Ifyabipa Fyonse Fikapwa!

LESA alitupeela Icebo cakwe, icalondolola umulandu abantu bacitila ifyabipa. Na kabili alitupeela amaka ya kuisalila ifyo tulefwaya ukucita e lyo na maka ya kuilama. Kanshi fwe bantu twalikwata amaka ya kukanacita ifyabipa. (Amalango 30:15, 16, 19) Apo twalikwata aya maka, kuti twaishiba imisango yabipa iyo twakwata no kucitapo cimo pa kuti tuleke iyo misango. Nga tuletaluka ku fyabipa icikafumamo ca kuti tukaba ne nsansa kabili nangu fye bantu tukala-ampana nabo bakaba ne nsansa.—Amalumbo 1:1.

Na lyo line, nangu tweshe na maka ukutaluka ku kucita ifyabipa, icalo ciya cilebipilako fye umulandu ne fyabipa ifyo abantu banensu bacita. Baibolo itusoka ukuti: “Ishiba ukuti mu nshiku sha kulekelesha  mukesaba inshita ishayafya nga nshi.” Pa kulondolola icalenga inshiku ukuba “ishayafya nga nshi,” Baibolo itwalilila ukusosa ukuti: “Abantu bakaba abaitemwa, abatemwa indalama, aba mataki, aba matutumuko, aba miponto, abashumfwila abafyashi babo, abashitasha, abashaba na cishinka, abashatemwa abantu, abashifwaya ifipangano, aba lwambo, abashailama, abankalwe, abashatemwa ubusuma, abafutuka abanabo, bamunshebwa, aba cilumba, abatemwa ukwangala ukucila ukutemwa Lesa, abamoneka kwati ni bakapepa lelo abakaana amaka ya bukapepa; ku ba musango yu uletalukako.”—2 Timote 3:1-5.

Muli aya mashiwi ya kusesema ayaba mu Baibolo, muli na mashiwi yaleti “inshiku sha kulekelesha.” Bushe muletontonkanya ukuti aya mashiwi yalola mwi? Abengi nga baumfwa amashiwi ya kuti “inshiku sha kulekelesha” kuti batontonkanya ukuti pali cimo icili no kupwa. Cinshi ico cine cili no kupwa? Moneni ifyo Lesa atulaya mu Cebo cakwe.

Ababifi bonse bakonaulwa.

“Pashala fye panono no mubifi takabepo; awe ukalolekesha apo aali, no kusanga talipo. Lelo abafuuka e bakekala mu calo, kabili bakasekelela nga nshi pantu umutende ukafula.”—AMALUMBO 37:10, 11.

“Yehova alinda bonse abamutemwa, lelo ababifi bonse akabalofya.”—AMALUMBO 145:20.

Takwakabe abakalatitikisha abanabo.

“Akapususha umulanda uulekuuta mutuule, no wacula na onse uushakwata wa kumwafwa. Akalubula imyeo yabo ukufuma ku ba mutitikisha na ku ba bunkalwe.”—AMALUMBO 72:12, 14.

“Ifibumbwa na fyo fikalubuka ku busha bwa kubola no kuba abana ba kwa Lesa.”—ABENA ROMA 8:21.

Abantu bakakwata fyonse ifyo bakabila.

“Bakekala umuntu onse mwi samba lya mwangashi wakwe, na mwi samba lya mukunyu wakwe, tapakabe no wa kubatiinya.” —MIKA 4:4.

“Bakakuula amayanda no kwikalamo; bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo; tabakalime amabala e lyo bambi bakalye ifisabo. Pantu ifyaba inshiku sha muti e fikaba inshiku sha bantu bandi; kabili umulimo wa minwe yabo abasalwa bandi bakasekelamo nga nshi.”—ESAYA 65:21, 22.

Mu calo mukaba umulinganya.

“Bushe kanshi Lesa takaleke ukuti kube umulinganya ku basalwa bakwe abalilila kuli ena akasuba no bushiku . . . ? Ndemweba, nati, Akaleka ukuti kube umulinganya kuli bena bwangu bwangu.”—LUKA 18:7, 8.

“Yehova atemwa umulinganya, kabili takashe aba cishinka bakwe. Bakacingililwa umuyayaya.”—AMALUMBO 37:28.

Mu calo mukaba ubulungami.

“Abekashi ba pa calo bakasambilila ubulungami.”—ESAYA 26:9.

“Tulelolela imyulu ipya ne sonde lipya ifyo Lesa alaya, umukaba ubulungami.”—2 PETRO 3:13.

Na Pali ino ine Nshita Abantu Balealuka

Ukwabula no kutwishika aya malayo yasuma nga nshi. Nomba cinshi cingalenga twacetekela  ukuti yakafikilishiwa? Ubushininkisho ubulanga ukuti amalayo Lesa atulaya yakafikilishiwa bwingi nga nshi. Bushininkisho nshi ubo bwine? Bwa kuti imintapendwa ya bantu mwi sonde balileka ifyabipa pamo nga ukuitemwa, ubulalelale, nelyo ulubuli kabili balisambilila ukuba abafumacumi, aba mutende kabili aba cikuuku. Muno nshiku, abantu abengi balapatana no kwipayana pa mulandu wa kupusana kwa fyalo bafumamo, imishobo e lyo ne mitundu, lelo Inte sha kwa Yehova abacilile pali 7 milioni balikatana mu calo conse fye. * Ifi abantu balealuka muli uyu musango bushininkisho bwa kuti ifyo Lesa atulaya fikacitika mwi sonde lyonse.

