Tulesekelela Pe Subilo Twakwata

“[Kwaliba] isubilo lya mweo wa muyayaya, uo Lesa uushingabepa alaile kale sana.”—TITO 1:2.

UKUPITULUKAMO

․․․․․

Twaishiba shani ukuti ku muulu kulaba ukusekelela nga uwasubwa afwa ne citetekelo?

․․․․․

Bushe ukufikilishiwa kwe subilo lya baba mwi bumba lya mpaanga shimbi kwa-ampana shani ne subilo lya basubwa?

․․․․․

Mibele nshi iya mushilo ne “milimo ya bukapepa” iyo tulingile ukukwata pa kuti isubilo lyesu likafikilishiwe?

1. Bushe isubilo ilyo Yehova atupeela litwafwa shani ukushipikisha?

UMUTUMWA Paulo alandile ukuti Yehova ni ‘Lesa utupeela isubilo.’ Alandile no kuti Yehova kuti ‘alenga twaba ne nsansa nga nshi kabili twaba no mutende pa mulandu wa citetekelo cesu, e pa kuti ku maka ya mupashi wa mushilo isubilo lyesu lilekoselako fye.’ (Rom. 15:13) Nga twakwata isubilo, kuti tuleshipikisha amesho yonse ayo twingakwata kabili kuti tuleba ne nsansa no mutende. Nga fintu caba ku Bena Kristu basubwa, isubilo lya musango uyu kuti lyaba ni “nanga ya mweo, ilyashininkishiwa kabili ilyakosa” na ku mpaanga shimbi. (Heb. 6:18, 19) Isubilo kuti lyatwafwa ukukanasensenunwa ilyo twakwata amafya kabili kuti lyatwafwa ukutwalilila fye ukuba ne citetekelo icakosa.—Belengeni AbaHebere 2:1; 6:11.

2. Masubilo nshi yabili ayo Abena Kristu bakwata kabili mulandu nshi “impaanga shimbi” balingile ukubombela pamo na basubwa?

² Muli shino nshiku isha kulekelesha, Abena Kristu bakwata isubilo ilya kwikala pe sonde nangu ilya kuya ku muulu. Abashalapo aba mu “mukuni unono” uwa Bena Kristu basubwa bakwata isubilo lya kwikala ku muulu umuyayaya, ukuba bashamfumu kabili bashimapepo pamo na Kristu mu Bufumu bwakwe. (Luka 12:32; Ukus. 5:9, 10) Abantu abengi sana ababa mwi “bumba ilikalamba” ilya “mpaanga shimbi” nabo balikwata isubilo lya kwikala umuyayaya muli paradaise pano isonde no kulatekwa no Bufumu bwa bu Mesia. (Ukus. 7:9, 10; Yoh. 10:16) Ababa mu mpaanga shimbi balingile ukwishiba ukuti pa kuti bakapusuke, balingile ukubombela pamo na ‘bamunyina’ ba kwa Kristu abasubwa abacili pe sonde. (Mat. 25:34-40) Abasubwa bakapokelela icilambu e lyo na ba mwi bumba lya mpaanga shimbi nabo bakapokelela icilambu. (Belengeni  AbaHebere 11:39, 40.) Intanshi, natulande pe subilo ilyo abasubwa bakwata.

ABENA KRISTU BASUBWA BAKWATA “ISUBILO ILYAFIKAPO”

3, 4. Bushe ‘ukufyalwa cipya cipya no kukwata isubilo ilyafikapo’ kupilibula cinshi ku Abena Kristu basubwa, kabili lisubilo nshi bakwata?

³ Umutumwa Petro alembele amakalata yabili ku Bena Kristu abasubwa, abo aleita ati “abasalwa.” (1 Pet. 1:1) Alandile ifingi pe subilo ilishaiwamina ilya mukuni unono. Muli kalata yakwe iya kubalilapo, atile: “Abe uwacindikwa Lesa kabili Wishi wa kwa Shikulwifwe Yesu Kristu, pantu pa kubuusha Yesu Kristu ku bafwa, Lesa atukwatile uluse ulukalamba no kutufyala cipya cipya. E lyo ici calenga ukuti tukwate isubilo ilyafikapo, ilya kupyana icishingabola kabili icishakowela kabili icishingakota. Ubu bupyani bwaba mu muulu kabili bwasungilwa imwe. Apo imwe mwalitetekela Lesa, na o ku maka yakwe akulamusunga pa kuti mukamone ipusukilo ilikasokoloka mu nshita ya kulekelesha. Pali uyu mulandu mulesekelela nga nshi.”—1 Pet. 1:3-6.

