Lekeni Ifyo Yehova Atwibukishako Filemulenga Ukusansamuka

“Nimpokelela ifya kutwibukishako ukuti fibe fyandi umuyayaya.”—AMALU. 119:111.

KUTI MWAYASUKA SHANI?

Mulandu nshi tufwile ukulasekelela mu fyo Yehova atwibukishako?

Finshi tufwile ukucita pa kuti tulecetekela Yehova?

Mulandu nshi cacindamina ukuba abacincila mu mulimo wa kwa Lesa?

1. (a) Bushe abantu bacita shani nga babeba ukucita fimo, kabili mulandu nshi? (b) Bushe icilumba kuti calenga umuntu ukucita shani ilyo bamufunda?

IFYO abantu bacita nga babeba ukucita fimo filapusanapusana. Bamo nga babeba ukucita fimo ku wa mu bulashi balomfwa no kucita ifyo babeba, nomba nga ca kutila uwabeba muntu uo balingene nankwe nelyo uo bacilile amaka, balakaana apo pene fye. E fyo caba na lintu abantu babafunda nelyo babasalapula. Bamo balafulwa, bamo balomfwa ububi e lyo bambi balomfwa insoni lelo bamo balafwaya ukucita ifyo babeba no kuwamyako umo bashalecita bwino. Cinshi cilenga abantu ukupusana mu fyo bacita nga babafunda nelyo nga babasalapula? Cimo icilenga cilumba. Umuntu uwa cilumba nga bamufunda amona kwati ifyo bamweba tafikwete incito ne ci cilenga ukuti akaane ukunonkelamo mu fyo bamufunda.—Amapi. 16:18.

2. Mulandu nshi Abena Kristu ba cine batemenwa ukupanda amano ukwaba mu Cebo ca kwa Lesa?

² Nomba Abena Kristu ba cine bena balitemwa ukupandwa amano, maka maka nga kulefuma mu Cebo ca kwa Lesa. Ifyo Yehova atwibukishako filalenga twaba abashilimuka, filatusambilisha kabili filatwafwa ukukanatemwisha ifyuma, ukutaluka ku bulalelale, ukubomfya imiti ikola no kunwesha ubwalwa. (Amapi. 20:1; 2 Kor. 7:1; 1 Tes. 4:3-5; 1 Tim. 6:6-11) Na kabili, ‘umutima ulasekelela’ pantu tulomfwila amafunde ya kwa Lesa.—Esa. 65:14.

3. Mibele nshi iya kwa kalemba wa malumbo iyo tufwile ukupashanya?

³ Pa kuti tutwalilile ukuba ifibusa na Shifwe wa ku muulu, tufwile ukulacita ifyo atweba. Tufwile ukupashanya uwalembele amalumbo, uwatile: “Nimpokelela ifya kutwibukishako ukuti fibe fyandi umuyayaya, pantu e filenga umutima wandi ukusansamuka”!  (Amalu. 119:111) Bushe na ifwe twalitemwa amafunde ya kwa Yehova, nelyo bushe limo tuyamona kwati yalyafya? Nangu ca kuti limo te kuti tutemwe ukufunda uko bengatufunda, tatufwile ukufuupulwa. Tufwile ukucetekela ukuti Lesa alikwatisha amano kabili ifyo atufunda filatunonsha! Lekeni tulande pa fintu fitatu ifingatwafwa ukumucetekela.

IPEPO KUTI LYAMWAFWA UKUCETEKELA SANA YEHOVA

4. Cinshi ico Davidi atwalilile ukucita?

⁴ Limo imfumu Davidi yaleba ne nsansa e lyo limo yalekwata amafya, lelo lyonse yalecetekela Kabumba. Yatile: “Kuli imwe, mwe Yehova, e ko natuula umweo wandi. Mwe Lesa wandi, muli imwe e mo natetekela.” (Amalu. 25:1, 2) Cinshi cayafwile Davidi ukucetekela sana Wishi wa ku muulu?

5, 6. Finshi ifyo Icebo ca kwa Lesa citweba pali bucibusa bwali pali Davidi na Yehova?

