Ukulashipikisha Ilyo Tulelolela Ubushiku bwa kwa Yehova

“Ku citetekelo cenu lundeniko . . . ukushipikisha.”—2 PETRO 1:5, 6.

1, 2. Bushe ukushipikisha e kuti shani, kabili mulandu nshi Abena Kristu bakabila ukulashipikisha?

UBUSHIKU ubukalamba ubwa kwa Yehova nabupalama nga nshi. (Yoele 1:15; Sefania 1:14) Fwe Bena Kristu abapampamina pa kutwalilila ukuba ne cishinka kuli Lesa tufwaisha ukuti bulya bushiku bukafike ilyo Yehova akacindikwa nge Mfumu iyapulamo. Lelo pali ino nshita, abantu balitupata, balatupontela, balatucusha pa mulandu wa kuti tuli Bena Kristu, kabili limo balatwipaya pa mulandu wa citetekelo cesu. (Mateo 5:10-12; 10:22; Ukusokolola 2:10) Kanshi tukabila ukushipikisha. Umutumwa Petro atukonkomesha ukuti: “Ku citetekelo cenu lundeniko . . . ukushipikisha.” (2 Petro 1:5, 6) Tulakabila ukushipikisha pantu Yesu atile: “Uwashipikisha ukufika na ku mpela, wene e ukapusuka.”—Mateo 24:13.

² Na kabili tulalwala, tulafwilwa, kabili tulaponenwa na mafya yambi. Ala Satana kuti atemwa nga nshi ukumona icitetekelo cesu canaka! (Luka 22:31, 32) Lelo, nga twashintilila pali Yehova, kuti twashipikisha amafya yalekanalekana. (1 Petro 5:6-11) Lekeni tulande pa fyacitikile bamo ifilanga ukutila kuti twashipikisha no kutwalilila ukuba ne citetekelo cakosa ilyo tulelolela ubushiku bwa kwa Yehova.

Ukulwala Takwabanenuna

3, 4. Landeni pa fyacitike ifilanga ukutila kuti twatwalilila ukuba ne cishinka kuli Yehova te mulandu no kulwalilila.

³ Pali ino nshita Lesa tatuposha mu cipesha mano, lelo alatupeela amaka ya kushipikisha ubulwele. (Amalumbo 41:1-3) BaSharon batile: “Ukutula fye ku bwaice nyendela pa cicinga. Ilyo nafyelwe fye, nalilwele ubulwele bwa kuli bongobongo ubwalengele ukuti mbe no bulebe kabili nshaleangala sana nge fyo abaice bambi bangala.” Ukusambilila pali Yehova na pa malayo yakwe ayatila ku ntanshi abantu bakaba abatuntulu kwalengele baSharon babe ne subilo. Nangu cingati balabako no bwafya pa kwenda na pa kulanda, balaba sana ne nsansa ukubombako umulimo wa kushimikila. Mu 1993, baSharon batile: “Nangu cingati ubulwele bwena buleya bulekoselako fye, icitetekelo na bucibusa bwandi na Lesa filankosha. Ala  nalitemwa nga nshi ukuba umubomfi wa kwa Lesa kabili ndomfwa bwino ukumona ifyo antungilila!”

⁴ Umutumwa Paulo akonkomeshe Abena Kristu ba ku Tesalonika ‘ukusansamusha abakungumane mitima.’ (1 Abena Tesalonika 5:14) Ukubipilwa sana kuti kwalenga umuntu ukuba no bulanda nga nshi. Mu 1993 baSharon balembele ukuti: “Ukulatontonkanya ukuti tapali ico ningacita kwalengele . . . ndwale amasakamika ica kuti nali no bulanda nga nshi pa myaka itatu. . . . Baeluda balingafwile sana ilyo balemfunda no kunsansamusha. . . . Ukupitila mu Ulupungu lwa kwa Kalinda, Yehova alinsambilishe ifya kucita ilyo nalwele amasakamika. Ca cine, Yehova alasakamana abantu bakwe kabili alabika amano ku fyo tuyumfwa.” (1 Petro 5:6, 7) BaSharon balitwalilila ukuba ne cishinka kuli Yehova ilyo balelolela ubushiku ubukulu ubwa kwa Yehova.

