“Senda Umwana Obe”
Palameni Kuli Lesa
“Senda Umwana Obe”
UKUFWILWA umwana kwaba pa fintu ifiletela sana abantu ubulanda. Yehova Lesa alikwata amaka ya kufumyapo imfwa. Twalishiba ukuti akacita ici pantu kale alipeele abantu bamo amaka ya kubuusha abafwa. Ilyashi limo, ni lilya lyalembwa pali 2 Ishamfumu 4:8-37, apo balanda pa mulumendo umo uo kasesema Elisha abuushishe.
Ili lyashi lyacitike mu musumba wa Shunemu. Muli uyu musumba, mwali umwanakashi ing’umba no mwina mwakwe abali ne cikuuku kuli Elisha, balemupeela lyonse ifya kulya no mwa kwikala. Bushiku bumo, kasesema aebele uyu mwanakashi ukuti: “Uyu mwaka uleisa nga ino ine nshita ukafukatila umwana mwaume.” Ubushiku bushilile kantu uyu mwanakashi alikwete umwana, nga filya fine Elisha amwebele. Lelo insansa shakwe tashatwalilile. Papitile fye imyaka iinono, uyu mwana alilwele umutwe ninshi ali mwi bala kabili bamusendele ku ng’anda, uko afwilile “pa molu ya kwa nyina.” (Ifikomo 16, 19, 20) Nyina aimishe icitumbi ca mwana wakwe no kucibika pa ca kusendamapo ico kasesema alesendamapo nga aisa.
Ukwabula no kupoosa inshita, uyu mwanakashi alimine kabili umulume wakwe alimusuminishe ukuyamona Elisha ku lupili lwa Karmele ukwalepele amakilomita 30. Ilyo afikile kuli Elisha, talilile nelyo ukucita ifili fyonse ifya kulanga ukuti ali sana no bulanda. Bushe icalengele ni co alyumfwile ukuti Eliya, uo Elisha apyene, alibuushishe umwana wa kwa mukamfwilwa? (1 Ishamfumu 17:17-23) Bushe uyu mwanakashi umwina Shunemu alicetekele ukuti Elisha na o alabuusha umwana wakwe? Te mulandu ne fyo cali, uyu mwanakashi alikeene ukubwelelamo ku ng’anda mpaka Elisha asumina ukuya nankwe.
Ilyo bafikile ku Shunemu, Elisha eka e waingile mu muputule umo alesendama ilingi kabili amwene umwana nafwa, nabamulaalika na “pa ca kusendamapo [cakwe].” (Icikomo 32) Kasesema atendeke ukupepa kuli Yehova ipepo lya kupaapata nga nshi. Lyena, ilyo Elisha aikete umwana, “wasukile umubili wa mwana wakaba.” Umutima wa mwana uwalekele ukutunta, walitendeke ukutunta na kabili! Elisha aitile nyina no kumweba amashiwi ayalengele ubulanda bwakwe ukupwa. Amwebele ati: “Senda umwana obe.”—Ifikomo 34, 36.
Ilyashi lya kubuushiwa kwa mwana mwaume uwa mwanakashi umwina Shunemu lilatupeela isubilo kabili lilatusansamusha. Yehova aleshiba ubulanda abafyashi bakwata nga bafwilwa umwana. Ne cacindama ca kuti alafwaisha ukufumyapo imfwa. (Yobo 14:14, 15) Ifipesha mano fya kubuusha abafwa ifyo Elisha na bantu ba kale bambi bacitile fyaba cilangililo ca kuti Yehova akabuusha abantu abengi nga nshi mu calo cipya icalungama icili mupepi. *
Ubulayo bwaba mu Baibolo ubwa kuti abafwa bakabuuka tabufumyapo ubulanda tukwata nga twafwilwa umuntu twatemwa. Ilyo Umwina Kristu umo uwa cishinka afwililwe umwana wakwe umo fye mpo, atile: “Ubulanda bwandi tabwakapwe mpaka fye nkafukatile umwana wandi na kabili.” Elenganyeni ifyo cikawama ukuba pamo na batemwikwa benu abafwa. Ukwishiba ukuti mukabamona na kabili no kubakumbatila kuti kwalenga ubulanda bwenu ukucepako. Bushe te kuti mutemwe ukwishiba na fimbi pali Lesa uwatulaya ubu bulayo bwawama nga nshi?
[Futunoti]
^ para. 8 Nga mulefwaya ukwishibilapo na fimbi pa fyo Baibolo yalaya ukuti abafwa bakabuuka, belengeni icitabo citila Bushe Cinshi Baibolo Isambilisha? Abalemba ici citabo ni Nte sha kwa Yehova.