BAMAYO balinjipwishe abati: “Cinshi kanshi ushilefwaila ukulapepa ifikolwe fyobe? Bushe tawaishiba ukuti ifikolwe e fyalenga ukuti ube no mweo? Ufwile ulefipepa pa kuti ulelanga ukuti ulatasha. Bushe kwena kuti wasuula shani intambi sha kale na kale isha fikolwe fyesu? Ifi ulekaana ukucindika ifikolwe fyesu ninshi ulelosha mu kuti ukupepa kwesu te kupepa kwine kwine.” Pa numa ya kulanda aya mashiwi, bamayo batendeke ukulila, ala balililile nga nshi!

Bamayo tababalile abalanda na ine muli uyu musango. Pantu na kuba e balengele ukuti ntendeke ukusambilila Baibolo. Pa kubalipo ba Nte balefwaya ukuti balesambilisha bamayo, nomba bamayo tabalefwaya, e ico baebele ba Nte ukuti balensambilisha. Lyonse naleumfwila bamayo, lelo ili lyena calinkosele, nalikeene ukucita ifyo balefwaya, pantu nalefwaya ukusekesha Yehova. Yehova abula ku ngafwa, nga nshakeene ukucita ifyo abafyashi balefwaya.

Abena Japan abengi ba Buddha, kanshi na ifwe bene e ko twalepepa. Ilyo papitile fye imyeshi ibili ukutula apo natendekeele ukusambilila Baibolo ne Nte sha kwa Yehova, nalishininkiishe ukuti ifyalembwa mu Baibolo e cine. Ilyo naishibe ukuti kwaliba Shifwe wa ku muulu, nalefwaisha ukumwishiba. Naleshimikilako bamayo ifyo nalesambilila, kabili nalitendeke ukulaya mu kulongana pa Mulungu ku Ng’anda ya Bufumu. Ilyo nasambilile ifingi ifya mu Baibolo, naishileeba bamayo ukuti naleka ukuba umu Buddha. Lelo ilyo nabebele fye, ifintu fyalitendeke ukubipa. Batile: “Camuseebanya sana ukukwata umuntu mu lupwa uwapata ifikolwe fyesu.” Kabili banjebele ukuti indeke ukulasambilila Baibolo no kulaya mu kulongana. Nshaleenekela bamayo ukucita ica musango uyu! Balyalwike icine cine.

Mu Abena Efese icipandwa 6, nasambililemo ukuti Yehova afwaya ukuti ndenakila abafyashi bandi. Batata nabo bene bali ku lubali lwa bamayo. Pa kubalilapo, namwene ukuti nga nakonka ifyo banjebele, bali no kumfwa nga nabalondolwela ifyo nalefwaya, kabili pa ng’anda kuti paba umutende. E lyo kabili, ilyo ifi fyalecitika ninshi ndi pa kutendeka ukulemba amashindano ya kuya ku sekondari. E ico nalisumine ukucita ifyo banjebele pa myeshi itatu, lelo nalaile Yehova ukuti myeshi itatu nga yapwa fye, nkatendeka ukulongana na kabili.

Nalimwene ukuti ifyo napingwilepo ukucita tafyaweme. Ica kubalilapo, nalemona kwati tapali icali no ku ntalusha kuli Yehova pali iyi myeshi itatu. Lelo tapapitile ne nshita, natendeke ukumfwa ukuti bucibusa bwandi na Yehova nabutendeka ukonaika pantu nshalekwata ifya kulya fya ku mupashi nge fyo caleba lyonse. Ica bubili, bamayo na batata balinkenye ukulacita fyonse fye ifyakumine ukupepa kwa cine.

Kwali aba bwananyina abengi abo twalelongana nabo abo balekaanya kuli balupwa wabo, kabili balinkoseleshe sana, balenjeba ukuti Yehova ali no kunkosha. (Mateo 10:34-37) Balenkoselesha no kuti, nine nali no kwafwa aba mu lupwa lwandi pa kuti bakapusuke. E ico natendeke ukulapepa sana kuli Yehova pa kuti angafwe ukulashintilila pali ena.