5. Cinshi cilelanga ukuti Abena Kristu kuti bashipikisha amafya ayesako pa mulandu ne fyo bapitilemo?

⁵ Abena Kristu bamo balasakamikwa sana umulandu ne fyo bapitilemo. BaHarley balimweneko ulukaakala lwabipisha ulwalecitika mu Nkondo ya Calo iyalenga bubili kabili ilingi line balelota ifyabipa ifyalecitika muli ilya inkondo. Nga nabalaala balepunda abati: “Mwafwa! Butukeni!” Nga basantamuka balesanga nababomba ku cibe. Lelo ilyo batendeke ukulaumfwila amafunde ya kwa Lesa, mu kuya kwa nshita balinashisheko ukulota ifiloto fyabipa.

6. Bushe Umwina Kristu umo alecita shani ubulwele nga bwamwikata ilyo aleshimikila?

⁶ Umwina Kristu uwalwele ubulwele bwa kuli bongobongo calemwafya ukushimikila ku ng’anda ne ng’anda. Lelo, alitwalilile ukulashimikila pantu alishibe ukuti ukushimikila imbila nsuma kwali no kulenga ena na balekutika kuli wena ukwisakwata umweo wa muyayaya. (1 Timote 4:16) Limo limo alefilwa ukukonkonsha pa ciibi, lelo atile: “Nga papita inshita ilyo naumfwako bwino, ndaya pa ng’anda iikonkelepo no kukonkonsha. Ukutwalilila ukushimikila kwalilenga bucibusa bwandi na Lesa ukulakoselako.” Ukusangwa ku kulongana na ko kwalemwafya, lelo alimwene ukuti ukulongana pamo ne Bena Kristu banankwe kwalicindeme nga nshi. Kanshi aleesha na maka yakwe yonse ukusangwako.—AbaHebere 10:24, 25.

7. Nangu cingati bamo baliba no mwenso wa kulanda pa cintubwingi nelyo ukusangwa ku kulongana, bushe bashipikisha shani?

⁷ Abena Kristu bamo baliba no mwenso, balatiina ifintu fimo nelyo ukucita fimo. Ica kumwenako fye, kuti baletiina ukulanda pa cintubwingi nelyo ukusangwa ku kulongana. Elenganyeni ifyo cibafya ukwasukapo pa kulongana nelyo ukulanda ilyashi mwi Isukulu lya Butumikishi Ilya Bulesa! Lelo, balashipikisha, kabili tulatasha nga nshi ilyo basangwa ku kulongana no kwasukapo.

8. Cinshi cingatwafwa sana ukushipikisha amasakamika?

⁸ Ukulatuusha sana no kulaala pa maawala ayengi kuti nalimo kwayafwa umuntu ukushipikisha ubulwele bwa masakamika. Lelo kuti cawama sana ukuya ku cipatala. Nomba icingatwafwa sana kulapepa lyonse kuli Lesa. Pa Amalumbo 55:22 patila: “Poosa pali Yehova icisendo cobe icafina, wene alekulama; pe fye takasuminishe uwalungama ukutelententa.” Kanshi ‘mulecetekela sana Yehova no mutima wenu onse.’—Amapinda 3:5, 6.

Ukushipikisha Ilyo Twafwilwa

9-11. (a) Cinshi cingatwafwa ukucefyako ubulanda ilyo umutemwikwa afwa? (b) Bushe ifyacitile Anna kuti fyatwafwa shani ukushipikisha ilyo twafwilwa?

⁹ Abantu nga bafwilwa, balaba no bulanda nga nshi. Abrahamu alilile ilyo umukashi wakwe Sara afwile. (Ukutendeka 23:2) Nangu fye muntu wapwililika Yesu ‘alililile ifilamba’ ilyo cibusa wakwe Lasaro afwile. (Yohane 11:35) Kanshi ca cifyalilwa fye ukuba no bulanda umutemwikwa nga afwa. Lelo, Abena Kristu balishiba ukuti abafwa bakabuuka. (Imilimo 24:15) E ico, tababa “na bulanda filya bambi baba abashaba ne suubilo.”—1 Abena Tesalonika 4:13.

