Bupainiya Bulakosha Bucibusa Bwesu na Lesa

‘Cisuma ukulumbanya Lesa wesu.’—AMALU. 147:1.

AMEPUSHO YA KUTONTONKANYAPO

Bushe bupainiya kuti bwakosha shani bucibusa bwenu na Yehova?

Nga ni mwe bapainiya, finshi fingamwafwa ukutwalilila ukubomba uyu mulimo uusuma?

Nga te imwe bapainiya, finshi mwingacita pa kuti na imwe mubombeko bupainiya?

1, 2. (a) Cinshi cingacitika nga tuletontonkanya pa muntu uo twatemwa no kulamulandapo? (Moneni icikope cili pa ntendekelo ya cino cipande.) (b) Mepusho nshi twalalandapo?

NGA tuletontonkanya pa muntu uo twatemwa no kumulandapo sana, bucibusa bwesu nankwe bulakoselako. Ifi fine e ficitika na kuli bucibusa bwesu na Yehova Lesa. Ilyo Davidi ali kacema, alepoosa inshita iikalamba ubushiku alelolesha intanda no kutontonkanya pa fyo Kabumba wabo aba uwa kupapusha. Alandile ukuti: “Ilyo nalolesha imyulu yenu, imilimo ya minwe yenu, umweshi ne ntanda ifyo mwapanga, ntila, wa nshi umuntu mwibukisha no kwibukisha umwina kufwa, kabili wa nshi umwana wa muntunse uwa kuti mulemusakamana?” (Amalu. 8:3, 4) Ilyo umutumwa Paulo atontonkenye pa fyo Yehova alefikilisha ukufwaya kwakwe ku bena Israele ba kwa Lesa, atile: “Iye amapaalo ubwingi ayafuma kuli Lesa! Yangu ifyo akwatisha amano!”—Rom. 11:17-26, 33.

² Ilyo tuleshimikila, tulatontonkanya pali Yehova no kulanda pali ena. Ukucita ifi kulatwafwa sana. Bapainiya ba nshita yonse abengi basanga ukuti ukushimikila sana kulabafwa ukutemwa Lesa nga nshi. Nga ni mwe bapainiya ba nshita yonse nelyo e lyo mulefwaya ukutendeka ukubombako bupainiya, tontonkanyeni pali ici cipusho: Bushe ukubombako bupainiya kuti kwakosha shani bucibusa bwenu na Yehova? Nga ni mwe bapainiya, ipusheni amuti, ‘Finshi fingangafwa ukutwalilila ukubomba uyu mulimo uusuma?’ Nga tamulatendeka ukubomba, ipusheni amuti, ‘Finshi ningacita pa kuti nkabombeko?’ Natulande pa fyo bupainiya bwingakosha bucibusa bwesu na Lesa.

 IFYO BUPAINIYA BUKOSHA BUCIBUSA BWESU NA LESA

3. Bushe ukulanda sana pa mapaalo ayo Ubufumu bukaleta kutukuma shani?

³ Ukulanda pa mapaalo ubufumu bwa kwa Lesa bukaleta, kulalenga twapalama kuli Yehova. Lilembo nshi mwatemwa ukubelengela abantu ilyo muleshimikila ku ng’anda ne ng’anda? Bushe nalimo mwatemwa Amalumbo 37:10, 11; Daniele 2:44; Yohane 5:28, 29; nelyo Ukusokolola 21:3, 4? Lyonse ilyo tulelanda na bantu pali aya mapaalo, tulacinkulwako ukuti “ica bupe conse icisuma no bupe bonse ubwapwililika fifuma” kuli Lesa. Kabili tulapalama kuli ena.—Yako. 1:17.

