Ifyo Twingafwaisha Ukwishiba mwi Buuku lya kwa Nahumu, Ilya kwa Habakuki, ne lya kwa Sefania
Icebo ca kwa Yehova ca Mweo
Ifyo Twingafwaisha Ukwishiba mwi Buuku lya kwa Nahumu, Ilya kwa Habakuki, ne lya kwa Sefania
ABENA Ashuri balyonaula kale Samaria, umusumba ukalamba uwa bufumu bwa mikowa 10 ubwa Israele. Pali iyi nshita icalo ca Ashuri e cakwatisha amaka. Kabili napapita inshita iitali sana ukutula apo abena Ashuri batendekela ukutiinya ubufumu bwa Yuda. Kasesema Nahumu uwikala mu Yuda ali ne fyebo fya kusobela pali Ninebe, umusumba ukalamba uwa bena Ashuri. Ibuuku lya mu Baibolo ilya kwa Nahumu lyalembelwe ilyo umwaka wa 632 B.C.E. uushilafika, kabili muli ili buuku mwaba ifyebo filanda pa fyali no kucitikila umusumba wa Ninebe.
Ilyo Ashuri yawile, icalo caishilekwata sana maka calo ca Babiloni, icaletekwa limo limo ne mfumu sha bena Kaldi. Ibuuku lya kwa Habakuki, ilyo Habakuki apwile ukulemba nalimo mu 628 B.C.E., lisobela ifyo Yehova ali no kubomfya abena Babiloni pa kukanda ifyalo fimbi ne fyali no kucitikila abena Babiloni bene.
Sefania ena ali kasesema mu Yuda ilyo Nahumu na Habakuki bashilaba bakasesema. Ali kasesema imyaka ukucila pali 40 ilyo Yerusalemu bashilayonaula mu 607 B.C.E., kabili asobele ubukombe bwa bulanda no bwe subilo ku ba mu Yuda. Mwi buuku lya kwa Sefania mwaliba no bukombe ubo Sefania asobele pa nko shimbi.
“WALISHAMA WE MUSUMBA UUSUMYA UMULOPA”
“Icisendo ca Ninebe” cafuma kuli Yehova Lesa ‘uukokola ukukalipa, kabili umukulu ku maka.’ Nangu cingati Yehova aba uwa “kushinako mu bushiku bwa kumanama” ku bantu abafwaya ukuuba muli ena, umusumba wa Ninebe wena akaonaula.—Nahumu 1:1, 3, 7.
“Yehova [akabwesho] kupulama kwa kwa Yakobo.” Lelo, abena Ashuri batiinya icalo ca bantu ba kwa Lesa kwati ni ‘nkalamo iletaakanya.’ Yehova ‘akoca maceleta [ya bena Ninebe] mu cushi, no lupanga lukalye misepela yabo [iya nkalamo, NW].’ (Nahumu 2:2, 12, 13) “Walishama we musumba uusumya umulopa” uwa Ninebe. ‘Bonse abakomfwa umulandu [ulwa uyu musumba] bakatoota indupi’ no kusekelela.—Nahumu 3:1, 19, Diocese of Mbala.
Amasuko ku Mepusho ya mu Baibolo:
1:9—Bushe “ukupwishishisha” ukonaula umusumba wa Ninebe kwali no kulenga aba mu Yuda ukumfwa shani? Aba mu Yuda tabali na kulatiina abena Ashuri na kabili; ubulanda tabwali na kwima “umuku uwalenga ibili.” Nahumu alesosa kwati umusumba wa Ninebe tawabako na kuba lintu alembele ukuti: “Moneni, pa mpili e pali amakasa ya ulebile mbila nsuma, uulengo kuumfwe fya mutende! Tebeto mutebeto obe we lambo, we Yuda.”—Nahumu 1:15.
2:6—Ni ‘mpongolo nshi isha ku mulonga’ ishaiswike? Ishiwi “impongolo” lyalelosha ku fipunda ifyo amenshi ya mu mumana wa Tigrisi yatulile mu cibumba ca musumba wa Ninebe. Mu 632 B.C.E. ilyo abena Babiloni na bena Madai baumene akapi no kuya mu kubalwisha, abena Ninebe tabaumfwile umwenso. Apo umusumba walicingililwe ne fibumba ifitali, balemona kwati takuli abengabengilila. Lelo ilyo imfula yalokele sana, umumana wa Tigrisi walipoosele. Uwalelemba ifyacitike kale Diodorus atile “incende imo mu musumba yalibundilwe kabili amenshi yawishishe ifibumba pa ncende fye iikalamba.” Ifi fine e fyo impongolo sha ku mulonga shaiswike, kabili nge fyo kasesema asobele, umusumba wa Ninebe baliucimfishe bwangu bwangu kwati ni filya umulilo oca impimbili ishauma sana.—Nahumu 1:8-10.
