishishi ya ku mitwe yenu yalipendwa yonse. E ico mwilatiina: Mwalicindama ukucila inseba ishingi.”—Mateo 10:29-31.

Ilingi, muli bamagazini ba Ulupungu lwa kwa Kalinda na Loleni! mulaba amalyashi ya Nte sha kwa Yehova aba muno nshiku abashipikisha amafya ukwabula umwenso. Ici tacalola mu kuti tabomfwa ububi nelyo ukusakamikwa pa mafya bakwata. Lelo tabaleka ukumfwe fyo kwabalenga ukuleka no kubombela Yehova. Amalyashi yabo ayalembwa kuti yamwafwa na imwe ukushipa ilyo mwaba na mafya. Natulande pa fya kumwenako fibili.

Ubumi Bwabo Bwalyalwike Ilyo Bacenekwe

Muli Awake! wa April 22, 2003, mwaba ilyashi litila, “How an Injury Changed My Life.” (Ifyo Ubumi Bwandi Bwayalwike Ilyo Nacenekwe) Muli ili lyashi, baStanley Ombeva, Inte ya kwa Yehova ku Kenya, balondolwele amafya bakwete ilyo motoka iyalebutuka sana yabapunkile. Ilyo ukulwala kwacililemo, balibafumishe incito kabili tababapeele ne ndalama nangu shimo. Munyina Ombeva alanda ukwabula ukupita mu mbali ukuti: “Ilyo naishibe ifyo ubulwele bwandi bwakulile, nalibipilwe icine cine, naletontonkanya fye pa bucushi bwandi kabili nalefulwa bwangu. Limo nalekalipa sana kabili naishileba umukali sana.” Nangu balepita muli uku kucula, baOmbeva batwalilile abashipa. Tabalekele ukuti ukubipilwa kubacimfye ica kuti baleka no kubombela Yehova. Lelo, bashintilile pali Yehova. Munyina Ombeva atila: “Yehova lyonse alentungilila mu mafya yonse ayo nalepitamo ica kuti limo naleumfwa ne nsoni. Napangile ukuti nangu cibe shani mfwile ukulabelenga no kutontonkanya pa malembo ayo naishibe ukutila kuti yansansamusha pa mafya nakwete.”

Amashiwi ya kwa munyina Ombeva ayabulo kupita mu mbali yalengele ukuti na bambi babe abashipa ilyo baleshipikisha amesho. Nkashi umo alembele ati: “Nalililile ilyo nabelengele ili lyashi. Namwene ukuti Yehova alintemwa no kuti alinsakamana kabili e nshila alensansamushishamo.” Nte umbi na o alembele ati: “Amalyashi ya musango yu yalatukoselesha sana fwe baba mu kucula kwapalako kabili fwe balecula fye cinshinshi.”

 Ukushipikisha Amasakamika

Ica kumwenako na cimbi ica kukoselesha ca baHerbert Jennings, ico bashimike mu lyashi lyaleti, “Tamwaishiba Ifyo Umweo Wenu Ukaba Mailo.” * Munyina Jennings alilwala ubulwele beta ati bipolar disorder. Nga baibukisha ifyo cali ilyo ubulwele bwatendeke fye, batila: “Bwali bwafya icine cine pa kuti fye nje ku kulongana. Nomba, ico nashininkishe ca kuti ukuba pamo na bamunyina kwalicindama sana. Ifyo nalecita ilingi fya kuti, naleingila mu Ng’anda ya Bufumu ninshi bonse nabekala kabili nalefuma ilyo fye ukulongana kwapwa ninshi bonse tabalaima na pa fipuna.”

Ukushimikila na ko bwali bwafya. Munyina Jennings atila: “Limo, nalecita nimfika pa ng’anda ya muntu lelo nafilwa ukukonkonsha. Na lyo line nshalekele, pantu nalishibe ukuti umulimo wesu uwa kushimikila ukapususha ifwe na bonse abalekutika. (1 Timote 4:16) Nga papita inshita, naumfwako bwino, naleya pa ng’anda yakonkapo no kwesha na kabili. Ukutwalilila ukubombako umulimo wa kushimikila kwanengele ukutwalilila ukuba uwakosa lwa ku mupashi, kabili ici calingafwile ukushipikisha.”

Ilyashi lwa kwa munyina Jennings ilya bufumacumi lyalikoseshe abengi abalibelengele abali na mafya yamo yene. Ku ca kumwenako, nkashi umo alembele ukuti: “Nalibelenga bamagazini ba Ulupungu lwa kwa Kalinda na Loleni! pa myaka 28, lelo nshatala nkoseleshiwapo nge fyo nakoseleshiwe ilyo nabelengele ili lyashi. Nalileka umulimo wa nshita yonse kabili naleumfwa ububi ilyo nalekele, pantu naletila mba ne citetekelo cakosa, nga nshalekele ulya mulimo. Ukubelenga ifyo munyina Jennings alekele umulimo wakwe pa kuti asakamane ubumi bwakwe kwalingafwile ukukanaumfwa ububi pa fyo nacitile. Ala mwandini amapepo yandi yalyaswikwe!”

Munyina umbi na o alembele ukuti: “Nalibombele bueluda imyaka 10, lelo nalilekele pa mulandu wa kuti natendeke ukulwala ubulwele bwa kufulunganako amano. Ukuimona ukuti tapali ico ningacita kwalincimfishe ica kuti nalefilwa no kubelenga amalyashi ayalanda pa bumi bwa bantu ba kwa Yehova, abo ilingi bashimika pa fintu fyaibela ifyo babomba. Nomba, ukushipikisha kwa kwa munyina Jennings kwalinkoseleshe sana. Nalibelenga ilyashi lyakwe imiku iingi.”

Ukutwalilila fye aba Citetekelo

Ukupala munyina Ombeva na munyina Jennings, Inte sha kwa Yehova abengi balitwalilila ukupepa Yehova Lesa mu kushipa te mulandu na mafya. Na imwe nga mulabombela Yehova nangu ca kuti mwalikwata amafya, tulemutasha nga nshi. Ishibeni ukuti: “Lesa tali uushalungama uwa kuti alabe umulimo wenu no kutemwa uko mwalangile kwi shina lyakwe, apo mwalipyungila aba mushilo kabili muletwalilila ukupyunga.”—AbaHebere 6:10.

Filya fine Yehova ayafwile abantu bakwe aba cishinka aba ku kale ukucimfya abalwani babo, e fyo na imwe akamwafwa ukucimfya amafya ayali yonse ayo mwingakwata. E ico, mwilalaba amashiwi Yehova alandile ukupitila muli kasesema wakwe Esaya ukuti: “Witiina, pantu ine ndi nobe, witentuka, pantu ine ndi Lesa obe; nakulakulengo kutalila, cene, nakulakwafwa, cene, nakulakufumbatila ku kwa kulyo kwandi kwa bulungami.”—Esaya 41:10.

[Amafutunoti]

[Ifikope pe bula 16]

Ukupala baStanley Ombeva (abali pa muulu) na baHerbert Jennings (abali ku kulyo), abengi balabombela Yehova mu kushipa

[Abatusuminishe Ukubomfya Icikope pe bula 14]

USAF photo