Kalata Ukufuma ku Russia

Ulwendo lwa Kuya “ku Mpela ya Calo”

INDEKE yesu iinono yaimine ukufuma pa Yakutsk kabili panono panono yalipupwike ukupita pe lungu lya Tuymaada Valley. Twapitile pa muulu wa mimana yalekanalekana iyali amenshi makaasa, e lyo twapitile na pa muulu wa mpili beta ati Verkhoyanskiy, isho bafimbile ku menshi makaasa kabili apo akasuba kalebalikila. Ilyo twaendele amakilomita 900, twasukile twafika pa mushi wa Deputatskiy.

Ulu lwali e lwendo lwa kubalilapo pa nyendo naendele mu calo ca Sakha Republic, ico beta no kuti Yakutia. Ici calo calikulapo pa fyalo fyaba ku Masamba ya Bulaya, kabili cisuma lelo imiceele yena yalibipa. Muli ici calo, nga kwati kukabe kulakaba icipesha amano kabili nga kwatalala mukwai cipesha mano kabili mu mushili mwaliba na mafupa ya nama ishikalamba ishaloba pali ino nshita. Nangu ca kuti napapita imyaka iingi apo natandalile kuli iyi ncende, na nomba ndebukisha fubefube iyali fye konse konse ica kuti no tumishi tatwalemoneka nakalya, no lubuuto lwa ku kapinda ka ku kuso lwalemoneka fye panono, ndebukisha na bena Yakutia aba nsansa nga nshi kabili abakosa.

Tatwapelele fye pa mushi wa Deputatskiy. Ine no munandi twali no kutandalila imishi na imbi. Umushi wa kubalilapo wali mushi wa Khayyr, uwali amakilomita 300 ukulola ku kapinda ka ku kuso, kabili wabelele mupepi na Bemba wa Laptev ku kapinda ka ku kuso aka Siberia. Cinshi twailiile kuli iyi mishi? Kwali Nte ya kwa Yehova uwaileshimikila kuli iyi mishi no kusanga abantu abengi abalefwaya ukusambilila Baibolo. Fwe bekala mu Yakutsk ni fwe twabelako mupepi na kuli iyi mishi, apaba amakilomita nalimo 1,000! Twatontonkenye ukuti aba bantu balekabila ukubakoselesha no kubafwa.

Ilyo twafikile mu Deputatskiy, twasangile umwaume uwali na motoka aleya ku Khayyr, kabili atile kuti atusendako nga twamupeelako ulupiya ulunono. Ilyo twamwene ifyo motoka yakwe yalemoneka, twalishimunwikeko, pantu yapangilwe kale sana kabili yali cisasa. Twatile natuninine fye iyi ine, awe e fyo twaimine, apa ninshi cali cungulo. Tatwaishibe nangu panono ifyali no kucitika.

Ifipuna muli motoka fyalitalele icine cine filya fine na pa mushili patalele, kabili twalishibe ukuti tafyali no kukaba. Twalilombele ukuti twiminineko kabili twabulile ifya kufwala fya mpepo mu fyola fyesu no kufifwala. Lelo tatwalekele ukumfwa impepo.

Shikulubantu uwale-ensha motoka alishibe sana iyi ncende kabili ali uwa nsansa icine cine. E lyo atwipwishe ati, “Bushe mwalimonapo ulubuuto lwa ku kapinda ka ku kuso?” Tatwatalile atulumonapo, e ico aliminike motoka kabili twalifumine pa nse. Ilyo naloleshe ku muulu, nalipapile  ifyo ulu lubuuto lwakwete amalangi ayengi kabili lwaleti lwayaka kabili lwashima, e lyo lwalemoneka kwati luli fye mupepi. Ala twalilekele no kutontonkanya pa fyo kwatalele

