Tulingile Ukulakonka Kristu, Intungulushi Iyapwililika

ABANTU abakonka ubutungulushi bwa bantunse ilingi line tabamwenamo mu fyo batungululwa. Lelo abakonka ubutungulushi bwa kwa Kristu bena balamwenamo. Yesu atile: “Iseni kuli ine imwe bonse mwe balecula kabili abafininwa, na ine nalamusansamusha. Sendeni ikoli lyandi no kusambilila kuli ine, pantu nalifuuka kabili nali-icefya, e lyo mwalasanga ukutuusha.” (Mat. 11:28, 29) Abakonka ubutungulushi bwa kwa Yesu balaba ne nsansa. Alafwaya sana ukwafwa abalanda nabo bacusha kuli bambi, kabili alabeta ukuti basende ikoli lyakwe ilyayanguka. Finshi twingacita ifingalanga ukuti tulakonka ubutungulushi bwa kwa Yesu?

Umutumwa Petro alembele ukuti: “Ni mwe Kristu aculiile, kabili amushilile ne cilangililo pa kuti mulekonka sana mu ntampulo shakwe.” (1 Pet. 2:21) Bushe ukukonka intampulo sha kwa Yesu kwacindama shani? Tutile muli mwi bumba ililefwaya ukupita mu mpanga iyo bashikamo utupata e lyo pali ilyo bumba pali fye umo uwishibe umo mwingapita pa kuti tamuponene mu busanso. Bushe te kuti mumukonke sana, napamo no kulanyanta fye no mo alenyanta? Na ifwe bene pa kuti tukekale bwino ku ntanshi, tulingile ukulakonka Yesu. Ne cikalanga ukuti tulemukonka, kumfwa amashiwi yakwe no kuyakonka e lyo no kunakila abeminishi bakwe.

Muleumfwa no Kunakila

Ilyo Yesu ali mu kusondwelela ilyashi lyakwe ilya pa lupili atile: “Onse uumfwa amashiwi yandi aya no kuyakonka, akaba ngo muntu uwacenjela, uwakuulile ing’anda yakwe pa mwalala. Awe imfula yalilokele na mulamba aliishile no mwela walikuukile no kupuma pali ilya ng’anda, lelo tayabongolweke, pantu yakuulilwe pa mwalala.”—Mat. 7:24, 25.

E ico Yesu alandile ukuti umuntu uumfwa no kukonka amashiwi yakwe, ‘alicenjela.’ Bushe tulomfwila Kristu no mutima onse pa kuti tulange ukutila twalimucindika kabili tulafwaya ukumupashanya, nelyo bushe pa mafunde yakwe tukonkapo fye yalya ayayanguka ukukonka? Yesu atile: “Lyonse ncita ifya kumusekesha.” (Yoh. 8:29) Natule-esha na maka ukupashanya Yesu.

Abatumwa balekonka sana ubutungulushi bwa kwa Kristu. Pa nshita imo, Petro aebele Yesu ukuti: “Moneni! Ifwe twalisha fyonse no kumukonka.” (Marko 10:28) Cine cine abatumwa ba kwa Yesu balishibe ukuti calicindeme sana ukukonka ubutungulushi bwa kwa Yesu, e calengele no kuti bashe ifintu fyonse no kumukonka.—Mat. 4:18-22.

Muleumfwila Abeminishi ba kwa Kristu

Ilyo Yesu ali mupepi no kufwa, alandile pa nshila na imbi iyo twingalangilamo ukuti tulekonka ubutungulushi bwakwe. Atile: “Uwapokelela onse uo natuma, ninshi apokelela na ine.” (Yoh. 13:20) Na kuba Yesu aleita abeminishi bakwe abasubwa ukuti “bamunyinane.” (Mat. 25:40) Ilyo Yesu abuushiwe no kuya ku muulu, ‘bamunyina’ balisontelwe ukumwimininako no kuba inkombe “ishibomba umulimo wa kwa Kristu” uwa kwita bambi ukuti babwelele kuli Yehova Lesa. (2 Kor. 5:18-20) Pa kukonka  ubutungulushi bwa kwa Kristu tufwile ukulaumfwila aba ‘bamunyina.’

Tufwile ukulaibebeta no kumona nga tulakonka ukufunda kwa mu Malembo ukuba mu mpapulo shesu ukwacindama sana. Nga tulebelenga Amalembo no kusangwa ku kulongana, tukalaibukisha amashiwi ya kwa Kristu. (2 Pet. 3:1, 2) Nga tulecita ifi lyonse ninshi tulelanga ukuti tulatasha pali ifi ifya kulya ififuma mu Cebo ca kwa Lesa. Tucita shani nga ca kutila batufunda pa cintu cimo cine imiku iingi? Ku ca kumwenako, Icebo ca kwa Lesa cifunda Abena Kristu ukuupila “muli Shikulu epela.” (1 Kor. 7:39) Ulupungu lwa kwa Kalinda lwalitufunda pali ici pa myaka ukucila 100. Abena Kristu basubwa balalanga ukuti balibika amano kuli bucibusa bwesu na Lesa pantu balalemba ifipande ifitufunda pali ici na pa fintu fimbi. Cimo icilanga ukuti tulakonka Yesu Kristu, Intungulushi yesu iyapwililika, kumfwila uku kufunda.

Pa Amapinda 4:18 patila: “Inshila ya balungami yaba ngo lubuuto lwa lucelo uluya lulebuutilako fye ukufikila akasuba kasaama.” Ca cine Yesu alaya-alewamya ifintu ilyo aletungulula, tafiba fye pamo pene. Cimbi icingalanga ukuti tulomfwila abasubwa, kukonka ilyo “umusha wa cishinka kabili uwashilimuka” atupeela ubulondoloshi ubupya pa cine ca mu Baibolo icasabankanishiwa mu mpapulo.—Mat. 24:45.

Na cimbi icilanga ukuti tulomfwila abasubwa, kukonka ubutungulushi bwa bakangalila basontwa mu cilonganino. Umutumwa Paulo atile: “Umfwileni abalemutungulula no kubanakila, pantu balinda imyeo yenu.” (Heb. 13:17) Ku ca kumwenako, eluda kuti amukoselesha ukulakwata Amapepo ya Lupwa lyonse, e lyo limbi kuti amwafwa pali fimo ifikumine umulimo wa mwi bala. Kangalila wenda na o kuti amufunda pali fimo ifyakuma imikalile ya Bwina Kristu. Nga tulekonka no mutima onse ifyo baletufunda ninshi tulekonka Yesu, Intungulushi yesu.

Muno calo tamwaba intungulushi ishingatutungulula bwino. Lelo ukutungululwa na Kristu uwatutemwa, cintu icisuma sana! Kanshi natule-esha na maka ukumfwila Intungulushi yesu no kunakila abeminishi bakwe pali lelo.

[Ifikope pe bula 27]

Bushe mulakonka ukufunda kwa mu Malembo ukwa kuti mwiba kwi koli limo line no ushatetekela?