Bushe Musakamana Bambi nge fyo Yehova Asakamana Abantu Bakwe?

“MULEPOOSA amasakamika yenu yonse pali [Lesa], pantu asakamana imwe.” (1 Petro 5:7) We mashiwi nobe ulawama! Yehova Lesa alibika sana amano ku bantu bakwe. Tatumfwa mwenso kabili tatusakamikwa pantu alatusakamana.

Na ifwe bene tufwile ukubika amano kuli bambi. Apo tatwapwililika, tufwile ukucenjela sana ilyo tulesakamana bambi pa kuti tatucishishemo. Ilyo tushilalanda pa fyo twingacishamo, natutale tulande pa misango yalekanalekana iyo Yehova asakamaninamo abantu bakwe.

Kemba wa malumbo Davidi apashenye ifyo Lesa asakamana abantu kuli filya kacema asakamana umukuni. Atile: “Yehova e mucemi wandi; nshibulwa. Mu mulemfwe uteku e mo anengo kuyolola, antwala pa menshi ayatekanya; abweseshamo umweo wandi. . . . Kabili ilyo nyenda mu mupokapoka wa kufiita kwa mfwa, nshitiina bubi; pantu imwe muli pamo na ine.”—Amalumbo 23:1-4.

Apo Davidi na o ali kacema, alishibe sana ifyo kacema alecita pa kusakamana umukuni. Kacema alacingilila impaanga shakwe ku nama mbi pamo nge nkalamo, imimbulu, na ba bere. Alalonganika umukuni pamo, alafwaya impaanga ishilubile, ishinakile ashisendela pa cifuba, kabili alabika sana amano ku shilwele nelyo ishifunike. Cila bushiku alapeela impaanga shakwe amenshi. Lelo, ici tacilolele mu kuti kacema afwile fye ukwishiba fyonse ifyo impaanga shilecita. Impaanga ishine shilayendela lelo ena alashicingilila.

Ifi fine e fyo na Yehova asakamana abantu bakwe. Umutumwa Petro alondolwele ukuti: ‘Mulindwa ku maka ya kwa Lesa.’ Amashiwi ya kuti ‘ukulindwa ku maka ya kwa Lesa,’ yapilibula ukulacingililwa na Lesa. (1 Petro 1:5) Apo Yehova alatusakamana, alatucingilila kabili ali-iteyanya ukutwafwa ilyo twakuuta kuli ena. Lelo, Yehova atupangile ukuti tuleisalila ifya kucita, kanshi tacilima nelyo ukunyantukila muli fyonse ifyo tucita ne fyo tupingulapo. Bushe kuti twapashanya shani Yehova muli uyu musango?

Mulesakamana Abana Benu nge fyo Lesa Asakamana Abantu Bakwe

“Abana baume cikwatwa icafuma kuli Yehova.” Kanshi abafyashi bafwile ukulasakamana no kulacingilila abana babo. (Amalumbo 127:3) Ici cilepilibula ukuti bafwile ukulenga abana ukulanda ifyo batontonkanya ne fyo bayumfwa. Nga baishiba ifyo abana babo batontonkanya ne fyo bayumfwa, lyena balingile ukulaibukisha ifyo fine muli fyonse ifyo balecita na bana babo. Nga abafyashi balefwaya fye umwana alecita  ifyo balefwaya ukwabula ukutontonkanya pa fyo ayumfwa, bakaba kwati ni kacema uukaka impaanga shakwe mu mukoshi pa kushitungulula. Takwaba kacema uwingatungulula impaanga shakwe muli uyo musango; kabili Yehova na o te fyo atutungulula.