Ku macaca, ninshi kucili nakufiita, twaishiletika mu menshi makaasa. Twalyafwile namutekenya ukutikulula motoka kabili na ku ntanshi nako yalitikilepo imiku iingi, imisebo twalepitamo pa kuya ku Khayyr yali ya kupansa fye mu menshi makaasa. Ilyo akasuba kaletula e lyo naishibe ukuti kanshi apo twalepita pali ni pa mimana nico fye amenshi yalikosele, yapangile amenshi makaasa! Ilyo papitile ama-awala 16 apo twafumine ku Deputatskiy, twasukile twafika ku Khayyr mu nshita ya kasuba. Nangu ca kuti nalemona kwati nali no kulwala pa mulandu wa kwenda mu mpepo pa ma-awala ayengi, ilyo twashibwike ulucelo, bonse twali fye bwino. Ku tukondo fye e ko naleumfwa icifungalashi, nalimo ico naleumfwila ifi ni pa mulandu wa kutalalisha. Aba muli uyu mushi, balimpeeleko amafuta yamo aya kuti nsube ku tukondo.

Ilingi line, fwe baNte ni fwe tutandalila abantu mu mayanda yabo pa kuti tubebeko imbila nsuma. Nomba ku Khayyr kwena, ilyo abantu baumfwile ukuti natwisa, e baishile mu kutufwaya! Pa milungu ibili na citika, twalesambilila Baibolo na bantu ba kuli iyi ncende cila bushiku, limo ukufuma ulucelo ukufika ubushiku sana. Twaletemwa sana ukusanga abantu abengi abashaifinya, abapokelela bwino abeni, kabili abalefwaya ukusambilila pali Lesa. Abanakashi abakalamba abapusanapusana aba ku Yakutia batwebele ati: “Twalisumina ukuti Lesa e ko aba. Ukwisa kwenu kuno, ku mpela ya calo, kuletulanga ukuti ca cine Lesa eko aba!”

Ifyo aba kuli iyi mishi balecita fyaletupapusha. Ku ca kumwenako, balebuula amabwe ya menshi makaasa no kuyabika mupepi na mayanda yabo kwati ni filya batuulika inkuni. Nga balefwaya amenshi, balebuulapo ilibwe limo no kulibika mu mpoto iikalamba iyo batekele pa mulilo pa kuti lisunguluke. Aba muli uyu mushi balitupekanishishe isabi ilisuma ilyo beta ati chir, ilyumfwika bwino sana nga ca kuti abene e bamupekanishisha. Nga baipaya fye ili sabi balalitalalika pa kuti likose, e lyo baliputaula mu tupimfya, balibika mu mucele uo basakanya ne mpilipili, no kulya apo pene. Abena mushi balitushimikileko na pa fyo basanga kuli iyi ncende pamo nga ameno ya nsofu ishikalamba sana ishafwile kale, e lyo ne fimuti ifyawa ifyaliko imyaka ishishibantu ifyo basanga muli iyi ncende.

Ilyo nafumine ku Khayyr, nale-enda amakilomita ayengi ukutandalila abalefwaya ukusambilila Baibolo mu mishi imbi iya mu Yakutia, ilingi line nale-enda ne ndeke. Aba bantu balapokelela bwino abeni kabili basuma icine cine! Nasangile akalumendo kamo akaishibe ukuti naletiina ukwenda mu ndeke. Kalinembeele kardi pa kuti kankoseleshe. Kalengelepo inseba ne ndeke iinono no kulembapo ati: “Ba Sasha, nga muli mu ndeke, mwilatiina ati mwalapona. Mateo 10:29.” Nalyumfwile bwino sana ilyo nabelengele ili lembo! Pali ili ilembo, nabelengelepo amashiwi Yesu alandile pa nseba ati: “Takuli nangu lumo ulwingapona pa nshi ukwabula Shinwe ukwishiba.”

Ifyo natemenweko ku Yakutia fingi, lelo namushimikilako fye ifinono. Lyonse nga natontonkanya pali ilya ncende yatalala, nkalaibukisha abantu basuma ababako abekala “ku mpela ya calo.”

[Icikope pe bula 25]

Twasangile ukuti abantu ba ku Yakutia tabaifinya kabili balapokelela bwino abeni