Bushe Ubufumu Bwa Kwa Lesa Bwaba mu Mutima wa Muntu?

Pope Benedict XVI alemba mu citabo cakwe icitila Jesus of Nazareth (Yesu uwa ku Nasarete) ukuti, “Ubufumu bwa kwa Lesa bwisa umuntu nga apokelela Yesu mu mutima wakwe.” Ifi fine e fyo bamo batontonkanya, bamona kwati umuntu nga aaluka ilyo apokelela Yesu Kristu no kukwata icitetekelo ninshi Ubufumu bwa kwa Lesa bwaisa muli ena. Bushe umuntu nga aaluka ninshi Ubufumu bwa kwa Lesa bwaisa muli ena? Bushe Ubufumu bwa kwa Lesa ‘bwaba mu mutima wenu’?

UBUFUMU bwalicindeme sana kuli Yesu. Pope Benedict alisumine ukuti Ubufumu bwa kwa Lesa e bo “Yesu aleshimikilapo sana.” Ukutula apo Yesu atendekele ukushimikila, apoosele inshita iikalamba mu “kubila imbila nsuma ya bufumu” mu Galili monse. (Mateo 4:23) Yesu alilangile apabuuta mu fyo alesambilisha na mu fipesha amano acitile ukuti Ubufumu te kupokelela fye Lesa mu mutima no kuba ne cumfwila kuli ena. Lelo bukateka na bantu, ukubapingula, no kubaletela amapaalo ya muyayaya.

Ukuteka no Kupingula Abantu

Bushiku bumo lintu kwashele fye inshita iinono ukuti Yesu apwishe umulimo wakwe pano calo, nyina wa kwa Yakobo na Yohane, abasambi abo Yesu atemenwe sana, aishile kuli Yesu no kusosa ukuti: “Soseni ukuti aba bana bandi babili bakekale, umo ku kulyo kwenu na umbi ku kuso kwenu, mu bufumu bwenu.” (Mateo 20:21) Ukwabula no kutwishika uyu mwanakashi talelanda pa cintu icali mu mitima ya bana bakwe. Alishibe ukuti kwali no kuba bamo abali no kuteka pamo na Yesu mu Bufumu, kabili alefwaya ukuti abana bakwe bakaleteka pamo na Yesu. Na kuba, Yesu alilaile abatumwa bakwe 11 aba cishinka ukuti bakaba mu Bufumu bwakwe kabili bakekala “pa fipuna fya bufumu” no “kupingula” abantu pamo nankwe. (Luka 22:30) Kanshi ku basambi ba kwa Yesu, Ubufumu bwakwe bwali buteko bwa cine cine.

Inga bantu bambi abaliko mu nshiku sha kwa Yesu, bushe balemona shani Ubufumu? Bushe baletontonkanya ukuti umuntu nga aaluka fye ninshi Ubufumu bwaisa, nelyo bushe bale-enekela ifyacilapo? Inshiku ishinono ilyo bashilasefya Ica Kucilila mu 33 C.E., Yesu aingile mu Yerusalemu ninshi nanina pa mwana wa mpunda kabili bamo balebilikisha ukuti: “Pususheni, Mwana Davidi!” (Mateo 21:9) Mulandu nshi balebilikishisha aya mashiwi? Nalimo ni co balishibe ukuti Yesu e Mesia walailwe no kuti Lesa ali no kumupeela “icipuna ca bufumu ica kwa Davidi wishi,” e kutila Ubufumu ubwali no kuteka umuyayaya. Balefwaisha ipusukilo, umutende, no mulinganya ifyo Ubufumu bwali no kuleta.—Luka 1:32; Sekaria 9:9.

Amapaalo ya Muyayaya

Nangu fye bantu abashabikile amano ku mulimo wa kwa Yesu balishibe ifyo alesambilisha pa Bufumu. Pa bushiku Yesu bamwipeye, incitatubi iyo bakobeke pamo nankwe yamupaapete ukuti: “Mwe Yesu, mukanjibukishe ilyo mukaba imfumu.” Bushe Yesu ayaswike shani? Aebele ulya mwaume walefwa ukuti: “Uli no kuba na ine mu Paradaise.”—Luka 23:42, 43.

Ilya ncitatubi ifwile yasumine ukuti Yesu nga bamubuusha, akapokelela Ubufumu nelyo akengila mu Bufumu. Yesu takwata fye amaka  ya kubuusha ulya mwaume no kumulenga ukwaluka, lelo alafwaisha no kucite fyo, kabili akacita cimo cine na ku bantu bambi abengi nga nshi. Kanshi Yesu, uwatendeka kale ukuteka mu muulu, akaletela abantu amapaalo ya muyayaya ilyo Ubufumu bukalateka icalo conse.—Yohane 5:28, 29.

