1, 2. (a) Finshi ifyo mufwaisha ukwisaipakisha mu calo cipya? (Moneni icikope icili pa muulu.) (b) Mapaalo nshi aya ku mupashi ayo tukakwata mu calo cipya?

FINSHI mutontonkanyapo nga mwaumfwa amashiwi ya kuti “umweo wine wine”? Fwe bengi tutontonkanya pa mweo wa muyayaya uo tukakwata mu Paradaise pano isonde. Na kuba, umutumwa Paulo alangilile ukuti “umweo wa muyayaya” e “mweo wine wine.” (Belengeni 1 Timote 6:12, 19.) Tulalolela inshita ilyo tukaba no mweo wa muyayaya uukalenga tukabe ne nsansa nga nshi. Pali nomba te kuti twelenganye bwino ifyo tukalaumfwa ukushibuka cila lucelo ukwabula ukumfwa nangu cimo icilekalipa. (Esa. 35:5, 6) Elenganyeni ifyo cikawama ukuba pamo na balupwa e lyo na banensu abo twatemwa, ukubikako fye na bonse abakabuushiwa! (Yoh. 5:28, 29; Imil. 24:15) Tukatwalilila no kusambilila na fimbi pali sayansi, pa nyimbo, pa fya makuule e lyo na fimbipo.

² Nangu ca kuti tulafwaisha ukwisaikala bwino, icacindama sana ico tufwaisha mu calo cipya kwisaba ifibusa fisuma ifya kwa Lesa. Ala cikawama nga nshi ilyo ishina lya kwa Yehova likaba ilya mushilo, kabili ilyo bonse bakeshiba ukuti Lesa e  walinga ukuteka! (Mat. 6:9, 10) Tukaba ne nsansa ukumona uko ifyo Yehova alefwaya abantu ne sonde ukuba fikalafikilishiwa. Elenganyeni ifyo cikatwangukila ukupalama kuli Yehova ilyo tukaya tulepwililika!—Amalu. 73:28; Yako. 4:8.

3. Finshi tufwile ukulacita ilyo tulelolela impela ya cino calo?

³ Ifi fyonse twalandapo fikafikilishiwa nangu cibe shani pantu Yesu atile, “Lesa kuti acita ifintu fyonse.” (Mat. 19:25, 26) Nga tulefwaya ukwisaikala mu calo cipya, e lyo no kwikala umuyayaya pa numa ya myaka 1,000 iya kuteeka kwa kwa Kristu, ino e nshita tufwile ‘ukwikatisha’ ku mweo wa muyayaya. Ilyo tulelolela impela ya cino calo cabipa, tufwile ukulaipekanishisha ukwikala mu calo cipya. Nomba apo twikala muli cino calo cabipa, kuti twaipekanya shani?

4. Langilileni ifyo twingacita pa kuti tuipekanye ukwisaikala mu calo cipya.

⁴ Bushe kuti twacita shani pa kuti tuipekanye ukwisaikala mu calo cipya ica kwa Lesa? Natulangilile. Bushe kuti mwaipekanya shani nga ca kuti mulefwaya ukukuukila ku calo cimbi? Nalimo kuti mwatendeka ukusambilila ululimi balanda ne ntambi isha kuli ico calo. E lyo kuti mwalyako ne fya kulya fimo ifyo balya muli ico calo. Nga mwacita ifi, kuti caba kwati namutendeka kale ukwikala muli ico calo. Pantu na kuba, ifyo fine e fyo mukalaikala ilyo mu kakuukilako. Ifi fine e fyo na ifwe tufwile ukulaipekanishisha ukwikala mu calo cipya. Natulande pa fya kumwenako fimo.

5, 6. Bushe ukunakila ubutungulushi bwa kwa Lesa kuti kwatwafwa shani ukuipekanya ukwisaikala mu calo cipya?

⁵ Mu calo cipya, abantu bonse bakeshiba ukuti Lesa e walinga ukuteka isonde kabili bakalamumfwila. Muli cino calo ca kwa Satana, abantu bacita fye ifyo abene balefwaya. Nomba finshi fyafumamo? Apo abantu tabafwaya ukukonka amafunde ya kwa Lesa, calenga kwaba amafya ayakalamba no kucula. (Yer. 10:23) Ala tulafwaisha icalo cipya, umo abantu bonse bakalakonka amafunde ya kwa Yehova!

