Utuyofi Tukapwa!

NGA ca kuti umuntu amwebele ati, “Nomba line utuyofi tuli no kupwa,” bushe kuti mwamwasuka shani? Nalimo kuti mwamweba ukuti, “Ulebepa fye. Utuyofi te kuti tupwe.” Nelyo kuti mwatontonkanya ukuti, ‘Bushe uyu muntu nine engalabepa?’

Nangu ca kutila cimoneka kwati utuyofi tatwakapwe, kwaliba ifingalenga twacetekela ukuti tukapwa. Lelo te bantunse abakapwisha utu tuyofi. Abantunse tabaishiba bwino ifyo ububumbo bwa kwa Lesa bwaba, tabaishiba no mulandu ifintu fimo ficitikila mu bubumbo, pali bufi ukukwata amaka ya kwalula nelyo ukulesha ifi fintu ukucitika. Imfumu Solomone iya bena Israele iyakwete sana amano kabili iyabikile sana amano ku kwishiba ifintu yalembele ukuti: “Abantu balifilwa ukwiluka umulimo uwacitwa mwi samba lya kasuba; te mulandu ne fyo abantu babombesha ku kufwaya ukuwishiba, te kuti bawiluke. Kabili nangu bengatila baliba na mano ya kwishiba, kuti bafilwa ukuwiluka.”—Lukala Milandu 8:17.

Nga ca kutila abantunse tabakwata amaka ya kulesha utuyofi ukucitika, ninshi nani wakwata ayo maka? Baibolo yalanda ukuti Kabumba wesu e wakwata aya amaka. E walenga ukuti ifintu ifyaba pe sonde fibeko, pamo nga ukushinguluka kwa menshi e lyo na fimbipo. (Lukala Milandu 1:7) Kabili ukupusanako na bantu, Lesa alikwatisha amaka. Kasesema Yeremia alishibe ici cishinka, kabili atile: “Iye, mwe Shikulu Mulopwe Yehova! Moneni, ni mwe mwapanga umuulu ne sonde ku maka yenu ayakalamba na ku kuboko kwenu ukwatambalikwa. Te kuti cimupeshe amano icintu nangu cimo.” (Yeremia 32:17) Apo Lesa e wapangile isonde na fyonse ifyabamo, alishiba ifyo akacita pa kulesha ifyo apanga ukuleta amasanso pa kuti abantunse bakaleikala umutende.—Amalumbo 37:11; 115:16.

Nomba bushe Lesa akacita shani pa kuti akapwishe utuyofi? Nga muleibukisha, icipande ca bubili cilandile ukuti ifintu ifingi ifya kutiinya ifilecitika muno nshiku fya ‘kwishibilako’ ukuti “icalo cili ku mpela.” Yesu atile: “Ilyo mwamona ifi filecitika, mwishibe ukuti ubufumu bwa kwa Lesa buli mupepi.” (Mateo 24:3; Luka 21:31) Ubufumu bwa kwa Lesa, ubuteko ubwa ku muulu, bukawamya ifintu ifingi pano calo, kabili bukalenga no kuti ifyo abumba fiikalaleta amasanso. Nangu ca kuti Yehova Lesa alikwata amaka ya kucita ifi fyonse, apeela uyu mulimo ku Mwana wakwe. Ilyo kasesema Daniele alelanda pali Yesu, atile: “Bamupeele ukuteka no bukata no bufumu,  pa kuti abantu na bantu bonse, aba nko ne ndimi bamubombele.”—Daniele 7:14.

Umwana wa kwa Lesa, Yesu Kristu, balimupeela amaka ya kuwamya ifintu fyonse pa kuti isonde likawame nga nshi. Ilyo Yesu ali pe sonde imyaka 2,000 iyapita, alicitile fimo ifyalelanga ukuti alikwata amaka ya kulesha amasanso. Inshita imo ilyo Yesu ali na basambi bakwe pali Bemba wa Galili, “kwaimine icikuuku ca mwela icikalamba na mabimbi yalapama mu bwato, ica kuti ubwato bwapene bwisule.” Abasambi bakwe balitiinine ukuti balafwa, e ico baebele Yesu ukuti abafwe. Cinshi Yesu acitile? Yesu ‘akalipile umwela no kweba bemba ati: “Talala! Ba tondolo!” No mwela walilekele, awe kwatalele na tondolo.’ Abasambi bakwe balipapile sana ica kutila baipwishe abati: “Nga kanshi uyu nani, uwa kuti no mwela na bemba filamuumfwila?”—Marko 4:37-41.

