Finshi Twingacita pa Kutwalilila ‘Ukulolela Yehova’?

“Nakulalolela Yehova.”—MIKA 7:7.

KUTI MWAYASUKA SHANI?

Finshi twingasambilila kuli Mika?

Finshi ifyo tulelolela ukucitika?

Kuti twalanga shani ukuti tulatasha pa kutekanya kwa kwa Yehova?

1. Cinshi cingalenga tufilwe ukutekanya ilyo tulelolela ukuti Yehova akonaule icalo ca kwa Satana?

ILYO Mesia atendeke ukuteka mu 1914, e lyo inshiku sha kulekelesha isha calo ca kwa Satana shatendeke. Muli ulya wine mwaka, ku muulu kwali inkondo kabili Yesu apoosele Satana ne fibanda fyakwe pe sonde. (Belengeni Ukusokolola 12:7-9.) Satana alishiba ukuti ali fye “ne nshita iinono.” (Ukus. 12:12) Lelo iyi “nshita iinono” yalitwalilila pa myaka iingi kabili bamo nalimo kuti bamona kwati inshiku sha kulekelesha shilekokola ukupwa. Bushe tulafilwa ukutekanya ilyo tulelolela ukuti Yehova akonaule icalo ca kwa Satana?

2. Finshi twalasambilila muli cino cipande?

² Ukukanatekanya kwalibipa pantu kuti kwalenga twacita ifintu ukwabula ukutontonkanyapo bwino. Kuti twacita shani pa kuti tutwalilile ukulolela? Cino cipande calatwafwa ukwishiba ifyo twingacita, kabili cala-asuka na mepusho yakonkapo. (1) Finshi twingasambilila kuli filya kasesema Mika ali uwatekanya? (2) Fintu nshi ifikacitika ifikalanga ukuti impela naipalama? (3) Kuti twalanga shani ukuti tulatasha pa kutekanya kwa kwa Yehova?

FINSHI TWINGASAMBILILA KULI MIKA?

3. Bushe imibele ya bantu mu Israele yali shani mu nshiku sha kwa Mika?

³Belengeni Mika 7:2-6. Kasesema wa kwa Yehova Mika alimwene uko icitetekelo ca bena Israele caile cilepwa ica kuti ilyo Imfumu yabipa Ahasi yaleteka, icitetekelo cabo calipwililile fye. Mika apashenye abena Israele abashali ne cishinka kuli “bacilasa” na ku “lubao lwa myunga.” Nga filya fine bacilasa no lubao lwa myunga ficena onse uwakumyako, e fyo na bena Israele baali, balecita ububi ku bantu bambi. Imibele yabo yalibipile sana ica kuti ne ndupwa shalipatene. Apo Mika  alishibe ukuti tapali ifyo ali no kucita ku kupwisha aya mafya, alipepele kuli Yehova ukufuma pa nshi ya mutima. Lyena, alolelele pali Lesa ukuti acitepo cimo. Mika alicetekele ukuti Yehova ali no kucitapo cimo pa nshita yakwe iyalinga.

4. Bushe mafya nshi tukwata?

⁴ Nga filya cali kuli Mika, na ifwe twikala na bantu abaitemwa. Abengi ‘tabatasha, tababa na cishinka, kabili tabatemwa abantu.’ (2 Tim. 3:2, 3) Tulomfwa ububi ukumona ifyo abo tubomba nabo, abo tusambilila nabo, na bena mupalamano besu baitemwa. Lelo ababomfi ba kwa Lesa bamo baliba na mafya ayakalamba ukucila aya. Yesu atile abasambi bakwe bali no kubapata kuli balupwa, kabili amashiwi alandile yalipalana na yalya ayaba pali Mika 7:6. Yesu atile: “Naisa ku kulekanya umuntu na wishi, no mwana mwanakashi na nyina, no mukashana waupwa na nafyala. Cine cine, abalwani ba muntu bakaba aba mu ng’anda yakwe.” (Mat. 10:35, 36) Ala cilafya sana ukushipikisha nga ca kutila balupwa baletupumya nelyo ukutucusha pa mulandu wa fyo twasuminamo! Nga twaba no bwafya bwa musango uyu, tatufwile ukukonka ifyo balupwa baletupatikisha ukucita. Lelo tufwile ukutwalilila aba cishinka kuli Yehova no kuba abatekanya ilyo tulelolela ukuti acitepo cimo. Nga tulepepa lyonse kuli Lesa ukuti atwafwe, akatupeela amaka na mano pa kuti tushipikishe.

5, 6. Bushe Yehova apaalile shani Mika, lelo finshi ifyo Mika ashamweneko?