⁶ Tukatemwa nga nshi ukulatungululwa na Yehova ilyo tukalawamya isonde, ukusambilisha abakabuuka ku bafwa, e lyo no kulacita ifikalenga Yehova akafikilishe ifyo afwaya ukucitila abantunse. Nomba bushe tukacita shani nga batweba ukubomba umulimo uo nalimo tushakatemwe? Bushe tukakonka ifyo bakatweba no kubomba uyu mulimo no mweo onse? Fwe bengi kuti twayasuka ukuti ee! Lelo bushe pali ino nshita tulanakila ubutungulushi bwa kwa Lesa? Nga tulanakila, ninshi tuleipekanya ukwisaikala umuyayaya ilyo Yehova akalateka.

7, 8. (a) Mulandu nshi uo tufwile ukulaumfwila abatungulula mu cilonganino ca kwa Lesa? (b) Finshi fyayaluka kuli bamunyinefwe bamo? (c) Finshi twingacetekela ukuti e fikacitika mu calo cipya?

⁷ Ukunakila ubutungulushi bwa kwa Yehova kwalicindama ilyo tuleipekanya ukwisaikala mu calo cipya, lelo tulingile no kusambilila ukuteka umutima no kulabombela pamo na batungulula mu cilonganino ca kwa Lesa. Nga tulecita ifi, ninshi cikatwangukila na mu calo cipya ukulabomba ne nsansa imilimo yonse iyo bakalatupeela. (Belengeni AbaHebere 13:17.) Abena Israele babaakenye Icalo ca Bulayo ku cipendwilo. (Impe. 26:52-56; Yosh. 14:1, 2) Kwena pali ino nshita tatwaishiba uko bakatweba ukulaikala mu calo cipya. Lelo ukumfwila ifyo bakatweba kukalenga tukateke umutima, kabili tukaba ne nsansa nga  nshi ilyo tukalabombela Yehova konse uko bakatweba ukulaikala.

⁸ Amapaalo tukaipakisha ilyo tukalaikala mu calo cipya te kuti yalingane ne fyo tuipeelesha ilyo tulekonka ubutungulushi mu cilonganino ca kwa Yehova no kubomba umulimo onse uo batweba ukubomba. Kwena limo ifintu kuti fyayaluka, ku ca kumwenako, bamunyinefwe bamo abalebombela pa Bethel ya ku United States balibatuma ukulabombela mu filonganino ifyalekanaleka, kabili baliba ne nsansa nga nshi mu mulimo wa nshita yonse uo babomba. E lyo bamo abaali ba kangalila benda, balibatuma mu filonganino nga bapainiya baibela pa mulandu no mushinku e lyo ne fintu fimbi. Nga tuleteka umutima, tulepepa ukuti Lesa aletwafwa, e lyo tulebombesha na mu mulimo wakwe, tukaba sana ne nsansa kabili Lesa akatupaala nga nshi na muli shino shine inshiku shakulekelesha ishayafya. (Belengeni Amapinda 10:22.) Inga ku ntanshi cikaba shani? Nalimo tulelenganya uko tufwaisha ukuti tukekale mu calo cipya, nomba nalimo bakatweba ukuyaikala ku cifulo cimbi. Lelo te mulandu no ko tukalaikala e lyo ne milimo bakatupeela, tatutwishika ukuti tukaba ne nsansa nga nshi.—Nehe. 8:10.

9, 10. (a) Ni muli finshi tukakabila ukuba abatekanya mu calo cipya? (b) Kuti twalanga shani ukuti twalitekanya?

⁹ Mu calo cipya kukalaba inshita ilyo tukalakabila ukuba abatekanya. Natulangilile, nalimo kuti twaumfwa ukuti ba lupwa ne fibusa fya banensu bamo nababuuka ku bafwa, lelo ba lupwa lwesu tabalabuushiwa. Pali iyi nshita tukakabila ukuba abatekanya ilyo tulelolela ba lupwa lwesu ukubuuka. Ifi nga fikacitika, bushe tukalasekelela na banensu abo abantu babo bakabuuka ilyo tulelolela abantu besu ukubuuka? (Rom. 12:15) Nga ca kuti tuleesha na maka ukuba abatekanya ino ine nshita, ninshi na mu calo cipya tulatekanya.—Luk. Mil. 7:8.

