Ababelenga Ino Magazini Balepusha Ukuti . . .

Mulandu Nshi Satana Abomfeshe Insoka pa Kulanda Kuli Efa?

▪ Nga filya tulandilepo pe bula 8, nalimo na imwe mwalisumina ukuti Satana abomfeshe insoka pa kulanda kuli Efa, kabili ifi fine e fyo na Baibolo isambilisha. Lelo nalimo kuti mwatontonkanya ukuti, ‘Mulandu nshi malaika uwakwata amaka engabomfesha insoka pa kulanda?’

Baibolo ilanda pali Satana ukuti alabomfya “imicenjelo,” nelyo ifya kubeleleka, kabili ifyo acitile mwi bala lya Edeni filashininkisha ici cishinka. (Abena Efese 6:11) Filya calembwa ukuti insoka yalilandile mu Edeni fya cine, kabili cilanga ukuti cine cine Satana alabomfya ubucenjeshi bwabipisha pa kuti ongole abantu no kubafumya kuli Lesa. Bushe ongola shani abantu?

Satana asalile uo aishibe ukutila kuti cayanguka ukumubeleleka. Efa e walekelesheko ukupangwa pa fibumbwa fyonse ifya mu muulu ne fya pe sonde. Ifi taishibe sana ifingi, Satana alimushukile no kumubeleleka. Filya alandiile mu nsoka, iyacenjela sana, Satana mu bucenjeshi afishile icali mu mutima wakwe. (Ukutendeka 3:1) Moneni na kabili ifyafumine muli filya alengele ukuti insoka imoneke kwati e ilelanda.

Ica kubalilapo, Satana acitile icintu icalengele Efa ukufwaisha ukukutika. Efa alishibe ukuti insoka tashilanda; umulume wakwe e wainike inama shonse amashina, ukubikako ne nsoka. Afwile ashinike amashina pa numa ya kwishiba bwino ifyo shaba. (Ukutendeka 2:19) Efa na o afwile alimwene ukuti insoka yali iyacenjela sana. Umucenjelo Satana abomfeshe walengele Efa ukulatontonkanya sana pa cimuti babaleseshe ukulyako. Ica bubili ca kutila, nga ca kuti insoka yali ku cimuti ilyo yalandile na Efa, bushe finshi atontonkenye? Bushe nalimo atontonkenye ukuti iyi nsoka yalilile icisabo e calengele ukuti itendeke ukulanda? Afwile atontonkenye ukuti nga ca kutila ici cisabo kuti calenga insoka ukulanda, nga ine bushe kuti naba shani nga nalyako? Kwena te kuti twishibe bwino ifyo Efa atontonkenye nelyo nga ca kuti insoka yalilile icisabo kuli cilya cimuti. Lelo ifyo twaishiba fya kuti ilyo insoka yaebele Efa ukuti nga alya ici cisabo ali no ‘kuba nga Lesa,’ alicetekele ifyo bamubepele.

Amashiwi Satana abomfeshe na yo yalangile ifyo Satana alefwaya Efa ukucita. Yalengele ukuti Efa atendeke ukulatwishika Lesa, alemona kwati Lesa alemufisa ifintu ifisuma kabili alimwikele pa nsambu. Filya Satana aebele Efa ukuti ali no kuba nga Lesa, fyali no kucitika fye nga ca kutila Efa atemwisha ifyo bamulaile ukucila ukutemwa Lesa uwamupeele fyonse ifyo akwete. (Ukutendeka 3:4, 5) Ica bulanda ca kuti, imicenjelo ya kwa Satana yalibombele; Adamu na Efa tabatemenwe Yehova ifyo balingile ukumutemwa kabili tabaletasha na pa fyo abacitile. Na ino ine nshita Satana afwaya ukuti abantu balecita fye ifyo abene balefwaya!

Bushe cinshi cali mu mutima wa kwa Satana? Mu Edeni Satana taisokolwele, kabili talefwaya Efa ukwishiba amapange akwete. Lelo ilyo papitile imyaka iingi, ali-isokolwele. Ilyo atunkile Yesu, alishibe ukuti talekabila ukuifungushanya. E ico, aebele fye Yesu mu kulungatika ukuti: ‘Fukama no kumpepa.’ (Mateo 4:9) Ukwabula no kutwishika, ukufuma fye na kale, Satana afwaya ukuti abantu balemupepa ukucila ukupepa Yehova Lesa. Kuti acita icili conse pa kuti afumye abantu ku kupepa Lesa nangu ukubalenga ukulamupepa mu nshila iyo ashasuminisha. Afwaya ukuti tuleke ukuba aba cishinka kuli Lesa.

Kanshi Baibolo ilatweba bwino ukuti Satana ni ncenjeshi ya kapela makufi, kabili aiminina pa konaula abantu. Lelo icawama ca kuti, te kuti atubepe nga filya abepele Efa, pantu “twalishiba amapange yakwe.”—2 Abena Korinti 2:11.