Baibolo Ilaalula Abantu

CALI shani pa kuti umufyashi umushimbe uwa ku Russia, uwalebomfya sana imiti ikola, aleke ukuibomfya no kutendeka ukulaikala bwino na bana bakwe? Cali shani pa kuti umwaume umo uwa mu Kyoto, ku Japan, uwaleikala fye mu musebo aleke imisango yalengele abe umupiina? Cinshi calengele ukuti umwina Australia uwalecema bakabalwe ne ng’ombe aleke ukukolwa sana? Yumfwileni ifyo abene balalondolola.

“Nalisambilile ukuti nine mfwile ukuisakamana.”—NELLY BAYMATOVA

IMYAKA: 45

ICALO: RUSSIA

IFYO BALI: BALEBOMFYA IMITI IKOLA

INKULILO YANDI: Nakulile ku Vladikavkaz, umusumba ukalamba uwa calo ca Republic of North Ossetia (ico beta nomba ukuti Alania). Ulupwa lwandi lwali ulukankaala. Lelo, nangu ca kutila twalikwete icuma, nshali ne nsansa. Ilyo nalefisha imyaka 34, ninshi nalyupwapo imiku ibili. Nalibomfeshe imiti ikola pa myaka 10, ica kuti balintekelepo mu kiliniki imiku ibili. Nangu ca kutila nalikwete abana babili, nshabatemenwe kabili nshaleumfwana ne fibusa nelyo balupwa.

Bamayo baishileba Inte ya kwa Yehova, kabili ilingi nalebomfwa balelila pa mulandu wandi kabili balepepa kuli Yehova ukuti angafwe. Naletontonkanya nati: ‘Kwena bamayo batuutu sana! Yehova kuti angafwa shani?’ Nalyeseshe sana ukuleka ukubomfya imiti ikola, nomba nalifililwe. Inshita imo, nalikele inshiku shibili ukwabula ukubomfyapo imiti ikola. Lyena, caishilenjisamo fye ukuti mfwile ukufumina pa nse, kabili e fyo natolweke pa windo. Icabipile ca kuti nali pa ntunti ya bubili, kanshi ilyo naponene nalikontweke ukuboko no kuulu kabili umusana walifunike. Ukucila pa mweshi umo uutuntulu, nshaleima, nalelaala fye.

Ilyo naifunine, bamayo e balentensha kabili tabatalile abanjebaulapo. Balishibe ukuti nshaletontonkanya bwino. Lelo balesha ama magazini ya Loleni! * mupepi no busanshi bwandi. Naleyabelenga kabili naliyatemenwe sana kabili mwali ifyebo ifisuma nga nshi. Lyena napingwilepo ukutendeka ukusambilila Baibolo ne Nte sha kwa Yehova.

IFYO BAIBOLO YA-ALWILE UBUMI BWANDI: Cimo ico Baibolo yansambilishe ca kuti nshifwile ukwenekela bambi ukumombela imilimo yandi. Mu nshita ya kulaenekela bamayo ukuti balensakamana, nalisambilile ukuti nine mfwile ukuisakamana no kulasakamana abana bandi. Apo pa myaka iingi naleicitila fye ifyo nalefwaya, calingafishe sana ukutendeka ukulabomba lyonse.

Ukufunda kwaba pa Amalango 6:5-7, ukwa kuti  abafyashi bafwile ukulasambilisha abana babo pali Lesa, na ko kwalingafwile sana. Nalilwike ukuti nkalubulula kuli Lesa pa fyo nalekusha abana bandi babili, kabili ici canengele ukuti ntendeke ukulaba pamo na bana lyonse no kubatemwa.

Nalitashishe nga nshi ukuti Yehova alimpeele ishuko lya kusambilila icine pali ena. E ico, nali-ipeele kuli ena kabili nalibatishiwe no kuba Inte ya kwa Yehova.

IFYO NANONKELAMO: Pa mulandu wa kuti nalisambilile ukukanaba ne cipyu, nalitendeke ukumfwana na bamayo. E lyo kabili ndomfwana sana na bana bandi.

Apo nalipata ifyo Lesa apata, amafya ayengi ayo nalekwata pa mulandu ne misango yandi yalipwa. Ino nshita ndaba ne nsansa sana ilyo ngafwa bambi ukwishiba icine pali Lesa wesu Yehova, uwakwata ukutemwa.

“Nkanatendeka ukukonka amafunde ya mu Baibolo ino nshita nga nalifwa.”—MINORU TAKEDA

IMYAKA: 54

ICALO: JAPAN

IFYO BALI: BALEIKALA MU MUSEBO

INKULILO YANDI: Batata na bamama e bankushishe kabili nakuliile mu musumba wa Yamaguchi. Bamayo nshabeshiba. Ilyo nali ne myaka 19, bamama balifwile, kabili nashele na batata. Nalebomba incito ya kwipika, iyo na batata balebombako. Inshita twaleilapo ku ncito shalepusana, kanshi tatwalemonana sana. Natendeke ukulabomba ama-awala ayengi no kunwa ubwalwa na banandi.

