‘Ica Kulya Candi Kucita Ukufwaya kwa kwa Lesa’
Cinshi cilenga ukuti muleba sana ne nsansa? Bushe cupo, ukukwata ulupwa, nelyo ukukwata icibusa? Mufwile mulatemwa sana ukuliila ica kulya pamo ne fibusa. Apo muli babomfi ba kwa Yehova mufwile mwalimona ukuti ukubombela Lesa, ukusambilila Icebo cakwe, no kushimikila imbila nsuma kulalenga mwaba ne nsansa.
Mu lwimbo Imfumu Davidi yaimbiile Kabumba, yatile: “Ku kucita ukufwaya kwenu, mwe Lesa wandi, e ko natemwa, na mafunde yenu yaba mu mutima wandi.” (Amalu. 40:8) Nangu ca kuti Davidi alekwata amafya, alitemenwe sana ukucita ukufwaya kwa kwa Lesa. Kwena te Davidi fye eka pa babomfi ba kwa Yehova uwatemenwe ukubombela Lesa.
Umutumwa Paulo alandile pa mashiwi yaba pa Amalumbo 40:8 ukuti yalelosha kuli Mesia, nelyo Kristu. Paulo atile: “E ico pa kwisa pano calo, [Yesu] atila: ‘“Tamwalefwaya ilambo no mutuulo, lelo mwampekanishishe umubili. Tamwatemenwe imituulo iituntulu iya koca no mutuulo wa pa lubembu.” E lyo natile: “Moneni! Naisa (filya Amalembo yalanda pali ine) ku kucita ukufwaya kwenu, mwe Lesa.”’”—Heb. 10:5-7.
Ilyo Yesu ali pano calo, alitemenwe ukutamba ububumbo, ukuba pamo ne fibusa, no kuliila pamo na bantu fye bambi ifya kulya. (Mat. 6:26-29; Yoh. 2:1, 2; 12:1, 2) Lelo ico abikileko amano kabili ico atemenwe sana kucita ifyo Wishi wa ku muulu alefwaya. Na kuba Yesu atile: “Ica kulya candi kucita ukufwaya kwa wantumine no kupwisha umulimo wakwe.” (Yoh. 4:34; 6:38) Yesu alisambilishe abasambi bakwe ifyali no kulenga baba ne nsansa sana. Ici calengele ukuti baleitemenwa ukubila imbila nsuma ya Bufumu.—Luka 10:1, 8, 9, 17.
‘KABIYENI KALENGENI ABANTU UKUBA ABASAMBI’
Yesu aebele abasambi bakwe ati: “Kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo, mulebasambilisha ukulakonka fyonse ifyo namwebele. Kabili, moneni! nakulaba na imwe inshiku shonse mpaka na ku mpela ya calo.” (Mat. 28:19, 20) Pa kuti tucite ifi alandile tufwile ukulashimikila ku bantu konse uko twabasanga, no kulabwelela ku balefwaya ukwishibilapo na fimbi, e lyo no kulatungulula amasambililo ya Baibolo. Ukubombako uyu mulimo kuti kwalenga twaba ne nsansa nga nshi.
Ukutemwa Yehova na bantu banensu kuti kwalenga twatwalilila ukushimikila nangu abantu balekaana ukumfwa
Nga tulemona uyu mulimo ukuti walicindama tukalaba ne nsansa ilyo tuleubomba, nangu abantu bakutike ku mbila nsuma nelyo bakaane. Mulandu nshi tushilekela ukushimikila nangu ca kuti limo tulasanga abantu abashifwaya ukukutika? Pantu twalishiba ukuti nga tuleshimikila imbila nsuma no kupanga abasambi ninshi twalitemwa Lesa na bantu banensu. Na kuba nga tatuleshimikila abantu kuti baisafwa ukubikako na ifwe bene. (Esek. 3:17-21; 1 Tim. 4:16) Lekeni tulande pa fintu fimo ifya-afwa aba bwananyina abengi ukutwalilila ukuba abacincila mu kushimikila nangu ca kutila bashimikila mu fifulo umo cayafya ukushimikila.
