Fundeni Abana Benu

Yoashi Alekele Ukupepa Yehova pa Mulandu wa Kwangala na Babipa

KWALI inshita ifintu fya-afishe sana mu musumba wa Yerusalemu umwali ne tempele lya kwa Lesa. Iyi nshita ninshi e lyo fye baipeye Imfumu Ahasia. Kuti wapapa nga waishiba ifyacitile Atalia nyina wa mfumu Ahasia pa numa ya kwipaya umwana wakwe. Atalia aipeye na beshikulu bakwe, e kutila abana ba kwa Ahasia! Bushe nawishiba icalengele ukuti epaye aba bantu bonse?— Pantu alefwaya ukuba imfumu, kabili talefwaya aba bambi ukulatekako.

Nomba, kwali Yoashi umwishikulu umo uwa kwa Atalia, uwali fye akanya, uo bapuswishe kabili banakulu ba Atalia tabaishibe nakalya. Bushe kuti watemwa ukwishiba ifyo bamupuswishe?— Uyu mwana umunono alikwete banyinasenge abo baleita ati ba Yehosheba, kabili aba bene e bafishile Yoashi mwi tempele lya kwa Lesa. Bamufishile mwi tempele pantu abalume babo ba Yehoyada bali ni ba Shimapepo Mukalamba. Kanshi aba babili balecingilila Yoashi bwino bwino.

Pa myaka 6, Yoashi balimufishile mwi tempele. Ilyo ali pe tempele, balemusambilisha pali Yehova Lesa na pa mafunde yakwe. E ico ilyo Yoashi afikile imyaka 7, Yehoyada alimusendele no kumubika pa bufumu. Bushe kuti watemwa ukwishiba icalengele ukuti Yehoyada acite ifi, ne fyacitikile Atalia nakulu wa kwa Yoashi, uwali Namfumu wabipa?—

Ifyo Yehoyada acitile ni fi. Mu bumfisolo aitile abacingilila imfumu abo ishamfumu sha mu Yerusalemu shalekwata ilya nshita. Abebele ifyo ena no mukashi wakwe bapuswishe umwana munono uwa Mfumu Ahasia. Lyena Yehoyada abalangile umwana wine, kabili na bo bailwike ukuti e walingile ukuba imfumu. Kabili bapangile ne fya kucita.

Yehoyada afumishe Yoashi no kumufwike icisote ca mfumu. Ilyo abantu bamwene, “batendeke no kutoota abati: ‘Kalebalika mwe mfumu!’” Bakacingilila bashingulwike Yoashi pa kuti bamucingilile. Nomba ilyo Atalia aumfwile abantu balesangalala, alibutukiileko no kubalesha ifyo balecita. E ico Yehoyada aebele abalecingilila imfumu ukuti bepaye Atalia, nabo balimwipeye.—2 Ishamfumu 11:1-16.

Bushe ulemona kwati Yoashi alitwalilile ukulakutika kuli Yehoyada no kulacita  ifyalungama?—Ee, Yoashi ali ne cumfwila imyaka yonse iyo Yehoyada ali no mweo pano calo. Yoashi alibombeshe ica kuti na bantu baletele indalama sha kuwamisha itempele lya kwa Lesa, ilyo bawishi ba Ahasia pamo na bashikulu wakwe ba Yehoramu, balekeleshe. Nomba natumfwe ifyacitike lintu Shimapepo Mukalamba Yehoyada afwile.—2 Ishamfumu 12:1-16.

Iyi nshita ninshi Yoashi ali ne myaka nalimo 40. Mu nshita ya kuti aleangala na bantu abalebombela Yehova, Yoashi abikene icibusa na bantu abalepepa tulesa twa bufi. Pali iyi nshita, Sekaria umwana wa kwa Yehoyada e wali shimapepo wa kwa Yehova. Bushe ulemona kwati cinshi Sekaria acitile lintu aishibe ukuti Yoashi alecita ifintu fyabipa?—

Sekaria aebele Yoashi ukuti: “Apo namusha Yehova, na o akamusha.” Aya mashiwi yalengele ukuti Yoashi akalipe icine cine ica kutila aebele abantu ukuti bapoole Sekaria amabwe mpaka afwe. Tala tontonkanyapo—Yoashi uo bapuswishe ku walefwaya ukumwipaya, e waipeye Sekaria!—2 Imilandu 24:1-3, 15-22.

Bushe naumona amasambililo twingasambililako kuli ili lyashi?— Kwena tatufwile ukuba nga Atalia, uwapatile abantu bakwe kabili uwali umunkalwe. Lelo tufwile ukutemwa bakapepa banensu no kutemwa na balwani besu bene, pantu e fyo Yesu atufundile ukulacita. (Mateo 5:44; Yohane 13:34, 35) Kabili ibukisha ukuti nga twatendeka ukucita ifisuma, nga filya fyatampile Yoashi, tufwile ukutwalilila ukula-angala na bantu abatemwa Yehova abengalatukoselesha ukulamubombela.

[Futunoti]

Nga ca kuti mulebelengela capamo na bana, apo mulesanga bashilile fye ninshi mufwile mwalolelako pa kuti abana balandepo.

Amepusho:

○ Bushe ni bani balefwaya ukwipaya Yoashi kabili apuswike shani?

○ Cali shani pa kuti Yoashi abe imfumu, kabili fisuma nshi acitile?

○ Cinshi calengele ukuti Yoashi abe imfumu yabipa, kabili nani aipeye?

○ Finshi twingasambililako kuli ili lyashi lya mu Baibolo?

[Icikope pe bula 25]

Yoashi balimupuswishe