Twalilileni Ukuba Abana ba Bufumu!

“Ikaleni imikalile iyawamina imbila nsuma.”—FIL. 1:27.

KUTI MWAYASUKA SHANI?

Ni bani abengaba abana ba Bufumu?

Finshi tulingile ukucita pa kuti tusambilile ululimi lwa Bufumu, twishibe ifingi pa Bufumu, e lyo na mafunde ya Bufumu?

Bushe abana ba Bufumu balanga shani ukuti balitemwa amafunde ya kwa Lesa?

1, 2. Mulandu nshi ukufunda uko Paulo afundile aba mu cilonganino ca mu Filipi kwacindamine?

UMUTUMWA Paulo akoseleshe aba mu cilonganino ca ku Filipi ati, “ikaleni imikalile iyawamina imbila nsuma.” (Belengeni Abena Filipi 1:27.) Ishiwi lya ciGriki ilyo Paulo abomfeshe ilyo bapilibula ukuti “ikaleni,” kuti na kabili lyapilibula ukuti “twalilileni ukuba abana.” Aya amashiwi yalicindeme sana ku bali mu cilonganino ca mu Filipi. Cinshi yacindamine? Pantu cimoneka kwati abaleikala muli uyu musumba wa Filipi nabo balibapeele insambu sha kuba abana calo ba buteko bwa bena Roma. Abena Filipi abo bapeele insambu sha kuba abena Roma, e lyo na bambi abaletekwa no buteko bwa bena Roma, baleyumfwa aba cilumba pa kuba abana calo ba ubu buteko kabili ifunde lya buteko ilya bena Roma lyalebacingilila.

² Kwali icalengele ukuti abali mu cilonganino ca mu Filipi baleyumfwa aba cilumba. Paulo abacinkwileko ukuti, apo bali Bena Kristu basubwa bali bana ba Bufumu “bwa ku muulu.” (Fil. 3:20) Tabali abana calo aba buteko bwa bantunse, lelo bali bana ba Bufumu bwa kwa Lesa. Ici calengele ukuti babe abapaalwa nga nshi no kucingililwa ukucila pa fyo ubuteko bonse ubwali no kubacingilila.—Efes. 2:19-22.

3. (a) Ni bani baba ne shuko lya kuba abana ba Bufumu? (b) Finshi twalalandapo muli cino cipande?

³ Ukufunda kwa kwa Paulo ukwa ‘kutwalilila ukuba abana’ kwakuma sana abakateka na Kristu mu muulu. (Fil. 3:20) Lelo kwalikuma na bakekala pano isonde, abakalatekwa no Bufumu bwa kwa Lesa. Cinshi twalandile fi? Pantu Abena Kristu bonse abaipeela babombela Imfumu imo, Yehova, kabili bakonka amafunde yamo yene. (Efes. 4:4-6) Muno nshiku, abantu balabombesha pa kuti babe abana calo aba calo icikankaala. Kanshi tufwile ukumona ukuti ukuba  abana ba Bufumu kwena kwalicindama sana! Pa kuti tumone sana ubucindami bwa kuba abana ba Bufumu, natulande pa fifwaikwa pa kuti umuntu abe umwana calo wa buteko bwa bantunse, e lyo ne fifwaikwa pa kuba umwana wa Bufumu bwa kwa Lesa. Lyena twalalanda pa fintu fitatu ifyo tufwile ukucita nga tulefwaya ukutwalilila ukuba abana ba Bufumu.