3:4—Bushe umusumba wa Ninebe wali shani kwati ni cilende? Abena Ninebe balelaya ifyalo fimbi ukuti bali no kuumana akapi no kulayafwana lelo baleyalukila abanabo no kutampa ukubatitikisha. Ica kumwenako fye, abena Ashuri balyafwilishe Imfumu Ahasi iya mu Yudea lintu abena Suria na bena Israele baumene akapi. Lelo, mu kuya kwa nshita ‘imfumu ya Ashuri yaishile kuli [Ahasi], kabili yalimucushishe.’—2 Imilandu 28:20.
Ifyo Twingasambililako:
1:2-6. Yehova alikandile abalwani bakwe abalekaana ukupepa ena eka fye. Ici cilanga ukuti Yehova afwaya abamupepa ukulapepa fye wena eka.—Ukufuma 20:5.
1:10. Ifibumba ifikalamba nga nshi ifyakwete impungu ishingi tafyacilikile ifyo Yehova asosele pali Ninebe ukufikilishiwa. Abalwani ba babomfi ba kwa Yehova aba muno nshiku tabakabelame pa bushiku bwa bupingushi ubwa kwa Yehova.—Amapinda 2:22; Daniele 2:44.
‘UWALUNGAMA AKABA UWA MWEO’
Mu fipandwa fibili ifya kubalilapo mwi buuku lya kwa Habakuki Yehova Lesa alelanshanya na kasesema. Apo Habakuki aumfwa ububi pa filecitika, aipusha Lesa ukuti: “Cinshi ico munengelo kumona buncitatubi? Cinshi ico munengelo kulolesho kucululusha?” Yehova ayasuka ukuti: “Ndeimya abena Kaldi, uluko ulwakalipa kabili ulwaangufyanya.” Kasesema apapa ukuti Lesa akabomfya “abafutika” pa kukanda Yuda. (Habakuki 1:3, 6, 13) Habakuki bamulaya ukuti abalungama bakaba no mweo, lelo abalwani bena bakakandwa. E lyo Habakuki alemba no tulanda tusano utukaponena abalwani abena Kaldi.—Habakuki 2:4.
Mwi pepo apepa ukuti bamubelele uluse, Habakuki aimba inyimbo sha bulanda umo apendawila ifya maka ifyo Lesa acitile kale pali Bemba Wakashika, mu matololo, na pa Yeriko. Kasesema asobela na pa fyo Yehova akabomfya amaka pa konaula abalwani pa Armagedone. Alekelesha ipepo lyakwe na ya mashiwi yatila: “Yehova, Shikulu, e bulamba bwandi, kabili acita amakasa yandi nga ya nsebula nkota, na pa misansama yandi e po anengo kunyanta.”—Habakuki 3:1, 19.
Amasuko ku Mepusho ya mu Baibolo:
1:5, 6—Mulandu nshi abaYuda bafililwe ukusumina ukuti Yehova ali no kubomfya abena Kaldi ukonaula Yerusalemu? Ilyo Habakuki aishileba kasesema, abena Egupti e bakwete amaka pali Yuda. (2 Ishamfumu 23:29, 30, 34) Nangu cingati abena Babiloni baleyabalekwata amaka, pali ilya nshita ninshi tabalacimfya Farao Neko. (Yeremia 46:2) Na kabili, itempele lya kwa Yehova lyali mu Yerusalemu, e lyo ishamfumu sha mu lupwa lwa kwa Davidi e mo shaleikala kabili shaleteka ukwabula aba kushilwisha. Pali ilya nshita, abaYuda balemona kwati “umulimo” wa kwa Lesa uwa kusuminisha abena Kaldi ukonaula Yerusalemu te kuti ucitike. Nomba nangu cingati abaYuda baletwishika ifyo Habakuki asosele, icimonwa calelanda pa fyo abena Babiloni bali no konaula Yerusalemu califikilishiwe mu 607 B.C.E.—Habakuki 2:3.
