‘Mwilafulilwa Yehova’
‘Mwilafulilwa Yehova’
“Ubuwelewele bwa muntu e bonaula inshila yakwe, e lyo umutima wakwe wafulilwa Yehova.”—AMAPI. 19:3.
KUTI MWAYASUKA SHANI?
Finshi ifingalenga ‘twafulilwa Yehova’?
Fintu nshi fisano ifingatwafwa ukukanafulilwa Lesa?
Finshi tufwile ukulaibukisha nga twakwata amafya?
1, 2. Mulandu nshi tushilingile ukupeelela Yehova umulandu pa mafya abantu baculako? Langilileni.
TUTILE mwalyupa kabili pa myaka iingi iyo mwaikala mu cupo mwaliba ne nsansa. Lelo bushiku bumo ilyo mwaya ku ng’anda mwasanga ifintu mu ng’anda fili fye cimbi cimbi. Mwasanga ukuti ifipe fyonse mu ng’anda nabafyonaula nakalya nakalya. Mu ng’anda mulemoneka kwati mupitile icinkukuma. Bushe kuti mwatila, “Mulandu nshi umukashi wandi acitile ifi?” Nelyo bushe kuti mwaipusha ukuti “Nani acitile ifi?” Ukwabula no kutwishika, kuti mwaipusha ici cipusho ca kulekelesha. Mulandu nshi? Pantu namwishiba ukuti abakashi benu abo mwatemwa te kuti bacite ica musango uyu.
2 Cino calo calyonaika. Umushili, amenshi no mwela fyonse fyalikowela. Abantu bankalwe kabili balacita ne fyabipa ifingi. Lelo ifwe fwe basambilila Baibolo twalishiba ukuti Yehova te walenga aya mafya yonse. Apangile cino calo icisuma pa kuti tuleikalamo. (Ukute. 2:8, 15) Yehova ni Lesa wa kutemwa. (1 Yoh. 4:8) Ukusambilila Baibolo kwalilenga ukuti twishibe uulenga amafya ayaba muno calo. No yu ni Satana Kaseebanya, “kateka wa ici calo.”—Yoh. 14:30; 2 Kor. 4:4.
3. Cinshi cingalenga twatendeka ukutontonkanya ifyalubana pa mafya tupitamo?
3 Lelo tatufwile ukupeela Satana umulandu pa mafya yonse ayo tuculako. Mulandu nshi? Pantu amafya yamo tuiletelela fye. (Belengeni Amalango 32:4-6.) Nangu ca kutila twalishiba ici cishinka, lelo apo tuli babembu, kuti twatendeka ukuba na matontonkanyo yalubana pa mafya tuculako kabili ici kuti cabipa sana. (Amapi. 14:12) Mu nshita ya kulaipeela umulandu nelyo ukupeela Satana umulandu pa mafya tulepitamo, kuti twatendeka ukupeela Yehova umulandu. Ici kuti calenga ‘twafulilwa na Yehova.’—Amapi. 19:3.
4, 5. Bushe Umwina Kristu kuti ‘afulilwa shani Yehova’?
4 Bushe ca cine kuti ‘twafulilwa Yehova’? Kwena ukucita ifyo kuicusha fye. (Esa. 41:11) Tapali icisuma nangu cimo icingafuma mu kufulilwa Lesa. Uulemba imishikakulo umo atile: “Ukuboko kobe kwipi sana ica kuti te kuti ulwe na Lesa.” Kwena te kuti tulande ukuti natufulilwa Yehova. Lelo Amapinda 19:3 yatila, ubuwelewele bwa muntu “e bonaula inshila yakwe, e lyo umutima wakwe wafulilwa Yehova.” Kanshi umuntu kuti afulilwa Lesa mu mutima wakwe. Ici kuti camonekela mu fyo alecita. Umuntu kuti aleka ukulongana, nelyo te kuti abe uwacincila mu mulimo wa kushimikila.
5 Finshi fingalenga ‘twafulilwa Yehova’? Kuti twacita shani pa kuti tatufulilwe Yehova? Nacicindama ukuti twishibe amasuko kuli aya mepusho, ukucita ifi kuti kwalenga twacingilila bucibusa bwesu na Yehova Lesa!
FINSHI IFINGALENGA ‘TWAFULILWA YEHOVA’?
6, 7. Cinshi calengele ukuti abena Israele mu nshiku sha kwa Mose batendeke ukuilishanya pali Yehova?
6 Finshi fingalenga umubomfi wa kwa Yehova uwa cishinka ukutendeka ukuilishanya mu mutima wakwe pali Lesa? Twalalanda pa fintu fisano ifingalenga twafulilwa Yehova kabili twalalanda na pa bantu abalembwa mu Baibolo abafulilwe Yehova.—1 Kor. 10:11, 12.