Abafyashi bandi balecita ifyalekanalekana pa kuti ndeke ukupepa. Bamayo balempapaata, kabili baleesha na maka ukupelulushanya na ine. Lelo ilingi line naleikala fye tondolo. Limo nga nalandako, twaleumana, pantu bonse twalefwaya ukulanga ukuti ico twalelandapo e cishinka. Ino nshita imona ukuti kanshi nga naletontonkanya sana pa fyo bacindikiishe ifyo basumiinemo e lyo ne calengele ukuti bafulwe pa fyo napingwilepo ukucita, nalimo ifintu nga fyaliko eyefilwa. Abafyashi bandi batendeke ukumpeela imilimo iingi pa kuti nshilefuma pa ng’anda. E lyo limo limo balekoma mu ng’anda pa kuti nshingilemo, e lyo limo balentana ne fya kulya.

Bamayo balyebeleko na bantu bambi pa kuti babapandeko amano. Balyebeleko bakafundisha wandi, lelo tabalandilepo nangu cimo. Bamayo balintwele na ku mukalamba wa ncito uko balebomba uwanjebele ukuti imipepele yonse yacabecabe ukufumyako fye iya ba Buddha. E lyo baletumina na balupwa wabo amafoni pa kuti babafwe uku ninshi balelila no kulila. Calenkalipa sana pa fyo balecita, lelo baeluda ba mu cilonganino balenjeba ukuti ifi bamayo balecita, cimo no kuti balebila imbila nsuma ku bantu abo baleebako ili lyashi.

Ubwafya bumbi ubo nakwete bwa kuti abafyashi balefwaya ukuntwala ku yuniversiti pantu balefwaya ukuti nkekale bwino sana ku ntanshi. Balefwaya nkasambilile sana pa kuti nkalebomba incito iisuma. Ala ili lyashi lyalikosele ica kuti twalifililwe ukulanshanya bwino, e ico nalilembeele  batata na bamayo amakalata ayengi aya kubalondolwela ifyo nalepanga ukucita ku ntanshi. Batata balifulilwe sana ica kuti banjebele ukuti, “Nga ulemona kwati tacayafya ukusanga incito, ukaye mailo mu kufwaya incito, nga tawakaisange ukafume na pano ng’anda.” Nalipepele kuli Yehova ukuti angafwe. Ubushiku bwakonkelepo, ilyo nalebila imbila nsuma, nkashi umo anjebele ukuti alefwaya ukuti ndesambilisha umwana wakwe umunono ifya ku sukulu. Pa bushiku bumo bwine, nkashi na umbi ifi fine e fyo anjebele. Nangu ca kuti nalitendeke incito ya kusambilisha abana, batata tabatemenwe, balilekele no kunsosha. Bamayo bena balandile abati, kuti cawamapo naba mpulamafunde ukucila ukuba Inte ya kwa Yehova.

Limo limo naletontonkanya nati bushe kwena Yehova alefwaya ukuti ntwalilile ukukaana ukucita ifyo abafyashi bandi balefwaya? Ukupepa lyonse kuli Yehova no kutontonkanya pa fyalembwa mu Baibolo ifilanga ifyo Yehova aba no kutemwa kwalengele nilaumfwa sana ububi pa fyo abafyashi balecita, calengele njishibe no kuti ico balenkaanisha ni co balintemenwe. Yehova alingafwile ukukanasakamikwa sana, kabili alingafwile no kwishiba ifya kucita pa bwafya nakwete. Ukushimikila lyonse abantu imbila nsuma kwalengele ntemwe sana umulimo wa kubila. Ne ci calengele ukuti ndepanga ukuba painiya wa nshita yonse.

Ilyo bankashi bamo baishibe ukuti ndefwaya ukutendeka bupainiya, banjebele ukuti ndoleleko mpaka abafyashi bandi bakabweshemo umutima. Nalipepele kuli Yehova pa kuti ampeele amano, nalifwailishe ifyebo mu mpapulo shesu, nalitontonkenye pa co nalefwaila ukuba painiya, e lyo nalilandileko na ba bwananyina abakosa mu fya kwa Lesa pa kuti bampandeko amano. E ico nasondwelele ukucita ifingasekesha Yehova. Na kuba, natontonkenye ukuti ukukanatendeka bwangu bupainiya takwali no kulenga abafyashi baluke.

Ilyo kwashele umwaka umo ukuti mpwishe isukulu lya ku sekondari, nalitendeke bupainiya. Tapapitile nshita iikalamba ukutula apo natendekele bupainiya, natampile ukutontonkanya pa kuya mu kubombela ukwaba ukukabila ukulamba. Lelo bamayo na batata tabalefwaya ukuti mfume pa ng’anda. E ico naliloleleleko mpaka nakumanya imyaka 20. Pa kuti ntalalikeko bamayo umutima, nalembeele iofeshi lya musambo ukuti bakantume ku kapinda ka ku kulyo aka mu Japan ukwali balupwa wesu.

