“Kufika Lilali . . . Ndelila Ukuti Mungafwe?”

Ba Jayne balelila abati: “Ico ine ndefwaya fye ca kutila ifilekalipa mu mubili fileke!” Ba Jayne balilwele kansa kabili yalesalangana umubili onse. Balupwa lwabo ne fibusa baleti abakwata amaka, nga balibaposeshe no kupwisha ifyalekalipa mu mubili wabo! Balipepele kuli Lesa ukuti abafwe. Bushe aali no kubafwa? Bushe alebasakamana?

LESA alishiba amafya abantunse bapitamo. Icebo cakwe Baibolo cisosa ukuti: “Ifibumbwa fyonse fitetela capamo no kucululukila capamo.” (Abena Roma 8:22) Lesa alishiba ukuti iminshipendwa ya bantu balakalipwa cila bushiku, balalwala kabili balasakamikwa, nga filya fine caba na kuli ba Jayne. Lesa alamona abantu 800 milioni abalaala fye insala cila bushiku, na bantu bambi abengi nga nshi abo bacusha kuli balupwa lwabo e lyo na bafyashi abengi abasakamikwa pa fyo abana babo bakekala ku ntanshi. Bushe mwalibala amutontonkanyapo ukutila Lesa akacitapo fimo pali aya mafya? Nga ca kuti fwe bantu tulafwaya ukwafwa abo twatemwa abalecula, bushe batini Lesa ena te kuti afwaye ukwafwa abantunse abacula, abo abumba?

Nga ca kutila mwalipushapo aya mepusho, ala te imwe mweka mwaipushapo. Imyaka ukucila 2,600 iyapita, umwaume wa cishinka, Habakuki na o aumfwile ifi fine abantu abengi bomfwa muno nshiku, kabili aipwishe Lesa ukuti: “Kufika lilali, mwe Yehova, ndelila ukuti mungafwe, na imwe ukuumfwa iyo? Kufika lilali ndebilikisha kuli imwe ukuti mumpusushe ku bunkalwe, na imwe ukupususha iyo? Cinshi ico munengela ukumona icabipa, na imwe mulolesha fye pa bucushi? Kabili cinshi ico ukupokolola ifipe no bunkalwe fyabela pa ntanshi yandi, kabili cinshi ukuumana kwaimina, kabili cinshi ifikansa ficitilwa?” (Habakuki 1:2, 3) Habakuki, kasesema umuHebere, alimwene ulukaakala ulwabipa nga nshi no bunkalwe ifyalecitika mu nshiku shakwe. Muno nshiku, ifintu fya musango yu e filandwapo fye cila bushiku kabili filalenga abantu abakwata umutima wa cikuuku ukumfwa sana ububi.

Bushe Lesa amwene ukusakamana kwa kwa Habakuki ukuti takwacindeme? Awe iyo. Alikutike ku mepusho Habakuki aleipusha aya kufuma pa nshi ya mutima, lyena alimusansamwishe no kumukoselesha. Yehova Lesa alikoseshe icitetekelo ca kwa Habakuki ilyo amulaile ukuti akapwisha ukucula. Amashiwi ya kwa Lesa aya kuti akapwisha ukucula kuti yamukoselesha na imwe bene, nga filya fine yakoseleshe ba Jayne no lupwa lwabo. Ifipande fikonkelepo fyala-asuka amepusho ya kuti: Kuti twashininkisha shani ukuti ca cine Lesa alatusakamana? Cinshi Lesa akacita pa kupwisha ukucula, kabili ni lilali kukapwa?