Yehova Alomfwa Inkuuta ya Mulanda

IMFUMU ya mano Solomone iya mu Israele wa ku kale yalimwene ukuti “inshita ya fintu fyabula ukwenekela ifikila fye umuntu uuli onse.” (Luk. Mil. 9:11) Icabipa nga cacitika nelyo twapita mu bucushi ubukalamba, tulalunguluka sana. Ku ca kumwenako, lupwa lwesu nga afwa tulaba no bulanda nga nshi. Tulaba no bulanda sana pa milungu iingi ne myeshi fye kabili tatwishiba ne ca kucita. Kulaba ukufulungana sana ica kuti watendeka no kumona kwati taulingile no kupepa kuli Yehova.

Ilyo ifya musango yu fyacitika, tulakabila aba kutukoselesha, no kutulangulukilako, e lyo no kutulanga ukutemwa. Davidi alandile amashiwi ya kukoselesha mu malumbo aimbile ilyo atile: “Yehova atungilila bonse abalewa, kabili enuna bonse abakontama.” (Amalu. 145:14) Baibolo itweba ukuti: “Amenso ya kwa Yehova, yalamona mu calo conse pa kuti alange amaka yakwe aya kwafwa ababa ne mitima ya cishinka kuli ena.” (2 Imila. 16:9) Alaba ‘pamo no wacula no mulanda, pa kuti apuupuutule abalanda no kupuupuutula imitima ya bacula.’ (Esa. 57:15) Bushe Yehova acita shani pa kuti atungilile no kusansamusha abacula na balanda?

“Amashiwi Ayalandwa apo Pene fye Yalefwaikwa”

Yehova alafwa abantu bakwe pa nshita yalinga ukupitila mu Bena Kristu banabo. Abena Kristu babeba ukuti ‘balesansamusha abali no bulanda.’ (1 Tes. 5:14) Umwina Kristu uwaba ne nkumbu nga alanga ukusakamana no kutemwa ku wasumina munankwe, kuti akoselesha uuli no bucushi no bulanda. Amashiwi ya kusansamusha ayanono fye kuti yakoselesha sana uuli no bulanda. Nalimo amashiwi ya musango yu kuti yafuma kuli balya abapitapo mu mafya yamo yene. Nangu uwingalanda ayo mashiwi ni cibusa wesu uwamonapo ificitika mu mafya ya musango uyu. Ifi e fimo ifyo Yehova acita pa kusansamusha abalanda.

Moneni ifyacitikile eluda, Umwina Kristu uwe shina lya Alex. Tapakokwele ukutula apo aupile, umukashi wakwe alifwile ilyo alwele ubulwele ubushipola. Kangalila wenda umo uwali ne cililishi aebele munyinefwe Alex amashiwi ya kukoselesha. Na o wine alifwililwe umukashi e lyo aupa umbi. Uyu kangalila wenda alondolwele ifyo imfwa ya mukashi wakwe yalengele aba no bulanda icine cine. Aleumfwa bwino nga ali na bantu mu kushimikila na mu kulongana. Lelo nga abwelela ku ng’anda aba eka, aletalalilwa  sana. Munyinefwe Alex atile: “Nalikoseleshiwe ukwishiba ukuti ifyo naleumfwa fyali fye bwino pantu e fyo na bantu bambi bomfwa.” Ca cine ukuti “amashiwi ayalandwa apo pene fye yalefwaikwa” yalakoselesha sana abantu ilyo balecula.—Amapi. 15:23.

