Ifyo Yesu Asambilishe Abantu pa fyo Aali

“Yesu alilandile pa fyo ali, uko afumine, umulandu aishile pano calo, ifyali no kumucitikila, ne fyo ali no kuba ku ntanshi.”—E FYALANDILE KALEMBA HERBERT LOCKYER.

ILYO tatulasumina no kutetekela ifyo Yesu asambilishe, intanshi tufwile ukumwishiba bwino. Bushe Yesu ali nani? Afumine kwi? Cinshi aishile pano calo? Ifyasuko kuli ifi fipusho fisangwa mu mashiwi Yesu umwine asosele ayaba mu mabuuku ya Mbila Nsuma, e kutila ibuuku lya kwa Mateo, ilya kwa Marko, ilya kwa Luka, ne lya kwa Yohane.

E ko aali na lintu talaisa pano calo Inshita imo Yesu atile: “Ilyo Abrahamu talabako, ninshi ine e ko naba.” (Yohane 8:58) Abrahamu aliko imyaka 2,000 ninshi Yesu talafyalwa pano calo. Na lyo line, Yesu aliko kale sana libe no yu muntu wa citetekelo talabako. Nomba ni kwi Yesu aali ilyo ashilaisa pano calo? Alondolwele ukuti: ‘Nafumine ku muulu.’—Yohane 6:38.

Umwana wa kwa Lesa Yehova alikwata abana abengi abekala ku muulu. Nomba Yesu ena ali-ibela. Umwine atile ali “Mwana wa kwa Lesa uwafyalwa eka.” (Yohane 3:18) Aya mashiwi yapilibula ukuti Yesu e cibumbwa ceka fye ico Lesa apangile ukwabula uwa kumwafwa. Mu Mwana uwafyalwa eka, emo Lesa alengeele ifibumbwa fyonse.—Abena Kolose 1:16.

“Umwana wa muntu” Ilyo Yesu alelanda pa mwine, alebomfya sana aya mashiwi ukucila amashiwi yambi yonse. (Mateo 8:20) Ilyo Yesu asosele aya mashiwi alangile ukuti tali ni malaika uwa-alwile fye umubili wakwe nelyo Lesa uwaishiile mu buntunse, lelo ali muntu uwa cine cine. Lesa abomfeshe umupashi wakwe uwa mushilo pa kukuusha ubumi bwa Mwana wakwe ukufuma ku muulu ukubuleta pano calo, kabili uyu mupashi walengele ukuti Maria nacisungu emite. Ne ci e calengele ukuti Yesu afyalwe ukwabula ulubembu.—Mateo 1:18; Luka 1:35; Yohane 8:46.

Mesia walaiwe Umwanakashi umwina Samaria aebele Yesu ukuti: “Ninjishiba ukuti Mesia aleisa.” Yesu amwaswike ati: “Nine wine ne ulelanda na iwe.” (Yohane 4:25, 26) Ishiwi lya kuti “Mesia,” ne lya kuti “Kristu,” yonse yapilibula ukuti “Uwasubwa.” Yesu alisubilwe, nelyo ukusontwa na Lesa ukubomba umulimo waibela mu kufikilisha amalayo ya kwa Lesa.

Umulandu uukalamba aishile pano calo Yesu atile: “Ndi no kubila imbila nsuma iya bufumu bwa kwa Lesa, pantu e co natumiinwe.” (Luka 4:43) Nangu ca kutila alicitile ifintu ifingi ifisuma ku bantu, icikalamba ico alecita kushimikila abantu pa Bufumu bwa kwa Lesa. Ifyo asambilishe pa Bufumu bwa kwa Lesa twalafilandapo ku ntanshi.

Kanshi Yesu tali fye muntu yaweyawe. * Nge fyo twalamona, filya Yesu aikelepo ku muulu fyalengele ukuti amashiwi alandile ilyo aishile pano calo yakwatishe amaka. Kanshi te kuti citupapushe umulandu alandiile amashiwi ayakuma abantu abengi nga nshi mu calo conse.

[Futunoti]