⁴ Impendwa inono iya Bena Kristu abo Yehova asala ukuba mu Bufumu bwa mu muulu na Kristu ‘balafyalwa cipya cipya’ ukuba abana ba kwa Lesa abasubwa no mupashi. Balasubwa no mupashi wa mushilo pa kuti babe ishamfumu na bashimapepo pamo na Kristu. (Ukus. 20:6) Petro atile, ‘ukufyalwa cipya cipya’ kulenga bakwata “isubilo ilyafikapo,” ilyo atile “bupyani ubushingabola kabili ubushingakowela kabili ubushingakota” ubwasungilwa bena “mu muulu.” Ili subilo lishaiwamina lilenga abasubwa ‘ukulasekelela.’ Lelo isubilo bakwata kuti lyafikilishiwa nga ca kuti batwalilila ukuba aba cishinka kuli Yehova.

5, 6. Mulandu nshi Abena Kristu basubwa balingile ukutwalilila ukuba aba cishinka kuli Yehova?

⁵ Muli kalata yakwe iya bubili, Petro akonkomeshe Abena Kristu basubwa ‘ukubombesha pa kutila bekapanya ubwite bwabo no kusalwa kwabo.’ (2 Pet. 1:10) Balingile ukubombesha pa kuti bengakwata imibele iisuma pamo nga icitetekelo, bukapepa, ukutemwa ababwananyina e lyo no kutemwa abantu bonse. Petro alandile no kuti: “Ifi fintu nga fyaba muli imwe no kufulisha, fikamulenga ukukanaba abanang’ani nelyo abashitwala ifisabo.”—Belengeni 2 Petro 1:5-8.

⁶ Kristu uwabushiwe aebele baeluda abasubwa aba mu cilonganino ca Filadelfia icali mu Asia Minor ati: ‘Apo mwalikonkele ifyo nalandile pa lwa kushipikisha kwandi, na ine nkamupususha mu nshita ya kwesha, iikesa pa bantu bonse aba pano isonde, ku kwesha abaikala pe sonde. Ndeisa bwangu. Mwikatishe ico mukwete, mwileka umuntu nangu umo akamupokolole icisote cenu ica bufumu.’ (Ukus. 3:10, 11) Umwina Kristu wasubwa nga aleka ukuba uwa cishinka kuli Yehova, te kuti apokelele “icilambu ca bukata icishingonaika” ico balaya abasalwa abatwalilila ukuba aba cishinka.—1 Pet. 5:4; Ukus. 2:10.

UKWINGILA MU BUFUMU

7. Lisubilo nshi ilishaiwamina ilyo Yuda alandilepo muli kalata yakwe?

⁷ Mu 65 C.E., Yuda, munyina wa kwa Yesu alilembele kalata ku Bena Kristu banankwe abasubwa abo aitile ati “abaitwa.” (Yuda 1; linganyeniko AbaHebere 3:1.) Pa kubalilapo fye afwaile ukubalembela pe subilo lya kupusuka ilyo Abena Kristu bonse abo Lesa aita mu Bufumu bwa mu muulu ‘bapeelwa.’ (Yuda 3) Nangu ca kuti mu kubalilapo alikwete ifyo alefwaya ukulandapo, kwali fimbi ifyapamfishe ifyo alingile ukulandapo, lelo  pa kupwisha kalata yakwe iipi, alandile na pe subilo ilyo Abena Kristu basubwa bakwata. Atile: “Nomba ku uli na maka ya kumucingilila pa kuti mwiwa no kumuleka mube ababula akalema pa ntanshi ya bukata bwakwe ne nsansa ishingi nga nshi, kuli Lesa umo mpo Umupusushi wesu muli Yesu Kristu Shikulwifwe, kube umucinshi, bukatebebe, amaka no kuteka ukufuma ku nshita pe na pali nomba no kufika ku nshita pe.”—Yuda 24, 25.

8. Ukulingana na mashiwi yaba pali Yuda 24, cinshi cilanga ukuti kulaba ukusekelela ku muulu ilyo uwasubwa afwa ne cishinka?

⁸ Ukwabula no kutwishika, Abena Kristu bonse abasubwa balafwaya Lesa ukubapokolola ku fingalenga bawa lwa ku mupashi pa kuti tabonawilwe. Isubilo bakwata ilyalembwa mu Baibolo lya kuti Yesu Kristu akababusha ku bafwa kabili bakaba no mubili wa bumupashi uwapwililika e lyo bakaba aba nsansa ukuba na Lesa ku muulu. Uwasubwa nga afwa ne cishinka, tatutwishika ukuti “abuushiwa no mubili wa ku muulu” kabili “uushibola . . . , mu bukata.” (1 Kor. 15:42-44) Nga ca kuti kulaba “ukusekelela mu muulu pa mubembu umo uwalapila,” tontonkanyeni pa kusekelela ukuba mu muulu ilyo Umwina Kristu wasubwa afwa ne cishinka. (Luka 15:7) Ilyo abasubwa bakapokelela icilambu, Yehova na bamalaika ba cishinka ‘bakasekelela apakalamba’ pamo nabo.—Belengeni 1 Yohane 3:2.

