Amepusho Ukufuma ku Babelenga

Bushe caliba fye bwino Inte ya kwa Yehova ukusangwa ku bwinga bwa kwa lupwa nelyo ubwa kwa cibusa uushili Nte?

Inshita ya bwinga ni nshita ya kusangalala, kabili no Mwina Kristu kuti atemwa ukusangwako. Kwena, abaice abo betile ku bwinga bafwile ukumfwila ifyo abafyashi babo nelyo ababasunga balanda, pantu e bakwata amaka pali bena. (Abena Efese 6:1-3) Bushe Umwina Kristu uwaupwa ku mwaume uushili Nte, kuti acita shani nga ca kutila umulume amweba ukuya nankwe ku bwinga ubukabela mu calici? Nalimo kampingu yakwe kuti yamusuminisha ukuyasangwako no kulatambako fye ifilecitika ukwabula ukucitako ifili fyonse ifya mapepo.

Kwena cila muntu kuti apingulapo nga alefwaya ukusangwa ku bwinga nelyo iyo. Nangu cibe fyo, Umwina Kristu umo umo afwile ukulaibukisha ukuti akalubulula kuli Yehova kabili alingile ukutontonkanya pa fishinte fya mu Baibolo ilyo alepingulapo nga akayasangwako nelyo iyo.

Icacindama nga nshi ico Umwina Kristu afwile ukutontonkanyapo sana ni bucibusa bwakwe na Lesa. Yesu atile: “Lesa Mupashi, na bamupepa bali no kupepela mu mupashi na mu cine.” (Yohane 4:24) Kanshi Inte sha kwa Yehova tabapepela pamo na macalici yambi kabili tabacitako ifintu ifyo Baibolo yalesha.—2 Abena Korinti 6:14-17.

Umwina Kristu alishiba ukuti ifyo apingulapo ukucita filakuma na bantu bambi. Nga mwapingulapo ukusangwako e lyo mwakaana ukucitako ifyo bonse balecita, bushe balupwa lwenu bakafulwa? Kabili mufwile ukutontonkanya na pa fyo Abena Kristu banenu bakomfwa. (Abena Roma 14:13) Nangu cingati imwe nelyo aba mu ng’anda yenu mwapingula ukuti cili fye bwino ukuyasangwa ku bwinga bwa ushili Nte, bushe bamunyina na bankashi mu cilonganino bena bakomfwa shani? Bushe bamo bakaipununa?

Ubwinga bwa kwa lupwa uushili Nte kuti bwaletako amesho. Nga ca kuti bamweba ukuba inshindishi pa bwinga bwa ushili Nte, kuti mwacita shani? Nelyo tutile abena mwenu te baNte, lelo balefwaya ukuti bakasangwe kuli fyonse fye ifikalacitika, bushe kuti mwacita shani? Nga ca kuti abaleupana bakayaupanina ku maofeshi ya buteko, ilingi line takuba ifingi ificitika, balapa fye imilapo no kusaina epela.

Lelo kwaliba ifingi ifyo Umwina Kristu alingile ukutontonkanyapo nga ca kuti ubwinga bukabela mu calici nelyo uukofya abaleupana ni shimapepo. Nalimo kuti apingulapo ukukanayako nga ca kutila alefwaya ukumfwila kampingu yakwe iyasambilishiwa na Baibolo no kukanacita ifintu ifipusene ne fyo asuminamo. Nelyo kuti akaana ukuyako nga talefwaya ukuyacita fimo ifingakalifya abene ba bwinga. (Amapinda 22:3) Amafya ya musango yu teti yabeko nga ca kuti mu kubangilila fye mwalanda ifyo mwasuminamo, ne fyo mwingacitako nelyo ifyo mwingafwaya cibe nga kwaba ubwinga bwa ushili Nte.

Pa numa ya kutontonkanya sana pali fyonse ifyabimbwamo, nalimo Abena Kristu bamo kuti bapingulapo ukutila kuti caba fye bwino ukusangwa ku bwinga lelo ukwabula ukucitako ifya mapepo ifili fyonse. Lelo Umwina Kristu nga amona ukuti ifikacitika ku calici kuti fyamuletelela, kuti asondwelela ukutila nga ayako nalimo kuti apula mu mafunde ya kwa Lesa. Nga asalapo ukukanaya ku calici, lelo apingulapo ukuyasangwa ku kusefya ukubako pa numa ya bwinga, afwile ‘ukucita ifintu fyonse ku kucindika Lesa.’ (1 Abena Korinti 10:31) Pa kupingula pa fintu fya musango yu, “umo na umo ali no kusenda icipe cakwe umwine.” (Abena Galatia 6:5) E ico, conse ico mwingapingulapo ukucita, nampo nga kuya nelyo ukukanayako, muleibukisha ukuti icacindama sana kukwata kampingu musuma kuli Yehova Lesa.