BaMariko * batila: “Pa myaka iingi naleeba fye abana ukuti, ‘Mwilacita ifi,’ ‘Mulecita ifi.’ Nalemona kwati e fyo umufyashi fye onse afwile ukulacita. Nshatalile mbatashapo, nelyo ukwikala nabo no kulanshanya bwino bwino.” Nangu cingati umwana mwanakashi wa baMariko alepoosa inshita iikalamba nga alelanda na banankwe pa foni, tatalile alanshanyapo na banyina pa nshita iikalamba. BaMariko batwalilile ukusosa ukuti: “Naishileiluka ukuti ifyo nalelanshanya nankwe fyalipusene ne fyo alelanshanya na banankwe. Nga alelanda na banankwe alebomfya amashiwi ayalelanga ukuti nabikako amano ku fyo umunankwe alelanda pamo nga ‘Ee cili fye bwino’ nelyo ‘Ifyo fine e fyo na ine ndemona.’ Natendeke ukubomfya amashiwi yamo yene pa kuti umwana wandi alelanda ifyo aletontonkanya ne fyo aleyumfwa. Awe twatendeke no kulanshanya bwino kabili twalelanda ilyashi pa nshita iikalamba.” Ici cilelanga ukuti ukulanshanya kusuma kwalicindama kabili cikabila abantu babili ukubikako amano ku fyo balelanshanya.

Abafyashi bafwile ukulenga abana babo ukulanda ifyo bayumfwa ne fyo bafwaisha ukucita, kabili abana bafwile ukwishiba bwino bwino ukuti ico abafyashi babikilako amano ku fyo balecita ni co bafwaya ukubacingilila. Baibolo ifunda abana ukulaumfwila abafyashi babo; lyena ilanda umulandu balingile ukucitile fyo. Itila: “Ukuti kuwame kuli iwe no kuti wikale nshiku ishingi pano isonde.” (Abena Efese 6:1, 3) Abana nga baishiba umulandu balingile ukulanakila abafyashi babo, cilabangukila ukuba ne cumfwila.

Pa Kusakamana Umukuni wa kwa Yehova

Ifyo Yehova asakamana abantu bakwe fimonekela mu cilonganino. Yesu Kristu Umutwe wa cilonganino aeba baeluda ukusakamana umukuni wakwe. (Yohane 21:15-17) Mu ciGriki ishiwi kangalila lyalipalana sana ne shiwi lya kuti “lolekesheni.” Ilyo Petro alekomaila pa fyo baeluda bafwile ukubomba uyu mulimo, abebele ati: “Cemeni umukuni wa kwa Lesa uwaseekeshiwa kuli imwe, te ku kupatikishiwa iyo, lelo ku kuitemenwa; te ku kutemwa ubunonshi bwa  nsoni, kano ku kucincila; te ku kutitikisha abali ubupyani bwa kwa Lesa, kano ukuba ifya kumwenako ku mukuni.”—1 Petro 5:2, 3.

Ca cine, umulimo wa baeluda walipalana sana no wa bakacema. Bafwile ukusakamana abanaka no kubafwa pa kuti balekonka amafunde ya kwa Lesa ayalungama. Kanshi umulimo wa baeluda wa kuteyanya imilimo ya cilonganino, ukulongana, no kusungilila umuyano mu cilonganino.—1 Abena Korinti 14:33.

Amashiwi yaba pali 1 Petro 5:2, 3 na yalanda pali cimo ico baeluda bashilingile ukucita, yacibacinkulako ukuti tabafwile “ukutitikisha” aba mu cilonganino. Baeluda kuti ‘baletitikisha’ icilonganino nga balebikako amafunde ayashilingile. Pa kufwaisha fye ukucingilila umukuni, nalimo eluda mu kukanaishiba kuti acishamo. Ica kumwenako fye, mu cilonganino cimo ica ku Asia, baeluda balibikileko amafunde ya kukonka pa kuposha bambi mu Ng’anda ya Bufumu, pamo nga nani alingile ukubalilapo ukulanda pa kuposha umunankwe. Balemona kwati ukulakonka ayo mafunde kwali no kulenga mu cilonganino mube umutende. Kwena ico balefwaisha ukucita cali fye bwino sana, nomba bushe balepashanya Yehova no kusakamana abantu bakwe nge fyo abasakamana? Kuti twasambililako isambililo ilyacindama kuli aya mashiwi ya kwa Paulo ayalanga ukuti ali kacema musuma, atile: “Te kutila ni fwe bacibinda pa citetekelo cenu, lelo tuli babomfi banenu ku kumuletelo kusekelela, pantu mwaimininina ku citetekelo cenu.” (2 Abena Korinti 1:24) Yehova alicetekela abantu bakwe.

