2 Sambilileni Icine Pali Lesa

“Pa kuti babe no mweo wa muyayaya, kano baishiba imwe mwe Lesa wa cine mweka.”—Yohane 17:3.

CINSHI CA-AFISHA UKUSAMBILILA PALI LESA? Abantu bamo batila takwaba Lesa. Bambi bamona ukwati Lesa te kuti eshibikwe bwino kabili alikwatisha sana amaka. Abasambilisha ati e ko aba basambilisha ifyapusanapusana pali ena na pa mibele akwata.

KUTI MWACITA SHANI PA KUTI MUSAMBILILE ICINE PALI LESA? Inshila imo iya kusambilililamo pali Lesa kumona ifintu ifyo apanga. Umutumwa Paulo atile: “Imibele [ya kwa Lesa], ukutula fye apo abumbile umuntu, bailukila ku fyo abumba, muli ifi e mo belukila amaka yakwe aya pe pamo na buLesa bwakwe.” (Abena Roma 1:20) Nga mwamona bwino bwino ifyo Lesa apanga, kuti mwasambilila ifingi pa mano na maka ya kwa Kabumba wesu.—Amalumbo 104:24, Esaya 40:26.

 Lelo, pa kuti umuntu eshibe bwino ifyo Lesa aba, afwile ukubuula Icebo ca kwa Lesa, Baibolo, no kuibelengela umwine. Mwileka bambi ukumusalilako ifyo mulefwaya ukusumina. Lelo, mulekonka ukufunda kwa mu Baibolo ukwa kuti: “Mwipalana no bwikashi buno, lelo mupilibuke pa kwalula amatontonkanyo yenu, pa kuti mushininkishe mwe bene ico Lesa afwaya, icisuma, icapokelelwa kabili icapwililika.” (Abena Roma 12:2) Moneni ifi fishinka ifyo Baibolo itweba pali Lesa.

Lesa alikwata ishina. Ishina lya kwa Lesa lyalesangwa imiku iingi mu Baibolo yonse. AmaBaibolo ayengi yalikwata ili ishina pa Amalumbo 83:18, apatila: “Ku kuleka beshibe ukuti imwe mweka, ishina lyenu Yehova, mwapulamo pano isonde ponse.”—E fyo yaba muli Baibolo ya Cibemba iya mu 1956.

Yehova Lesa alatemwa nangu ukukalipa ukulingana ne fyo abantunse balecita. Ilyo Yehova alubwile abantu ukufuma mu busha mu Egupti, limo balesuula ifyo alebeba. Ifi balemupondokela fyalemulenga ‘ukulunguluka.’ Ku fyo balecita “bakalifye Uwa mushilo wa kwa Israele.”—Amalumbo 78:40, 41.

Yehova alatusakamana umo umo. Yesu aebele abasambi bakwe ati: “Bushe tabashita inseba shibili mu kandalama akanono sana? Na lyo line takuli nangu lumo ulwingapona pa nshi ukwabula Shinwe ukwishiba. Lelo ne mishishi ya ku mitwe yenu yonse yalipendwa. E ico mwilatiina: Mwalicindama ukucila inseba ishingi.”—Mateo 10:29-31.

Lesa tacindamikapo abantu ba mu fyalo fimo ukucila aba mu fyalo fimbi. Umutumwa Paulo aebele abaGriki bali mu Atena ati “mu muntu umo e mo” Lesa “alengeele inko shonse isha bantunse, ukwikala pano isonde ponse.” Kabili atile Lesa “taba kutali kuli ifwe umo umo.” (Imilimo 17:26, 27) Umutumwa Petro atile: “Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—Imilimo 10:34, 35.

BUSUMA NSHI BWABA MU KUSAMBILILA PALI LESA? Bamo balikwata “ukupimpa kwa kubombela Lesa . . . lelo te kupimpa ukwalingana no kwishiba kwine kwine.” (Abena Roma 10:2) Nga mwaishiba ifyo Baibolo isambilisha pali Lesa, tabakamulufye lelo ‘mukapalama kuli Lesa.’—Yakobo 4:8.

Nga mulefwaya ukwishibilapo na fimbi, belengeni icipandwa 1 icitila “Bushe Lesa Aba Shani?” mu citabo citila Bushe Cinshi Baibolo Isambilisha? *

[Futunoti]

[Icikope pe bula 6]

Inshila imo iya kusambililamo pali Lesa kumona ifintu apanga