Mwileka Icili Conse Cimutalushe Kuli Yehova
Mwileka Icili Conse Cimutalushe Kuli Yehova
“Salenipo mwe bene lelo uo mwakulabombela.”—YOSH. 24:15.
ASUKENI
Bushe kuti twacita shani pa kuti incito taitutalwishe kuli Yehova?
Kuti mwasala shani ifya kuleseshamo icitendwe ne fya kutamba ifisuma?
Kuti mwashipikisha shani ilyo lupwa lwenu asha Yehova?
1-3. (a) Mulandu nshi Yoshua abela ica kumwenako icisuma? (b) Finshi tufwile ukulaibukisha ilyo tulefwaya ukusalapo ifya kucita?
“UKUSALAPO” kwalicindama. Umuntu uulesala ifya kucita alakwata ifyo alefwaya ukucita ifingi kabili kuti acita conse ico alefwaya. Natulangilile: Tutile umuntu aleya kumo, lyena mu kukanaenekela asanga umusebo wapaatukana. Musebo nshi alayamo? Umuntu nga alefwaya ukuya ku cifulo cimo, kuti nalimo abomfya inshila imo iingalenga afika uko aleya, e lyo inshila imbi kuti yamutwala ukutali ne co cifulo.
2 Baibolo yalilanda pa bantu abengi abasalilepo ukucita fimo mu bumi. Ku ca kumwenako, Kaini apo alikalipe sana alingile ukusalapo nampo nga kutwalilila ukuba ne cipyu nelyo ukulama icipyu. (Ukute. 4:6, 7) Yoshua alingile ukusalapo pa kubombela Lesa wa cine nelyo ukupepa tulesa twa bufi. (Yosh. 24:15) Ico Yoshua alefwaisha ukucita kupalamina kuli Yehova; e co asalilepo ifingamwafwa ukucita ifyo alefwaya. Kaini talefwaya ukupalama kuli Lesa kabili asalilepo ukucita ifyalengele ataluke sana kuli Yehova.
3 Na ifwe kulaba inshita shimo ilyo citukosela ukusalapo ifya kucita. Ico nga cacitika, mufwile ukulatontonkanya pa fyo mufwaya ukucita nelyo ubuyo bwenu, e kutila ukucindika Yehova muli fyonse ifyo mulecita no kukanacita ifingalenga mwataluka kuli ena. (Belengeni AbaHebere 3:12.) Cino cipande ne cikonkelepo filelanda pa fintu 7 ifyo tushilingile ukuleka fyatutalusha kuli Yehova.
INCITO
4. Mulandu nshi ukubomba incito kwacindamina?
4 Abena Kristu bafwile ukuisakamana no kusakamana indupwa shabo. Baibolo itila umuntu nga tafwaya ukusakamana aba mu ng’anda yakwe, ninshi abipa ukucila no ushatetekela. (2 Tes. 3:10; 1 Tim. 5:8) Kwena ukubomba incito kwalicindama, lelo nga tamucenjele kuti yamutalusha kuli Yehova. Kuti kwamutalusha shani?
5. Finshi mufwile ukutontonkanyapo ilyo mulefwaya ukwingila incito?
5 Inga ca kuti mulefwaya ukwingila incito, kuti mwacita shani? Nga mwikala mu calo umo cayafya ukusanga incito, nalimo kuti mwasumina ukwingila incito iili yonse iyamoneka. Limbi iyo incito taileufwana ne fyo Baibolo ilanda. Nelyo limbi iyo ncito ikalakabila ukuti mukalepoosa inshita iyikalamba ica kuti mulefilwa no kusangwa ku kulongana nelyo ukuba no lupwa. Bushe mukasumina ukwingila incito ya musango uyo, ukutontonkanya ukuti ukwingila iyo ncito kwawama ukucila ukuba ilofwa? Muleibukisha ukuti nga mwafilwa ukusala bwino ifya kucita kuti mwaitalusha kuli Yehova. (Heb. 2:1) Nga ca kuti mulefwaya ukwingila incito nelyo muletontonkanya pa ncito mubomba, kuti mwasalapo shani bwino ifya kucita?