Ubufumu pa Kati Kabo

Bushe Yesu tasosele ukuti: “Ubufumu bwa kwa Lesa buli pa kati kenu”? Ca cine Yesu alisosele aya mashiwi kabili yasangwa pali Luka 17:21. Na kuba, amaBaibolo yambi yatila “ubufumu bwa kwa Lesa buli mu kati ka imwe,” e lyo yambi yatila ‘muli nabo pa kati kenu.’ (Ku ca kumwenako, belengeni muli Baibolo ya Cibemba iya mu 1956 na mu Icipangano cipya.) Ni mwi Yesu aloseshe ilyo asosele aya mashiwi?

Ifikomo fyabangililako filanga ukuti Yesu alelanda ku baFarise. E co, Yesu afwile talelanda pa kwaluka kwa baFarise nelyo pa kwalula amatontonkanyo yabo. AbaFarise bali libumba lya bashimapepo abaYuda abali ne mpatila. Ifyo bale-enekela pali Mesia na pa Bufumu bwakwe fyali-ibelele. Balemona kwati Mesia ali no kwisa nge Mfumu iya bukata “na makumbi ya mu muulu,” ku kulubula abaYuda ku bena Roma no kubwesesha ubufumu kuli Israele. (Daniele 7:13, 14) Lelo, pa kubalungika, Yesu abebele ukuti: “Ubufumu bwa kwa Lesa tabwakese mu musango wa kuti bonse bakabumone.” Lyena asosele no kuti: “Moneni! ubufumu bwa kwa Lesa buli pa kati kenu.”—Luka 17:20, 21.

Nangu cingati ifyo Yesu alesambilisha ne fipesha amano alecita fyalelanga apabuuta ukuti e Mfumu yalaiwe iya bulya Bufumu, abaFarise, abali ne mpatila kabili abashali na citetekelo, bena e lyo bakoselepo ukumukaanya. Baletwishika Yesu nga ali ni Mesia. E co abebele icishinka ica kuti: Ubufumu, ubwaleimininwako ne Mfumu ya buko, bwali ‘pa kati kabo.’ Talebeba ukuti baloleshe mu kati ka mibili yabo. Yesu na basambi bakwe bali pa kati kabo. E co abebele ukuti: “Ubufumu bwa kwa Lesa buli pa kati kenu.”—Luka 17:21.

Ubufumu Ubwacindama Kuli Imwe

Nangu cingati Ubufumu bwa kwa Lesa tabwaba mu mitima ya bantu ababembu, tufwile ukulabumona ukuti bwalicindama. Ifyo Yesu alesambilisha ne fipesha amano alecita fyaleafwa abalekutika kuli ena ukusubila mu buteko ubwalungama ubwali no kuleta umutende ne cibote mu calo. Alefwaya ukuti babe ne citetekelo icali no kulenga imikalile yabo ukuwama. Na kuba, abasambilishe ukulapepa ukuti: “Shifwe wa mu muulu, ishina lyenu libe ilya mushilo. Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:9, 10) Amashiwi ya kwa Yesu yalifikile abengi abalekutika kuli ena pa mutima kabili baishileba ne citetekelo icalengele ukuti balekonka Yesu pa kuti bakaipakishe amapaalo ilyo Ubufumu bwa kwa Lesa bukalateka.

Bushe kuti mwatemwa ukuba ne citetekelo ca musango yu? Finshi mufwile ukucita pa kuti mube ne citetekelo ca musango yu? Ibukisheni amashiwi Yesu abalilepo ukusosa ilyo alelanda Ilyashi lya pa Lupili, atile: “Balipaalwa abaishiba ukuti balakabila ifya kwa Lesa, pantu ubufumu bwa mu muulu bwabo.” (Mateo 5:3) Mulandu nshi mushingatendekela ukusambilila Baibolo ne Nte sha kwa Yehova, ishamupeele iyi magazini? Nga mwatampa ukusambilila Baibolo ne Nte sha kwa Yehova, mukakwata isubilo mu buteko ubwalungama ubukateka abantu mu mulinganya, Ubufumu ubukaletela abantu bonse umutende ne cibote.

[Amashiwi pe bula 11]

Bushe Ubufumu bwa kwa Lesa bwali mu mitima ya bantu abali ne mpatila kabili abalefwaya ukwipaya Yesu?