Ifingamwafwa Ukushipikisha Abena Mwenu nga Bapondoka

BA MARGARITA na bena mwabo, ba Raúl, balibombele Yehova mu mulimo wa nshita yonse pa myaka iingi. * Lelo pa numa fye ya kukwata umwana wa kubalilapo, ba Raúl batendeke ukufuma kuli Yehova. Basukile batendeka bucende-ende kabili balitamfiwe na mu cilonganino ca Bwina Kristu. Ba Margarita batila: “Ilyo ifi fyonse fyalecitika, nalemona ati nalafwa. Calimponeshe pa musao, nshaishibe ne fya kucita.”

Ilyo ba Jane baupilwe, papitile fye inshita iinono abalume babo abo batemenwe sana no kucetekela batampile ukubapuma. Ba Jane batila: “Ilyo bangumine ikofi umuku wa kubalilapo, nalipapile sana, nalyumfwile insoni, no kumfwa ukuti bansaalula sana. Balilombele ubwelelo kabili caishileba fye cisela, baleti nga bampuma balomba ubwelelo. Nalemona kwati apo ndi Mwina Kristu mfwile fye ukubeleela no kulabako. Nalemona no kuti nga naebako bambi ubwafya tukwete, nangu fye ni baeluda mu cilonganino, ninshi nshili wa cishinka. Balitwalilile pa myaka iingi ukumpumaula, na ine nalebeleela fye. Pa myaka yonse iyi, naletontonkanya ukuti kuli fimo ifyo mfwile ukucita  pa kuti abalume bandi bakantemwe. Ilyo banshiile pamo no mwana wesu umwanakashi, namwene kwati nafililwe fye ukusunga icupo, nalimo ncitapo fimo nelyo ukulandapo na fimbi icupo nga tacapwile.”

Nga filya fine cali kuli ba Margarita na ba Jane, limbi na imwe mwaliba na masakamika, na mafya ya ndalama, kabili limbi bucibusa bwenu na Yehova tabwakosa pa mulandu wa kuti abalume benu balimupondokela. Nga mwalyupa e lyo abakashi benu bamupondokela, nalimo na imwe mwalikwata amasakamika na mafya. Ukwabula no kutwishika, nga filya fine Baibolo yalanda, twikala mu “nshita ishayafya nga nshi.” Uku kusesema kulanda ukuti mu “nshiku sha kulekelesha,” mu ndupwa ishingi mukaba amafya, pantu abantu tabakalelanga ukutemwa. Bamo bakalabepekesha fye ukuti balebombela Lesa. (2 Tim. 3:1-5) Abena Kristu ba cine nabo bene balakwata amafya ya musango yu; e ico cinshi cingamwafwa ukushipikisha nga bamupondokela?

Muleimona nga Filya Yehova Amumona

Pa kubala, kuti mwafilwa ukusumina ukuti uo mwatemwa kuti acita icamukalifya sana. Limbi kuti mwalamona no kuti ni mwe mulengele abena mwenu balecita imembu.

Mwilaba ukuti nangu fye ni Yesu balimufutwike ku muntu uo acetekele no kutemwa. Yesu pa kusala ifibusa fyakwe, e kutila abatumwa, alibalile apepa no kutontonkanyapo sana. Pali iyo nshita bonse 12 bali babomfi ba kwa Yehova abacetekelwa. Kanshi, Yesu afwile alyumfwile ubulanda sana ilyo Yuda ‘amufutwike.’ (Luka 6:12-16) Lelo Yehova tapeele Yesu umulandu pa fyo Yuda acitile.

Takwaba nangu umo pa bopana uwapwililika. Bonse babili, umulume no mukashi, balacita ifilubo. Ilyo kemba wa malumbo apuutilwemo no mupashi alandile icishinka ca kuti: “Imembu nga e sho mulolekesha, mwe Jah, mwe Yehova, nani uwingeminina?” (Amalu. 130:3) Nga filya Yehova eleela, abaupana bafwile ukulaesha na maka ukulaelela imembu sha bena mwabo.—1 Pet. 4:8.

Lelo, “ifwe bonse umo umo tukalubulula kuli Lesa.” (Rom. 14:12) Nga ca kuti umulume nangu umukashi atemwa ukulanda ifya musaalula nelyo ukucita ifyabipa, uyo wine e ukalubulula kuli Yehova. Yehova alipata ulukaakala no musaalula, kanshi takuli umulandu nangu umo uwingalenga abaupana ukuba abankalwe ku bena mwabo no kubasaalula. (Amalu. 11:5; Efes. 5:33; Kol. 3:6-8) Na kuba, Umwina Kristu nga aletwalilila ukuba no lubuli ukwabula ukulapila, afwile ukutamfiwa mu cilonganino. (Gal. 5:19-21; 2 Yoh. 9, 10) Umulume nangu umukashi talingile ukumfwa ububi pa kweba baeluda pa fyabipa ifilecita umwina mwakwe. Na kuba, Yehova alomfwila abakwata amafya ya musango yu ubulanda.