4. Mulandu nshi tutashisha sana pa busuma bwa kwa Lesa ilyo tuleshimikila kuli bambi?

⁴ Nga twamona abashaiba icine abo tushimikilako tulatasha sana pa cine ico twaishiba. Abantu mu calo tabakwata aba kubafwa ukutunguluka no kuba ne nsansa. Abengi balasakamana pantu tabaishiba ifikacitika ku ntanshi kabili tabakwata isubilo. Balafwaya ukwishiba ico twabela pano calo. Na balya bene abalanda ukuti bena Lesa tabaishiba bwino ifya Amalembo yalanda. Baba kwati bena Ninebe. (Belengeni Yona 4:11.) Nga tulebombesha mu mulimo wa kushimikila, tulamona sana ubupusano bwaba pa bantu tushimikilako na bantu ba kwa Yehova. (Esa. 65:13) Ici cilenga tuletontonkanya pa fyo Yehova atutemwa, tatupeela fye ifya ku mupashi lelo alapeela abantu bonse icisansamushi ne subilo.—Ukus. 22:17.

5. Bushe ukusambilisha bambi icine kulenga ukuti tulemona shani amafya yesu?

⁵ Ukwafwa bambi ukwishiba Lesa kulatwafwa ukukanabika amano ku mafya yesu. Trisha, nkashi uuli ni painiya wa nshita yonse alishininkishe ifi ilyo abafyashi bakwe balekene. Atile: “Ala ici cacitike calengele mbe no bulanda sana.” Bushiku bumo alyumfwile ububi sana kabili talefwaya no kuya mu kushimikila, na lyo line aliile mu kutungulula isambililo lya Baibolo ku bana batatu abakwete amafya ayengi. Bawishi ba aba bana balibabutwike kabili umukalamba wabo uwalebasunga na o alebacusha sana. Trisha atile: “Ubwafya nelyo ubulanda nakwete tafyalingene na mafya bakwete. Ilyo twalesambilila nabo, pa menso balemoneka fye abasansamuka kabili balemwentula. Aba bana baali ca bupe ukufuma kuli Yehova, maka maka pali bulya bushiku.”

6, 7. (a) Bushe icitetekelo cesu ciba shani nga tulesambilisha bambi icine ca mu Baibolo? (b) Bushe tumfwa shani nga twamona ifyo Baibolo yafwa abo tusambilila nabo ukwalula imibele yabo?

⁶ Ukusambilisha bambi icine ca mu Baibolo kulakosha icitetekelo cesu. Umutumwa Paulo alembeele abaYuda bamo abaliko mu nshiku shakwe abalefilwa ukucita ifyo balesambilisha ukuti: “Bushe iwe, we usambilisha umbi, taubala waisambilisha we mwine?” (Rom. 2:21) Bapainiya bena te fyo baba! Ilingi balakwata inshita iikulu iya kusambilisha bambi icine no kutungulula amasambililo ya Baibolo. Pa kuti balesambilisha bambi bwino bafwile ukupekanishisha kabela ifyo bakasambilila no musambi umo na umo kabili limo balasapika ne fyebo pa kuti basange ifyasuko ku mepusho babepwishe. Nkashi Janeen uuli ni painiya atile: “Lyonse nga ndesambilisha bambi icine, na ine ifyo nsambilisha filamfika sana pa mutima. Ne ci cilenga icitetekelo candi ukulakoselako.”

⁷ Ukumona uko abo tusambilila nabo Baibolo balebomfya ifyo balesambilila kulalenga twatemwa sana amano ya kwa Lesa. (Esa. 48:17, 18) Ici cilatwafwa ukufwaisha ukubomfya ifyo tulesambilila. Painiya na umbi uwe shina lya Adrianna atile: “Abantu baba fye cimbi cimbi nga baleshintilila pa mano yabo abene. Lelo ilyo batendeka fye ukushintilila pali Yehova,  balanonkelamo.” E fyo na munyinefwe Phil alandile, atile: “Tulamona ifyo Yehova alula abantu abafililwe ukwalula imibele yabo abene.”

