Fundeni Abana Benu

Yoshia Asalilepo Ukucita Icalungama

BUSHE kuti watila calikosa ukucita icalungama? *— Nga wa-asuka ukuti ee calikosa, taulubile, pantu na bantu abengi kuti ba-asuka ifyo fine. Nangu fye bakalamba bene cilabakosela ukucita ifyo baishiba ukuti e fyalungama. Natumfwe icalengele ukuti cikosele sana Yoshia ukupingulapo ukucita ifyalungama. Bushe uyu wine Yoshia walimwishiba?—

Yoshia ali ni mwana Amone, imfumu ya mu Yuda, uwali fye ne myaka 16 pa nshita afyele Yoshia. Amone alibipile icine cine, kwati fye ni filya fine fyali wishi, Imfumu Manase. Na kuba Manase ali ni kateka wabipa pa myaka iingi. Nomba balimwikete ku bena Asiria no kumusenda ku Babiloni. Ilyo Manase ali mu cifungo, apapeete Yehova ukuti amubelele uluse, kabili Yehova na o alimubelele uluse.

Ilyo Manase bamufumishe mu cifungo, abweleele ku Yerusalemu no kuyatwalilila ukuba pa bufumu. Ilyo fye abwelelemo alyalwike, alekele ukucita ifyabipa kabili ayafwile na bantu ukwamba ukubombela Yehova. Afwile taumfwile bwino ilyo umwana wakwe Amone afililwe ukupashanya imibele yakwe iisuma. Iyi iine nshita e lyo na Yoshia afyelwe. Baibolo tayalandapo nampo Manase no mwishikulu wakwe Yoshia balelanshanya sana nelyo iyo. Lelo bushe ulemona ukuti Manase afwile alefunda Yoshia pa fya kubombela Yehova?—

Ilyo Yoshia ali fye ne myaka 6, Manase alifwile, kabili Amone wishi wa kwa Yoshia, e watendeke ukuteka. Amone atekeleko fye imyaka ibili na babomfi bakwe balimwipeye. Yoshia e pakuba imfumu ya baYuda ninshi ali fye ne myaka 8. (2 Imilandu, Icipandwa 33) Cinshi uletontonkanya ukuti e co Yoshia acitile? Bushe akonkele ifyo wishi uwabipa Amone acitile, nangu akonkele ica kumwenako cisuma ica kwa shikulu wakwe Manase uwalapiile?—

Nangu cingati Yoshia ali mwaice, alefwaisha ukubombela Yehova. E calengele alekutika ku batemenwe Yehova, ukucila ukukutika ku bali ifibusa fya  kwa wishi. Yoshia ali fye ne myaka 8, lelo alishibe ukuti ukukutika ku bantu abatemenwe Lesa e calungeme. (2 Imilandu 34:1, 2) Bushe kuti watemwa ukwishibapo fimo pa bantu bapandile Yoshia amano no kumulanga imibele isuma iya kukonka?—

Yoshia alepashanya sana kasesema Sefania. Uyu Sefania ali ni lupwa wa kwa Yoshia, pantu cimoneka kwati afyelwe kuli Hisekia wishi wa kwa Manase, uwali imfumu iisuma. Ilyo Yoshia atendeke ukuteka, Sefania alembele ibuuku lya ba mu Baibolo ilyo beta ati Sefania. Sefania asokele ukuti ifintu fyabipa fyali no kucitikila abashalecita ifyalungama, kabili Yoshia afwile alekutikisha ilyo Sefania alesoka.

Na umbi uo Yoshia alepashanya ali ni Yeremia uo nalimo waishiba. Yeremia na Yoshia bonse bali fye balumendo kabili bakulile mu ncende imo ine. Yehova abomfeshe Yeremia ukulemba ibuuku lyaba mu Baibolo ilyo beta ati Yeremia. Ilyo Yoshia bamwipeye mu nkondo, Yeremia ashikile ulwimbo lwa bulanda, ku kulanga ubulanda ubukalamba ubo akwete. (2 Imilandu 35:25) Kuti twaelenganya ifyo bafwile balekoseleshanya ukutwalilila aba cishinka kuli Yehova!

Finshi ulemona wingasambilila kuli Yoshia?— Nga ca kuti na iwe tawakwata bawiso ababombela Yehova, bushe takwaba umuntu umbi uwingakwafwa ukusambilila pali Lesa? Limbi walikwata banoko, basokulu nelyo banokokulu, nangu lupwa umbi. E lyo limbi muntu fye umbi uubombele Yehova, uo banoko bengasuminisha ukuti mulesambilila nankwe Baibolo.

Yoshia na o ali mwaice, lelo alishibe ukuti alingile ukupanga icibusa na bantu abalebombela Yehova. Na iwe, e fyo ufwile ukucita no kusalapo ukulacita icalungama!

[Futunoti]

Amepusho:

○ Wishi na shikulu wa kwa Yoshia bali ni bani, kabili bali shani?

○ Bushe shikulu wa kwa Yoshia acitile shani pa misango akwete?

○ Ni bakasesema nshi babili abo nalimo Yoshia alepashanya, kabili ulemona ukuti cinshi cawamina ukukwata ifibusa fya musango yu?

[Ifikope pe bula 25]

Bushe Sefania na Yeremia nalimo ba-afwile shani Yoshia ukulacita icalungama?