IFIFWAIKWA PA KUTI UMUNTU ABE UMWANA CALO

4. Bushe ululimi lwine lwine ni cinshi, kabili tululanda shani?

⁴ Ukusambilila ululimi. Mu fyalo fimo bafwaya ukuti uulefwaya ukuba umwana calo kano asambilila ululimi ulo balanda sana mu calo cabo. Nangu umuntu balimusuminisha ukuba umwana calo, palapita imyaka iingi pa kuti eshibe bwino bwino ululimi lwa muli ico calo. Nalimo kuti asambilila bwangu ifya kulanda ululimi, lelo kuti capoosako inshita pa kuti asambilile ifya kushimbula bwino amashiwi. Ifi fine e fyo caba na kubafwaya ukuba abana ba Bufumu bwa kwa Lesa, balingile ukusambilila ululimi ulo Baibolo ita ukuti “ululimi lwine lwine.” (Belengeni Sefania 3:9.) Bushe lulimi nshi ulu lwine? Ulu lulimi, cine pali Lesa ne fyo afwaya ifyalembwa muli Baibolo. “Tulanda” ululimi lwine lwine nga tulekonka amafunde ya kwa Lesa. Abana calo ba Bufumu bwa kwa Lesa limbi kuti basambilila bwangu amasambililo ya kutendekelako aya mu Baibolo no kubatishiwa babatishiwa. Lelo na lintu babatishiwa, bafwile ukulaesha na maka “ukulalanda” bwino sana ululimi lwine lwine. Kuti bacita shani? Bonse tulingile ukwishiba ukuti tatufwile ukupeleela fye pa kwishiba amafunde ya mu Baibolo, lelo tufwile no kulayakonka.

5. Cinshi tulingile ukwishibila ifingi pa kuteyanya kwa kwa Yehova?

⁵ Ukwishiba ifingi pali ico calo. Umuntu uulefwaya ukuba umwana calo mu calo cimbi afwile ukwishiba ifingi pali ico calo. Cimo cine na balefwaya ukuba abana ba Bufumu, bafwile ukwishiba ifingi pa Bufumu bwa kwa Lesa. Natulande pa bana baume aba kwa Kora, abalebomba imilimo imo mu Israele. Balitemenwe nga nshi umusumba wa Yerusalemu ne cifulo balepepelapo kabili balelandapo sana. Icalengele batemwe sana uyu musumba te mabwe ne ndaka baukuliile, lelo mulandu wa fyo umusumba ne cifulo balepepelapo fyaleimininako. Yerusalemu wali “musumba wa Mfumu Nkulu,” Yehova, pantu e musumba wasalilwe ukupepelamo Lesa wa cine. E mo balesambilishisha abantu Amafunde ya kwa Yehova. Yehova ali ne cikuuku ku bantu abaletekwa ne Mfumu ya mu Yerusalemu. (Belengeni Amalumbo 48:1, 2, 9, 12, 13.) Bushe na imwe mulafwaisha ukusambilila no kulanda pa kuteyanya kwa kwa Yehova nga  filya ba mwana Kora balecita? Nga mwasambilila ifingi pa kuteyanya kwa kwa Lesa ne fyo Yehova aafwa abantu bakwe, e lyo mukacetekela sana Ubufumu bwa kwa Lesa, kabili mukalafwaya ukushimikila sana imbila nsuma iya Bufumu.—Yer. 9:24; Luka 4:43.

6. Bushe caliba fye bwino ifi Yehova afwaya ukuti tusambilile amafunde yakwe aya Bufumu no kulayakonka?

⁶ Ukwishiba amafunde. Amabuteko ya bantu yafwaya ukuti abantu baishiba amafunde ya calo no kulayakonka. Kanshi Yehova na o alafwaya ukuti tusambilile no kulakonka amafunde ayatungulula abana ba Bufumu. (Esa. 2:3; Yoh. 15:10; 1 Yoh. 5:3) Ilingi line amafunde ya bantu tayafikapo kabili limo tamuba umulinganya. Lelo “amafunde ya kwa Yehova yalifikapo.” (Amalu. 19:7) Bushe twalitemwa amafunde ya kwa Lesa, kabili bushe tulabelenga Icebo cakwe cila bushiku? (Amalu. 1:1, 2) Nga tulebelenga Baibolo e lyo twingasambilila amafunde ya kwa Lesa. Kanshi fwe bene ni fwe tulingile ukubikako amano ku kusambilila.