Baeluda abasakamana umukuni tabafwile ukubikako amafunde yashili ya mu Malembo, kabili tabafwile ukulasokolola inkaama. Balebukisha ifunde lya kwa Lesa ilya kuti: “Ica nkama cakwe wisokolwela umbi.”—Amapinda 25:9.

Umutumwa Paulo apashenye icilonganino ca Bena Kristu basubwa ku mubili wa muntu, atile: “[Lesa] alundinkenye umubili . . . ukuti mwiba amalekano mu mubili, lelo ukuti ifilundwa fya uko fibe no kusakamanana kumo kwine.” (1 Abena Korinti 12:12, 24-26) Amashiwi ya ciGriki ayo bapilibula ukuti “fibe no kusakamanana kumo kwine” yapilibula ‘ukusakamikwa pa mulandu wa bambi.’ Kanshi Abena Kristu bafwile ukubika sana amano ku Bena Kristu banabo.—Abena Filipi 2:4.

Bushe Abena Kristu kuti balanga shani ukutila ‘balasakamikwa pa mulandu wa bambi’? Balalanga ukuti balasakamana bambi mu cilonganino nga balebapepelako no kwafwa abali mu kukabila. Ici cilenga nabo ukulasakamana bambi. Ifi fine e fyacitikile Tadataka. Uyu mulumendo abatishiwe ilyo ali ne myaka 17, kabili e walepepa fye Yehova mu lupwa lwabo. Ashimike ukuti: “Kwali ulupwa lumo mu cilonganino ulwalenjita ku mwabo ku kulya ifya kulya no kwangalila pamo. Ilingi line ulucelo pa kuya ku sukulu naleya ku mwabo ku kubebeta ilembo na bena. Balemfunda pa fya ningapwisha amafya pa sukulu, kabili twalepepela pali ayo mafya pamo. Aba bantu balinsambilisha bukapekape.” Tadataka alacita ifyo asambilile kuli lulya lupwa kabili nomba abombela pa maofesi ya Nte sha kwa Yehova.

Umutumwa Paulo asokele pali cimo icalubana ico tushilingile ukucita ilyo tulesakamanana. Alandile pa banakashi bamo abasangwike “aba mulomo kabili abaipoosa mu fishibakumine, abalande ifyo bashifwile kulanda.” (1 Timote 5:13) Ca cine, tulingile ukubika amano ku banensu, lelo tacifwile ukucilamo ica kuti twalaipoosa na mu fishitukumine. ‘Ukulanda ifyo tushifwile ukulanda,’ pamo ngo kusuusha ifyo bambi balecita, e kulanga ukuti tuleipoosa mu fishitukumine.

Tulingile ukulaibukisha ukuti Abena Kristu kuti bapusana mu fyo bacita, ifyo basalapo ukulya, ne fyo batemwa ukucita ilyo balefwaya ukutushako nelyo ukwangala. Cila muntu aliba no buntungwa bwa kusala ifyo alefwaya ukucita cikulu fye talepula mu mafunde ya mu Baibolo. Paulo akonkomeshe Abena Kristu ba ku Roma ukuti: “Twilapingulana. . . . Natukonkelele ifya mutende ne fya kukuulana.” (Abena Roma 14:13, 19) Kanshi tufwile ukulanga ukuti tulasakamana bambi mu cilonganino ukupitila mu kubafwa, te kuipoosa mu milandu yabo iishitukumine. Nga tulesakamanana muli uyu musango, mu lupwa lwesu na mu cilonganino mukaba ukutemwana no kwikatana.

[Futunoti]

[Icikope pe bula 19]

Muletasha abana benu no kubabikako amano e lyo bakalalanda ifyo batontonkanya ne fyo bayumfwa