Amepusho Ukufuma ku Babelenga
Yesu aebele abaSaduke ukuti abakabuuka “tabakaleupa nangu kuupwa.” (Luka 20:34-36) Bushe Yesu alelanda pa bakabuukila pano isonde?
Ici cipusho nacicindama sana, maka maka kuli bonse abafwilwa abena mwabo. Pantu nalimo balafwaisha ukwisaba pamo na baali abena mwabo mu calo cipya nga babuuka. Umwaume umo uo umukashi afwa atile: “Ine no mwina mwandi tatwalefwaya ukuti icupo cesu cipwe. Twalefwaisha ukutwalilila ukulapepela Lesa pamo umuyayaya. Ifi fine e fyo mfwaisha ukuti cikabe ku ntanshi.” Bushe kwaliba ifingalenga tucetekele ukuti abakabuuka ku bafwa bakoopa nelyo ukuupwa? Kuti twatila fye tatwaishiba bwino icasuko.
Pa myaka iingi impapulo shesu shilanda ukuti amashiwi ayo Yesu alandile pa kubuuka na pa kuupa nelyo ukuupwa yalosha kubakabuukila pano isonde no kuti abakabuuka tabakaleupa nelyo ukuupwa. * (Mat. 22:29, 30; Marko 12:24, 25; Luka 20:34-36) Nangu ca kuti tatulelanda ukuti ifi fine e fyo cikaba, bushe kuti caba fye bwino ukulanda ukuti Yesu alelanda pa bakabuukila ku muulu? Natulande pa mashiwi Yesu alandile.
Moneni icalengele ukuti Yesu alande aya mashiwi. (Belengeni Luka 20:27-33.) AbaSaduke, abashasumine mu kubuuka kwa bafwa balefwaya ukwesha Yesu ilyo bamwipwishe icipusho pa kubuuka kwa bafwa na pa cupo ca kuupana pali bumulamu. * Yesu ayaswike ati: “Abantu ba muli cino calo baloopa no kuupwa, lelo abalinga ukubako muli ilya nshita iikesa no kubuuka ku bafwa bena tabakaleupa nangu kuupwa. Na kuba, tabakalefwa, pantu bakaba nga bamalaika, kabili bakaba abana ba kwa Lesa ilyo bakabuuka.”—Luka 20:34-36.
Mulandu nshi impapulo shesu shilandila ukuti Yesu nalimo alelanda pa kubuuka kwa pano isonde? Kwaliba ifintu fibili ifyalenga ukuti impapulo shesu shilande ifi. Ica kubalilapo ca kuti, cimoneka kwati ilyo abaSaduke baleipusha Yesu, baletontonkanya pa kubuuka kwa pano isonde kabili nga ca kuti ifi e fyo baletontonkanya ninshi Yesu alibaswike fye bwino. Ica bubili, ilyo Yesu alebasuka alandile na pali Abrahamu, Isaki, na Yakobo, abantu abacitetekelo abakabuuka no kwikala pano isonde.—Luka 20:37, 38.
Lelo cimoneka kwati Yesu alelanda pa bakabuukila ku muulu. Cinshi calenga ukuti tulande ifi? Natulande pa mashiwi ayo Yesu alandile.
“Abalinga . . . ukubuuka ku bafwa.” Abasubwa ababa ne cishinka ‘balilinga ukuba mu Bufumu bwa kwa Lesa.’ (2 Tes. 1:5, 11) Balilungamikilwa ku citetekelo pa mulandu wa cilubula; kanshi tabafwa nga baba no mulandu wa lubembu. (Rom. 5:1, 18; 8:1) Aba babeta ukuti ‘balipaalwa kabili ba mushilo’ kabili balilinga ukubuukila ku muulu. (Ukus. 20:5, 6) Lelo pa bakabuukila pano isonde pakaba na “bashalungama.” (Imil. 24:15) Bushe nabo kuti twatila “balilinga” ukubuuka ku bafwa?
“Tabakalefwa.” Yesu talandile ukuti: “Tabakafwe.” Lelo alandile ukuti “Tabakalefwa.” AmaBaibolo yambi yapilibula ili shiwi ukuti “tabengafwa” no kuti “te kuti bafwe.” Abasubwa nga bafwa aba cishinka kuli Yehova bakabuukila ku muulu kabili tabakalefwa, bakaba no mweo wa muyayaya. (1 Kor. 15:53, 54) Bonse ababuukila ku bumi bwa ku muulu tabafwa. *
Ukulingana ne fi twalandapo, kanshi kuti twatila fye amashiwi Yesu alandile pa kuupa no kubuuka yalelosha ku bakabuukila ku muulu. E co amashiwi ayo alandile, kuti yatweba ifingi pa bakabuukila ku muulu. Taboopa, tabafwa kabili baba nga bamalaika, abekala mu bwikalo bwa mipashi. Ifi twalanda kuti fyalenga abantu baipusha amepusho ayengi.
