“Munjibukishe, Mwe Lesa Wandi, no Kuncitila Ubusuma”
Palameni Kuli Lesa
“Munjibukishe, Mwe Lesa Wandi, no Kuncitila Ubusuma”
UMWINA KRISTU umwanakashi uwa citetekelo uwaleimona ukuti tacindama atile: “Nalemona kwati Yehova, uwanjishiba bwino sana, te kuti antemwe.” Bushe na imwe mulomfwapo ifi, kwati nalimo Lesa tamubikako amano, pali bufi ukumutemwa? Nga e fyo mumfwa, ninshi amashiwi yaba pali Nehemia 13:31 kuti yamukoselesha.
Nehemia, uwaletungulula abaYuda mu myaka ya ba 400 B.C.E., ale-esha na maka ukusekesha Lesa. E watungulwile umulimo wa kukuula cipya cipya ifibumba fya Yerusalemu te mulandu ne fyo abalwani balebalwisha. Ashininkishe ukuti abena Israele balekonka Amafunde ya kwa Lesa, alesakamana abatitikishiwa, kabili alefwaya ukukosha icitetekelo ca bena Israele banankwe. Bushe Lesa alimwene ifisuma ifyo uyu mwaume wa citetekelo acitile? Bushe Nehemia balimutemenwe kuli Yehova? Kuti twaishiba amasuko kuli ifi fipusho nga twabelenga amashiwi ya kulekelesha aya mwi buuku ilyainikwa ishina lyakwe.
Nehemia apepele ukuti: “Munjibukishe, mwe Lesa wandi, no kuncitila ubusuma.” * Bushe Nehemia alemona kwati Lesa talemona ifisuma ifyo alecita nelyo ukutila Lesa kuti amulabako? Iyo. Ukwabula no kutwishika Nehemia alishibe ifyo abalembele amabuuku ya kubalilapo aya mu Baibolo balandile pali Yehova ukuti alibika amano ku babomfi bakwe aba citetekelo na ku milimo yabo iisuma. (Ukufuma 32:32, 33; Amalumbo 56:8) Ninshi finshi alelomba Lesa ukucita? Icitabo cimo catila ishiwi lya ciHebere ilyo bapilibula ukuti “munjibukishe” lipilibula “ukutemwa icintu no kucitapo cimo icilelanga ukuti tawalabako kuli ico cintu.” Apo Nehemia alicetekele ukuti ipepo lyakwe lyala-asukwa, alombele Lesa ukumwibukisha, e kutila ukumulanga ukutemwa, no kumupaala.—Nehemia 2:4.
Bushe Yehova ali no kwasuka ipepo lya kwa Nehemia ilya kuti amwibukishe? Mu nshila imo, Yehova alyaswike kale ipepo. Ifi Yehova asuminishe ili pepo lya kwa Nehemia ukulembwa mu Baibolo, bushininkisho bwa kuti alibukishe Nehemia kabili alimutemenwe. Lelo ‘uumfwa ipepo’ akacita na fimbi pa kwasuka ipepo ilyo Nehemia apepele ukufuma pa nshi ya mutima.—Amalumbo 65:2.
Lesa akalambula Nehemia pa fisuma fyonse ifyo acitile ku kutungilila ukupepa kwa cine. (AbaHebere 11:6) Yehova akabuusha Nehemia mu calo cipya icalungama ico alaya. * (2 Petro 3:13; Ukusokolola 21:3, 4) Nehemia akamona ukuti Yehova alimwibukisha no kumucitila icisuma pantu mu paradaise akaba ne subilo lya kuba no mweo wa muyayaya.
Ipepo lya kwa Nehemia lilanga ukuti amashiwi Imfumu Davidi yalandile ya cine, ayatila: “Mukapaala bonse abalungama, mwe Yehova; nge nkwela iikalamba, e fyo mukacingilila abo musekelelamo.” (Amalumbo 5:12) Kanshi Lesa alamona ifyo twesha na maka ukumusekesha kabili alatasha nga nshi. Nga ca kuti fye mule-esha na maka ukumubombela, akamwibukisha no kumulanga ukutemwa kabili akamupaala icine cine.
Amalembo ya Kubelenga mu February:
[Amafutunoti]
^ para. 5 Pa miku 4 iyo Nehemia alombele Lesa ukumupaala pa fisuma ifyo alecita, uyu e muku wa kulekelesha apepele.—Nehemia 5:19; 13:14, 22, 31.
^ para. 7 Nga mulefwaya ukwishibilapo na fimbi pa fyo Lesa akacitila abantu ababa ne citetekelo, belengeni ifipandwa 3 na 7 mu citabo citila Bushe Cinshi Baibolo Isambilisha? Abalemba ici citabo ni Nte sha kwa Yehova.