⁵ Yehova alipaalile Mika pantu ali uwatekanya. Mika alimweneko uko Imfumu yabipa Ahasi yafwile ne fyo ukuteka kwakwe kwapwile. Alimweneko uko Imfumu iisuma Hisekia yapyene wishi Ahasi no kulenga abena Israele ukutendeka ukupepa Lesa wa cine. Na kabili, Mika alimweneko uko ifyo aseseme pali Samaria fyafikilishiwe ilyo abena Siria basanshile ubufumu bwa Israele ubwa ku kapinda ka ku kuso.—Mika 1:6.

⁶ Lelo Mika tamweneko uko fyonse ifyo Yehova amwebele ukusobela fyafikilishiwe. Ku ca kumwenako, Mika alembele ukuti: “Mu nshiku sha ku mpela, . . . ulupili lwa ng’anda ya kwa Yehova lukapampamikwa ukucila pa muulu wa mpili, kabili lukasumbulwa ukucila utupili; kabili inko shonse shikakonkomokelako. Ne nko ishingi shikayako no kutila: ‘Iseni, natunine tuleya ku lupili lwa kwa Yehova.’” (Mika 4:1, 2) Mika afwile ninshi uku kusesema takulafikilishiwa. Na lyo line atwalilile uwa cishinka kuli Yehova mpaka ne mfwa yakwe, te mulandu no kuti bambi balecita ifyabipa. Mika atile: “Abantu bonse bakendela cila muntu mwi shina lya kwa lesa wakwe; lelo ifwe twakulaendela mwi shina lya kwa Yehova Lesa wesu umuyayaya umuyayaya.” (Mika 4:5) Pa nshita yonse iyo ifintu fyabipile, Mika alitekenye no kulolela pantu alicetekele ukuti Yehova ali no kufikilisha fyonse ifyo alaile. Uyu kasesema wa cishinka alicetekele Yehova.

7, 8. (a) Mulandu nshi tufwile ukucetekela Yehova? (b) Cinshi cingalenga ukuti tulemona ukuti inshita ile-enda bwangu bwangu?

⁷ Bushe na ifwe twalicetekela Yehova nga filya Mika amucetekele? Kwaliba ifintu ifingi ifingalenga ukuti tumucetekele. Twalimona ifyo ukusesema uko Mika asobele kwafikilishiwa. “Mu nshiku sha ku mpela,” abantu abengi nga nshi ukufuma mu nko shonse ne mitundu ne ndimi balekonkomokela ku “lupili lwa ng’anda ya kwa Yehova.” Nangu ca kuti bafuma mu fyalo ifyaba pa bulwani, bakapepa ba kwa Lesa balifula “impanga shabo ukuti shibe baplao,” kabili balikaana “ukusambilila inkondo na kabili.” (Mika 4:3) Ala lishuko nga nshi ukuba pa bantu ba kwa Yehova aba mutende!

⁸ Ifwe bonse tulafwaya ukuti Yehova onaule cino calo cabipa bwangu bwangu.  Lelo pa kuti tube abatekanya ilyo tulelolela ukuti Yehova akonaule cino calo, tufwile ukulamona ifintu nge fyo Yehova afimona. Alibika ubushiku umo akapingula abantunse ukubomfya Yesu Kristu, “uo asonta.” (Imil. 17:31) Lelo ilyo ubu bushiku bushilaisa, Lesa alepeela abantu ishuko lya “kwishiba bwino bwino icine” no kucita ifyo balesambilila pa kuti bakapusuke. Tufwile ukulaibukisha ukuti abantu kuti baisaonaika. (Belengeni 1 Timote 2:3, 4.) Nga tuli abacincila ukwafwa bambi ukwishiba bwino Lesa, inshita ikalaenda bwangu bwangu kabili tatwakalemona ukuti ubushiku bwa kwa Yehova bulekokola ukwisa. Nomba line fye, ubu bushiku buli no kwisa. Nga bwaisa, ala tukasansamuka sana ukuti twali abacincila mu mulimo wa kushimikila pa Bufumu!

FINSHI FIKACITIKA IFIKALANGA UKUTI IMPELA YAPALAMA?

9-11. Bushe 1 Abena Tesalonika 5:3 yalifikilishiwa? Londololeni.

⁹Belengeni 1 Abena Tesalonika 5:1-3. Nomba line, ifyalo fili no kulanda ukuti “Umutende no mutelelwe!” Pa kuti twikabepwa ilyo bakabilisha ifi, tufwile ukuba ‘abalola kabili abatekanya.’ (1 Tes. 5:6) Twalalanda pa fyacitika ifilanga ukuti balitendeka ukucitapo fimo pa kuti bakabilishe ukuti umutende no mutelelwe.