⁵ Abantu abengi bapepa fye kuli Lesa lilya bali na mafya. Nga ca kuti mwalikwata cibusa, nomba alanda fye na imwe nga alefwaya mumupeeleko indalama nelyo alefwaya mumwafweko fimo, bushe kuti mwatila uyo cibusa wenu alimutemwa? Kwena kuti mwatendeka ukutwishika bucibusa bwa uyo muntu. Davidi ena te fyo ali. Mu bumi bwakwe bonse, ilyo ifintu fyali bwino na lintu ali na mafya, amapepo alepepa yalelanga ukuti alitemenwe sana Yehova kabili alimucetekele sana.—Amalu. 40:8.

⁶ Umfweni amashiwi Davidi alandile pa kulumbanya Yehova no kumutasha, atile: “Mwe Yehova Shikulwifwe, ifyo lyacindama ishina lyenu mwi sonde lyonse, mwebo ubukata bwenu bulumbanishiwa mu myulu!” (Amalu. 8:1) Bushe mwamona bucibusa Davidi akwete na Wishi wa ku muulu? Davidi alelumbanya Lesa “akasuba konse” pantu Yehova alikulisha kabili wa bukata.—Amalu. 35:28.

7. Bushe ukupepa lyonse kuli Yehova kuti kwatwafwa shani?

⁷ Nga filya fyalecita Davidi, na ifwe tufwile ukulapepa lyonse kuli Yehova pa kuti tulemucetekela. Baibolo itila: “Palameni kuli Lesa, na o akapalama kuli imwe.” (Yako. 4:8) Ukupepa kuli Lesa kulalenga twapalama kuli ena kabili e nshila iyacindama iyo atupeelelamo umupashi wa mushilo.—Belengeni 1 Yohane 3:22.

8. Mulandu nshi tushilingile ukulabwekeshapo amashiwi yamo yene lyonse ilyo tulepepa?

⁸ Ilyo mulepepa, bushe mulabwekeshapo amashiwi yamo yene nelyo mulanda fye pali fimo fine lyonse? Nga e fyo mucita, kuti cawama ilyo mushilapepa mwatala mwatontonkanishisha libela ifyo mwalalanda mwi pepo. Nga tulebwekeshapo amashiwi yamo yene ilyo tulelanda na cibusa wesu nelyo lupwa lwesu, bushe kuti atemwa ukukutika kuli ifwe? Kuti aleka ukukutika ku fyo tulemweba. Ca cine ukuti Yehova te kuti akaane ukukutika ku mapepo ayafuma pa nshi ya mutima aya babomfi bakwe aba cishinka. Lelo tufwile ukwesha na maka ukukanabwekeshapo fimo fine lyonse ilyo tulepepa.

9, 10. (a) Finshi twingapepelapo? (b) Cinshi cingatwafwa ukulapepa amapepo ayasuma?

⁹ Kwena, pa kuti tupalame kuli Lesa, amapepo yesu tayafwile ukuba aya munsaunte. Nga tulepepa sana kuli Yehova no kumweba fyonse ifili ku mutima wesu, tukapalama sana kuli ena kabili tukamucetekela nga nshi. Nomba finshi tulingile ukupepela? Icebo cakwe citila: “Muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.” (Fil. 4:6) Kanshi, kuti twapepela icili conse icilekuma bucibusa bwesu na Lesa nelyo ifili fyonse ifitukumine.

¹⁰ Kuti twasambililako ifingi ku mapepo ya baume na banakashi abali ne citetekelo abalembwa mu Baibolo. (1 Sam. 1:10, 11; Imil. 4:24-31) Ku ca kumwenako, mu Amalumbo mwaba amapepo ayengi  ne nyimbo isho ababomfi ba kwa Yehova balepepa no kwimba ukufuma pa nshi ya mutima. Muli aya mapepo ne nyimbo, mwaba amashiwi ayalanga ifyo abantu bomfwa nga bali no bulanda nelyo nabasansamuka. Ukutontonkanya pa mashiwi yaba muli aya mapepo ne nyimbo kuti kwatwafwa ukulapepa amapepo ayasuma.