Mu kuya kwa nshita, incito yatendeke ukuntendusha. Nalyumene na bakalamba ba ncito kabili nalitendeke ukunwa sana. Umuye nshiku, ilyo nali mupepi ne myaka 30, nalifumine pa ng’anda no kuya kumbi. Ilyo indalama shapwile, natendeke ukubomba umo balete-ela ifyangalo fya kushitikapo indalama. Umu mwine e mo naishibene no mukashana umo ifi kabili e fyo twaupene. Lelo pa numa fye ya myaka ibili ne myeshi 6, twalilekene.

Nalilwele nga nshi pa mulandu wa bulanda ica kuti nalefilwa ukubomba imilimo iili yonse ne ci calengele ukuti nkwate inkongole ishingi. Nalibutwike aba nkongole no kubwelela kuli batata, lelo nalebabepa sana kabili ici calengele ukuti tupusane. Nalibile indalama sha batata no kutendeka ukuteya ifyangalo fya kushitikapo indalama. Umuya inshiku, indalama shalipwile kabili nasangwike umupiina ica kuti natendeke ukwikala pa citesheni ce shitima. Nakuukile ku Hakata, lyena naishileya ku Himeji, na pa kulekelesha naile ku musumba wa Kyoto. Naleikala fye mu musebo.

IFYO BAIBOLO YA-ALWILE UBUMI BWANDI: Mu 1999, ninshi ndi mu parka mupepi no mumana wa Kamogawa ku Kyoto, abanakashi babili baishile apo nali. Umo anjipwishe ukuti, “Bushe kuti mwatemwa ukulasambilila Baibolo?” Nalisumine. Abena Kristu aba mu  cilonganino ca Nte sha kwa Yehova mu Kyoto batendeke ukusambilila Baibolo na ine kabili balingafwile ukwishiba ukuti calicindama ukubomfya ifyo ndesambilila. Banjebele ukuti mfwile ukufwaya incito ne ng’anda. Pa kufwaya ukubasekesha, naile mu kufwaya incito, lelo pa kubala nshabikileko sana amano. Ilyo papitile inshita, nalitendeke ukupepa pa kuti Lesa angafwe ukusanga incito e lyo na ine nalibikileko amano ukufwaya incito kabili umuye nshiku yalimoneke.

Ipepo lyalingafwile na lintu nakwete ubwafya ubukalamba. Balya aba nkongole abo nabutwike basukile bansanga kabili batendeke ukumpinda indalama shabo. Nalisakamikwe nga nshi. Nalebelenga Baibolo cila bushiku, kabili bushiku bumo nabelengele pali Esaya 41:10. Pali ili lembo, Lesa alaya ababomfi bakwe aba cishinka ukuti: “Nkakwafwa.” Ubu bulayo bwalinkoseshe sana. Nalibombeshe kabili nasukile nabwesha inkongole. Mu mwaka wa 2000, nalibatishiwe no kuba Inte ya kwa Yehova.

IFYO NANONKELAMO: Ifyo nasambilile muli Baibolo fyanengele ukuti ntendeke ukulaumfwana na batata, kabili na bo balimbelele uluse pa fyo nacitile. Balitemenwe sana ukwishiba ukuti nalitendeke ukukonka amafunde ya mu Baibolo. Mona ukuti nkanatendeka ukukonka amafunde ya mu Baibolo ino nshita nga nalifwa.

Na kabili, ndabomba pa kuti ndeisakamana. (Abena Efese 4:28; 2 Abena Tesalonika 3:12) Nalisanga ne fibusa fya cine cine mu cilonganino ca Bena Kristu. (Marko 10:29, 30) Ndatasha Yehova ukufuma pa nshi ya mutima wandi pa fyo ansambilisha.

“Calingafishe sana ukwaluka.”—DAVID HUDSON

IMYAKA: 72

ICALO: AUSTRALIA

IFYO BALI: BALI NI BACAKOLWA

INKULILO YANDI: Nali umwana uwalenga 11 mu lupwa lwesu. Batata bali ni ba Willie e lyo bamayo bali ni ba Lucy. Twaleikala mu Aurukun, umushi wikalamo aba Aborijini, uwabela ku kapinda ka ku kuso aka Queensland. Uyu mushi wakuulilwe mu lulamba lwa mumana uwayemba uwa Archer mupepi na bemba. Abafyashi besu batusambilishe ukulunga no kwipaya isabi pa kusanga umwa kuliila. Pali ilya nshita, ubuteko e bwaletungulula aba Aborijini kabili kwali ifunde lya kuti tatwalingile ukulaisungila indalama, kabili tabaletusuminisha ukufuma mu ncende twaleikala.

