Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Moneni nga kuti mwa-asuka amepusho yakonkapo:

• Mulandu nshi cacindamina ukutwalilila aba kaele ukulingana no Bwina Kristu?

Ukutwalilila aba kaele kulenga tulange ukuti tunakila ukuteka kwa kwa Yehova pa mulandu wa kuti twalimutemwa kabili tushinina Satana ukuti wa bufi. Na kabili, pali bukaele bwesu e po Lesa akatupingwila, e kutila, bukaele bulafwaikwa pa kuti tube subilo lya kupusuka.—12/15, amabula 4-6.

• Malumbo nshi yamo ayalanga umulimo Yesu akwata mu kufwaya kwa kwa Lesa?

Umwana uwafyalwa eka. Cebo. Ameni. Kawikishanya wa cipangano cipya. Shimapepo Mukalamba. Umwana Uwalaiwe.—12/15, ibula 15.

• Mulandu nshi Eliya aebele umubomfi wakwe ukulolesha lwa kuli bemba ilyo ena alepepela ukuti imfula iloke? (1 Isha. 18:43-45)

Eliya alangile ukuti alishibe ifyo amenshi yashinguluka. Amakumbi yapangilwe pa muulu wa bemba yali no kusendwa ukuya ku mulundu no kulosha imfula.—1/1, amabula 15-16.

• Bushe kuti twacita shani pa kuti tulesekelela sana ilyo tulebomba umulimo wa kushimikila?

Tufwile ukuteyanya imitima yesu, ukulatontonkanya sana pa fyo twingafwa bambi. Ilyo tuleshimikila, tufwile ukwiminina pa kutampa amasambililo ya Baibolo. Nga ca kuti abantu tabalebikako amano, kuti twa-alula ifya kulanda no kulalanda pa fyo aba mu cifulo tubombela bengafwaya ukumfwa.—1/15, amabula 8-10.

• Bushe ifibashi balandapo mu Baibolo e ubu bwine bulwele bwabako na lelo?

Akashishi akaleta ifibashi eko kali mu nshita sha mu Baibolo. (Lebi 13:4, 5) Baibolo ilanda na pa fibashi ifyalemoneka ku fya kufwala na mu mayanda. Filya “fibashi” nalimo ni filya twingatila ukufufuma. (Lebi 13:47-52)—2/1, ibula 19.

• Bushe ifyo Baibolo isambilisha fifwile ukulenga Umwina Kristu ukumona shani icililo ne ntambi sha pa cililo?

Nangu ca kuti Umwina Kristu kuti aloosha uwafwa, aleshiba ukuti abafwa bantu abashaishiba nangu kamo. Tacitako intambi ishilenga cilemoneka kwati abafwa kuti bacita ifingakuma aba mweo, te mulandu ne fyo abashipepa bengamumona. Abena Kristu bamo balalemba ifyo balefwaya icililo cabo cikabe, pa kuti kwikaba amafya ya ntambi.—2/15, amabula 29-31.

• Ukulingana ne lembo lya Amalumbo 1:1, fintu nshi fitatu tufwile ukutalukako nga tulefwaya ukuba abapaalwa?

Ici cikomo calilandapo pa “amano yapanda ababifi,” “inshila ya babembu,” e lyo na “apekala abapumya.” Nga tulefwaya ukupaalwa, tufwile ukutaluka ku bapumya nangu abasuula amafunde ya kwa Lesa. Lelo, tufwile ukusekelela mu mafunde ya kwa Yehova.—3/1, ibula 17.

• Bushe “ibuuku lya kwa Yashari” ne “buuku lya Nkondo sha kwa Yehova” mabuuku ya mu Baibolo ayaluba fye? (Yosh. 10:13; Impe. 21:14)

Iyo. Cimoneka kwati mabuuku yalembelwe ayashali ya mushilo ayaliko mu nshita sha mu Baibolo kabili bakalemba ba Baibolo bamo balemonamo fimo ilyo balelemba.—3/1, ibula 32.

• Cintu nshi icikalamba ico ba-alula muli Baibolo ya nomba line iya ciLatin?

Mu 1979, Papa John Paul II alisuminishe ukuti kube Baibolo ipya mu ciLatin iyaleitwa ati Nova Vulgata. Mu ya ntanshi ishina lya kwa Lesa, Iahveh, e mo lyali mumo mumo. (Ukufu. 3:15; 6:3) Lelo, umuku wa bubili baifumishe mu 1986, palya apali Iahveh bapyanikepo ishiwi lya kuti Dominus [Shikulu].—4/1, ibula 22.