9. Bushe abasubwa aba cishinka ‘bakasengelwa’ shani ilyo bakengila mu Bufumu kabili ili isubilo libafwa shani ilyo bacili pe sonde?

⁹ Nga fintu Yuda alandile, Petro na o alembeele Abena Kristu basubwa ukuti nga batwalilila fye aba cishinka, ‘bakasengelwa pa kwingila mu bufumu bwa muyayaya ubwa kwa Shikulwifwe kabili Umupusushi Yesu Kristu.’ (2 Pet. 1:10, 11) Ukwabula no kutwishika ilyo ‘bakabasengela’ ukwingila mu Bufumu bwa mu muulu imibele yabo iisuma iya Bwina Kristu ikamoneka. Amashiwi ya kuti ‘bakabasengela’ kuti yapilibula na mapaalo ayengi ayo bakaipakisha pa mulandu wa kubutukisha muli ulu lubilo lwa ku bumi. Bakaba ne nsansa ukutontonkanya  pa fyo bali aba cishinka. Isubilo bakwata lilakosha icitetekelo cabo ilyo bacili pano calo kabili ‘balateyanya imitima ukutwalilila ukubombesha.’—1 Pet. 1:13.

IMPAANGA SHIMBI SHALIKWATA “UMULANDU WA KUSUBILA”

10, 11. (a) Lisubilo nshi ilyo impaanga shimbi bakwata? (b) Bushe ukukwata isubilo lya kwikala pe sonde kwa-apana shani na Kristu e lyo no ‘kusokolola abana ba kwa Lesa’?

¹⁰ Umutumwa Paulo alilandile pe subilo ilisuma ilyo abasubwa no mupashi “abana ba kwa Lesa” bakwata ilya kuba “impyani shinankwe” isha kwa Kristu. Alilandile na pe subilo ilisuma ilyo Yehova apeela abantu abashingapendwa aba mwi buumba lya mpaanga shimbi ati: “Ifibumbwa filalolela nga nshi ukumona ilyo Lesa akasokolola abana bakwe [abasubwa]. Pantu ifibumbwa fyalengelwe ukunakila ku kuicusha fye, te ku kuitemenwa iyo lelo ku wafilengele ukunakila, pa mulandu wa kusubila ukuti ifibumbwa na fyo fikalubuka ku busha bwa kubola no kuba abana ba kwa Lesa.”—Rom. 8:14-21.

¹¹ Yehova alipeele abantu “umulandu wa kusubila” ilyo alaile ukuti akabalubula ku “cisoka ca pa kutendeka,” Satana Kasebanya, ukubomfya “umwana” uwalailwe. (Ukus. 12:9; Ukute. 3:15) Ishiwi lya kuti “umwana” lilosha maka maka kuli Yesu Kristu. (Gal. 3:16) Imfwa no kubushiwa kwa kwa Yesu kwalenga abantu ukukwata isubilo ilya kulubulwa ku lubembu ne mfwa. Ili subilo lyalyampana no ‘kusokololwa kwa bana ba kwa Lesa.’ Abasubwa abacindikwa baba ulubali lwa bubili ulwa “mwana.” Abasubwa ‘bakasokololwa’ ilyo bakabombela pamo na Kristu ukufumyapo imicitile yabipa iyaba mu calo ca kwa Satana. (Ukus. 2:26, 27) E cikalenga impaanga shimbi ukupusuka no kufuma mu bucushi bukalamba.—Ukus. 7:9, 10, 14.

12. Bushe ukusokolola kwa basubwa kukalenga abantunse ukukwata amapaalo nshi ayashaiwamina?

¹² Mu myaka 1,000 iya Kuteka kwa kwa Kristu, abantu bakapaalwa nga nshi! Pali iyi nshita, ‘abana ba kwa Lesa’ abacindikwa ‘bakasokololwa’ na kabili ilyo bakabomba bushimapepo pamo na Kristu, ku kuleta amapaalo ya cilubula ca kwa Yesu pa bantunse. Apo bakatekwa no Bufumu bwa mu muulu, abantu aba cishinka, panono panono bakalubulwa ku mafya tukwata pa mulandu wa lubembu ne mfwa. Na kabili “bakalubuka ku busha bwa kubola.” Nga batwalilila aba cishinka kuli Yehova mu myaka 1, 000 na pa nshita ya bwesho bwa kupelekeshako ubukesa pa numa ya myaka 1, 000, amashina yabo yakalembwa mwi “buuku lya mweo” kabili ‘bakaba abana ba kwa Lesa.’ (Ukus. 20:7, 8, 11, 12) Ili lisubilo ilishaiwamina nga nshi!

