Natulesekelela Lyonse Capamo!

CALYAFYA abantu ukuba ne nsansa e lyo no kusekelela. Abengi bamona kwati te kuti cicitike ukwikala pamo mulesansamuka no kulanda ilyashi ilisuma. Ifyo abantu bekala muno nshiku, maka maka mu misumba iikalamba kulenga bamo ukulaipatula ku banabo ica kuti balaba fye beka.

Ba Alberto Oliverio, ba Profesa abasambilila pa fyo abantu batontonkanya batile, “abantu abengi balatalalilwa sana. Balundilepo no kuti abekala mu misumba iikalamba balatalalilwa sana. Ukutalalilwa kulalenga abantu ukukanabika amano ku banabo, ku ncito, ku bena mupalamano na ku babomba mu na shitolo.” Ne ci cilalenga abantu ukuba abakungumana.

Lelo ifi te fyo caba ku Bena Kristu. Umutumwa Paulo alembele ukuti: “Mulesekelela lyonse.” (1 Tes. 5:16) Kwaliba ifintu ifingi ifilenga tulesekelela no kulasansamukila pamo. Tupepa Yehova, Lesa Uwapulamo, twalyumfwikisha ubukombe bwa cine ubwaba mu  Baibolo, twalikwata isubilo lya kupusuka no kwikala umuyayaya, kabili kuti twaafwako abantu na bambi ukukwata aya mapaalo.—Amalu. 106:4, 5; Yer. 15:16; Rom. 12:12.

Ukulasekelela pamo na banensu e citwishibisha ukuti tuli Bena Kristu ba cine. Kanshi te kuti tupape umulandu Paulo alembeele abena Filipi ukuti: “Ndeanga no kusekelela pamo na imwe bonse. Awe, mu musango umo wine na imwe mwange no kusekelela pamo na ine.” (Fil. 2:17, 18) Mu mashiwi fye ayanono, Paulo alanda imiku ibili pa kwanga no kusekelela capamo.

Abena Kristu tabafwile ukulaitalusha kuli bambi. Uuitalusha kuli bambi te kuti alesekelela capamo na Bena Kristu banankwe. Bushe kuti twakonka shani ukufunda kwa kwa Paulo ukwa kuti “twalilileni ukusekelela mu mulimo wa kwa Shikulu”?—Fil. 3:1.

Sekeleleni na Bena Kristu Banenu

Ilyo Paulo alembele kalata ku bena Filipi, afwile ali umufungwa mu Roma pa mulandu wa kushimikila mbila nsuma. (Fil. 1:7; 4:22) Lelo ukuba umufungwa takwalengele aleka ukushimikila. Na lyo line, alesekelela sana mu mulimo wa kwa Yehova no ‘kutuulwa kwati mutuulo wa mwangashi uuleitululwa pe lambo.’ (Fil. 2:17) Ifyo Paulo acitile fyatulanga ukuti tatulingile ukusekelela fye ifintu nga fili bwino. Nangu ca kuti ali mu cifungo, atile: “Na kabili nakulasekelela.”—Fil. 1:18.

Paulo alitendeke icilonganino icipya mu Filipi kabili alitemenwe sana aba bwananyina muli cilya cilonganino. Alishibe ukuti ukubashimikilako ifyo ali uwa nsansa mu kubombela Yehova kwali no kubakoselesha. E ico alembele ukuti: “Awe ndefwaisha imwe mwe bamunyinane, mwishibe ukuti, ifyancitikiile fyalilundulula imbila nsuma ukucila ukuicilikila, ica kuti nacishibikwa kuli bonse ukuti ndi mu cifungo pa mulandu wa kutetekela Kristu, nacishibikwa ku balinshi bonse aba kwa Kateka na ku bashala bonse.” (Fil. 1:12, 13) Ilyo Paulo abashimikileko ifyamucitikile, aba bwananyina mu Filipi balikoseleshiwe. Alisekelele pamo nabo, nabo balisekelele pamo nankwe. Abena Filipi balingile ukulaibukisha umulandu balesekelela, tabalingile ukufuupulwa pa mulandu wa fyacitikile Paulo, kanshi balingile ukumupashanya. (Fil. 1:14; 3:17) Lelo abena Filipi bali no kutwalilila ukulamupepelako no kumwafwa muli fyonse ifyo alekabila.—Fil. 1:19; 4:14-16.