ABANA BA BUFUMU BALITEMWA AMAFUNDE YA KWA LESA

7. Mafunde nshi ayo abana ba Bufumu bakonka?

⁷ Pa kuti tutwalilile ukuba abana ba Bufumu, tatulingile fye ukwishiba amafunde ya kwa Lesa, lelo tulingile no kuyatemwa. Abana calo abengi batila balakonka amafunde ya calo cabo. Lelo nga tabatemenwe ifunde limo, e lyo nga takuli no ulebamona tabalikonka. Ilingi line ico abantu ba musango yu bakonkela amafunde kufwaya fye ukuti ‘abantu babatashe.’ (Kol. 3:22) Lelo abana ba Bufumu bena balakonka amafunde ya kwa Lesa. Tulaitemenwa ukukonka amafunde ya kwa Lesa nangu takuli uuletumona. Cinshi cilenga? Pantu twalitemwa Uwabikako amafunde.—Esa. 33:22; belengeni Luka 10:27.

8, 9. Kuti mwaishiba shani nga ca kuti mwalitemwa sana amafunde ya kwa Lesa?

⁸ Kuti mwaishiba shani nga ca kuti mwalitemwa sana amafunde ya kwa Lesa? Tontonkanyeni pa fyo mucita nga ca kuti bamufundako pa fintu pamo nga imifwalile ne misakwile, ifyo nalimo mumona ukuti ni mwe mwakwatapo insambu. Ilyo tamulaba umwana wa Bufumu, nalimo tamwapoosele amano ku mifwalile yenu, nelyo nalimo mwalefwala ifya kubimbula abantu. Ilyo mwatemenwe sana Lesa mwatendeke ukufwala bwino. (1 Tim. 2:9, 10; 1 Pet. 3:3, 4) Nalimo ino nshita mumona kwati mulafwala bwino. Inga ca kuti eluda amweba ukuti imifwalile yenu ilepunwisha abantu mu cilonganino kuti mwacita shani? Bushe kuti mwakaana nelyo ukufulwa? Ifunde limo ilikalamba ilya Bufumu bwa kwa Lesa ilyo abana ba Bufumu balingile ukulakonka kulapashanya Kristu. (1 Pet. 2:21) Umutumwa Paulo alandile pa ca kumwenako ca kwa Yesu ukuti: “Ifwe umo umo tufwile ukucitila abanensu ifingabakuula. Pantu nangu fye ni Kristu talecita fye ifyalemuwamina.” (Rom. 15:2, 3) Pa kuti mu cilonganino mube umutende Umwina Kristu uwafikapo tafwile ukukaana ifyo bamufunda, afwile ukulatontonkanya pa fyo bambi bomfwa.—Rom. 14:19-21.

⁹ Tontonkanyeni na pali ifi fintu fibili ifyacindama: Ifyo tumona icupo no kwampana. Abashili bana ba Bufumu bwa kwa Lesa bamona kwati ukwampana kwa baume bekabeka nelyo abanakashi bekabeka kwaliba fye bwino, bamona ukutamba ifye shiku kwati takwabipa kabili bamona ubulalelale no kulekana ukuti fintu ifyo umuntu umwine alingile ukuipingwila. Abana ba Bufumu balileka iyi misango iingabaletelela kabili tabafwaya ukucita fye ifingabawamina. Nangu ca kutila Abena Kristu abengi balecita ifyabipa kale, ino nshita bamona icupo ukuti bupe bwafuma kuli Lesa. Balicindika amafunde ya kwa  Yehova kabili balishiba bwino bwino ukuti abatwalilila ukucita ubupulumushi tabalinga ukuba abana ba Bufumu. (1 Kor. 6:9-11) Lelo kwena balishiba ukuti umutima wa bucenjeshi. (Yer. 17:9) E co balomfwa nga babasoka pa kuti batwalilile ukuba ne mibele isuma.