¹⁰ Bushe kuti twashipikisha shani ilyo twafwilwa? Nalimo natulangilile: Umunensu nga aima ubulendo bwa kuya ukutali tatuba sana no bulanda pantu tulenekela ukwisamonana nankwe ilyo akabwela. Nga tulemwena imfwa ya Mwina  Kristu muli uyu musango, nalimo ubulanda kuti bwacepako pantu tukalaibukisha ukuti akesabuuka ku bafwa.—Lukala Milandu 7:1.

¹¹ Ukushintilila no mutima wesu onse pali “Lesa wa cisansamushi conse” kukatwafwa ukushipikisha ilyo twafwilwa. (2 Abena Korinti 1:3, 4) Na cimbi icingatusansamusha, kutontonkanya pa fyacitike kale kuli mukamfwilwa Anna. Aishileba mukamfwilwa pa numa ya kwikala imyaka 7 mu cupo. Na lyo line, alitwalilile ukubombela Yehova umulimo wa mushilo pe tempele na lintu ali ne myaka 84. (Luka 2:36-38) Ukuipeelesha mu mulimo wa kwa Lesa kwalimwafwile ukucefyako ubulanda no kutalalilwa. Ukulabombako lyonse imilimo ya Bwina Kristu, ukubikako no mulimo wa kushimikila, kuti kwatwafwa ukucefyako ubulanda nga twafwilwa.

Ukushipikisha Amesho Ayalekanalekana

12. Mesho nshi aya mu lupwa Abena Kristu bamo bashipikisha?

¹² Abena Kristu bamo balashipikisha amesho ya mu lupwa. Ica kumwenako fye, aba mu lupwa balaba no bulanda nga nshi umulume nelyo umukashi nga acita ubucende! Pa mulandu wa cikonko no bulanda, uwa kaele kuti alefilwa ukulaala utulo kabili alalila sana. Kuti cayafya fye no kulabomba imilimo iyayanguka, kuti alelufyanyalufyanya fye nelyo kuti aicena no kuicena. Nalimo kuti alefilwa ukulya, kuti aonda, kabili limbi kuti aleba fye uwa nkumbabulili. Kuti alefilwa fye no kulabomba imilimo ya Bwina Kristu. Kabili nangu fye bana nabo kuti babipilwa nga nshi!

13, 14. (a) Bushe ipepo lyapepele Solomone pa kwisula itempele limukoselesha shani? (b) Mulandu nshi tulombela umupashi wa mushilo?

¹³ Ilyo tulepita mu mesho ya musango yo, Yehova alatwafwa. (Amalumbo 94:19) Mwi pepo Imfumu Solomone yapepele pa kwisula itempele lya kwa Yehova yatile Yehova alomfwa amapepo ya bantu bakwe. Solomone apepele kuli Lesa ati: “Ukupepa konse, ukupaapaata konse ukukaba ku muntu onse, uwa mu bantu benu bonse abena Israele, abaishiba umuntu no muntu impumo ya ku mutima wakwe, uwafungulule ndupi shakwe ukulola ku ng’anda ino, lyene imwe muumfwe mu muulu mu bwikalo bwenu, mulekelele no kucita, mupeele na ku muntu no muntu umwabele mibele yakwe yonse, mwe baishibo mutima wakwe (pantu imwe, ni mwe mweka, mwaishibe mitima ya bana ba bantu bonse), ku kuleka bamutiine inshiku shonse isho  bene baba no mweo pa calo ico mwapeele kuli bashifwe.”—1 Ishamfumu 8:38-40.

¹⁴ Icingatwafwa sana, kutwalilila ukulalomba umupashi wa mushilo. (Mateo 7:7-11) Lesa nga atupeela umupashi wa mushilo tukaba ne fisabo fya mupashi pamo nga ukusekelela no mutende. (Abena Galatia 5:22, 23) Ala tulomfwa bwino Shifwe wa ku muulu nga ayasuka amapepo yesu! Ubulanda ne cikonko filapwa, kabili tulasansamuka ica kuti tatusakamikwa sana!