Bushe na ifwe tulasekelela nga fintu Paulo alecita? Bushe te kuti tutontonkanye pa fintu  ifisuma ifitucitikila e lyo ne fisuma ificitika mu mulimo wa kushimikila? Ilyo tuli pamo na bamunyinefwe, tulingile ukulalanda pa fisuma ifilenga tulesekelela mu mulimo wa kushimikila. Tatulingile ukulolela mpaka kwacitika ifisuma sana e lyo twashimika. Nalimo twalibomfesheko inshila iisuma nelyo twalilanshenye bwino e lyo uo twashimikile akutika. Limbi twalilanshenye bwino no mwine wa ng’anda pe lembo limo. Nangu limbi abantu balitwishibe mu cifulo tushimikilamo ukuti tuli Nte sha kwa Yehova, kabili ici calengele bacindike Lesa. Ukushimika amalyashi ya musango yu na ko kwine kuti kwalenga tulesekelela pamo na bamunyinefwe.

Abantu ba kwa Yehova balaipusula pa kuti fye balebombesha mu mulimo wa kushimikila. Bapainiya, bakangalila benda, ababomba pa Bethel, bamishonari, abaya mu kubombela ku fyalo fimbi, balabombesha mu mulimo wa nshita yonse kabili balasekelela ilyo balebomba. Bushe tulatemwa no kusekelela pamo nabo? Kanshi natuletasha aba bamunyinefwe ‘ababomba na ifwe umulimo wa bufumu bwa kwa Lesa.’ (Kol. 4:11) Nga tuli pamo pa kulongana kwa pa cilonganino nelyo ukulongana kukalamba tufwile ukulabakoselesha. Tufwile no kulabapashanya. Nalimo kuti tulebetako ku ca kulya ku mayanda yesu pa kuti baletukoseleshako ilyo baletushimikila ifyo babomba mu mulimo wa kwa Lesa.—Fil. 4:10.

Mulesekelela Pamo na Bali na Mesho

Ukushipikisha amafya no kucimfya amesho fyaleafwa Paulo ukutwalilila ukuba uwa cishinka kuli Yehova. (Kol. 1:24; Yako. 1:2, 3) Ukwishiba ukuti aba bwananyina mu cilonganino ca mu Filipi kuti nabo bakwata amafya yamo yene, e lyo no kuti ifyo ashipikishe kuti fyakoselesha aba bwananyina, kwamulengele ukusekelela no kusansamukila pamo nabo. E co alembeele ukuti: “Pantu kuli imwe kwapeelwe ishuko pa mulandu wa kwa Kristu, te kumutetekela fye, lelo no kumuculila kwine. Kanshi muli no kushomboka kumo kwine uko mwamwene muli ine kabili uko nomba muleumfwa ukuti ncili ndeshomboka.”—Fil. 1:29, 30.

Na muno nshiku mwine, Abena Kristu balabacusha pa mulandu wa kubila imbila nsuma. Limo limo balatucusha icabipisha, nomba ilingi babomfya ubucenjeshi. Abasangu kuti batubepesha ubufi, ba lupwa wesu kuti batupata, e lyo abanensu nangu abo tusambilila nabo kuti baletuseka. Yesu atile amesho ya musango uyu tayalingile ukutupapusha nangu ukutufuupula. Lelo yalingile ukutulenga ukusekelela. Atile: “Abantu nga bamupontela no kumucusha no kumubepesha ubufi bwalekanalekana pa mulandu wandi, ninshi mwalipaalwa. Sekeleleni no kwanga, pantu icilambu cenu cikalamba mu muulu.”—Mateo 5:11, 12.

Tatulingile ukumfwa umwenso nangu ukulatiina nga twaumfwa ukuti mu fyalo fimo bamunyinefwe balebacusha nga nshi. Lelo tulingile ukusekelela pa fyo baleshipikisha. Tulingile ukubapepelako ukuti Yehova akoshe icitetekelo cabo pa kuti baleshipikisha. (Fil. 1:3, 4) Apo tapali cimbi ico twingacita pa mbali ya kubapepelako, tufwile ukula-afwa ababa mu filonganino fyesu abale-eshiwa. Tufwile ukubabikako amano no kulabafwilisha. Kuti tulesekelela pamo nabo nga tulebetako ku Mapepo ya Lupwa limo limo, ukubomba nabo umulimo wa kushimikila, e lyo no kulalesesha pamo nabo icitendwe.

Ala kwaliba ifingi ifyo twingacita pa kuti tulesekelela capamo! Tatulingile ukuba nga ba muli cino calo abashifwaya ukuba pamo na banabo, lelo tulingile ukutwalilila ukusekelela pamo na bamunyinefwe. Nga tulecita ifi, tatwakalenge fye mu cilonganino mukabe ukutemwana no kwikatana, lelo tukatwalilila ukulasekelela no kusansamukila pamo na ba bwananyina. (Fil. 2:1, 2) E ico, ‘natulesekelela lyonse muli Shikulu,’ pantu Paulo atucincisha ati: “Na kabili, Sekeleleni!”—Fil 4:4.

[Abatusuminishe Ukubomfya Icikope pe bula 6]

Globe: Courtesy of Replogle Globes