7 Ifyabipa ifyo bambi balanda. (Belengeni Amalango 1:26-28.) Abena Israele e lyo fye babalubwile mu busha mu Egupti. Yehova aletele ifinkunka 10 pa bena Egupti kabili aonawile Farao na bashilika bakwe pali Bemba Wakashika. (Ukufu. 12:29-32, 51; 14:29-31; Amalu. 136:15) Abena Israele baali fye mupepi no kwingila mu Calo ca Bulayo. Lelo batendeke ukuilishanya pali Yehova. Cinshi calengele ukuti icitetekelo cabo cinenuke apo bali fye mupepi no kwingila mu Calo ca Bulayo? Imitima yabo yalisungulwike pa lyashi ilyabipa ilyo inengu shimo ishaile mu kulengula icalo shaletele. (Impe. 14:1-4) Finshi fyafuminemo? Yehova tasuminishe ilya nkulo yonse ukwingila muli cilya “calo icisuma.” (Amala. 1:34, 35) Bushe limo tulaleka ifyabipa ifyo bambi balanda ukunenuna icitetekelo cesu no kutendeka ukuilishanya pa fyo Yehova aletungulula abantu bakwe?
8. Cinshi calengele ukuti abantu ba kwa Lesa mu nshiku sha kwa Esaya batendeke ukupeela Lesa umulandu pa mafya bakwete?
8 Amacushi na mafya kuti yatunenuna. (Belengeni Esaya 8:21, 22.) Mu nshiku sha kwa Esaya, abaYuda balecula sana. Abalwani balibashingulwike. Abantu abengi bali ne nsala pantu ifya kulya fyalicepele. Lelo icacililepo ukubipa ca kuti balilekele ukumfwila Yehova kabili balilekeleshe bucibusa bwabo na Lesa. (Amose 8:11) Lelo mu nshita ya kulomba Yehova ukuti abafwe, batendeke “ukulapisha” imfumu yabo na Lesa wabo. Balepeela Yehova umulandu pa mafya bakwete. Nga twaponenwa no bucushi nelyo twakwata amafya, bushe na ifwe kuti twatendeka ukusosa mu mutima wesu ukuti, ‘Ni kwi Yehova aali ilyo nalemufwaya sana?’
9. Cinshi calengele abena Israele mu nshiku sha kwa Esekiele ukutendeka ukutontonkanya ifyabipa pa fyo Yehova alecita ifintu?
9 Tatwishiba ifishinka fyonse. Pa mulandu wa kuti abena Israele mu nshiku sha kwa Esekiele tabaishibe ifishinka fyonse, balemona kwati imibele ya kwa Yehova “tayalungama.” (Esek. 18:29) Balecita kwati balikwete insambu sha kupingula Lesa, balefwaya alecita ifintu ukulingana ne fyo abene balemona ukuti e fyalungama. Nga ca kutila tatumfwikishe ilyashi limo ilyalembwa mu Baibolo nangu ifintu fimo mu bumi bwesu fya-aluka, bushe na ifwe mu mutima tutontonkanya ukuti Yehova talungama ne mibele yakwe “tayalungama”?—Yobo 35:2.
10. Bushe bamo bacita shani nga filya fyacitile Adamu?
10 Nga tulepeela bambi imilandu pa membu tucitile nelyo ifilubo. Umuntu wa kubalilapo Adamu, apeele Lesa umulandu pa lubembu acitile. (Ukute. 3:12) Nangu ca kutila Adamu abembwike fye ku mufulo kabili alishibe ne fyali no kufuma mu kupula ifunde lya kwa Lesa, apeele Yehova umulandu pa fyo acitile. Ale-eba Yehova ukuti umukashi amupeele ali mubi. Ukutula lilya, abantu balapeela Lesa umulandu pa filubo bacita. Kanshi, tufwile ukuipusha ati, ‘Bushe nga nalufyanya ndomfwa sana ububi ica kuti natendeka no kumona ukuti amafunde ya kwa Yehova yalicilamo fye?’