MULETONTONKANYA PA FYO LESA ATWIBUKISHAKO

11. Mulandu nshi tufwile ukulatontonkanishisha pa fyo Lesa atufunda?

¹¹ Davidi atile: “Ifyo Yehova atwibukishako fyalicetekelwa, filenga uwapelwa mano ukuba na mano.” (Amalu. 19:7) Kanshi, nangu ca kuti twalipelwa amano, nga tuleumfwila amafunde ya kwa Lesa kuti twaba na mano. Ukufunda kumo ukwaba mu Baibolo kukabila ukutontonkanyapo sana pa kuti kutwafwe ukuba aba cishinka. Ku ca kumwenako, ukutontonkanya pa fyo Baibolo ilanda kuti kwatwafwa ukutwalilila aba cishinka ilyo batutunka ukucita ifyabipa ku sukulu nelyo ku ncito. Kuti kwatwafwa no kumfwila amafunde ya kwa Lesa ayalanda pa mulopa, ukukanaitumpa mu fikansa fya calo, na pa mifwalile no kuipempenkanya. Ukutontonkanya pa fyo Lesa atufunda pali ifi fintu kukatwafwa ukwishiba ifya kucita ilyo twaba na mafya ya musango uyu. Nga twatontonkanishisha libela kabili twaipekanya ku fintu fya musango uyu, tukataluka ku kucita ifintu ifingatuletela amacushi.—Amapi. 15:28.

12. Mepusho nshi tufwile ukutontonkanyapo pa kuti tulecita ifyo Lesa atwibukishako?

¹² Ilyo tulelolela ukufikilishiwa kwa fyo Lesa atulaya, bushe ifyo tucita filanga ukuti twaliba abalola? Ku ca kumwenako, bushe twalishininkisha ukuti Babiloni Mukalamba akonaulwa nomba line? Bushe na ino nshita tumona amalayo Lesa atulaya, pamo nga ubumi bwa muyayaya mu paradaise, ukuti ya cine cine nga filya twaleyamona ilyo fye twasambilile icine? Bushe tucili twalicincila mu kushimikila nelyo twabika sana amano ku kufwaya ukuisekesha? Bushe isubilo lya kubuuka, ukulenga ishina lya kwa Yehova ukuba ilya mushilo, no kuti Yehova e walinga ukuteka ficili fyalicindama kuli ifwe? Ukutontonkanya pa mepusho ya musango uyu kuti kwatwafwa ukucita nga filya fyacitile uwaimbile amalumbo uwatile, lekeni ‘ifya kutwibukishako fya kwa Lesa fibe fyandi umuyayaya.’—Amalu. 119:111.

13. Mulandu nshi cayafishe ku Bena Kristu mu nshita ya batumwa ukumfwikisha ifintu fimo? Langilileni.

¹³ Fimo ifyaba mu Baibolo te kuti tufyumfwikishe pali ino nshita pantu Yehova umwine talatusokolwela. Yesu alyebele abatumwa bakwe imiku iingi ukuti alingile ukucula no kufwa. (Belengeni Mateo 12:40; 16:21.) Lelo abatumwa tabaishibe umo aloseshe. Baishileumfwikisha fye umo aloseshe ilyo abuushiwe no kumonekela ku basambi bakwe kabili “abalengele ukuti beshibe bwino bwino umwalola Amalembo.” (Luka 24:44-46; Imil. 1:3) Na kabili, ilyo abasambi ba kwa Kristu bapokelele umupashi wa mushilo pa Pentekoste mu 33 C.E., e lyo baumfwikishe ukuti Ubufumu bwa kwa Lesa bwali no kulateka ku muulu.—Imil. 1:6-8.

14. Ku kutendeka kwa myaka ya ba 1900, finshi ifyo bamunyinefwe abengi bacitile nangu ca kuti tabaumfwikishe ifyali no kucitika mu nshiku sha kulekelesha?

