Ipepo

6 Bushe Ukupepa Kuti Kwatwafwa?

BUSHE ukupepa kulatwafwa? Baibolo ilanga ukuti ukupepa kulatwafwa. Amapepo ya babomfi ba kwa Lesa aba cishinka yalabafwa. (Luka 22:40; Yakobo 5:13) Na kuba, ukupepa kuti kwatwafwa nga nshi mu fya kwa Lesa, mu matontonkanyo, na ku bumi bwesu fye. Mu nshila nshi?

Natulangilile: Tutile umwana wenu bamupeela ica bupe. Bushe kuti mwamufunda ukuti afwile ukutashisha fye mu mutima? Nelyo kuti mwamufunda ukulaeba abamupeela ubupe ukuti natasha? Nga twalanda ifili ku mutima, tulatendeka ukufitontonkanyapo sana kabili tulacilanapo ukutasha pa fyo batucitile. Ifi fine e fyo ciba na lintu tulelanda kuli Lesa! Moneni ifya kumwenako fyakonkapo.

Amapepo ya kutasha. Nga twatasha Shifwe pa fisuma ifyo atucitila, tulatendeka ukutontonkanya pa fyo atupaala. Icifumamo ca kuti, tulacilapo ukutasha pa fyo atucitila, tulaba ne nsansa, kabili tatusakamikwa.—Abena Filipi 4:6.

Ica kumwenako: Yesu alitashishe pa fyo Wishi alekutika no kwasuka amapepo yakwe.—Yohane 11:41.

Amapepo ya kulomba ukuti atubelele uluse. Nga twalomba ukuti Lesa atubelele uluse, tulakosha kampingu yesu, tulalapila icine cine, kabili tuleshiba bwino ifyo ukucita ulubembu kwabipa. Kabili tulaleka no kuyumfwa aba mulandu pa lubembu twacitile.

Ica kumwenako: Davidi alipepele kuli Lesa pa kulanga ifyo alapiile ne fyo ali no bulanda.—Amalumbo 51.

Amapepo ya kulomba amano no butungulushi. Ukulomba Yehova ukuti atutungulule nelyo ukutupeela amano pa kuti tupingule bwino pa fintu kuti kwalenga twaba abaicefya icine cine. Kuti kwatucinkulako pa fyo tushingacita ku maka yesu kabili kuti kwalenga twatetekela Shifwe wa mu muulu.—Amapinda 3:5, 6.

Ica kumwenako: Solomone ali-icefeshe no kulomba Lesa ukuti amupeele amano no kuti alemutungulula pa kuti aleteka bwino abena Israele.—1 Ishamfumu 3:5-12.

Amapepo tupepa lintu tuli na mafya. Nga ca kutila twaeba Lesa fyonse ifili ku mutima ifiletucusha, tukomfwa bwino, kabili tukashintilila pali Yehova ukucila ukushintilila pa maka yesu.—Amalumbo 62:8.

Ica kumwenako: Imfumu Asa yalipepele kuli Lesa ilyo yalolenkene na balwani aba maka.—2 Imilandu 14:11.

Amapepo tupepelako bambi. Ukupepelako bambi kulalenga ukuti twiba na bukaitemwe, kabili kulalenga tulelangulukilako bambi no kuba aba luse.

Ica kumwenako: Yesu alipepeleko abasambi bakwe.—Yohane 17:9-17.

Amapepo ya kulumbanya Lesa. Nga tulelumbanya Yehova pa mibele yakwe na pa fintu ifisuma ifyo acita, tulacililako ukumupeela umucinshi no kumutasha. Amapepo ya musango uyu kuti yalenga no kuti tupalame sana kuli Lesa wesu kabili Shifwe.

Ica kumwenako: Davidi alelumbanya Lesa pa fyo aabumba.—Amalumbo 8.

Ubusuma na bumbi ubwaba mu kupepa bwa kuti tulakwata “umutende wa kwa Lesa uwacila amatontonkanyo yonse.” (Abena Filipi 4:7) Ukukwata umutende muli cino calo ca mafya lipaalo icine cine. Ukupepa kulalenga umuntu ukuba no bumi ubusuma. (Amapinda 14:30) Lelo bushe kubombesha kwesu ukulenga tube no uyu mutende nelyo kwaliba na cimbi icacindama sana icilenga?

[Amashiwi pe bula 10]

Ukupepa kulatwafwa mu fintu ifingi, mu matontonkanyo, ku bumi bwesu, e lyo maka maka mu fya kwa Lesa