“Ifyo Natemwa Amafunde Yenu!”

AMALUMBO 119 lwimbo umo kemba alelanda ifyo aleyumfwa pa bukombe ubwapuutwamo, nelyo icebo ca kwa Lesa. Kemba wa malumbo aimba ukuti: “Ifyebo fyenu nafisungila mu mutima wandi.” “Ifipope fyenu e fyo nkatemwisha.” “Umweo wandi naufunshika ku kufuluka ubupingushi bwenu inshita yonse.” “Ifyebo mutucinkulako nalifitemwisha.” “Mfuluka ifipope fyenu.” “Nkatemwisha amafunde yenu ayo natemwa.” “Na ku fipope fyenu nkabikako amano.” “Ifyo natemwa amafunde yenu! Akasuba konse e yo ntontonkanyapo.”—Amalumbo 119:11, 16, 20, 24, 40, 47, 48, 97, NW.

Ca cine kemba wa malumbo alitashishe Lesa pa cebo cakwe ico asokolola! Bushe na imwe muyumfwa kwati ni kemba wa malumbo pa bukombe ubwaba mu Cebo ca kwa Lesa Baibolo? Bushe kuti mwafwaya ukutemwa icebo ca kwa Lesa muli iyo nshila? Nga ca kuti mulefwaya ukucite fyo, mufwile intanshi ukuba no mukosha wa kubelenga Baibolo lyonse, nga cingacitika cila bushiku. Yesu Kristu atile: “Te ku cilyo ceka, umuntu engabela umumi, lelo ku cebo conse icifuma mu kanwa ka kwa Yehova.” (Mateo 4:4) Ica bubili, mufwile ukulatontonkanya sana pa fyo mulebelenga. Ukulatontonkanya pa fyo Lesa aba, imibele yakwe, ne fyo afwaya, kukalenga mukatemwe Baibolo no mweo wenu onse. (Amalumbo 143:5) Ne cacindama sana ca kuti mulingile ukulacita ifyo Baibolo imusambilisha mu mikalile yenu lyonse.—Luka 11:28; Yohane 13:17.

Bushe kuti mwanonkelamo shani nga mwatemwa ifyo Baibolo ilanda? Amalumbo 119:2, NW yatila: “Balipaalwa ababaka ifyebo [Lesa] atucinkulako.” Ifya kutuncikulako ifyaba mu Baibolo fikamwafwa ukupwisha amafya mupitamo mu mikalile yenu. (Amalumbo 1:1-3) Mukanonka amano, umucetekanya no kwiluka, ifikamwafwa ‘ukulama amakasa yenu ku nshila yonse ibi.’ (Amalumbo 119:98-101) Ukwishiba icine pali Lesa na pa fyo afwaya ukuti isonde likabe kukalenga muleikala bwino, kabili mu kalaenekela sana amalayo ya ku ntanshi.—Esaya 45:18; Yohane 17:3; Ukusokolola 21:3, 4.

Inte sha kwa Yehova balatemwa sana ukwafwa bambi ukwishiba bwino Baibolo pa kuti bengatemwa ifyalembwamo. Mukwai tulemukoselesha ukucita ifyo ifyebo fyakonkapo filelanda.