¹⁰ Na kabili kuti twaipekanya ukwisaikala mu calo cipya nga ca kuti tuli abatekanya ilyo kwaba ukwaluka mu fyo twaishiba icine. Bushe nga kwaba ubulondoloshi ubupya, tulabelenga no kufwaisha ukubwishiba? Bushe tulatekanya nga ca kuti tatumfwikishe? Nga ca kuti tulatekanya, ninshi na mu calo cipya mwine tukalatekanya ilyo Yehova akalatweba ifyo alefwaya ukuti tucite.—Amapi. 4:18; Yoh. 16:12.

11. Cinshi Yehova atusambilisha pa fyo tufwile ukulacita ku bantu banensu, kabili ukucita ifi kukalenga tukaleikala shani mu calo cipya?

¹¹ Cimbi ico tufwile ukulacita pa kuti twingaipekanya ukwisaikala mu calo cipya kulaelela bambi. Ilyo Kristu akalateka pa myaka 1,000, pakapita inshita pa kuti abalungama na bashalungama bakapwililike. (Imil. 24:15) Bushe tukalaelela abantu banensu nga batulufyanya? Nga ca kuti pali ino nshita tuleelela, kabili tatwenda ne cikonko ku mukoshi, ninshi na mu calo cipya mwine cikatwangukila ukulaelela abantu banensu.—Belengeni Abena Kolose 3:12-14.

12. Mulandu nshi tufwile ukuipekanishisha ino ine nshita ifyo tukalaikala mu calo cipya?

¹² Tufwile ukwishiba ukuti ilyo tukalaikala mu calo cipya, tatwakalekwata fyonse fye ifyo tulefwaya kabili pa nshita tulefifwailapo. Lelo tukalatasha pali fyonse ifyo Yehova akalatupeela no kuteka umutima kuli ifyo fine, kabili tukalanakila ubutungulushi bwakwe. Pali iyi nshita tukalakonka sana ifyo Yehova atusambilisha. Nga twakwatila kabeela imibele iisuma, tacakatwafye ukuba ne yi mibele mu calo cipya. Kanshi ifyo tucita muno nshiku fifwile  ukulakosha icitetekelo cesu ilyo tulelolela “icalo icikesa.” (Heb. 2:5; 11:1) Na kabili nga tuli ne mibele iyo Yehova atusambilisha, ninshi tulanga ukuti tulafwaisha ukwikala umuyayaya mu calo cipya ica kwa Lesa umukaba ubulungami.

13. Finshi tukabikako sana amano mu calo cipya?

¹³ Natulande pa cintu na cimbi icingatwafwa ukuipekanya ukwisaikala mu calo cipya. Nangu ca kuti Lesa alitulaya ukuti mu calo cipya mukaba ifya kulya ifingi nga nshi ne fintu fimbi ifyo tukafwaya, icikalenga ukuti tukabe sana ne nsansa kubika sana amano ku fya kwa Lesa. (Mat. 5:3) Mu calo cipya tukabika sana amano ku kubombela Yehova, kabili tukalasekelela nga nshi muli Yehova. (Amalu. 37:4) Nga ca kuti pali nomba tulebika amano ku fya kwa Lesa, ninshi tuleipekanishisha ukukwata umweo wine wine ku ntanshi.—Belengeni Mateo 6:19-21.

14. Finshi abacaice balingile ukupangila kabeela ukucita ifingalenga balatontonkanya pa mweo wa muyayaya?

¹⁴ Kuti twacita shani nga tulefwaya tuleba sana ne nsansa mu mulimo wa kwa Lesa? Cimo ico tulingile ukucita, kupangila kabeela ifyo tulefwaya ukucita mu mulimo wakwe. Nga ca kuti muli bacaice kabili mulafwaisha ukulabombesha mu mulimo wa kwa Yehova, kuti mwabelenga ifyebo twasabankanya ifilanda pa mulimo wa nshita yonse, no kupangila kabeela umulimo mwingabombako. * E lyo kuti mwaipusha na baabomba umulimo wa nshita yonse pa myaka iingi. Nga ca kuti mwasalapo ukuba mu mulimo wa nshita yonse, ninshi muleipekanishisha kabeela ifyo mukalabomba uyu mulimo mu calo cipya.