MULESHIMIKILA INSHITA YONSE IYO MWASHUKILA
Ukubomfya bwino ifipusho kuti kwalenga tuleshimikila bwino. Bushiku bumo, ba Amalia bamwene umwaume mu parka alebelenga inyunshipepala. Balipaleme no kumwipusha nga ca kuti mwali ilyashi ilisuma. Ilyo uyu mwaume akeene, ba Amalia batile, “Ndefwaya ukumwebako ilyashi ilisuma pa Bufumu bwa kwa Lesa.” Ici calengele uyu mwaume ukufwaya ukumfwilapo na fimbi, kabili alisumine ukulasambilila Baibolo. Ba Amalia balitendeke amasambililo ya Baibolo yatatu mu parka.
Ba Janice balashimikila pa ncito. Ilyo malonda no munankwe batemenwe icipande cimo mu Ulupungu lwa kwa Kalinda, ba Janice balaile ba malonda ukuti bakulabatwalila magazini lyonse. Ifi fine e fyo bacitile na ku muntu na umbi uo babomba nankwe uwatemenwe sana amalyashi ayaba mu Ulupungu lwa kwa Kalinda na Loleni! Ici calengele ukuti na umbi afwaye ukulamutwalilako magazini. Ba Janice batile: “Ala Yehova alimpaala!” Ba Janice basukile bakwata abantu 11 abo baletwalila magazini lyonse.
MULETONTONKANYA PA FISUMA IFINGAFUMAMO
Kangalila wa muputule umo alekoselesha bakasabankanya ukuti ilyo baleshimikila ku ng’anda ne ng’anda, belapelela fye pa kweba abo baleshimikilako ukuti bakabwelelako. Lelo bafwile ukwipusha umuntu ukuti: “Bushe kuti mwatemwa nkabwele na kabili pa kuti nkamulange ifyo tusambilila Baibolo?” nelyo kuti mwatila, “Bushiku nshi ne nshita iyo mwingatemwa ukuti nkabwele pa kuti tukeselanshanya na fimbi?” Kangalila wa muputule atile ukucita ifi kwalengele bamunyina na bankashi mu cilonganino cimo ukutendeka amasambililo ya Baibolo 44 mu mulungu fye umo.
Calicindama ukubwelela bwangu ku bantu mwashimikileko, nangu fye ni pa numa ya nshiku ishinono. Mulandu nshi? Ukucita ifi kulanga ukuti tulafwaisha ukwafwa abafwaya ukwishibilapo na fimbi pali Baibolo. Umwanakashi umo ilyo bamwipwishe icalengele ukuti asumine ukulasambilila Baibolo na ba Nte atile: “Icalengele ntendeke ukusambilila mulandu wa kuti nalimwene ukuti balimbikileko sana amano kabili balintemenwe.”
Kuti mwaipusha umuntu amuti: “Bushe kuti mwatemwa nkabwele na kabili pa kuti nkamulange ifyo tusambilila Baibolo?”
Ilyo ba Madaí basangilwe kwi Isukulu lya Bapainiya tapakokwele batendeke ukutungulula amasambililo ya Baibolo 15, kabili balipeeleko bakasabankanya bambi amasambililo yambi yasano. Abengi abo balesambilila nabo Baibolo balitendeke ukulongana. Cinshi calengele ukuti ba Madaí bakwate amasambililo ayengi? Ilyo bali ku sukulu basambilile ukuti bafwile ukulabwelela ku bantu bashimikilako abalefwaya ukusambilila. Nkashi na umbi uwasambilila na bantu abengi icine ca mu Baibolo atile, “Nalisambilila ukuti calicindama sana ukulabwelela ku bantu abo tushimikilako pa kuti tubafwe ukwishiba Yehova.”
Ukubwelela bwangu ku bantu twashimikileko kulanga ukuti twalitemwa abalefwaya ukusambilila Baibolo
Pa kuti tulebwelela kubo twashimikilako na pa kuti tuletungulula amasambililo ya Baibolo, tulingile ukubombesha. Kabili ififumamo filawama icine cine. Nga tulebombesha ukusambilisha abantu pa Bufumu kuti twabafwa “ukwishiba bwino bwino icine,” ne ci kuti calenga baisapusuka. (1 Tim. 2:3, 4) E lyo kuti calenga na ifwe twaba sana ne nsansa.
