Umulandu Ukuiceefya Kwayafisha

ABENGI bamona kwati muli cino calo umuntu tafwile ukuiceefya. Abacita icili conse pa kuti fye bacile bambi, aba cilumba kabili abafwaya ukulacita fye ifyo balefwaya, e batungulula abanabo, kabili e bamoneka abacindama. Abantu abengi muno calo bakumbwa imikalile ya bakankaala na balumbuka, tabakumbwa abaiceefya na balanda. Balya abacindama mu mikalile balaitakisha ukuti icalenga bacindame mulandu wa kutila balabombesha. Mu nshita ya kuti baiceefye, balaitakisha icine cine ukuti abene e balenga ukuti bacindame.

Umwina Canada umo uufwailisha ifishinka alandile ukuti mu calo ekala, “muli ubwafya bwa kuitemwa ne cilumba.” Bambi nabo balimona ukutila abantu mu calo babika sana amano ku kwangala ukucila ukubomba imilimo yacindama kabili balimona no kuti abengi batemwa sana ukucita ifibasekesha, te fingasekesha bambi iyo. Kanshi ici e cilenga camoneka kwati ukuiceefya muli cino calo takwawama.

Kwena, banono abengatila abantu bambi tabafwile ukuiceefya, pantu abaiceefya tabayafya ukwikala nabo. Nomba muli cino calo umwaba sana ukucimfyanya, bamo balatiina ukuiceefya pantu bamona kwati kuti babatoola.

Icebo ca kwa Lesa Baibolo casobele ukuti shino nshiku, abantu bakaba “aba mataki, aba matutumuko.” (2 Timote 3:1, 2) Bushe tamulesumina ukuti filya Baibolo yasobele filecitika? Bushe kuti mwatila ukuiceefya kwalicindama? Nangu bushe kuti mwatila umuntu nga aliiceefya ninshi kuti bamushukila no kulamulila amasuku pa mutwe?

Baibolo yena ilatweba umulandu ukuiceefya kwacindamina, ne co tufwile ukuiceefesha. Ilatweba ukuti ukuiceefya kusuma no kutila abantu balingile ukulaiceefya. Ilanda no kuti umuntu nga aliiceefya te kutila ni ca mwenso iyo, ninshi alishipa. Icipande cikonkelepo calalondolola umulandu cabela ifi.

[Icikope pe bula 3]

Bushe tulingile ukuimona shani nga twacita fimo ifyacindama?