Abafyashi bandi balibikile sana amano ku kunsambilisha imibele isuma kabili basambilishe fwe bana bonse ukucindika abakalamba no kuba bakapekape. Ici calengele ukuti tulemona abakalamba bonse nga bafyashi besu.

Batata bafwile ninshi ndi ne myaka 7, kabili twakuukile ku Mapoon, ku minshoni ya ba Aborijini, ukwalepa amakilomita  150 ukulola ku kapinda ka ku kuso aka Aurukun. Ilyo nali ne myaka 12, natendeke ukusambilila ifya kusunga bakabalwe ne ng’ombe ukufika na lintu nali mupepi no kukumanya imyaka 50, nalibombele mu macinka ayalekanalekana. Imikalile tayaweme nangu panono. Nalenwa sana kabili ici calengele ukuti ndekwata amafya ayengi.

Bushiku bumo nafumine mwi hotela ninshi ninkolwa ndetalantanta fye kabili naileingila mu musebo ninshi kwali na motoka iyaleisa naibutuka. Imyaka ibili iituntulu yalipwile naleundapwa fye, kabili apa pene e po nalekele no kucema bakabalwe ne ng’ombe.

IFYO BAIBOLO YA-ALULA UBUMI BWANDI: Pali iyi nshita naleundapwa, cibusa wandi umwanakashi andetele ama magazini ya Ulupungu lwa kwa Kalinda na Loleni! ukuti ndebelenga. Nshasambilile sana, e co nshaishibe sana ukubelenga. Bushiku bumo, shikulubantu umo uwali ne myaka 83 aishile pa ng’anda ninshi nakukaba icine cine. Nalimwingishe mu ng’anda no kumupeela amenshi ayatalala. Ampeele impapulo shimo ishalelanda pa fya mu Baibolo kabili alinjipwishe nga kuti natemwa abwela pa kuti akesenondolwela ifyalembelwemo. Mu kuya kwa nshita, nalitendeke ukulasambilila Baibolo lyonse. Ilyo nalesambilila, nalimwene ukuti nga ndefwaya ukusekesha Lesa, mfwile ukwaluka no kwalula imikalile yandi.

Calingafishe sana ukwaluka. Lelo pa mulandu wa fyo bamayo bansambilishe, nalicindike sana aba bashikulubantu abalensambilisha Baibolo kabili nalicindike ne fyo balensambilisha. Na lyo line, naleshingashinga ukuipeela kuli Lesa. Nalemona kwati mfwile ukwishiba fyonse ifyalembwa mu Baibolo.

Umuntu umo uo nalebomba na o e wangafwile ukwaluka mu fyo naletontonkanya. Uyu muntu ali ni Nte ya kwa Yehova, kabili anangile amashiwi ya kukoselesha ayaba pa Abena Kolose 1:9, 10. Amashiwi yaba pali ili lembo yatweba ukuti tufwile ukutwalilila ‘ukulaishibilako Lesa bwino bwino.’ Uyu munandi alingafwile ukwishiba ukuti ukusambilila takwakapwe, kanshi ukukanaishiba fyonse te kwingalenga ukuti nkaane ukuipeela kuli Lesa.

Nalitemenwe sana ilyo natendeke ukulongana ne Nte sha kwa Yehova. Nalimwene ifyo abantu aba nkulilo shalekanalekana bali abaikatana mu kupepa Lesa. Ukwikatana baikatana kwalengele nashininkisha ukuti ninsanga ukupepa kwa cine, kabili mu 1985, nalibatishiwe no kuba Inte ya kwa Yehova.

IFYO NANONKELAMO: Nomba ndabelenga bwino, kabili cila mulungu ndapoosa inshita iikalamba ukwafwako bambi ukwishiba ukubelenga no kusambilila Baibolo. Na kabili ulya cibusa wandi umwanakashi uwandetele ama magazini ya Ulupungu lwa kwa Kalinda na Loleni! umuku wa kubalilapo, na o atendeke ukusambilila ne Nte sha kwa Yehova, alibatishiwe, kabili pali ino nshita mukashi wandi uo natemwa nga nshi. Ine no mukashi wandi, tulasanga sana insansa ukwafwako abantu abekala mu mushi wa ba Aborijini ukwishiba Yehova Lesa.

[Futunoti]

[Amashiwi pe bula 21]

Ine no mukashi wandi tulasanga insansa ishine shine mu kwafwa abantu bekala mu mushi wa ba Aborijini ukwishiba icine pali Lesa