2:5—Bushe “umwaume” ni nani, kabili mulandu nshi ‘ashakafikile pa co afwaya’ (NW)? Apo abena Babiloni balebomfya imicenjelo iyalekanalekana pa kucimfya ifyalo, bali kwati “mwaume.” Ukucimfya kwalengele babe kwati muntu uukolelwe umwangashi. Lelo, tabali na kuilonganikila ifyalo fyonse pantu Yehova ali no kulenga abena Madai na bena Persia ukubacimfya. Muno nshiku, ifyalo fyakwatisha amaka e fyaba kwati “mwaume.” Apo fyaliicetekela, fya mataki, kabili lyonse fifwaya fye ukulatungulula ifyalo fimbi, fyaba kwati fyalikolwa umwangashi. Lelo tafyakacite ico fifwaya, e kuti ‘ukuilonganikila inko shonse.’ Bufumu fye bwa kwa Lesa e bukalenga abantu ukwikatana.—Mateo 6:9, 10.
Ifyo Twingasambililako:
1:1-4; 1:12–2:1. Habakuki alipwishe amepusho ayamusakamike, kabili Yehova alimwaswike. Lesa wa cine alakutika ku mapepo ya babomfi bakwe aba cishinka.
2:1. Tufwile ukuba abacincila lyonse mu mulimo wa kwa Yehova nga filya Habakuki ali. Na kabili tufwile ukumfwa no kwaluka ilyo batukalipila nelyo ukutulungika.
2:3; 3:16. Ilyo tulelolela ubushiku bwa kwa Yehova ukwisa, tuleibukisha ukuti buli mupepi nga nshi.
2:4. Tukabila ukushipikisha pa kuti tukapusuke ubushiku bwa bupingushi ubwa kwa Yehova.—AbaHebere 10:36-38.
2:6, 7, 9, 12, 15, 19. Ukwabula no kutwishika akalanda kakesa pa bantu abatemwa ubunonshi bwa bufumfuntungu, ulukaakala, abacita ubulalelale, nelyo abapepa utulubi. Tatufwile ukulacita ifintu fya musango yu.
2:11. Nga twafilwa ukusoka abantu pa bubifi bulecitika muli ici calo, “ilibwe lya mu cibumba likabilikisha.” Calicindama ukutwalilila ukulashimikila imbila nsuma ya Bufumu ukwabula umwenso!
3:6. Takwaba icingalesha Yehova ukonaula ababifi. Nangu fye tubungwe twa bantu uto twingapashanya ku mpili no tupili nato twine te kuti tumuleshe.
3:13. Twalishininkisha ukuti Yehova takonaule aba kaele pamo na babifi pa Armagedone, lelo akapususha ababomfi bakwe aba cishinka.
3:17-19. Nangu cingati kuti twapita mu mafya pali ino nshita na pa Armagedone, twalicetekela ukuti Yehova akatupeela “ubulamba” ilyo tuletwalilila ukumubombela ne nsansa.
“NABUPALAMA UBUSHIKU BWA KWA YEHOVA”
Ukupepa Baali nakuseeka sana mu Yuda. Yehova alandila muli kasesema Sefania ukuti: “Nkatambikilo kuboko kwandi pali Yuda, na pa bekashi ba mu Yerusalemu bonse.” Sefania asoka aba mu Yuda ukuti: “Nabupalama ubushiku bwa kwa Yehova.” (Sefania 1:4, 7, 14) Bantu fye abacita ifyo Lesa afwaya e ‘bakabelama’ muli bulya bushiku.—Sefania 2:3.
“Kalanda ku . . . musumba uucululusha” Yerusalemu! “Nindeni, cisemo ca kwa Yehova, lindeni ubushiku nkeminamo ku kulubulwisha; pantu kupanga kwandi ukulonganike nko . . . ku kupongolwela pali bene icipyu candi, icifukushi conse ca bukali bwandi.” Lelo, Lesa abalaya ukuti: “Nkamulengo kuba abalumbuka kabili ukutashiwa mu bantu na bantu bonse pano isonde, ilyo nkabwesha bunkole bwenu ku menso yenu.”—Sefania 3:1, 8, 20.
Amasuko ku Mepusho ya mu Baibolo:
3:9—Bushe “ululimi lwine lwine” e lwisa, kabili balulanda shani? Ululimi lwine lwine cine icaba mu Cebo ca kwa Lesa, Baibolo. Cisanshamo fyonse ifyo Baibolo isambilisha. Tulanda ululimi lwine lwine nga twasumina mu cine ca mu Baibolo, nga tulelungika ukusosa icine ilyo tulesambilisha bambi, na lintu tulecita ifintu ukulingana no kufwaya kwa kwa Lesa.