6, 7. (a) Fintu nshi fibili ifilenga abantu ukwingila incito? (b) Cinshi pali ifi fibili icingamwafwa ukupalama kuli Yehova, kabili mulandu nshi?
6 Nga fintu tulandilepo kale, muleibukisha ifyo mufwaya ukucita. Yipusheni amuti, ‘Bushe cinshi ndefwaila iyi ncito? Nelyo cinshi naingilila iyi ncito?’ Nga ca kuti mumona ukuti incito ya kumwafwa fye no lupwa lwenu ilyo mulebombela Yehova, Yehova akamupaala. (Mat. 6:33) Yehova te kuti afilwe ukumwafwa lintu incito yapwa nangu imikalile ya-afya. (Esa. 59:1) “Alishiba ukupokolola bakapepa ku fya kwesha.”—2 Pet. 2:9.
7 Inga ca kuti ico mulefwaila ukwingila incito ni pa kuti mukakwate ifyuma, finshi fingafumamo? Nalimo kuti mwakwata ifyuma, lelo mufwile ukulaibukisha ukuti mwaliba ubwafya mu kufwaisha ukukwata ifyuma. (Belengeni 1 Timote 6:9, 10.) Ukubika sana amano ku kukwata ifyuma na ku ncito kuti kwatutalusha kuli Yehova.
8, 9. Finshi abafyashi bafwile ukulaibukisha ilyo baletontonkanya pa ncito babomba? Londololeni.
8 Nga ca kuti mwalikwata abana, muleibukisha ukuti ifyo mucita filakuma abana benu. Bushe abana benu bamona ukuti ifyo mwacindika ni ncito mubomba nelyo ni bucibusa bwenu na Yehova? Abana benu nga bamona ukuti mwabika sana amano ku kulumbuka, ku kwikala bwino, na ku kukwata ifyuma, bushe nabo tabakasalepo ukucita ifingabatalusha kuli Yehova? Bushe bakatwalilila ukumucindika? Uwacaice umo atile: “Ukufuma fye na kale, batata balebombesha ku ncito. Naletontonkanya ukuti balebombesha pa kuti ulupwa lwesu luleikala bwino. Na pa kuti tulekwata ifyo tukabila. Nomba ino nshita ifintu nafyaluka. Batata balabombesha no kutuletela ifintu ifya mutengo ukucila na pa fyo tukabila. Ici calenga abantu ukutwishiba ukuti twalikwete sana indalama ukucila ukwishibikwa ukuti twalekoselesha bambi ukubombesha mu fya kwa Lesa. Kuti natemwa sana nga ca kuti batata balebombesha ukutwafwa ukupalama kuli Lesa ukucila ukubombesha ukuti tukwate ifyuma.”
9 Mwe bafyashi mwileka incito imutalushe kuli Yehova. Langeni abana benu ukuti mwalisumina ukutila icuma icacindama ico twingakwata, ni bucibusa na Lesa te fyuma iyo.—Mat. 5:3.