8. Bushe ukubomba na bamunyinefwe mu mulimo wa kushimikila kutwafwa shani?

⁸ Tulanonkelamo nga tulebombela pamo na bamunyinefwe na bankashi. (Amapi. 13:20) Bapainiya abengi balashimikila inshita iikalamba na Bena Kristu banabo. Ici cilalenga bakwata inshita iikalamba iya ‘kukoseleshanya.’ (Rom. 1:12; belengeni Amapinda 27:17.) Lisa, painiya wa nshita yonse atile: “Ku ncito abantu balacimfyanya kabili baliba na kalumwa. Cila bushiku ndomfwa uko baleamba bambi no kulanda ifyabipa. Ico bafwaya fye kucila abanabo. Inshita shimo balanseka no kumpumya pa mulandu wa kuba ne mibele ya Bwina Kristu. Lelo ukubomba pamo na Bena Kristu banandi kulankoselesha icine cine. Nga nainuka ukufuma mu butumikishi nangu ca kuti ninaka, ndomfwa bwino.”

9. Bushe ukubomba bupainiya pamo na bena mwesu kuti kwalenga icupo ukuba shani?

⁹ Nga tulebomba bupainiya na bena mwesu, icupo cesu ica mwando uwapyatwa ne ntambo shitatu cilakoselako. (Luk. Mil. 4:12) Ba Madeline, ababomba bupainiya pamo na bena mwabo, batile: “Ine na bena mwandi ilingi line tulanda pa fyo twacibomba umulimo wa kushimikila nelyo pa fyo twingabomfya ifyo tubelengele muli Baibolo ilyo tuleshimikila. Bucibusa bwesu bulakoselako ilyo tulebombela pamo bupainiya cila mwaka.” Ba Trisha nabo batile: “Ine na bena mwandi tatufwaya ukuba ne nkongole, kanshi tatupusanina pa ndalama. Tulabombela pamo ilyo tuleya ku fipempu na ku masambililo ya Baibolo, ici calitwafwa ukulaumfwana  kabili twaliba abakosa mu fya kwa Lesa.”

10. Bushe ukubika Ubufumu intanshi no kumona ifyo Lesa atwafwa kulenga shani twamucetekela?

¹⁰ Nga twabika Ubufumu intanshi, tulacetekela sana Yehova, tulamona ifyo atwafwa ne fyo asuka amapepo yesu. Ifi fine e fyo caba ku Bena Kristu bonse aba cishinka. Lelo bapainiya bena basanga ukuti nga bacetekela Yehova e lyo bengatwalilila ukubomba bupainiya. (Belengeni Mateo 6:30-34.) Ba Curt, ni bapainiya kabili limo limo balabatuma ku kubombela ifilonganino nga kangalila wa muputule. Ilyo babebele ukuyatandalila icilonganino apo bali no kwenda ama-awala yabili na mamineti 30, balisumine. Abena mwabo nabo ni bapainiya ba nshita yonse. Muli motoka bakwete mwali fye amafuta ayanono aya kubafisha fye ku Ng’anda ya Bufumu, kabili kwashele umulungu umo pa kuti bafole. Ba Curt batile: “Natendeke ukutwishika nga cali fye bwino filya nasumine ukuyabombela kulya.” Pa numa ya kupepa, bapingwilepo ukuya kabili balicetekele ukuti Lesa akabafwa. Ilyo bali fye mu kwima, nkashi umo alibatumine foni no kubeba ukuti alikwete ubupe ubo alefwaya ukubapeela. Indalama abapeele e shalekabilwa pa kuti bashitemo amafuta ya muli motoka pa kubwela. Ba Curt batile: “Ilyo ifya musango uyu filecitika libili libili, cilanguka ukumona ukuti Yehova e uletwafwa.”

