Basanga Icuma Cafiswa

BUSHE mwalibala amusangapo icuma ico bafisa apo mushile-enekela ukucisanga? Ici e cacitike pa March 27 mu 2005, kuli ba Ivo Laud ababa mu lukuta lwa Nte sha kwa Yehova mu calo ca Estonia. Ba Ivo baleafwa ba Nte banabo abakote ba Alma Vardja, ukubongolola akayanda ka kale umo balesungila ifintu. Ilyo babongolwele icibumba ca ku nse, bamwene ipulanga ilyo bafimbile ku lubali lumo ulwa luceshi. Ilyo bafumisheko ili ipulanga, bamwene icipunda mu luceshi icali amasentimita 10 mu bwipi, amamita 1.2 mu butali e lyo ukwingila mu kati amasentimita 10, e lyo pali ne pulanga bakupikepo ilyalingene fye ne cipunda. (1) Muli ici cipunda balifishilemo icuma! Cuma nshi? Nani afishilemo?

Muli ici cipunda mwali utufulukutu utwingi uto bapombele bwino bwino mu cipepala catikama. (2) Muli utu  tufulukutu bapombelemo impapulo sha Nte sha kwa Yehova, maka maka Ulupungu lulya babomfya ukusambililamo nga bali pamo. Pa mpungu basangilemo pali ne sha mu 1947. (3) Ishi mpapulo shalembelwe fye ku minwe busaka busaka mu lulimi lwa bena Estonia. Mu fifulukutu fimo mwali ifyabafwile ukwishiba uwafishile ishi mpapulo. Ne fi, fyalelanga ifyo ba Villem Vardja, abalume ba ba Alma balebalubulwisha. Fimbi ifyo basangile ifyalembelwemo, myaka baikele mu cifungo ilyo babakakile. Cinshi babakakiile?

Ba Villem Vardja bali babomfi balebombela mu cilonganino ca Nte sha kwa Yehova mu Tartu e lyo pa numa, bayambile ukubombela mu Cilonganino ca Otepää mu Estonia, icalo caletekwa na ba Soviet Socialist Republic. Bafwile basambilile icine ca mu Baibolo ninshi inkondo ya calo conse iya bubili tailatendeka. Ilyo papitile imyaka iinono, pa December 24 mu 1948, Munyinefwe Vardja balimwikete ku ba mu buteko pa mulandu wa milimo ya kwa Lesa iyo alebomba. Balimulubulwishe no kumucusha kuli bakapokola ilyo balemupatikisha ukuti abebe amashina ya ba Nte banankwe. Pa numa ya kumukaanya ukulubulula mu cilye ca milandu pa kuti ailandile, bamukakile imyaka 10 mu fifungo fya ku Russia.

Ba Villem Vardja batwalilile fye ukuba aba cishinka kuli Yehova mpaka imfwa yabo pa March 6 mu 1990. Abakashi babo tabaishibe nangu panono ulwa ishi mpapulo. Ba Villem bafwile balefwaya ukucingilila abakashi babo epali babalubulwisha. Cinshi bafishiile impapulo? Mulandu wa kuti bakapokola ba mu kabungwe ka Soviet State Security Committee, ba KGB libili libili balepikita mu mayanda ya Nte sha kwa Yehova ku kufwayamo impapulo shabo. Ukwabula no kutwishika, icalengele ukuti ba Vardja bafise ishi mpapulo, kufwaya ukusungila Abena Kristu banabo ifya kulya fya ku mupashi nga ca kuti bakapokola bapokele impapulo shonse. Ku kutampa kwa lusuba lwa mu 1990, kwali na kumbi uko basangile impapulo isho bafishile. Shimo bashisangile mu Tartu, ku kapinda ka ku kulyo aka calo ca Estonia. Ne shi shine ni ba Villem Vardja bashifishile.

Mulandu nshi ishi mpapulo shabela cuma? Ni co ishi mpapulo bafishile ishalembelwe fye ku minwe shilalanga bwino ifyo ba Nte bacindikiishe impapulo shilanda pa fya kwa Lesa isho bakwete pali ilya nshita. (Mat. 24:45) Bushe mwalicindikisha impapulo ishilanda pa fya kwa Lesa isho mupokelela uko mwikala? Pali ishi mpapulo paba no Ulupungu lwa kwa Kalinda ululembwa mu ciEstonian e lyo na mu ndimi shimbi ishacila pali 170.