Umulume nangu umukashi nga acita ubucende, tabembukila fye umwina mwakwe uwa cishinka lelo alabembukila na Yehova. (Mat. 19:4-9; Heb. 13:4) Nga ca kuti uwa kaele ale-esha ukukonka ifishinte fyaba mu Baibolo, ninshi tafwile ukuipeela umulandu pa bucende bwa mwina mwakwe.

Muleibukisha ukuti Yehova alishiba ifyo mumfwa. Umwine ailondolola ukuti mulume wa luko lwa bena Israele, kabili mu Cebo cakwe mwaliba amalyashi aya bulanda ayalanda pa fyo Lesa alelunguluka mu mutima pa fyo ulu luko lushaleba ne cishinka pa kumupepa. (Esa. 54:5, 6; Yer. 3:1, 6-10) Nga ca kuti abena mwenu balimupondokela, ishibeni ukuti Yehova alishiba bwino ifyo camukalipa. (Mal. 2:13, 14) Alishiba ukuti mulakabila ukusansamushiwa no kukoseleshiwa.

Ifyo Yehova Asansamusha

Icilonganino ca Bwina Kristu caba pa fintu ifyo Yehova abomfya pa kutusansamusha. Emo ba Jane basangile icisansamushi. Ba Jane batila: “Kangalila wa muputule atandalile icilonganino pa nshita nali no bulanda sana. Alishibe ifyo nali no bulanda pa mulandu wa kuti abena mwandi batwele umulandu  ku cilye pa kuti tulekane. Kangalila wa muputule alingafwile ukutontonkanya pa malembo pamo nga 1 Abena Korinti 7:15. Aya malembo e lyo na mashiwi yakwe aya cikuuku yalengele ukuti ndeke ukulaumfwa uwa mulandu no kuleka ukusakamana.” *

Ba Margarita abo tulandilepo pa kubala, nabo baishileishiba ukuti Yehova alatwafwa ukupitila mu cilonganino ca Bwina Kristu. Ba Margarita batila: “Ilyo camoneke ukuti abalume bandi tabalelapila, nasendele abana no kukuukila kwi tauni limbi. Ilyo nafikile, nafwaile imiputule ibili iya kusonkela. Ubushiku bwakonkelepo, ilyo nalelongolola ifyali mu cola ninshi ndi no bulanda sana, naumfwile fye balekonkonsha ku ciibi. Naletila abene ba ng’anda abaleikala fye mupepi, e baisa. Nalipapile ukumona ukuti uwaishile ni nkashi uwaletungulula isambililo lya Baibolo kuli bamayo kabili e wayafwile ulupwa lwesu ukusambilila icine. Uyu nkashi taishibe ukuti ninkuukila pali iyi ng’anda, lelo aishile ku kumona umwine wa ng’anda pantu e o alesambilila nankwe Baibolo. Nalyumfwile bwino ica kuti nafililwe ukushipikisha. Nalimulondolwelele ubwafya nakwete, kabili bonse twatampile fye ukulila. Bwangu bwangu alipekenye pa kuti tusangwe ku kulongana bulya bwine bushiku. Bamunyinefwe mu cilonganino balitupokelele, kabili baeluda balipekenye inshila sha kungafwilamo pa kuti ine na bana tulekwata ifingatwafwa ukukosha bucibusa bwesu na Lesa.”

Ifyo Bambi Bengaafwa

Aba mu cilonganino ca Bwina Kristu kuti bayafwa mu nshila ishalekanalekana. Ku ca kumwenako fye, ilyo ba Margarita batampile ukufwaya incito, ulupwa lumo mu cilonganino bali-ipeeleshe ukulasunga abana nga bafuma ku sukulu ilyo ba Margarita bashilipo.

Ba Margarita batila: “Ndatasha sana ilyo bamunyina na bankashi baeba ine na bana bandi ukuya nabo mu kushimikila.” Ukwafwa kwa musango yu, kulenga aba mu cilonganino ‘ukulasendelana ifisendo’ kabili ilyo balecita ifyo ninshi balefishapo “ifunde lya kwa Kristu.”—Gal. 6:2.

Bonse abaculila pa membu sha bambi balatasha sana nga babafwa muli uyu musango. Ba Monique, abo abalume bashiile, no kubasha mu nkongole ukufika ku madola 15,000 e lyo na bana 4 abanono, batila: “Bamunyina na bankashi mu cilonganino balengafwa sana. Nshishibe ifyo cali no kuba nga ca kuti tabalengafwa. Nshitwishika ukuti Yehova e wampeele bamunyina abasuma sana, abaipeeleshe ukwafwa abana bandi. Nalitemwa ukumona uko  abana bandi balunduluka muli bukapepa pa mulandu wa fyo babafwa. Ifintu nga fyayafya baeluda balempandako amano. Nga ndefwaya ukubebako fimo, balekutika.”—Marko 10:29, 30.