11. Mapaalo nshi yamo ayo bapainiya bakwata?

¹¹ Ca cine, bapainiya ilingi line basanga ukuti nga bapalama sana kuli Yehova no kubombesha mu mulimo wakwe, balapaalwa nga nshi. (Amala. 28:2) Na lyo line, tacanguka limo ukubomba bupainiya. Ababomfi ba kwa Lesa bonse balaba na mafya pa mulandu wa bucipondoka bwa kwa Adamu. Nangu ca kuti bapainiya bamo balaleka ukubomba bupaniya pa nshita imo, amafya yamo ayalenga ukuti baleke ukubomba kuti bayapwisha nelyo ukushipikisha. Finshi nalimo ifingafwa bapainiya ukutwalilila ukubomba uyu mulimo uusuma?

UKUTWALILILA MU MULIMO WA NSHITA YONSE

12, 13. (a) Finshi painiya afwile ukucita pa kuti alekumanisha ama-awala yafwaikwa? (b) Mulandu nshi ukutantika inshita ya kulabelenga Baibolo cila bushiku, ukuisambilisha no kutontonkanyapo fyacindamina?

¹² Bapainiya abengi balikwata ifya kucita ifingi. Kuti cayafya ukupwisha ukucita fyonse ifyo balefwaya ukucita, e co kanshi calicindama ukutantika bwino ifintu. (1 Kor. 14:33, 40) Nga ca kuti painiya alefilwa ukukumanisha ama-awala ayakabilwa, afwile ukutontonkanya pa fyo alebomfya inshita yakwe. (Efes. 5:15, 16) Nalimo kuti ayipusha ukuti: ‘Bushe ndepoosa inshita iikalamba pa fya kuleseshamo icitendwe? Bushe mfwile ukuilama mu fyo momfya inshita? Bushe mfwile ukwalukako mu fyo momba incito?’ Bapainiya bafwile ukuyipusha aya mepusho libili libili pa kuti balealuka mu fyo babomfya inshita.

¹³ Bapainiya bafwile lyonse ukulabelenga Baibolo, ukuisambilisha, no kutontonkanya pa fyo balebelenga. Kanshi, painiya afwile ukuilama pa kuti talepoosa inshita pa fintu ifishacindama ica kuti afilwa no kucita ifyacindamisha. (Fil. 1:10) Natulangilile. Pa numa ya kuwisha akasuba mu kushimikila, painiya abwelela ku ng’anda. Alefwaya ukuti inshita ya cungulo apekanye ukulongana. Lelo lilya afika atendeka ukulanda pa foni. Pa numa, atendeka ukukutika kuli programu ya pa cilimba iyo atemwa sana. Ilyo aisa mu kwiluka ukuti tapekenye ukulongana ninshi na ma-awala yabili nayapita. Mulandu nshi ifyo uyu painiya acita fyabela bwafya? Abangala ifyangalo fya kucimfyanya nga balefwaya ukutwalilila  ukula-angalako amangalo bafwile ukulalya ifya kulya ifisuma lyonse. E fyo na bapainiya bafwile ukucita, bafwile ukulaisambilisha lyonse pa kuti batwalilile mu mulimo wa nshita yonse.—1 Tim. 4:16.

14, 15. (a) Mulandu nshi bapainiya balingile ukwangushisha imikalile? (b) Nga ca kuti painiya akwata ubwafya, cinshi alingile ukucita?

¹⁴ Bapainiya ababomba bwino balesha na maka ukwangusha imikalile. Yesu akoseleshe abasambi bakwe ukuba ne linso ililolesha fye pa cintu cimo. (Mat. 6:22) Alyangwishe ubumi pa kuti apwishe umulimo wakwe uwa kushimikila ukwabula ukupumfyanishiwa. Alandile ukuti: “Bamumbwe balikwata ifilindi umo bekala ne fyuni fya mu muulu fyalikwata ifisansala, lelo Umwana wa muntu takwata na pa kusaisha umutwe.” (Mat. 8:20) Bapainiya abapashanya Yesu, balishiba ukuti nga bakwata ifintu ifingi, bakalakabila ukufisakamana, ukufiwamya nelyo ukufwailapo fimbi nga fyaonaika.