10. Cinshi ico abacaice bafwile ukutontonkanyapo ilyo balefwaya incito bakengila nga bakula?
10 Nga ca kuti muli bacaice kabili mulatontonkanya na pa ncito mulefwaya ukubomba nga mwakula, kuti mwacita shani pa kuti musale incito iisuma? Nga fintu tulandilepo kale, incito mukalafwaya ukubomba ikalanga ifyo mufwaya imikalile yenu ukuba. Bushe amasambililo ne ncito ifyo mulefwaya fikamwafwa ukulabomba bwino ifya Bufumu nelyo fikalenga mukataluke kuli Yehova? (2 Tim. 4:10) Bushe mufwaya ukuba nga bantu ba muli ici calo ababa fye ne nsansa nga na bakwata sana indalama? Nelyo bushe mukasalapo ukutetekela Yehova nga filya Davidi acitile? Davidi atile: “Nali umulumendo, nomba ninkota, lelo nshatalamona uwalungama nalekeleshiwa, nelyo abana bakwe balelombelesha ifya kulya.” (Amalu. 37:25) Muleibukisha ukuti ico mwasalapo ukucita kuti calenga mwataluka kuli Yehova nelyo kuti calenga mwaisaba no bumi bwa nsansa ku ntanshi. (Belengeni Amapinda 10:22; Malaki 3:10.) Ni cili kwi ico mukasalapo ukucita? *
IFYA KULESESHAMO ICITENDWE NE FYA KUTAMBA
11. Finshi Baibolo yalandapo pa fya kuleseshamo icitendwe na pa kwangalako, lelo cinshi tushilingile ukulaba?
11 Baibolo tayalesha ukusangalalako, kabili tayalanda ukuti ukucitako ifya kulesha icitendwe no kutambako fimo konaula fye inshita. Paulo alembeele Timote ukuti: “Ukutukusha umubili kwafwa fye panono.” (1 Tim. 4:8) Baibolo ilanda no kuti kwaliba “inshita ya kuseka” e lyo “ne nshita ya kusansamuka,” kabili itukoselesha ukuti ukutuushako kusuma. (Luk. Mil. 3:4; 4:6) Lelo nga tatucenjele, ifya kuleseshamo icitendwe ne fyo tutamba kuti fyatutalusha kuli Yehova. Mu nshila nshi? Ifintu fye fibili e filenga ubwafya, e kutila umusango wa fyo twasalapo ukucita e lyo ne nshita tupoosapo.
12. Finshi mufwile ukutontonkanyapo ilyo mulefwaya ukusala ifya kuleseshamo icitendwe ne fya kutamba?
12 Ica kubalilapo, tontonkanyeni pa musango wa fyo musalilepo ukucita. Ifya kuleseshamo icitendwe ne fyangalo ifisuma e ko fyaba, kuti mwafisanga. Na lyo line, ifya kuleseshamo icitendwe ne fya kutamba ifingi mwaliba ifyo Lesa apata, pamo nga ubunkalwe, ifya mipashi, e lyo no bulalelale. Kanshi mulingile ukubebeta bwino ifya kuleseshamo icitendwe ne fya kutamba ifyo mulesalapo. Yipusheni aya mepusho: Bushe nga nacita ifi nalaumfwa shani? Bushe fyalalenga mbe umunkalwe, camwenso, nelyo fyalalenga ntemwe ukucimfyanya, nangu ukutemwisha icalo candi? (Amapi. 3:31) Bushe nkalapoosapo indalama ishingi? Bushe kuti fyapunwisha bambi? (Rom. 14:21) Bushe ifya kuleseshamo icitendwe ne fyo ntamba kuti fyalenga nakwata ifibusa fya musango nshi? (Amapi. 13:20) Bushe ifyo nsalapo filalenga ndefwaya ukucita ifyabipa?—Yako. 1:14, 15.
13, 14. Finshi tufwile ukutontonkanyapo pa nshita tupoosa mu kwangala?
13 Tontonkanyeni na pa nshita mupoosa pa fya kuleseshamo icitendwe na pa fya kutamba. Yipusheni amuti: ‘Bushe ndapoosa inshita iikalamba ukucita ifya kuisekesha ne mwine ica kuti nashala fye ne nshita iinono iya kucitamo ifya kwa Lesa?’ Nga ca kuti mulepoosa inshita iikalamba pa fya kuleseshamo icitendwe ne fya kutamba, mukasanga ukuti tamuleipakisha ifyo musalilepo. Na kuba, abantu abapoosa fye inshita iyalinga pa kulesha icitendwe balaipakisha sana ifyo basalilepo ukucita. Mulandu nshi? Pantu baleshiba ukuti bacibalilapo ukucita “ifyacilapo ukucindama,” kanshi tabacula na kampingu ilyo batendeka ukucita fimbi ifya kuisekesha.—Belengeni Abena Filipi 1:10, 11.