Nomba bushe cinshi cilenga ukuti abantu baluke? Icasuko cisangwa mu bulayo na bumbi ubwa mu Baibolo ubwalembwa mwi buuku lya kwa Esaya, ubutila:

“Umumbulu ukekala inshita inono na kana ka mpaanga, kabili imbwili ikalaala pamo na kana ka mbushi, na kana ka ng’ombe no mwana wa nkalamo na kanama akaina fikekala pamo; kabili umwaice e ukalaficema. . . . Ne nkalamo ikalya icani nge ng’ombe. Kabili umwana uonka akaangala pa bwendo bwa kwa ngoshe; no mwana wasumunwa akabika ukuboko kwakwe pa bwendo bwa nsoka ya busungu. Tafyakacite ububi nangu ubonaushi monse mu lupili lwandi ulwa mushilo; pantu isonde likesulamo ukwishiba Yehova filya amenshi yaisula muli bemba.”—Esaya 11:6-9.

Bushe uku kusesema kulanda fye pa nshita lintu ifinama fikaba pa mutende na bantu? Awe, pantu amashiwi ya kulekelesha muli uku kusesema yalilondolola icilenga uku kwaluka, yatila: “Isonde likesulamo ukwishiba Yehova.” Nomba bushe ukwishiba Lesa  kuti kwalenga inama ukwaluka? Awe nakalya, bantu baluka nga baishiba Lesa! Uku kusesema kusobela ukuti abantu abali abankalwe kwati ni nama nga basambilila Baibolo no kutendeka ukulacita ifyo isambilisha, bakaaluka kabili bakaba ne mibele nga ilya yakweteko Kristu.

Ku ca kumwenako, tontonkanyeni pa fyo ba Pedro * bali. Ba Pedro balefwaisha sana ukupwisha ulufyengo. Ici calengele babe mu kabungwe aka fipondo. Pa numa ya kubakansha, babebele ukuti bayepuulisha ibomba mu mushi wa bakapokola. Ilyo balefwaya ukupuulisha ibomba, balibekete. Baikele imyeshi 18 mu cifungo lelo tabalekele incitilo shabo isha bucipondoka. Ilyo bali mu cifungo, abakashi babo batampile ukusambilila Baibolo ne Nte sha kwa Yehova. Ilyo ba Pedro bafumine mu cifungo, nabo batendeke ukusambilila Baibolo, kabili ifyo basambilile pali Yehova Lesa fyalengele ukuti balule imibele yabo ne kwalula ifyo balemona ubumi. Batile: “Ndatasha Yehova ukuti nshaipeyepo umuntu nangu umo ilyo nali mwi bumba lya fipondo. Pali ino nshita imomfya ulupanga lwa mupashi wa kwa Lesa, e kutila Baibolo, pa kushimikilako abantu imbila nsuma ya Bufumu bwa kwa Lesa iilanda pa mutende wa cine cine no mulinganya.” Ba Pedro baileshimikila na ku bantu ba mu mushi wa bakapokola umo balefwaya  ukupuulisha ibomba. Babashimikile amashiwi yalanda pa mutende wa cine cine na pa calo umushakabe ulukaakala.

Amaka ya kwalula abantu ayo Icebo ca kwa Lesa cakwata e yalenga tucetekele ukuti ubulayo bwa kwa Lesa ubwa kuti ifyabipa fyonse fikapwa, bukafikilishiwa. Ca cine, abantu tabakatwalilile ukucita ifyabipa ku ciyayaya lelo bakaluka no kuba abantu abasuma. Nomba line fye Yehova ali no konaula Satana Kaseebanya uulenga ukuti ifyabipa filecitika, uulenga no kuti abantu ba muli cino calo balecita ifyabipa. Baibolo itila: “Icalo conse calaala mu maka ya mubifi.” (1 Yohane 5:19) Lelo nomba line ali no konaulwa. Na bantu abakaana ukuleka ukucita ifyabipa nabo bene bakonaulwa. Ala mwandini cikawama ukulaikala mu calo umushakabe ububifi!

Bushe cinshi umuntu alingile ukucita pa kuti akekale mu calo ca musango uyu? Mwilaba ukuti “ukwishiba Yehova” e kulenga abantu baaluke pali ino nshita kabili e kukalenga ifintu fyonse ukwaluka mu calo nomba line fye. Nga mwaishiba bwino bwino ifyo Baibolo isambilisha no kulaficita, nge fyo ba Pedro bacitile, na imwe bene kuti mwasubila ukwikala mu calo “umukaba ubulungami.” (2 Petro 3:13) E ico tulemukoselesha ukuti mutendeke ukulasambilila pali Lesa na Yesu Kristu, pantu nga mulecita ifi e lyo mukaba no mweo wa muyayaya.—Yohane 17:3.

[Amafutunoti]

[Amashiwi pe bula 9]

Na imwe bene kuti mwasubila ukwikala mu calo “umukaba ubulungami.”—2 PETRO 3:13