15. Finshi fimo ifyo twingapangila kabeela ukucita mu mulimo wa kwa Lesa?

¹⁵ Finshi tufwile ukupangila kabeela ukucita mu mulimo wa kwa Lesa? Kuti twapanga ukuwamyako inshila tushimikilamo, nelyo ukulaesha na maka ukumfwikisha no kulakonka amashiwi ya kwa Lesa ayatutungulula. Kuti twawamyako ifyo tubelenga no kusambilisha pa cintubwingi, e lyo ne fyo twasuka pa kulongana. Nga kuliko na mumbi umo tulemona ukuti tufwile ukuwamyako, tufwile ukucita ifyo fine. Ico tulelandapo ca kuti: Nga tulepangila kabeela ifyo tulefwaya ukucita mu mulimo wa kwa Lesa, tukaba abacincila mu mulimo wakwe, ne ci cikatwafwa ukuipekanya ukwisaikala mu calo cipya.

16. Mulandu nshi ukubombela Yehova kulengela tuleba ne nsansa?

¹⁶ Bushe nga tuleipekanya ifyo tukekala mu calo cipya ninshi tuleipusula ku fintu fya muli cino calo? Awe iyo! Pantu ukubombela Yehova e cintu icacindamisha icitulenga ukuba ne nsansa sana. Yehova tatupatikisha ukumubombela, kabili ico tumubombela te kufwaya fye ukuti akatupusushe mu bucushi bukalamba, lelo atubumbile ukuti tulemubombela, kabili tulaba ne nsansa sana nga tulemubombela. Ukutungululwa na Yehova, ukuba ifibusa fyakwe, e lyo ne cikuuku atulanga fyalicindama sana ukucila fye no bumi bwesu. (Belengeni Amalumbo 63:1-3.) Kwena tatulingile ukulalolela fye icalo cipya pa kuti tukamone ifyo Yehova akatupaala, pantu kale kale alitendeka ukutupaala ilyo tumubombela no mweo onse! Ici ca cine, pantu ababombela Yehova pa myaka iingi balimona ifyo Yehova abapaala, kabili baliimwena ukuti takwaba icingalenga umuntu ukuba ne nsansa sha cine cine ukucila pa kubombela Yehova.—Amalu. 1:1-3; Esa. 58:13, 14.

17. Finshi tukabikako sana amano mu Paradaise?

¹⁷ Mu calo cipya tukalakwatako ne nshita ya kwangala no kucita ifintu ifisuma ifyo tulefwaya. Ici te kuti citupapushe pantu Yehova atubumbile ukuti tuleipakisha ubumi! (Luk. Mil. 2:24) Kanshi mu calo cipya, Yehova ‘akapeela ica mweo conse ifyo cilefwaya.’ (Amalu. 145:16) Tulaba ne nsansa nga ca kuti tulebika sana amano kuli bucibusa bwesu na Yehova, e lyo tulekwatako ne nshita ya kwangala no kutuusha. Ifi fine e fyo cikaba na mu Paradaise. Kanshi nangu ca kuti ukwangala kusuma, ino e nshita ya kuti tuletangisha Ubufumu intanshi no kubika sana amano ku mapaalo Yehova atupeela. Ukucita ifi kuti kwatwafwa ukuipekanya ifya kwisaikala mu calo cipya.—Mat. 6:33.

18. Finshi tufwile ukulacita pa kuti tuleipekanishisha ukwikala umuyayaya mu Paradaise?

¹⁸ Ilyo tukalaikala mu Paradaise, tukaba ne nsansa isho tushabala atukwatapo. Kanshi kuti twalanga ukuti tulafwaisha ukwikala mu calo cipya nga ca kuti tuleipekanishisha libeela ino ine nshita. E ico natuleesha na maka ukukwata imibele iyo Abena Kristu bafwile ukukwata no kulabomba ne nsansa umulimo wa kushimikila uo Yehova atupeela. Natutwalilile ukuba ne citetekelo cakosa mu malayo ya kwa Yehova no kusambilila ukwikala ifyo tukalaikala mu calo cipya!