¹⁴ E fyo cali na ku kutendeka kwa myaka ya ba 1900. Ifyo Abena Kristu ba cine balesubila ukucitika mu “nshiku sha kulekelesha” tafyacitike. (2 Tim. 3:1) Ku ca kumwenako, bamo balemona kwati mu 1914 e lyo baali no kuya ku muulu. Lelo ifi tafyacitike. E ico, batendeke ukusambilila Amalembo na kabili, lyena baishileiluka ukuti umulimo wa kushimikila walekabilwa ukubombwa intanshi ilyo bashilaya ku muulu. (Marko 13:10) E ico, mu 1922, munyinefwe J. F. Rutherford uwaletungulula  umulimo wa kushimikila, aebele abasangilwe ku kulongana kwa fyalo ifingi pa Cedar Point, Ohio, ku U.S.A., ukuti: “Moneni, Imfumu ileteka! Imwe ni mwe babomfi ba Mfumu. E ico sabankanyeni, sabankanyeni, sabankanyeni, Imfumu no bufumu bwa iko.” Ukutula ilya nshita, ababomfi ba kwa Yehova beshibikilwa ku kubila ‘imbila nsuma iya bufumu.’—Mat. 4:23; 24:14.

15. Busuma nshi bwaba mu kutontonkanya pa fyo Lesa acitila abantu bakwe?

¹⁵ Nga tuletontonkanya pa fyo Yehova acitiile abantu bakwe aba ku kale ne fyo alecitila abantu bakwe muno nshiku, tulacetekela sana ukuti akacita fyonse ifyo afwaya. E lyo kabili, ifyo Lesa atwibukishako filatwafwa ukulatontonkanya pa masesemo ayashilafikilishiwa. Ukwabula no kutwishika, ukucita ifi kukalenga tukacetekele sana ukuti Lesa akacita ifyo atulaya.

UKUBOMBA IMILIMO YA KWA LESA KUKAMWAFWA UKUMUCETEKELA SANA

16. Mapaalo nshi yaba mu kubombesha mu mulimo wa kwa Lesa?

¹⁶ Lesa wesu Yehova alikwatisha amaka kabili alabombesha. Uwaimbile amalumbo aipwishe ukuti: “Nani uwa maka nga imwe, mwe Jah? Ukuboko kwenu kwalikosa, ukuboko kwenu ukwa ku kulyo kwalisansabikwa.” (Amalu. 89:8, 13) Apo Yehova alabombesha, alatasha no kutupaala ilyo tulebombesha mu mulimo wakwe. Amona ukuti ababomfi bakwe bonse, abaume na banakashi, abaice na bakalamba tabalya “ifya kulya fya mu bunang’ani.” (Amapi. 31:27) Na ifwe tulapashanya Kabumba wesu, tulabombesha mu mulimo wakwe. Nga tulebombela Yehova no mweo wesu onse, tulaba ne nsansa kabili tulalenga umutima wakwe ukusekelela.—Belengeni Amalumbo 62:12.

17, 18. Mulandu nshi twingalandila ukuti ukubomba imilimo ya kwa Yehova kuti kwatwafwa ukucetekela ifyo atweba? Langilileni.

 ¹⁷ Bushe ukubomba imilimo ya kwa Yehova kutulenga shani ukumucetekela? Tontonkanyeni ifyo cali ilyo abena Israele baleingila mu Calo ca Bulayo. Yehova aebele bashimapepo abalesenda icipao ca cipangano ukuyanyanta mu menshi ya mu Mumana wa Yordani. Lelo ilyo abantu balepalama ku mumana, bamwene umumana naupoosa. Bushe abena Israele bali no kucita shani? Bushe bali no kupanga inkambi mu mbali ya mumana no kulolela pa milungu iingi ukuti amenshi yacepeko? Iyo, bacetekele Yehova kabili balicitile ifyo abebele. Finshi fyacitike? Baibolo itila: “Cilya . . . amakasa ya bashimapepo abasendele icipao yanyanta mu mbali ya menshi, . . . e lyo amenshi ayalefuma lwa ku muulu yaiminine pamo. . . . Kabili abantu bayabwike apalungatana na Yeriko. Na bashimapepo abasendele icipao ca cipangano ca kwa Yehova baiminine ukwabula ukusunkana pa mushili uwauma, pa kati ka Yordani, uku ninshi abena Israele bonse baleyabuka apauma.’ (Yosh. 3:12-17) Elenganyeni ifyo abena Israele batemenwe ilyo bamwene amenshi yaiminina pamo! Ukwabula no kutwishika, icitetekelo ca bena Israele calikosele pantu balicitile ifyo Yehova abebele.