Ica kubalilapo, mulandu nshi Yesu alandile pa kubuukila ku muulu ilyo aleasuka abaSaduke, abo nalimo baletontonkanya pa kubuuka kwa pe sonde? Te lyonse Yesu aleasuka abalemukaanya ukulingana ne fyo baletontonkanya. Ica kumwenako, aebele abaYuda abalefwaya abapeele icishibilo ukuti: “Bongololeni itempele ili, kabili nkalimya mu nshiku shitatu.” Nalimo Yesu alishibe ukuti baletontonkanya pe tempele ilyo bakuulile, “lelo itempele alelandapo mubili wakwe.” (Yoh. 2:18-21) Nalimo Yesu amwene fye kuti talingile ukwasuka balya abaSaduke abaali no bumbimunda, pantu tabasumine ukuti kukaba ukubuuka nelyo ukuti bamalaika e ko baba. (Amapi. 23:9; Mat. 7:6; Imil. 23:8) Lelo alefwaya ukusokolola icine pa kubuuka kwa ku muulu pa kuti abasambi bakwe basambilileko pantu bena bushiku bumo baali no kubuukila ku muulu.
Ica bubili, mulandu nshi pa kulekelesha Yesu alandile pali Abrahamu, Isaki, na Yakobo abakabuukila ku bumi bwa pe sonde? (Belengeni Mateo 22:31, 32.) Ilyo Yesu talalanda pali ifi fikolwe, abalilepo amashiwi ya kuti “pa mulandu wa kubuuka kwa bafwa.” Aya mashiwi Yesu alandile yalelosha ku kubuuka kumbi. Ilyo alandile pa fyo Mose alembele ifyo na baSaduke balelanda ukuti balisuminemo, Yesu abomfeshe amashiwi ayo Yehova aebele Mose pa cimpusa icalepya pa kuti akoshe icishinka ca kuti abantu bakabuuka pe sonde pantu e fyo Lesa umwine afwaya.—Ukufu. 3:1-6.
Ica butatu, nga ca kuti filya Yesu alandile pa kubuuka no kuupa nelyo kuupwa alelosha ku bakabuukila ku muulu, bushe aloseshe mu kuti abakabuukila pano isonde bakopa nelyo ukuupwa? Icebo ca kwa Lesa tacalandapo mu kulungatika. Na kuba, nga ca kuti Yesu alelanda pa kubuukila ku muulu, ninshi kanshi talandile nga ca kuti abakabuukila pe sonde bakoopa nelyo ukuupwa.
Lelo twalishiba ifyo Icebo ca kwa Lesa calanda ukuti imfwa ilapwisha icupo. Kanshi abafwilwa abena mwabo tabafwile ukutiina nga bafwaya ukuupa nelyo ukuupwa na kabili. Abene e bafwile ukupingulapo, kabili nga bapingulapo ukuupa nelyo ukuupwa na kabili tatufwile ukubapeela umulandu.—Rom. 7:2, 3; 1 Kor. 7:39.
Kwena nalimo tulafwaya ukwishiba ifingi pa fyo imikalile ikaba mu calo cipya. Mu nshita ya kulatontonkanya pali ifi fipusho ifyo te kuti tumfwikishe, tufwile ukulolela pa kuti tukamone ifikacitika. Lelo tufwile ukwishiba ici: Abantu abacumfwila bakaba ne nsansa, pantu Yehova akabapeela fyonse ifyo bakabila mu nshila iisuma.—Amalu. 145:16.
^ par. 4 Moneni Ulupungu lwa kwa Kalinda ulwa mu ciNgeleshi ulwa June 1, 1987, amabula 30-31.
^ par. 5 Ku kale, kwaleba icupo ca pali bumulamu e kutila, ukulingana no lutambi umwaume aleupa umukashi wa kwa ndume nankwe nga ca kuti afwa ukwabula ukufyalamo umwana umwaume uwakupyana ishina lya kwa munyina pa kuti liloba mu lupwa.—Ukute. 38:8; Amala. 25:5, 6.
^ par. 9 Bonse abakabuukila pe sonde bakaba no mweo wa muyayaya, lelo te mweo uushifwa. Nga mulefwaya ukwishibilapo na fimbi pa bupusano bwaba pa mweo uushifwa no mweo wa muyayaya, moneni Ulupungu lwa kwa Kalinda ulwa mu ciNgeleshi ulwa April 1, 1984, amabula 30-31.