¹⁰ Ilyo Inkondo ya Calo iya Kubalilapo ne ya Bubili yapwile, ifyalo fyalefwaya sana umutende. Pa numa ya Nkondo ya Calo iya Kubalilapo, bapangile akabungwe ka League of Nations pa kuti kalete umutende mu calo. Lyena, pa numa ya Nkondo ya Calo iya Bubili akabungwe ka United Nations kalipangilwe kabili balesubila ukuti e kalaleta umutende mu calo. Amabuteko na bashimapepo baasubila ukuti utu tubungwe e twingaleta umutende. Ku ca kumwenako, akabungwe ka United Nations kabilishe ukuti 1986 Mwaka wa Mutende. Muli ulya mwaka, bakateka na bashimapepo abengi balilongene pamo no mukalamba we Calici lya Katolika mu Assisi ku Italy ku kupepela umutende.

¹¹ Lelo ukubilisha kwa mutende no mutelelwe ukwa mu 1986 nelyo ukubilisha kumbi takwafikilisha ukusesema kwaba pali  1 Abena Tesalonika 5:3. Mulandu nshi? Pantu “ubonaushi bwa kupumikisha” tabwacitika.

12. Finshi twaishiba pa kubilisha kwa kuti “Umutende no mutelelwe”?

¹² Ni bani bakabilisha ukuti “Umutende no mutelelwe”? Finshi ifyo intungulushi sha batila Bena Kristu ne sha mu mipepele imbi shikacita ilyo kukaba uku kubilisha? Bushe bakateka bakacita shani? Baibolo tayalanda. Ico twaishiba ca kuti nangu bakabilisha ukuti kuli umutende no mutelelwe no kulenga camoneka kwati ca cine, uyu “mutende no mutelelwe” tawakabe wa cine cine. Pali ilya nshita, Satana ninshi acili aleteka cino calo cabipa. Icalo ca kwa Satana calibipa icine cine kabili cikaba fye ifi fine. Ala kuti cabipa sana nga twasumina ubu bufi bwa kwa Satana no kutendeka ukuipoosa mu fikansa fya calo!

13. Mulandu nshi bamalaika baikatilila imyela ya konawilako isonde?

¹³Belengeni Ukusokolola 7:1-4. Ilyo tulelolela ukufikilishiwa kwa mashiwi yaba pali 1 Abena Tesalonika 5:3, bamalaika ba maka balikatilila imyela ya bucushi bukalamba. Finshi balolela? Cimo icacindama ico balolela, kufwatika kwa kulekelesha ukwa basubwa, “abasha ba kwa Lesa wesu,” uko umutumwa Yohane alandilepo. * Ukufwatika kwa kulekelesha nga kwapwa, e lyo bamalaika bakalekelako ku myela ya konawilako isonde. Lyena, cinshi cikacitika?

14. Cinshi cilelangilila ukuti Babiloni Mukalamba ali no konaulwa nomba line?

¹⁴ Babiloni Mukalamba, ukupepa konse ukwa bufi, ali no konaulwa pantu alilinga ukonaulwa. “Abantu abengi kabili amabumba ya bantu, ne nko shonse na ba ndimi shonse,” tabakamwafwe. Ifilecitika filelangilila ukuti ali no konaulwa nomba line. (Ukus. 16:12; 17:15-18; 18:7, 8, 21) Tulomfwa pa milabasa no kutamba pa TV uko abantu balesuusha sana imipepele na bashimapepo. Na lyo line, intungulushi sha muli Babiloni Mukalamba bena tabamona ukuti ifintu fili no kubabipila. Ala uku kuibepa fye! Ilyo fye bakabilisha ukuti “Umutende no mutelelwe!” amabuteko yakemina imipepele yonse iya bufi mu kupumikisha fye kabili bakayonaula umupwilapo. Babiloni Mukalamba takatale abako na kabili! Kanshi te konaula fye inshita ukuba abatekanya ukulolela ukufikilishiwa kwa ifi fintu ifyacindama.—Ukus. 18:8, 10.

KUTI TWALANGA SHANI UKUTI TULATASHA PA KUTEKANYA KWA KWA LESA?

15. Mulandu nshi Yehova atekanishisha?

¹⁵ Nangu ca kuti abantu balisaalula ishina lya kwa Lesa, Yehova alitekanya, alalolela inshita yalinga iya kuti akacitepo cimo. Yehova tafwaya ukuti abafwaya ukumwishiba bakonaike. (2 Pet. 3:9, 10) Bushe na ifwe tufwaya ukuti abantu bakapusuke? Ilyo ubushiku bwa kwa Yehova bushilaisa, kuti twalanga ukuti tulatasha pa kutekanya kwakwe nga tulecita ifyakonkapo.