14 Nangu ca kuti cilomfwika bwino ukupoosa inshita iikalamba ukucita ifya kuleseshamo icitendwe, ukucita ifi kuti kwamutalusha kuli Yehova. Ifi fine e fyacitikile Kim, nkashi uuli ne myaka 20. Atile: “Lyonse nalesangwa ku mitebeto. Cila mulungu pali Cisano, pa Cibelushi na pa Mulungu kwaleba imitebeto iyo nalesangwako. Nomba nalishiba ukuti kwaliba ifintu ifingi ifyacindama ifyo mfwile ukucita. Ku ca kumwenako, apo nine painiya, mbuuka ulucelo pa 6 koloko no kuya mu mulimo wa mwi bala, kanshi te kuti ndeba ku mitebeto ukufika na ku macaaca. Nalishiba ukuti ukwangala takwabipa lelo kuti kwalenga walafilwa ukubomba bwino. Ukwangala nako kukabila ukupoosapo fye inshita iiyalinga.”
15. Finshi abafyashi bafwile ukucita pa kuti abana babo baleipakisha ukwangala?
15 Abafyashi e balingile ukulasakamana ulupwa mu fyo lukabila mu mikalile, mu fya kwa Lesa, e lyo no kulanga abana ukuti balibatemwa. Ici cilesanshamo no kwangalila pamo na bana. Mwe bafyashi mwilamona ukuti ukwangala ne fya kuleseshamo icitendwe fibi. Kwena ifya kuleseshamo icitendwe fimo tafyawama. (1 Kor. 5:6) Nga ca kuti mwatontonkanishisha libela, kuti mwafwaya ifya kuleseshamo icitendwe ifisuma ifingalenga ulupwa lwenu ukumfwa bwino. * Nga mulecita ifi, ifya kuleseshamo icitendwe ne fya kutamba ifyo mukasala tafyakamutalushe kuli Yehova.
ULUPWA
16, 17. Cinshi cingalenga abafyashi ukuba no bulanda sana, kabili twaishiba shani ukuti Yehova alomfwikisha ifyo bomfwa?
16 Umufyashi no mwana balatemwana sana, e co Yehova alandile pali uku kutemwa pa kulanga ifyo atemwa abantu bakwe. (Esa. 49:15) Kanshi e co tumfwila ububi nga lupwa lwesu afuma kuli Yehova. Nkashi umo uwakwata umwana uwatamfiwe atile: “Ala calinkalipe, naleyipusha nati, ‘mulandu nshi afumina kuli Yehova?’ Naleumfwa ububi, nalemona kwati nine nengele.”
17 Yehova aleshiba ifyo mumfwa. Pantu na o ‘alyumfwile ubulanda mu mutima wakwe,’ ilyo umuntu wa kubalilapo e lyo na bantu baliko ilyo Ilyeshi lishilaisa bamupondokele. (Ukute. 6:5, 6) Kwena kuti cayafya ku bashakwatapo ubu bwafya ukumfwikisha ifyo cikalipa ilyo uwa mu lupwa apondoka. Na lyo line, te kuti ciwame ukutaluka kuli Yehova pa mulandu fye wa kuti lupwa lwesu natamfiwa. Nomba, bushe kuti mwacita shani pa kuti mushipikishe ilyo lupwa lwenu asha Yehova?
18. Mulandu nshi abafyashi bashifwile ukumona kwati e balengele umwana wabo ukusha Yehova?
18 Mwilamona kwati ni mwe mwalenga. Yehova afwaya tuleisalila ifya kucita kabili umubomfi onse uwa kwa Lesa uwaipeela no kubatishiwa alingile “ukuisendela icipe cakwe umwine.” (Gal. 6:5) E co kanshi Yehova amona uyo wine umubembu ukuti e ufwile ukulubulula, te imwe iyo. (Esek. 18:20) Kabili mwilapeela bambi umulandu. Cindikeni inshila Yehova abomfya pa kusalapula abantu bakwe. Kaanyeni Satana Kaseebanya te kulakaanya bakacema abacingilila icilonganino.—1 Pet. 5:8, 9.