11. Finshi twingasambilila kuli Yona?
11 Nga twatendeka ukutontonkanya fye pa fyo tulefwaya. Kasesema Yona alifulilwe ilyo Yehova aumfwilile uluse abena Ninebe. (Yona 4:1-3) Mulandu nshi afulilwe? Napamo aletiina ukuti abantu bakalamumona ukuti ni kasesema wa bufi pantu umusumba tawaonawilwe nga filya alesesema. Yona abikile sana amano ku fyo abantu bali no kumumona ukucila ukumfwila uluse abena Ninebe abalapiile. Bushe na ifwe tubika fye amano ku fyo tulefwaya ica kuti ‘twafulilwa na Yehova’ pa kukanaleta bwangu impela? Nga ca kutila twalishimikila pa myaka iingi ukuti ubushiku bwa kwa Yehova nabupalama, bushe abantu nga batupumya ukuti ni kale twatendeka ukulandapo, tukatendeka ukulamona ukuti Yehova alashingashinga?—2 Pet. 3:3, 4, 9.
IFYO TUFWILE UKUCITA PA KUTI ‘TWILAFULILWA YEHOVA’
12, 13. Nga ca kuti mu mutima wesu twatendeka ukutwishika fimo ifyo Yehova acita, finshi tufwile ukucita?
12 Cinshi twingacita nga ca kuti umutima wesu watendeka ukutwishika ifyo Yehova acita? Muleibukisha ukuti te cisuma ukucita ifyo. Nomba katulande pa fintu fisano ifingatwafwa ukukanafulilwa Yehova.
13 Mwilekelesha bucibusa bwenu na Yehova. Nga twakwata bucibusa bwakosa na Yehova, tatwakalemufulilwa. (Belengeni Amapinda 3:5, 6.) Tufwile ukucetekela Yehova. Tatufwile ukulaimona aba mano nelyo ukulafwaya fye ukucita ifyo tulefwaya. (Amapi. 3:7; Luk. Mil. 7:16) Nga twacita ifi, tatwakalepeela Yehova umulandu pa fyabipa ificitika.
14, 15. Finshi fingatwafwa ukukanaonaula bucibusa bwesu na Yehova pa mulandu wa fyabipa ifyo bambi balanda?
14 Mwileka ifyabipa ifyo bambi balanda fimulenge ukonaula bucibusa bwenu na Yehova. Abena Israele mu nshiku sha kwa Mose balingile ukucetekela ukuti Yehova ali no kubengisha mu Calo ca Bulayo. (Amalu. 78:43-53) Lelo, ilyo baumfwile ilyashi ilyabipa ilyo inengu 10 ishabula icishinka shalandile, tabaibukishe “ukuboko kwakwe.” (Amalu. 78:42) Nga tuletontonkanya pa fyo Yehova acita, ukulaibukisha ifintu ifisuma ifyo atucitila, tukakosha bucibusa bwesu nankwe. Nga twacita ifi, tatwakaleke ifyabipa ifyo bambi balanda ukututalusha kuli Yehova.—Amalu. 77:11, 12.
15 Nga tulelanda ifyabipa pali bamunyinefwe, bucibusa bwesu na Yehova kuti bwapwa. (1 Yoh. 4:20) Ilyo abena Israele baleilishanya pa calengele Aarone ukusontwa ukuba shimapepo, Yehova amwene ukuti baleilishanya pali ena. (Impe. 17:10) Na ifwe nga tuleilishanya pa bantu Yehova alebomfya ukutungulula icilonganino cakwe ica pe sonde, ninshi tuleilishanya pali Yehova.—Heb. 13:7, 17.
16, 17. Finshi tufwile ukulaibukisha ilyo twaba na mafya?
16 Muleibukisha ukuti Yehova te ulenga amafya tukwata. Nangu ca kutila abena Israele mu nshiku sha kwa Esaya balipondokele Yehova, Yehova ena alefwaya sana ukubafwa. (Esa. 1:16-19) Te mulandu na mafya twingakwata, tuleibukisha ukuti Yehova alatusakamana kabili alafwaya ukutwafwa. (1 Pet. 5:7) Na kuba, alitulaya ukuti akulatupeela amaka ya kushipikisha.—1 Kor. 10:13.
17 Nga ca kutila twafyengwa nga filya cali kuli Yobo umulungami, tufwile ukulaibukisha ukuti Yehova te ulenga ukuti tulecula. Alipata ulufyengo; alitemwa umulinganya. (Amalu. 33:5) Tufwile ukumfwa nga filya fine cibusa wa kwa Yobo Elihu aumfwile, uwatile: “Lesa wa cine te kuti acite ifyabipa, Uwa Maka Yonse te kuti afyenge umuntu nakalya!” (Yobo 34:10) Yehova te ulenga ifyabipa, lelo e utupeela “ica bupe conse icisuma no bupe bonse ubwapwililika.”—Yako. 1:13, 17.
18, 19. Mulandu nshi tushifwile ukutwishikila Yehova? Langilileni.