16, 17. (a) Mulandu nshi tulingile ukwafwila abanaka? (b) Mulandu nshi abanaka balingile ukwangufyanishisha ukubwelela kuli Yehova?

¹⁶Muleafwa abanaka. Yesu atile mulaba ukusekelela ukukalamba mu muulu impaanga imo iyalubile nga yasangwa. (Mat. 18:14; Luka 15:3-7) Yehova alibika sana amano kuli bonse abatemwa ishina lyakwe, nangu ca kuti pali ino nshita balinaka. Nga twa-afwa abantu ba musango uyu ukubwelela ku cilonganino, Yehova na bamalaika balasekelela.

¹⁷ Bushe na imwe pali ino nshita mwalileka ukubombela Lesa? Nalimo ico mwalekela, mulandu wa kuti umuntu umo mu cilonganino alimukalifye. Apo nomba napapita inshita, yipusheni amuti: ‘Bushe  ifintu fyalingwamina pali ino nshita kabili bushe naliba ne nsansa sana? Bushe ni Yehova e wankalifye, nelyo muntu uushapwililika? Bushe Yehova Lesa alibala ankalifyapo?’ Yehova lyonse alatucitila ifisuma. Nangu ca kuti pali ino nshita tatulebombela Yehova nge fyo twamulaile, na lyo line alatupeela ifintu ifisuma. (Yako. 1:16, 17) Ubushiku bwa kwa Yehova buli mupepi sana. Ino e nshita ya kubwelela kuli Shifwe uwaba no kutemwa na ku cilonganino cakwe, umo fye twingacingililwa.—Amala. 33:27; Heb. 10:24, 25.

18. Mulandu nshi tulingile ukulatungilila abatutungulula?

¹⁸Muletungilila abaletungulula. Yehova, Kacema musuma, alatutungulula no kutucingilila. Alisonta Umwana wakwe ukuba Kacema Mukalamba uwa mpaanga shakwe. (1 Pet. 5:4) Baeluda ababa mu filonganino ukucila pali 100,000 balacema impaanga imo na imo iya kwa Lesa. (Imil. 20:28) Nga tuletungilila abo Lesa asonta, ninshi tulelanga ukuti tulatasha pali fyonse ifyo Yehova na Yesu batucitila.

19. Finshi tufwile ukucita pa kuti tupalame kuli bamunyinefwe?

¹⁹Mulepalama ku Bena Kristu banenu. Bushe cipilibula nshi ukupalama ku Bena Kristu banenu? Nga ca kutila abashilika abakanshiwa bwino babasansa ku balwani, abashilika balapalamana. Nga bacita ifi, cilafya ku balwani ukubacimfya. Satana naima apasweka ukusansa abantu ba kwa Lesa. Ino te nshita ya kulalwishanya na bamunyinefwe. Lelo ni nshita ya kupalama kuli bamunyinefwe, ukusuulako ku filubo fyabo, no kucetekela ubutungulushi bwa kwa Yehova.

20. Finshi ifyo tufwile ukulacita pali ino nshita?

²⁰ E ico, natutwalilile ukuba abalola no kuba abatekanya. Natube abatekanya ilyo tulelolela ukuti bakabilishe abati “Umutende no mutelelwe!” e lyo no kukakatikwa kwa kulekelesha ukwa basalwa. Pa numa, bamalaika bane bakalekelako ku myela ya bonaushi kabili Babiloni Mukalamba akonaulwa. Ilyo tulelolela ifi fintu ifyacindama ukucitika, natulekonka ubutungulushi bwa baume abo Yehova asonta ukutungulula icilonganino. Natupalame kuli bamunyinefwe pa kuti Satana ne fibanda bekwata apa kwingilila! Ino e nshita ya kumfwila ukufunda ukwa waimbile amalumbo uwatile: “Koseni, kabili lekeni imitima yenu ishipe, imwe bonse mwe balolela Yehova.”—Amalu. 31:24.

[Futunoti]

[Ifipusho]

[Ifikope pe bula 12]

Abantu ba kwa Yehova balesha na maka ukwafwa bonse abanaka ukubwelela kuli Yehova (Moneni paragrafu 16 na 17)

[Icikope pe bula 14]

Ino ni nshita ya kupalama kuli bamunyinefwe pa kuti Satana ne fibanda bekwata apa kwingilila (Moneni paragrafu 19)