TWALILILENI UKUBA NE SUBILO

13. Ni pali cinshi isubilo lyesu lyashimpwa kabili ni lilali Kristu akasokololwa?

¹³ Mu mabuuku yabili ayo Petro alembele mwaliba ifingi ifingafwa abasubwa ne mpaanga shimbi ukutwalilila ukuba ne subilo. Alandile ukuti ico bakwatila ili isubilo te milimo babomba lelo ni pa mulandu wa cikuuku ca kwa Yehova. Alembele ati: “Tekanyeni nga nshi; mulesubila fye icikuuku ca kwa Lesa icikamwishila ilyo Yesu Kristu akasokoloka.” (1 Pet. 1:13) Kristu akasokololwa ilyo akesa mu kulubula abasambi bakwe aba cishinka kabili akapingula abashaishiba Lesa.—Belengeni 2 Abena Tesalonika 1:6-10.

14, 15. (a) Pa kuti tutwalilile ukuba ne subilo, finshi tulingile ukulatontonkanyapo? (b) Finshi Petro atufundile?

¹⁴ Pa kuti tuletwalilila ukuba ne subilo, tulingile ukulatontonkanya pa “bushiku bwa kwa Yehova” ubuli no kwisa. Yehova  akonaula “imyulu” e kutila ama buteko ya bantunse, e lyo ne “sonde,” abantu babipa e lyo ne “fintu” fyabipa ifyabamo. Petro atile: “Imwe mufwile ukuba . . . , abalolela kabili abafulukisha ukubapo kwa bushiku bwa kwa Yehova, ilyo imyulu ikapya no konaika ne fya mu muulu fikakaba se no kusunguluka!”—2 Pet. 3:10-12.

¹⁵ Pa “myulu” ne “sonde” ifyabapo muno nshiku pakapyana “imyulu ipya [Ubufumu bwa kwa Kristu] ne sonde lipya [ubuteko bwa bantunse ubupya].” (2 Pet. 3:13) Lyena Petro alandile na pa fyo tulingile ukucita ilyo ‘tulelolela’ ubulayo bwe sonde lipya nelyo ukulatontonkanya pali ili isubilo. Atile: “E ico, mwe batemwikwa, apo mulelolela ifi fintu, ibikilisheniko ukuti akamusange ababula akabi, ababula akalema, kabili mu mutende.”—2 Pet. 3:14.

MULECITA IFILANGA UKUTI MWALIKWATA ISUBILO

16, 17. (a) Mibele nshi iya mushilo ne “milimo ya bukapepa” iyo tulingile ukukwata pa kuti isubilo lyesu likafikilishiwe? (b) Bushe isubilo lyesu likafikilishiwa shani?

¹⁶ Tulingile ukutwalilila ukuba ne subilo e lyo no kulacita ifintu ifilanga ukuti twalikwata isubilo. Tulingile ukubika amano ku kulacita ifintu ifisekesha Lesa. Ukuba ne “mibele ya mushilo” cipilibula ukuba ne “myendele iisuma mu bena fyalo.” (2 Pet. 3:11; 1 Pet. 2:12) Tulingile ‘ukulatemwana.’ Ici cipilibula ukuti tufwile ukulacita fyonse ifingalenga twalaumfwana na bamunyinefwe aba mwi sonde lyonse e lyo na ba mu cilonganino cesu. (Yoh. 13:35) “Imibele ya mushilo” fintu ifyo tulingile ukucita ifingatwafwa ukukosha bucibusa bwesu na Yehova. Ne fingatwafwa, mapepo ayafuma pa nshi ya mutima, e lyo no kubelenga Baibolo lyonse, ukuisambilisha fwe bene, amapepo ya lupwa e lyo no kulashimikila ‘imbila nsuma iya bufumu.’—Mat. 24:14.

¹⁷ Bonse tufwaya ukusekesha Yehova kabili tufwaya ukuti akatupusushe ilyo ifintu fyabipa ifya muli cino calo “fikasunguluka.” Tukamonako uko isubilo lyesu ilya kukwata “umweo wa muyayaya, uo Lesa uushingabepa alaile kale sana” likafikilishiwa.—Tito 1:2.

[Ifipusho]

[Icikope pe bula 22]

Lesa alapeela Abena Kristu abasubwa ‘isubilo lyafikapo ilya kufyalwa cipya cipya’

[Icikope pe bula 24]

Langeni ukuti mwalikwata isubilo mu lupwa lwenu