15. Malembo nshi ayengatwafwa ukucefyako amasakamika?

¹⁵ Ca cine, ilyo tuleshipikisha amafya tulingile ukwenekela ukuti twakulasakamikwa. Lelo, teti tulesakamikwa sana nga tuleibukisha aya mashiwi ya kwa Yesu ayatila: “Mwilasakamikilwa imyeo yenu ifyo mukalya nelyo ifyo mukanwa, nelyo imibili yenu ifyo mukafwala. ... E ico, mulefwaya intanshi ubufumu no bulungami [bwa kwa Lesa], na fyonse ifi fimbi fikalundwako kuli imwe.” (Mateo 6:25, 33, 34) Umutumwa Petro atukonkomesha ‘ukupoosa amasakamikwa yesu yonse pali Lesa, pantu asakamana ifwe.’ (1 Petro 5:6, 7) Cisuma ukubombesha pa kuti twingapwisha ubwafya. Lelo, nga twaesha ukufika apo twingapesha, ukusakamikwa takwingatwafwa nangu panono, kano ukupepela pali ubo bwafya e kwingatwafwa. Kemba wa malumbo atile: “Konkomwena pali Yehova inshila yobe, kabili mutetekele, na o akacita.”—Amalumbo 37:5.

16, 17. (a) Mulandu nshi tushikalilapo fye ukwabula amasakamika? (b) Tukanonkelamo shani nga twakonka ifyalembwa pa Abena Filipi 4:6, 7?

¹⁶ Paulo alembele ukuti: “Mwisakamikwa nangu kamo, lelo muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Abena Filipi 4:6, 7) Ukulanda fye icishinka, bamwana Adamu abashapwililika te kuti bekale fye ukwabula amasakamika. (Abena Roma 5:12) Abakashi ba kwa Esau abena Hiti “bali akalusha buci” kuli Isaki na Rebeka, abafyashi ba kwa Esau abaletiina Lesa. (Ukutendeka 26:34, 35) Nalimo Abena Kristu pamo nga Timote na Trofimu nabo balesakamikwa umulandu no kulwalilila. (1 Timote 5:23; 2 Timote 4:20) Paulo alesakamikwa pa mulandu wa Bena Kristu banankwe. (2 Abena Korinti 11:28) Lelo ‘uumfwa ukupepa’ alafwa abamutemwa.—Amalumbo 65:2.

¹⁷ Ilyo tulelolela ubushiku bwa kwa Yehova, “Lesa wa mutende” alatutungilila no kutusansamusha. (Abena Filipi 4:9) Yehova ni “Lesa wa nkumbu kabili uusenamina,” ‘musuma kabili alalekelela,’ kabili ‘ebukisho kuti tuli lukungu.’ (Ukufuma 34:6; Amalumbo 86:5; 103:13, 14) E ico, natuleleka ‘ifya kulomba fyesu fishibikwe kuli ena,’ pantu nga twacite fyo tukaba no “mutende wa kwa Lesa,” e kuti umutende uo fwe bantu tushingakwata pa lwesu.

18. Ukulingana na Yobo 42:5, bushe kuti ‘twamona’ shani Lesa?

¹⁸ Amapepo yesu nga yayasukwa, tuleshiba ukuti Lesa ali na ifwe. Ilyo Yobo ashipikishe amesho apitilemo atile: “Ku kuumfwa kwa kutwi nalimuumfwile [mwe Yehova], lelo nomba amenso yandi yamumona.” (Yobo 42:5) Nga twaishiba Icebo ca kwa Lesa tukalatontonkanya pa fyo Lesa atusakamana kabili kuti ‘twamumona,’ e kuti tukaba ne citetekelo cakosa kabili tukalatasha pa fyo atutungilila. Ala ukwishiba ifyo kulatulenga ukuba no mutende nga nshi!

19. Cinshi cingacitika nga ‘twapoosa amasakamika yesu yonse pali Yehova’?

¹⁹ Nga ‘twapoosa amasakamika yesu yonse pali Yehova,’ kuti twashipikisha amesho kabili kuti twaba no mutende uwingatulenga ukukanasakamikwa sana. Tukaba no mutende mu mutima wesu uwa mampalanya ica kuti tatwakalesakamikwa sana.

20, 21. (a) Ifyo Stefani apitilemo filanga shani ukutila kuti twaba no mutende na lintu tulepakaswa? (b) Landeni pa fyacitike muno nshiku ifilelanda pa babomfi ba kwa Lesa abasakamikwe ilyo baleshipikisha amesho.

