Amepusho Ukufuma ku Babelenga

Bushe Umwina Kristu afwile ukumona shani ukwipaya inama no kwipaya isabi?

Baibolo tayalesha ukwipaya inama no kwipaya isabi. (Amalango 14:4, 5, 9, 20; Mateo 17:27; Yohane 21:6) Na lyo line, Baibolo yalilandapo fimo ifyo Abena Kristu abepaya inama nelyo isabi bafwile ukutontonkanyapo.

Lesa alisuminishe Noa na bana bakwe ukwipaya inama no kulya, kulila fye bafumyamo umulopa mu nama. (Ukutendeka 9:3, 4) Ili funde lyalengele camoneka apabuuta ukuti umuntu alingile ukucindika umweo wa nama apo wafuma kuli Lesa. Kanshi Abena Kristu tabepaya inama ku musamwe fye, kabili tabashiipaya fye icipayeipaye.—Amapinda 12:10.

Cimbi na co ico tufwile ukutontonkanyapo, mulandu twatemenwa ukwipaye nama nelyo isabi. Abatumwa ba kwa Yesu abali abalondo bafwile baletemwa nga baipaya isabi ilingi. Lelo takwaba ifitulanga ukutila baleyumfwa ukuti e baishiba ubulondo atemwa ukwipaya inama. Kabili tabalecimfyanya na banabo pa kutila bamone umwaume wine wine uwaishiba sana ifya kusanga isabi nelyo inama e lyo ne fya kwipaya.—Amalumbo 11:5; Abena Galatia 5:26.

Kanshi kuti cawama ukuyipusha ukuti: ‘Bushe nalicindika ubumi nge fyo Yehova umwine abucindika? Bushe naikalila fye ukulanda no kutontonkanya pa kulunga inama atemwa pa kwipaya isabi? Bushe ifyo ncita filanga ukuti nabika sana amano ku kwipaya isabi nelyo inama, nangu bushe filanga ukuti ndi mubomfi wa kwa Lesa? Bushe ukuya mu kwipaya inama nelyo isabi kulalenga ndeampana sana na bashasumina atemwa no kulekelesha fye ulupwa lwandi?’—Luka 6:45.

Bamo abepaya inama e lyo na bepaya isabi bamona kwati tacabipa ukulekelesha imilimo ya Bwina Kristu pali ilya nshita baya mu kwipaya isabi nelyo inama. Lelo tulanga ukuti twalicetekela sana Lesa nga tatubikile amano ku fingalenga twalekelesha imilimo yakwe. (Mateo 6:33) Na kabili, Abena Kristu balomfwila amafunde yonse aya kwa “Kaisare” ayakuma ukwipaya inama nelyo isabi, nangu ca kuti limbi uko bekalila no buteko bwine tabwikata abatoba ayo mafunde.—Mateo 22:21; Abena Roma 13:1.

Bamo nakalimo bafwile ukwalula ukutontonkanya kwabo pa kuti baleumfwila amafunde ya kwa Yehova ayalanda pa kwipaya inama nelyo isabi. (Abena Efese 4:22-24) Tufwile no kucindika ifyo bambi basalapo ukucita ukulingana na kampingu yabo. Kabili tufwile ukwibukisha ukufunda kwa mutumwa Paulo ukwa kuti: “Twilapingulana kabili, lelo ici e co mupingule, ica kukanabikila munyinenwe ica kupunwisha nangu ica kuipuntulako.” (Abena Roma 14:13) Nga tulecite fi, tulalanga ukuti twalitemwa abantu no mutima onse no kuti twalibacindika. Ici, cilenga mu cilonganino mwaba umutende, kabili Lesa Kabumba wesu, intulo ya mweo, alatemwa.—1 Abena Korinti 8:13. *

[Futunoti]