Sambilileni Icebo ca kwa Lesa

Mulandu Nshi Lesa Abumbile Isonde?

Ici cipande cilelanda pa mepusho ayo nalimo mutontonkanyapo kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Mulandu nshi Lesa abumbile isonde?

Isonde balipangile ukuti muleikala abantu. Pa numa ya kubumba bamalaika ukuti baleikala ku muulu, Lesa apangile umuntu ukuti aleikala pe sonde. (Yobo 38:4, 7) E ico, Yehova abikile umuntu wa kubalilapo muli paradaise iisuma iyaleitwa ukuti Edeni kabili amupeele ne shuko lya kuipakisha umweo wa muyayaya pe sonde kumo na bana abo ali no kukwata.—Ukutendeka 2:15-17; belengeni Amalumbo 115:16.

Ibala lya Edeni lyali fye ni ncende iinono pano isonde. Abantu ba kubalilapo, Adamu na Efa, bali no kulakwata abana. Ilyo abantu bali no kulaya balefula pe sonde, bali no kulima isonde no kulipanga paradaise. (Ukutendeka 1:28) Isonde talyakonaulwe nakalya.—Belengeni Amalumbo 104:5.

2. Mulandu nshi isonde lishabela paradaise pali nomba?

Adamu na Efa tabaumfwilile Lesa, e co balibatamfishe mu Edeni. E fyo isonde lyalekele ukuba paradaise, kabili takwaba umuntu nangu umo uwakwanisha ukulenga isonde ukuba paradaise na kabili. Baibolo itila: “Isonde alipeela mu minwe ya mubifi.”—Yobo 9:24; belengeni Ukutendeka 3:23, 24.

Lelo Yehova talabako ku fyo alefwaya isonde ukuba, kabili teti afilwe ukulenga isonde ukuba paradaise. (Esaya 45:18) Akalenga abantu ukulaikala nge fyo alefwaya pa kubala.—Belengeni Amalumbo 37:11.

3. Finshi Lesa akacita pa kuti pe sonde pakabe umutende na kabili?

Pa kuti abantu bakaleikala mu mutende, intanshi Lesa afwile ukufumyapo abantu babipa. Pa nkondo ya Armagedone, bamalaika ba kwa Lesa bakonaula bonse abalwisha Lesa. Satana bakamukaka pa myaka 1,000, lelo abantu abatemwa Lesa bena bakapusuka no kwingila mu calo cipya.—Belengeni Ukusokolola 16:14, 16; 20:1-3; 21:3, 4.

  4. Ni lilali ukucula kukapwa?

Pa myaka 1,000, Yesu akalateka isonde kabili akalilenga ukuba paradaise. Na kabili, akapwisha imembu sha bantu abatemwa Lesa. Ifi fine e fyo Yesu akafumyapo ukulwala, ukukota, no kufwa.—Belengeni Esaya 11:9; 25:8; 33:24; 35:1.

Ni lilali Lesa akafumya ububifi pe sonde? Yesu alipeele “icishibilo” ica kwishibilako ukuti impela ili mupepi. Ifilecitika mu calo pali ino nshita nafibipa nga nshi kabili filelanga ukuti “icalo cili ku mpela.”—Belengeni Mateo 24:3, 7-14, 21, 22; 2 Timote 3:1-5.

5. Ni bani bakaba mu Paradaise?

Yesu aebele abasambi bakwe ukulenga abantu ukuba abasambi no kubasambilisha inshila sha kwa Lesa isha kutemwa. (Mateo 28:19, 20) Yehova alelenga abantu abengi nga nshi mu calo ukwaluka pa kuti bakengile mu calo cipya. (Sefania 2:3) Pa Mayanda ya Bufumu aya Nte sha kwa Yehova, abantu balasambilila ifyo bengaba abalume abasuma, abakashi abasuma, nelyo abafyashi abasuma. Abana na bafyashi basambilila pamo ifingalenga bacetekele ukuti ku ntanshi ifintu fikawama.—Belengeni Mika 4:1-4.

Nga mwaya ku Ng’anda ya Bufumu, mukasangako abantu abatemwa Lesa kabili abafwaya ukumusekesha.—Belengeni AbaHebere 10:24, 25.

Nga mulefwaya ukwishibilapo na fimbi, belengeni icipandwa 3 muli ici citabo, icalembwa ne Nte sha kwa Yehova. Bushe Cinshi Baibolo Isambilisha?