18 Mwilatwishika Yehova. Lesa alipwililika kabili amatontonkanyo yakwe yalicila amatontonkanyo yesu. (Esa. 55:8, 9) Nga twali-icefya kabili twalifuuka, tukasumina ukuti tatwaishiba fyonse. (Rom. 9:20) Ilingi line, tatwishiba ifishinka fyonse pa ficitike. Nalimo mwalimona ukuti ili pinda lya cine, ilitila: “Uubalilapo ukulubulula amoneka umulungami, mpaka umunankwe aisa no kumulubulwisha.”—Amapi. 18:17, New International Version.
19 Tutile twalikwata cibusa uo twacetekela e lyo acita fimo ifyo tushishibe umo filolele nelyo ifyatupapusha, bushe tukamupeela umulandu apo pene fye? Iyo. Mu nshita ya kumupeela umulandu, tukebukisha ukuti tatwishibe ifishinka fyonse pa ficitike. Nga ca kutila kuti twacita ifi kuli cibusa wesu umubembu, ninshi tufwile ukucilapo ukucetekela Shifwe wa ku muulu pantu inshila shakwe na matontonkanyo yakwe yalicila ayesu!
20, 21. Mulandu nshi tushifwile ukupeelela Yehova umulandu nga twaba na mafya?
20 Muleibukisha icalenga ukuti tuleba na mafya. Mulandu nshi? Pantu amafya yamo tuiletelela fye fwe bene. (Gal. 6:7) Tatufwile ukupeela Yehova umulandu pa mafya tukwata. Mulandu nshi cishingabela bwino ukupeela Yehova umulandu? Natulangilile: Motoka yalikwata apo ipeleela ukubutuka. Nomba cinshi cingacitika nga ca kuti namutekenya abutusha sana motoka ilyo alekooneka? Kuti aba mu busanso ubwabipisha. Bushe namutekenya afwile ukupeela umulandu abapangile motoka ukuti e balenga abe mu busanso? Awe nakalya! E fyo caba na kuli Yehova, alitupeela ubuntungwa bwa kuisalila. Lelo alitupeela ne fya kukonka pa kuti tulepingula bwino pa fintu. Kanshi tatufwile ukupeela Kabumba wesu umulandu pa filubo tucita!
21 Kwena, amafya yamo ayo tukwata te ya kuiletelela. Yamo yesa pa mulandu wa “fintu fyabula ukwenekela.” (Luk. Mil. 9:11) Na kabili, tatufwile ukulaba ukuti Satana Kaseebanya e ulenga ububifi bwaba muno calo. (1 Yoh. 5:19; Ukus. 12:9) Satana e mulwani wesu, te Yehova iyo!—1 Pet. 5:8.
MULEBIKA AMANO KULI BUCIBUSA BWENU NA YEHOVA
22, 23. Finshi tufwile ukulaibukisha nga twafuupulwa pa mulandu na mafya?
22 Nga mulepita mu mafya, muleibukisha ica kumwenako ca kwa Yoshua na Kalebu. Inengu 10 shaletele ilyashi ilibi lelo Yoshua na Kalebu baletele ilyashi ilisuma. (Impe. 14:6-9) Balicetekele Yehova. Na lyo line, balilulumbile mu matololo pa myaka 40 pamo na bena Israele bambi. Bushe Yoshua na Kalebu balifulilwe nelyo ukulailishanya ukuti tabalingile ukulalulumba mu matololo? Iyo. Balicetekele Yehova, kabili alibapaalile! Nangu ca kuti abengi bafwilile mu matololo, aba baume babili bena balingiile mu Calo ca Bulayo. (Impe. 14:30) Na ifwe Yehova akatupaala nga ‘tatunenwike’ ukucita ukufwaya kwakwe.—Gal. 6:9; Heb. 6:10.
23 Finshi mufwile ukucita nga mwafuupulwa pa mulandu wa mafya, nga bambi balufyanya, nelyo nga mwalufyanya? Muletontonkanya pa mibele iisuma iya kwa Yehova. Mule-elenganya pa fintu ifisuma ifyo Yehova amulaya. Muleyipusha amuti: ‘Bushe ubumi bwandi nga bwaba shani nkanaishiba Yehova?’ Twalilileni ukupalama kuli Yehova, kabili mwikaleka umutima wenu ukufulilwa Yehova!
[Ifipusho]
[Icikope pe bula 12]
Ukukutika ku fyabipa ifyo bambi balanda kuti kwalenga twafulilwa Yehova
(Moneni paragrafu 7)
[Icikope pe bula 14]
Yoshua na Kalebu balipaalilwe pantu balicetekele Yehova (Moneni paragrafu 22)