Ilyo nalebombela kuli ici citungu, Lesa alimpaalile nga nshi, nalitemenwe ukumona uko abasambi bandi abengi babatishiwe. Nalitendeke no kusambilila iciNgeleshi pa kuti ndeshimikila abantu abalanda iciNgeleshi. Mu cilonganino umo nali, mwali bamunyinefwe babili bapainiya baibela. Bali abacincila nga nshi, kabili baleyafwa abantu. Ici calengele ndefwaisha ukuba painiya waibela. Ilyo nali kuli ici citungu, bamayo balilwelepo imiku ibili, kabili pali iyi miku ibili iyo balwele sana nalile mu kubatensha. Ifyo nacitile fyalibapapwishe sana ica kuti balicefesheko ukunkanya ukubomba umulimo wa kwa Lesa.

Pa numa ya myaka 7, napokelele kalata iyafumine kuli munyinefwe Atsushi, umo pali balya bapainiya baibela abo nandilepo. Muli kalata munyinefwe atile alefwaya tukoopane. Nshatemenwe ba Atsushi ica kutila kuti nafwaya no kuupana nabo, kabili nshaletontonkanya no kutila kuti bantemwa. Ilyo papitile umweshi umo, nalibalembeele kalata, ukubeba ukuti cili fye bwino, kuti twatendeka ukwishishanya pa kuti twishibane bwino. Ilyo twaleishishanya, nalimwene ukuti ifingi ifyo batemwa, e fyo na ine natemwa. Bonse twalefwaya ukutwalilila mu mulimo wa nshita yonse no kubomba imilimo iili fye yonse iyo bengatupeela mu mulimo wa kwa Lesa. Mu kuya kwa nshita, twalyupene. Ala nalitemenwe nga nshi ilyo twakwete ubwinga pantu bamayo na batata e lyo na balupwa abengi balisangilweko!

Ilyo twalebomba bupainiya bwa nshita yonse, tapakokwele, ba Atsushi balibasontele ukuba bakaafwa kuli kangalila wa muputule. Mu kuya kwa nshita, balitusontele ukuba bapainiya  baibeela, kabili pa numa balitutumine mu kubombela mu mutupule. Pa numa ya kubombela ifilonganino fyonse mu muputule pa muku wa kubalilapo, aba kwi ofeshi lya musambo balitutumine foni no kutwipusha nga kuti twatemwa ukuya mu kubombela mu muputule ku calo ca Nepal.

Nshaishibe ifyo abafyashi bandi bali no kumfwa nga nabeba ukuti nali no kuya mu kubombela ukutali. Ilyo nabatumine foni, batata banjebele ukuti: “Ku calo ca Nepal uko mukaya kusuma sana.” Umulungu umo ilyo nshilatumina abafyashi foni, abanabo ba batata balibapeele icitabo umo balondolola ifyo icalo ca Nepal caba, kabili batata balepanga ukuya mu kutandala kuli ici calo.

Ilyo twalebombela ku Nepal ukwaba abantu abatemwa abantu banabo, Lesa alitupaalile na kabili. Batwebele ukulabombela ne filonganino ifyaba mu calo ca Bangladesh. Ici calo caba fye mupepi ne calo ca Nepal, lelo caliibela mu fintu ifingi. Twaleshimikila abantu imbila nsuma mu nshila shalekanalekana. Ilyo papitile imyaka 5, balitwebele ukubwelela ku Japan, uko twatwalilila ukubombela mu muputule.

Ukubombela mu calo ca Japan, Nepal e lyo ne calo ca Bangladesh kwalilenga nasambilila ifingi pali Yehova! Muli ifi fyalo mwaba intambi ne fishilano ifyalekanalekana kabili na bantu bene baliibela. Nalimona ifyo Yehova asakamana abantu bonse, alabasuminisha ukupalama kuli ena, alabafwa, no kubapaala alabapaala.

Yehova alimpaala pantu alilenga ukuti imwishibe, alimpeela umulimo wakwe, kabili alimpeela no mwaume uwaba ne mibele iyo Abena Kristu balingile ukukwata. Lesa alingafwa ukupingula bwino pa fintu, ino nshita ndi cibusa wa kwa Lesa kabili ndomfwana na bafyashi bandi. Ndatasha Yehova, pantu ine na bamayo nomba tulomfwana. Nalitemwa nga nshi pantu nomba ndi cibusa wa kwa Lesa kabili tulomfwana na bamayo.