²⁰ Stefani ali no mutende ilyo aleshipikisha ubwesho ubwabipisha. Ilyo ashilashimikila umuku wa kulekeleshako, bonse abali mu Sanhedrini “bamwene icinso cakwe cali kwati cinso ca kwa malaika.” (Imilimo 6:15) Umutende walemoneka pa cinso cakwe, alemoneka kwati ni malaika, inkombe ya kwa Lesa. Ilyo Stefani  asosele ukuti balikuminweko ku mfwa ya kwa Yesu, abapingushi “balikalifiwe imitima, balamusumanisha na meno.” Apo Stefani ‘aliswilemo umupashi wa mushilo,’ “atontele amenso mu muulu no kumona ubukata bwa kwa Lesa no bwa kwa Yesu naiminina ku kwa kulyo kwa kwa Lesa.” Ici cimonwa calikoseshe Stefani ica kuti ali ne cishinka kuli Lesa ukufika na ku mfwa. (Imilimo 7:52-60) Nangu cingati tatumone fimonwa, Lesa kuti atupeela umutende ilyo baletucusha pa mulandu wa kuba Abena Kristu.

²¹ Umfweni amashiwi ya Bena Kristu bamo abo baipeye ku baNazi ilyo kwali Inkondo ya Calo iya bubili. Ilyo alelondolola ifyacitike ilyo ali mu cilye, Umwina Kristu umo atile: “Ilyo bapingwile ukuti nalingile ukufwa, nalandile mu mutima nati, ‘Ube ne citetekelo mpaka ne mfwa,’ e lyo na mashiwi yambi ayasosele Shikulu. . . . Lelo mwisakamana pantu ine nshisakamikwe nangu panono!” Umwina Kristu wacaice uo bali no kuputulako umutwe alembele abafyashi bakwe ukuti: “Kale kale nacicila pa kati ka bushiku. Ninkwata inshita ya kuti ntontonkanyepo. Nomba te kuti mbe ne nsansa na kabili nga nakaana Shikulu! Ndemwishibisha ukuti nangu nalafwa, ndi ne nsansa kabili nshisakamikwe.” Tatuletwishika ukuti Yehova alatungilila aba cishinka kuli wena.

Na Imwe Kuti Mwashipikisha!

22, 23. Finshi ifyo mufwile ukwenekela nga muleshipikisha ilyo mulelolela ubushiku bwa kwa Yehova?

²² Nalimo te kuti mube na mafya nga aya twalandapo. Lelo, Yobo uwaletiina Lesa alilungike ilyo atile: “Umuntu uwafyalwa ku mwanakashi wa nshiku shinono, kabili uwaisulamo ukutenkana.” (Yobo 14:1) Nalimo muli bafyashi abalebombesha ukukusha abana benu ukulingana na mafunde ya mu Baibolo. Abana benu bakapita mu mesho pa sukulu ayo balingile ukushipikisha. Kabili ukwabula no kutwishika mulaba ne nsansa nga nshi nga balekonka ifishinte fyalungama ifya kwa Yehova! Na imwe bene limbi mulatunkwa nelyo ukupita mu mafya ilyo muli pa ncito. Na lyo line, kuti mwashipikisha fyonse ifi pantu Yehova ‘alasenda’ icisendo cenu.—Amalumbo 68:19.

²³ Nalimo kuti muleimona kwati tapali ico muli, lelo mwilaba ukuti Yehova takalabe imilimo yenu no kutemwa uko mulanga kwi shina lyakwe. (AbaHebere 6:10) Nga mwashintilila pali ena, mwakulashipikisha amesho. E ico, mwilalaba ipepo no kucita ukufwaya kwa kwa Lesa muli fyonse ifyo mulecita. Nga mulecita ifi, ninshi Lesa akulamupaala no kumutungilila kabili mwakulashipikisha ilyo mulelolela ubushiku bwa kwa Yehova.

Bushe Kuti Mwayasuka Shani?

• Mulandu nshi Abena Kristu balingile ukulashipikishisha?

• Finshi fingatwafwa ukushipikisha ilyo tulelwalilila nangu lintu twafwilwa?

• Bushe ipepo litwafwa shani ukushipikisha amesho?

• Mulandu nshi twingalandila ukutila kuti twashipikisha ilyo tulelolela ubushiku bwa kwa Yehova?

[Amepusho]

[Icikope pe bula 29]

Ukushintilila pali Yehova kulatwafwa ukushipikisha ilyo twafwilwa

[Icikope pe bula 31]

Ipepo lilatwafwa ukushipikisha amesho