ABANA BA BUFUMU BALOMFWA NGA BABASOKA

10, 11. Finshi ifyo ukuteyanya kwa kwa Lesa kutusokako, kabili mumfwa shani nga bamusoka?

¹⁰ Amabuteko yalasoka abantu pa malwele, pa fya kulya ifishawama e lyo na pa miti imo. Kwena te muti onse ne fya kulya ifyabipa. Lelo nga ca kuti ifya kulya fimo no muti tafiweme, ubuteko kuti bwasoka abantu pa kuti babacingilile. Nomba nga ca kutila ubuteko tabusokele abantu, kuti babupeela umulandu wa mulekelesha. No Bufumu bwa kwa Lesa nabo bulatusoka pa mibele yabipa e lyo na pa fintu ifingonaula bucibusa bwesu na Lesa. Ku ca kumwenako, Intaneti isuma nga nshi ku kulanshanya na bantu, ku masambililo, e lyo na ku kuleseshamo icitendwe. Ukuteyanya kwa kwa Lesa kulabomfya Intaneti ku kubomba imilimo iingi iisuma. Lelo fimo ifyaba pa Intaneti fyalibipa kabili kuti fyaonaula bucibusa bwesu na Lesa. Pa Intaneti palaba ne fye shiku ifingonaula bucibusa ubo abana ba Bufumu bakwata na Lesa. Pa myaka iingi, umusha wa cishinka alitusoka pa fya musango yu ifyaba pa Intaneti. Ala tulatasha nga nshi pa fyo batusoka!

¹¹ Mu myaka ya nomba line, kwalisa programu na imbi iyaba pa Intaneti, iingatwafwa nga ca kuti tuleibomfya bwino. Iyi programu baita ukuti social network (inshila ya kulanshanishishamo na bantu pa Intaneti). Iyi nshila na yo ine kuti yaonaula abantu. Kuti yalenga umuntu ukulaumfwana na bantu ababipa. (1 Kor. 15:33) E mulandu wine ukuteyanya kwa kwa Lesa kutusokela ukuba abacenjela pa fya kubomfya iyi programu. Bushe mwalibelenga impapulo sha nomba line umo umusha wa cishinka alanda pali iyi programu? Te kuti ciwame ukutampa ukuibomfya ukwabula ukubelenga ishi mpapulo! * Kuti caba kwati kunwa umuti uukali sana ukwabula ukubelenga ifyo balembapo.

12. Mulandu nshi cabipila ukukanaumfwa ukusoka?

¹² Abashumfwa ifyo umusha wa cishinka atusoka, balailetelela kabili balalenga na bantu bambi ukuculilamo. Bamo balikunkuma ku kutamba ifye shiku nelyo balicita ubulalelale nelyo ubucende kabili batontonkanya ukuti Yehova tamona ifyo bacita. Ala nga tutontonkanya ukuti Yehova tamona ninshi tuikopeka fye! (Amapi. 15:3; belengeni AbaHebere 4:13.) Lesa alafwaya ukwafwa abantu ba musango yu kabili abomfya ababomfi bakwe aba pe sonde ku kubafwa. (Gal. 6:1) Lelo nga filya fine ubuteko bwa bantunse bwingatamfya umuntu mu calo uwacita imilandu iikalamba, Yehova na o kuti atamfya umuntu uushilapila, uushikonka amafunde yakwe. * (1 Kor. 5:11-13) Lelo alikwata uluse. Abalapila no kuleka ukucita ifyabipa kuti baba ifibusa fya kwa Yehova na kabili no kutwalilila ukuba abana ba Bufumu. (2 Kor. 2:5-8) Lishuko sana ukubombela  Yehova, Imfumu iyaba sana no kutemwa!