Eluda umbi uwaishibana na bantu abengi abafwilwa abena mwabo, alyebelepo ba Alex amashiwi ya kukoselesha. Abebele cikuuku cikuuku ukuti Yehova alishiba ifyo tumfwa ne fyo tukabila. Uyu eluda atile: “Nga papita imyeshi nangu imyaka walaumfwa ukuti ulekabila ukuupa, Yehova alisuminisha ukuupa nelyo ukuupwa na kabili.” Kwena te bonse abengafwaya ukuupa nelyo ukuupwa na kabili ilyo abena mwabo bafwa. Ilyo ba Alex batontonkenye pa mashiwi ulya eluda abebele, batile: “Ukunjibukishako ukuti uku kupekanya kwa kwa Yehova, kwalengele naleka ukutontonkanya ukuti nga naupa na kabili ninshi nshili na cishinka ku mwina mwandi na kuli Yehova uwabikako icupo.”—1 Kor. 7:8, 9, 39.

Kemba wa malumbo Davidi uwakwete amesho na mafya ayengi atile: “Amenso ya kwa Yehova yalola pa balungama, na matwi yakwe yomfwa inkuuta yabo.” (Amalu. 34:15) Ukwabula no kutwishika, abalanda nga bakuuta, Yehova kuti ayasuka pa nshita iyalinga ukupitila mu fyebo fya kukoselesha ifyo Umwina Kristu munensu uwakosoka uwamonapo ificitika mu mafya ya musango yu engalanda. Caliwama ukukwata aba kutukoselesha.

Ukulongana kwa Bwina Kristu Kulatwafwa

Umuntu uuli no bulanda alaba na malangulushi ayengalenga aipaatula kuli bambi. Lelo, ilembo lya Amapinda 18:1 litusoka ukuti: “Uuitalusha ku banankwe afwaya fye ukucita ifyo umwine atemenwe; tafwaya ukupandwa amano.” Ba Alex batila: “Umwina mobe nga afwa, kulaba ukuipeela imilandu.” Balebukisha ifyo baleipusha abene ukuti: “‘Bushe kuliko fimo ifyo nalingile ukucita? Bushe nalimo nshalemulangulukilako sana no kumfwikisha ifyo alepitamo?’  Nshalefwaya ukushala neka. Nshalefwaya ukuba umushimbe. Cilafya sana ukuleka ukutontonkanya pali ifi pantu cila bushiku kulaba ifilenga walatontonkanyapo ukuti waba weka.”

Ilyo umuntu aba no bulanda e lyo akabila sana ukuba na bengamukoselesha. Pa kulongana kwa cilonganino palaba lyonse abengacita ifyo. Nga tuli pa kulongana, tulakutika ku fya kwa Lesa ifitukosha no kutukuula.

Ukulongana kwa Bwina Kristu kulatwafwa ukukanasakamikwa sana. Nga tulekutika no kutontonkanya pa fya mu Baibolo, twakulabika amano ku fintu fibili ifyacindama nga nshi, ne fi, kulanga ukuti Yehova e walinga ukuteka no kulenga ishina lyakwe ukuba ilya mushilo. Tatwakulabika fye amano ku macushi yesu. Na kabili, ilyo tuli pa kulongana kwa Bwina Kristu tulesambilila pali Yehova, tulakoseleshiwa ukwishiba ukuti nangu ca kuti bambi tabeshibe amafya tukwete ne fyo tuleumfwa, Yehova ena naishiba. Alishiba ukuti “umuntu alaba no bulanda pa mulandu wa kukalipwa umutima.” (Amapi. 15:13) Lesa wa cine alafwaya ukutwafwa, ne ci cilalenga twatwalilila ukukosa.—Amalu. 27:14.

Ilyo Imfumu Davidi baicushishe sana ku balwani baiko, yakuutile kuli Lesa ukuti: “Umupashi wandi uuli muli ine wanaka; umutima wandi mu nda watalala.” (Amalu. 143:4) Ilingi line amafya yalanasha no kufulunganya umuntu, yalalenga no mutima ukutalala. Limo tulacula nga twalwala pa nshita inono nangu nga twalwala amalwele ya mutatakuya. Kuti twacetekela ukuti Yehova akatwafwa ukushipikisha. (Amalu. 41:1-3) Nangu ca kuti Lesa tondapa abantu mu cipesha mano pali lelo, alapeela amano ku muntu uulecula kabili alamukosha pa kuti ashipikisha. Mwilaba ukuti ilyo Davidi balemucusha, ashintilile pali Yehova. Aimbile ukuti: “Nga naibukisha inshiku sha ku kale; ntontonkanya pa micitile yenu yonse; nabika umutima wandi pa fyo iminwe yenu yacitile.”—Amalu. 143:5.