Na kuba, cibusa uwaba no kutemwa aleshiba ilyo ashifwile kulanda pa fya bulanda ifyacitikila umunankwe. (Luk. Mil. 3:7) Ba Margarita batila: “Mu cilonganino nakuukiile, naleumfwa bwino ukulanda na bankashi pa mulimo wa kushimikila, pa masambililo ya Baibolo, e lyo na pa bana besu. Ico nshalefwaya, kulanda pa mafya nalekwata. Nalibatashishe pa fyo bangafwile ukulabako ku fyancitikile no kutendeka ubumi cipya cipya.”

Mwilafwaya Ukulandula

Limo, te kuti mulemona kwati ni mwe mwalengele abena mwenu ukubembuka, lelo kuti mwalaumfwa ububi sana ukuti abena mwenu e balenga mulecula. Nga ca kutila icipyu cacilamo kuti calenga mwafilwa ukutwalilila ukuba aba cishinka kuli Yehova. Nalimo kuti mwalafwaya ukucita fimo pa kuti abena mwenu nabo cibakalipe.

Nga mwailuka ukuti muletontonkanya pa kulandula, mufwile ukutontonkanya pa fyacitile Yoshua na Kalebu. Aba baume ba citetekelo baibikile mu kapoosa mweo ilyo baile mu kulengula Icalo ca Calaiwe. Inengu shimbi tashakwete icitetekelo kabili shalengele abantu ukuleka ukumfwila Yehova. Abena Israele bamo balefwaya fye no kupoola Yoshua na Kalebu amabwe ilyo baeseshe ukukoselesha uluko ukutwalilila ukuba ne citetekelo. (Impe. 13:25–14:10) Pa mulandu wa fyo abena Israele bacitile, Yoshua na Kalebu nabo balilulumbileko mu matololo pa myaka 40, te pa mulandu wa membu shabo, lelo pa mulandu wa membu sha bambi.

Nangu ca kutila Yoshua na Kalebu balyumfwile ububi pa fyacitike, tabalekele imembu sha bamunyinabo ukulenga baba ne cipyu. Babikile fye amano ku kubombela Yehova. Pa numa ya kululumba mu matololo pa myaka 40, Yoshua na Kalebu, kumo na bena Lebi balilambwilwe, muli ilya nkulo pantu e bapuswike fye no kwingila mu Calo Calaiwe.—Impe. 14:28-30; Yosh. 14:6-12.

Ifyo abena mwenu abapondweke bacita kuti fyalenga mwacula pa nshita ntali. Icupo kuti capwa, kabili pa numa nalimo kuti mwaba aba bulanda no kubulisha fye ne ndalama. Lelo, mu nshita ya kulatontonkanya sana pa fyabipa ifyacitika, muleibukisha kuti Yehova alishiba ifya kucita kuli bonse abasuula amafunde yakwe, nga filya fine cali ku bena Israele mu matololo abashakwete icitetekelo.—Heb. 10:30, 31; 13:4.

Kuti Mwashipikisha!

Ukucila ukulatontonkanya lyonse pa fyamucitikila, muletontonkanya sana pa mashiwi ya kwa Yehova. Ba Jane batile: “Ukukutika ku matepu ya Ulupungu lwa kwa Kalinda na ya Loleni!, kwalingafwile ukushipikisha. Ukulongana nako kwalenkosha sana. Ukulayasukapo sana pa kulongana kwalelenga ukuti ndelabako ku mafya. Ukushimikila nako kwalingafwile sana. Ukula-afwa bambi ukukwata icitetekelo muli Yehova, kwalikoseshe icitetekelo candi. Kabili ukwafwa abasambi ba Baibolo kwalengele mbike amano ku fintu ifyacindama sana.

Ba Monique, abo tulandilepo kale, batile: “Ukulasangwa lyonse mu kulongana no kulashimikila apapela amaka yandi, fyalingafwa ukushipikisha. Fyalenga ulupwa lwandi ukwikatana no kupalama sana ku cilonganino. Ukucula kwandi kwalenga njishibe bwino no mo mfwile ukubombela. Nalipita mu mesho, lelo Yehova alingafwa ukushipikisha.”

Na imwe bene kuti mwashipikisha amesho ayapala aya. Nangu ca kuti mwaliba no bulanda pa fyo abena mwenu bamupondokela, mule-esha ukukonka ukufunda kwa kwa Paulo ukutila: “Twinenuka ukucita icawama, pantu mu nshita yalinga tukalobolola nga tatutompweke.”—Gal. 6:9.

[Amafutunoti]

[Icikope pe bula 31]

Abo basha ku bena mwabo balatasha ababafwa mu mulimo wa kushimikila