ABANA BA BUFUMU BALITEMWA UKUSAMBILILA

13. Bushe abana ba Bufumu balanga shani ukuti balitemwa ukusambilila?

¹³ Amabuteko ya bantunse yalabikako sana amano ku kusambilisha abekala calo. Balabikako amasukulu ya kusambilisha abantu ukubelenga no kulemba e lyo ne milimo imbi. Abana ba Bafumu balitemwa aya amasukulu kabili balabikako amano ku kusambilila ukulemba no kubelenga, kabili ifi filabafwa mu mikalile. Lelo bacindamika sana ifyo Lesa abasambilisha pantu bana ba Bufumu bwa kwa Lesa. Yehova alasambilisha abantu ukulemba no kubelenga mu cilonganino ca Bena Kristu. Abafyashi balabakoselesha ukulabelengela abana babo abanono. Cila mweshi, umusha wa cishinka alalemba ifyebo ififuma muli Baibolo, ifiba mu Ulupungu lwa kwa Kalinda na Loleni! Nga ca kuti mulebelengako amabuula yamo cila bushiku, kuti mwatwalilila ukunonkelamo mu fyo Yehova atusambilisha.

14. (a) Bushe Yehova atukansha shani? (b) Bushe pa fyo batucinkulako pa fya kutungulula Amapepo ya Lupwa, finshi mwabomfyapo?

¹⁴ Cila mulungu, abana ba Bufumu balakanshiwa pa kulongana kwa cilonganino. Ku ca kumwenako, ukucila pa myaka 60, Isukulu lya Butumikishi Ilya Bulesa, lyalyafwa abasambi ukulasambilisha bwino Icebo ca kwa Lesa. Bushe mwalilembesha muli ili isukulu? Pa myaka iinono iyapitapo, umusha wa cishinka alikomaila pa kulakwata Amapepo ya Lupwa cila mulungu. Aya mapepo yalakosha indupwa. Bushe mwalikonka ifyo umusha atucinkulako pa fya kutungulula Amapepo ya Lupwa ifyo asabankanya mu mpapulo shesu? *

15. Lishuko nshi limo ilikalamba ilyo twakwata?

¹⁵ Abana calo balongola abantu pa kutila baletungilila parte iyo babamo, limo balaya na ku ng’anda ne ng’anda mu kongola abantu. Abana ba Bufumu bena balicilapo ukutungilila Ubufumu bwa kwa Lesa, balalanshanya na bantu mu misebo e lyo na pa mayanda. Na kuba, nge fyo twalandilepo mu cipande cafumineko, Ulupungu lwa kwa Kalinda ulusabankanya Ubufumu bwa kwa Yehova, e lupapulo lusabankanishiwa sana ukucila impapulo shonse! Ishuko limo ilikalamba sana ilyo twakwata, lya kwebako abantu pa lwa Bufumu bwa kwa Lesa. Bushe mwaliba abacincila mu kushimikila?—Mat. 28:19, 20.

16. Kuti mwalanga shani ukuti muli bana abasuma aba Bufumu bwa kwa Lesa?

¹⁶ Nomba line fye, Bufumu bwa kwa Lesa epela e bukalateeka icalo conse kabili e bukalatungulula abantu mu fintu fye fyonse. Bushe mukaba abana ba Bufumu bwa kwa Lesa abasuma ilyo bukalateeka? Ino e nshita ya kuti mulange ukuti mukaba abantu basuma. Muli fyonse ifyo musalapo ukucita cila bushiku, mulecindika Yehova, ne ci e cikalanga ukuti muletwalilila ukuba abana basuma aba Bufumu bwa kwa Lesa.—1 Kor. 10:31.

[Amafutunoti]

[Ifipusho]

[Amashiwi pe bula 14]

Bushe mulomfwa ukusoka ukuba mu mpapulo shesu pa fya kubomfya Intaneti?

[Ickope pe bula 12]

Bushe mwalitemwa ukupepa kwa cine, ne lyashi lya Bufumu nga filya fyatemenwe abana ba kwa Kora?

[Icikope pe bula 15]

Amapepo ya Lupwa kuti yamwafwa no lupwa lwenu ukuba abana ba Bufumu abasuma