Ifyo Twingasambililako:
1:8. Abantu bamo mu nshiku sha kwa Sefania bafwile balefwala “ifya kufwala fimbi fimbi” pa kuti babatemwe ku bantu aba mu fyalo ifyo bapalamine na fyo. Ala kuti caba buwelewele ku bantu abapepa Yehova pali ino nshita ukulafwaya ukupalana na bantu aba muli cino calo!
1:12; 3:5, 16. Libili libili Yehova aletuma bakasesema ukusoka abantu bakwe pa fyo ali no kubapingula. Alebasoka lyonse nangu cingati abaYuda abengi balecita fye ifyo abene balefwaya kabili tabalebika amano ku fyo Lesa alebeba ukupitila muli bakasesema. Kanshi bali kwati fisekwa ifyakambatila pe samba lya mitondo iyo basungilamo umwangashi. E ico, ilyo ubushiku ubukalamba ubwa kwa Yehova bulepalamina, tatufwile ukuleka abantu abashibika amano ku mbila nsuma tushimikila ukulenga ‘amaboko yesu ukutompoka’ ica kuti twanenuka, lelo tufwile ukutwalilila ukushimikila imbila nsuma ya Bufumu ukwabula ukuleka.
2:3. Ni Yehova fye eka e wingatupususha mu bushiku bwa bukali bwakwe. Pa kuti Yehova atwalilile ukulatupaala, tufwile ‘ukulamufwaya’ ukupitila mu kusambilila Icebo cakwe, Baibolo; ukulapepa ukuti aletutungulula; no kutwalilila ukulapalama kuli ena. Tufwile ‘ukufwaya ubulungami,’ e kutila ukuba ne mibele iisuma. Kabili tulingile ‘ukufwaya ubufuke,’ icilepilibula ukuti tufwile ukuba abafuuka no kulanakila ku fyo Yehova aletweba.
2:4-15; 3:1-5. Ilyo Yehova akapingula cino calo, akonaula abantu ba mu Kristendomu na ba mu fyalo fyonse abacusha abantu bakwe kwati ni filya aonawile abaleikala mu Yerusalemu na mu fyalo ifyali mu bwina mupalamano. (Ukusokolola 16:14, 16; 18:4-8) Tufwile ukutwalilia ukushimikila ukwabula umwenso pa fyo Lesa akapingula cino calo.
3:8, 9. Ilyo tulelolela ubushiku bwa kwa Yehova, tufwile ukulasambilila ukulanda “ululimi lwine lwine” no ‘kulalilila kwi shina lyakwe’ ukupitila mu kuipeela kuli ena. Nga tulecita ifi, ninshi tuleipekanya ukwisapusuka ubushiku bwa kwa Yehova. Na kabili tulingile ukulabombela pamo na bantu ba kwa Yehova “no mutima umo” no kulapeela ifya bupe fya ‘malambo ya kumulumbanya.’—AbaHebere 13:15.
“Nabupalama no Kwangufyanisha”
Kemba wa malumbo atile: “Pashala panono, e lyo umubifi takabepo; awe ukalolekesha apo ali, no kusanga tabapo.” (Amalumbo 37:10) Nga twatontonkanya pa kusesema kwaba mwi buuku lya kwa Nahumu ukulanda pa musumba wa Ninebe na pa kusesema kwaba mwi buuku lya kwa Habakuki ukulanda pa musumba wa Babiloni na pa busangu bwali mu Yuda, tatutwishika ukuti ifyo kemba wa malumbo alandile fikacitika. Lelo, bushe tukalolela ukufika lilali?
Pali Sefania 1:14 patila: “Nabupalamo bushiku bukulu bwa kwa Yehova, nabupalama no kwangufyanisha.” Ibuuku lya kwa Sefania litweba ne fyo twingacita pa kubelama muli bulya bushiku ne fyo tufwile ukulacita pali ino nshita pa kuti tukapusuke. Kanshi cine cine, “icebo ca kwa Lesa ca mweo kabili ca maka.”—AbaHebere 4:12.
[Ifikope pe bula 8]
Ifibumba ifikalamba nga nshi ifyashingulwike umusumba wa Ninebe tafyacilikile ukusesema kwa kwa Nahumu ukufikilishiwa
[Abatusuminishe]
Randy Olson/National Geographic Image Collection