¹⁸ Ca cine ukuti muno nshiku Yehova tacita ifipesha mano nga filya acitile pa kwafwa abantu bakwe, lelo alabapaala nga nabamucetekela kabili balekonka ne fyo alebeba. Umupashi wa mushilo uwa kwa Lesa ulabafwa ukubomba umulimo wa kushimikila imbila nsuma iya Bufumu mu calo conse. Kabili, Kristu Yesu, Inte iikalamba iya kwa Yehova aebele abasambi bakwe ukuti akalabafwa ilyo balebomba uyu mulimo uwacindama. Atile: “E ico kabiyeni, kalengeni aba nko shonse ukuba abasambi, . . . nakulaba na imwe inshiku shonse mpaka na ku mpela ya calo.” (Mat. 28:19, 20) Ba Nte abengi abaali ne nsoni nelyo umwenso balasumina ukuti umupashi wa mushilo uwa kwa Lesa walibafwa ukuba abashipa pa kushimikila ku bantu abo bashaishiba.—Belengeni Amalumbo 119:46; 2 Abena Korinti 4:7.

19. Nga ca kutila tulafilwa ukubombesha mu mulimo wa kwa Lesa, finshi tufwile ukulaibukisha?

¹⁹ Bamunyinefwe bamo na bankashi balafilwa ukubombesha mu mulimo wa kwa Lesa pantu balalwalilila nelyo bakoloci. Lelo bafwile ukucetekela ukuti “Shifwe wa nkumbu kabili Lesa wa cisansamushi conse” alishiba amafya ayo Umwina Kristu onse akwata. (2 Kor. 1:3) Alatasha pa fyo tubomba mu mulimo wakwe ukulingana na maka yesu. Bonse tufwile ukulaibukisha ukuti pa kuti tukapusuke, tufwile ukucetekela ilambo lya cilubula ilya kwa Kristu.—Heb. 10:39.

20, 21. Ni nshila nshi shimo isho tulangilamo ukuti twalicetekela Yehova?

²⁰ Mu kupepa kwesu mwaba no kubomfya inshita yesu, amaka ne fyuma mu mulimo wa kwa Lesa. Ico tufwaisha sana ‘kubomba umulimo wa kwa kabila wa mbila nsuma.’ (2 Tim. 4:5) Tulatemwa ukubomba uyu mulimo pantu ulalenga bambi “ukwishiba bwino bwino icine.” (1 Tim. 2:4) Ukwabula no kutwishika, ukucindika no kulumbanya Yehova kulalenga twacindama. (Amapi. 10:22) Kabili kulatwafwa ukucetekela sana Kabumba wesu.—Rom. 8:35-39.

²¹ Nga fintu twasambilila, tufwile ukubombesha pa kuti tucetekele ukuti Yehova e wingatutungulula bwino. E ico, mulepepa kuli Yehova pa kuti mulemucetekela. Muletontonkanya pa fyo Yehova afikilishe amalayo yakwe ne fyo akayafikilisha ku ntanshi. Kabili twalilileni ukulabomba imilimo ya kwa Yehova pa kuti icitetekelo cenu cilekoselako. Ukwabula no kutwishika, ifyo Yehova atwibukishako fikatwalilila umuyayaya. Kanshi nga mulebika amano ku fyo atwibukishako, na imwe mukekala umuyayaya!

[Ifipusho]

[Icikope pe bula 12]

[Icikope pe bula 15]

Bushe na imwe mukacetekela Yehova nga filya abantu bakwe mu nshiku sha kwa Yoshua bamucetekele? (Moneni paragrafu 17 na 18)