19, 20. (a) Cinshi abafyashi abakwata abana abatamfiwa bafwile ukucita pa kuti bashipikishe ubulanda? (b) Lisubilo nshi abafyashi ba musango yu bakwata?
19 Nomba nga mwafulilwa Yehova, mukaitalusha fye kuli ena. Lupwa lwenu uwatamfiwa afwile ukumona ukuti mwalitemwa Yehova ukucila na pa fyo mwamutemwa. Kanshi pa kuti mushipikishe mufwile ukulakosha bucibusa bwenu na Yehova. Mwilaitalusha kuli bamunyinenwe ne nkashi Abena Kristu ba cishinka. (Amapi. 18:1) Mule-eba Yehova mwi pepo fyonse ifyo muleumfwa. (Amalu. 62:7, 8) Mwilafwaya umwa kulesesha pa kuti fye mulelanshanya na lupwa lwenu uwatamfiwa, ku ca kumwenako limbi ukulatumishanya amashiwi ukubomfya foni nangu Intaneti. (1 Kor. 5:11) Mulebombesha mu fya kwa Lesa. (1 Kor. 15:58) Nkashi tulandilepo kale atile, “Nalishiba ukuti imfwile ukubombesha mu mulimo wa kwa Yehova no kuba uwakosa mu fya kwa Lesa pa kuti ilyo umwana wandi akabwelela kuli Yehova, nkamwafwe.”
20 Baibolo ilanda ukuti ukutemwa “kusuubila fyonse.” (1 Kor. 13:4, 7) Caliba fye bwino ukulatontonkanya ukuti lupwa lwenu akabwelela kuli Yehova. Cila mwaka, abantu abalufyenye balabwela mu cilonganino ca kwa Yehova. Yehova tatwalilila ukufulilwa uwalapila. Lelo ‘ali-iteyanya ukwelela.’—Amalu. 86:5.
MULESALA BWINO
21, 22. Finshi mwapingulapo ukucita ilyo mulefwaya ukusala pa fintu?
21 Yehova alipeela abantu ubuntungwa bwa kuisalila. (Belengeni Amalango 30:19, 20.) Lelo tukalubulwilapo nga tatulesala bwino. Umwina Kristu onse afwile ukuipusha ati: ‘Bushe ifyo nsalapo ukucita filenga ndecita ifisuma? Bushe nalilenga incito, ifya kuleseshamo icitendwe ne fya kutamba, nelyo ulupwa ukuntalusha kuli Yehova?’
22 Yehova takatale aleka ukutemwa abantu bakwe. Kuti twafuma fye kuli Yehova nga twasalapo ukucita ifyabipa. (Rom. 8:38, 39) Lelo tamufwile ukucita ica musango yu! Pampamineni pa kukanaleka icili conse ukumutalusha kuli Yehova. Icipande cikonkelepo cikalanda pa fintu na fimbi fine ifyo tulingile ukupingulapo bwino.
[Amafutunoti]
^ para. 10 Nga mulefwaya ifyebo na fimbi pa fya kusala incito ya kubomba ku ntanshi, moneni icipandwa 38 mu citabo citila Ifipusho Abacaice Bepusha ne Fyasuko Ifingabafwa, Ibuuku 2.
^ para. 15 Nga mulefwaya ifyebo na fimbi, moneni Awake! ya November 2011 pa mabula 17-19.
[Ifipusho]
[Icikope pe bula 14]
Ukusala ifya kuleseshamo icitendwe ifisuma no kupoosapo inshita iyalinga kulaleta insansa
[Icikope pe bula 16]
Caliba fye bwino ukulatontonkanya ukuti lupwa lwenu akabwelela kuli Yehova