Apo aya mashiwi yalilembwa mu Cebo ca kwa Lesa, cilangililo ca kuti Yehova alishiba ifyo tumfwa. Aya mashiwi yaletulanga ukuti alomfwa nga twapepa kuli ena. Nga twapokelela ukwafwa kwa kwa Yehova, ‘na o akatukosha.’—Amalu. 55:22.

“Mulepepa Ukwabula Ukuleka”

Pali Yakobo 4:8 patila: “Palameni kuli Lesa, na o akapalama kuli imwe.” Cimo ico twingacita pa kupalama kuli Lesa, kulapepa kuli ena. Umutumwa Paulo atukonkomeshe ukuti “mulepepa ukwabula ukuleka.” (1 Tes. 5:17) Ilyo twafilwa ukulanda bwino bwino ifyo tuleumfwa, “umupashi wine ulatupapaatilako ilyo tuleteta ukwabula ukulanda.” (Rom. 8:26, 27) Ukwabula ukutwishika Yehova aleshiba ifyo tumfwa.

Ba Monika abaipakisha sana bucibusa na Yehova, batila: “Ipepo, ukubelenga Baibolo, no kuisambilisha ne mwine, fyalenga ndeumfwa ukuti Yehova ni cibusa wandi. Nalimwishiba bwino sana ica kuti ndamona ne fyo ansakamana lyonse. Ndomfwa bwino ukwishiba ukuti na lintu nafilwa ukulanda ifyo ndeumfwa, aleshiba ifyo ndeumfwa. Nalishiba ukuti icikuuku cakwe na mapaalo yakwe tafipwa.”

E ico, lekeni tuleumfwa ku mashiwi ya kukoselesha ukufuma ku Bena Kristu benensu, no kulakonka ifyo baletufunda no kutucinkulako pa kulongana, kabili natulepepa kuli Yehova no kumweba fyonse ifyo tuleumfwa. Fyonse ifi ifyo Yehova apekanya filanga ukuti alatusakamana. Ba Alex balanda ukulingana ne fyabacitikile ilyo batila, “Nga ca kuti tulebomfya fyonse ifyo Yehova Lesa apekanya ifitwafwa ukutwalilila ukuba ifibusa fyakwe, tukaba na ‘maka yacila aya bantunse’ ayakatwafwa ukushipikisha ubwesho ubuli bonse.”—2 Kor. 4:7.

[Akabokoshi ne Cikope pe bula 18]

Ifisansamusha Abalanda

Ibuuku lya malumbo lyalilanda sana pa fyo fwe bantu tumfwa kabili lyalitweba imiku iingi ukuti Yehova alomfwa inkuuta ya mulanda uuli na mafya ayamusakamike. Moneni ifikomo fyakonkapo:

“Mu kucula kwandi nalelilila kuli Yehova, kabili kuli Lesa wandi e ko nalekuutila. Mwi tempele lyakwe aumfwile ishiwi lyandi, ne nkuuta yandi kuli ena yafikile mu matwi yakwe.”—Amalu. 18:6.

“Yehova ali mupepi ku baba ne mitima ya bulanda; kabili apususha abasakamikwa imitima.”—Amalu. 34:18.

“[Yehova] ondapa aba nkumbabulili, no kubakakila pa filonda fyabo.”—Amalu. 147:3.

[Icikope pe bula 17]

Ala “amashiwi ayalandwa apo pene fye yalefwaikwa” yalasansamusha sana nga ca kuti yalandwa ilyo umuntu ali no bulanda!