Ino nshita, Yesu aba ku muulu, kabili balimupeela amaka ayakalamba nga nshi. Apo ni Mfumu ya Bufumu bwa kwa Lesa, e wakwata umulimo na maka ya kuwamya ifintu pano calo pa kuti abantu bakekale umutende kabili mu mutelelwe.

Lelo nge fyo tumwene, abantu e balenga amafya ayengi no tuyofi ukulacitika nelyo ukulabipilako. Ne calenga mulandu wa matukuto yabo aya bukaitemwe no bufunushi. Cinshi Ubufumu bukacita ku bantu abatwalilila fye ukonaula icalo kabili abashifwaya ukwaluka? Baibolo yalanda pali Shikulu Yesu ukuti aleisa “ukufuma mu muulu pamo na bamalaika bakwe aba maka mu mulilo uulebilima, ilyo akaleta icilandushi pa bashaishiba Lesa na bashinakila imbila nsuma iya kwa Shikulwifwe Yesu.” Ukwabula no kutwishika, Yesu “akonaula abaleonaula isonde.”—2 Abena Tesalonika 1:7, 8; Ukusokolola 11:18.

Pa numa, iyi “Mfumu ya shamfumu,” Yesu Kristu, akashininkisha ukuti ifyabumbwa tafileleta amasanso pa calo. (Ukusokolola 19:16) Akashininkisha ukuti abo akalateka tabaleponenwa no tuyofi. Akabomfya amaka akwata pa fyabumbwa pamo nga amenshi no mwela, pa kuti fikalelenga imiceele ukuba iisuma pe sonde na bantunse bakalenonkelamo. Ne cikafumamo ca kutila amashiwi Yehova Lesa alaile abantu bakwe aba ku kale yakafikilishiwa, aya mashiwi yatila: “Nkalamupeela imfula pa nshita ya iko, ne calo cikalafumya ubulimi bwa ciko, ne miti ya mu mabala ikalatwala ifisabo fya iko.” (Ubwina Lebi 26:4) Abantu bakalakuula amayanda ukwabula ukutiina ukuti yakonaika mu kayofi. “Bakakuula amayanda no kwikalamo; bakalima na mabala ya myangashi no kulya ifisabo fya yako.”—Esaya 65:21.

Cinshi Mulingile Ukucita?

Ukwabula no kutwishika, kuti mwatemwa ukwikala mu calo umushakabe utuyofi, nga filya fine na bantu abengi bengatemwa. Nomba finshi mulingile ukucita pa kuti mukekale muli ici calo? Apo “abashaishiba Lesa” na “bashinakila imbila nsuma” tabakabe muli cilya calo umushakabe utuyofi, kanshi cintu cayeba ukuti umuntu alingile ukusambilila pali Lesa no kulatungilila ukuteka kwakwe. Lesa afwaya ukuti tumwishibe no kulanakila imbila nsuma iilanda pa Bufumu bwakwe kabili Umwana wakwe e kateka wa ubu Bufumu.

Inshila iisuma iya kusambilila pa Bufumu bwa kwa Lesa kulasambilila Baibolo. Muli Baibolo mwaliba amafunde ayo tulingile ukulakonka pa kuti tukekale mu calo ca mutende ilyo Ubufumu bwa kwa Lesa bukalateka. Nga mulefwaya ukwishiba ifyo Baibolo isambilisha, kuti mwaeba Inte sha kwa Yehova. Na kuba, uyu wine e mulimo Inte sha kwa Yehova babomba. Nga ca kuti mwabombesha ukwishiba Lesa no kulanakila imbila nsuma, ninshi na imwe bene mukabako ilyo amashiwi yaba pa Amapinda 1:33 yakafikilishiwa, ayatila: “Uumfwa kuli ine, akekala umutelelwe no kwikala umutende ukwabula ukutiina ububi.”