¹⁵ Bapainiya balishiba ukuti umulimo babomba walicindama, lelo tabaimona ukuti balicindama ukucila bambi. Balishiba ukuti umulimo wa nshita yonse bupe, ni Lesa e wa bapeela. Kanshi pa kuti batwalilile muli bupainiya, bafwile ukushintilila pali Yehova. (Fil. 4:13) Amafya na macushi yena kuti yaisa. (Amalu. 34:19) Lelo nga bakwata amafya, bapainiya bafwile ukulolesha kuli Yehova pa kuti abatungulule no kubafwa, ukucila ukwangufyanya ukuleka bupainiya. (Belengeni Amalumbo 37:5.) Ilyo balemona ifyo Lesa alebafwa, balapalama sana kuli ena kabili bucibusa bwabo na Shibo wa ku muulu bulakoselako.—Esa. 41:10.

BUSHE KUTI MWABOMBAKO BUPAINIYA?

16. Bushe kuti mwacita shani nga mulefwaya ukubombako bupainiya?

¹⁶ Nga ca kuti na imwe kuti mwatemwa ukuba na mapaalo ayo bapainiya wa nshita yonse bakwata, ebeni Yehova mwi pepo. (1 Yoh. 5:14, 15) Landeniko na babomba bupainiya. Tantikeni ifyo mwingacita mu mulimo wa kwa Lesa ifingamwafwa ukubombako bupainiya. E fyacitile ba Keith na ba Erika. Balebomba incito, kabili ilyo baupene balishitile ng’anda na motoka iipya. Batile: “Twalemona kwati ukukwata ifi fintu kwali no kutuletela insansa, lelo te fyo cali.” Ilyo ba Keith babafumishe incito, batendeke ukubomba bupainiya bwa kwafwilisha. Ba Keith batile: “Ukubombako bupainiya kwalengele nashininkisha ukuti ukushimikila kulalenga umo ukuba ne nsansa.” Baishileba ifibusa na baupana abalebomba bupainiya bwa nshita yonse ababafwile ukumona ukuti ukwangusha imikalile no kubombako bupainiya kulaleta insansa. Cinshi ba Keith na ba Erika bacitile? Batile: “Twalitantike ifyo twalefwaya ukucita mu mulimo wa kwa Lesa kabili twafilembele pa kapepala no kukabika pa friji, e lyo nga twafikilisha cimo, twaleconga.” Mu kuya kwa nshita, balitendeke bupainiya.

17. Mulandu nshi cingabela bwino ukwalula incito mubomba ne mikalile yenu pa kuti mubombeko bupainiya?

¹⁷ Bushe kuti mwabombako bupainiya? Nga te kuti mubombeko pali ino nshita, esheni apapela amaka yenu ukubombesha mu butumikishi pa kuti mukapalame sana kuli Yehova. Nga mwapepa kuli Yehova mukasanga ukuti, kuti mwabomba bupainiya nga mwa-alulako imikalile yenu. Nga mwabombako bupainiya, mukaba ne nsansa nga nshi ukucila na pa fyo mukasha pa mulandu wa kubombako umulimo wa nshita yonse. Mukaba ne nsansa nga mwabika ifya Bufumu intanshi mu bumi bwenu. (Mat. 6:33) Mukasanga insansa ishaba mu kupeela bambi. Na kabili, mukalatontonkanya sana pali Yehova no kulanda pali ena, ici cikalenga mukamutemwe sana kabili mukalenga Lesa ukusekelela.

[Ifipusho]

[Icikope pe bula 27]

[Icikope pe bula 29]

Ukubombesha mu mulimo wa nshita yonse kulalenga twaba ne nsansa (Moneni paragrafu 9)